Luc 2
2
Ebyɛ́l mé Yésʉs
1Njwɨ́ɨ̌ nɨ́nɨ́ɨ́ Kɛ́ɛza Agûst nzě tyêl bʉ̂r o b'á didi ɨ́ mesí mé bá etié ó, bé tôʼ láŋɔɔ, bɨ́bɛ̂h. 2Nó yé á be ó jɔʼ ésôʼ ó bé láŋaa bʉr mbi waá yɨ́. Yé á be ó, ɨ́ jɔ̌ʼ Kirínios á be ngóvina ɨ́ sí Sirî yɨ́. 3Nó bʉ̂r bɨ́bɛ̂h, bé á nze ka tô, tó cɛmɔɔ míe, mʉr nyɨnyɛ̂h ɨ́ nkanǎ kúl yé, yé á sisyɛŋa tɨ̂ʼ yɨ́.
4Nó ntémé ó Yóseb á nze duhǒ Nazarɛ̂t ɨ́ sí Galilê, nzě nkɛ́ɛ, lɨ́ etô sí Yʉ́da. Tɨ̂ʼ ó nyé á tô, nkǒ nkana yé, Bétɛlɛhɛm, gúmó njwɨ́ɨ David á byɛ̂l yɨ́. Nye á tô gʉ̂ʼ ó, ebě, nye á be ó mʉr mbɛ̌r bʉ̂r mé David. 5Nó nyé á to cɛmɔɔ díe, bé e Maria, mʉmá bé e nɔ́ɔ́ bé á be le etié lé ébâ nyá. Maria á be ó, nye mû le ebum. 6Jɔʼ bé á be gʉ̂ʼ yɨ́, jɔʼ ébyâ, yê nzě pyâl. 7Nye ntɔ̂ʼ byâ mâ mʉrʉ̂m, mwân medwéʼe wé. Nye nzě díble nyé ɨ́ kán, dyêʼ nyé ɨ́ gúmó bítab byé á dɨde mede mɔ́ɔ́ yɨ́, ebě, yé á bé akǎ be e já ɨ́ mbɛ̌r ójwóo.
Opála o bínteme, bé e beéngeles mé Nzyɛ̌m
8Yé á be ó e bʉ́ʉ́ bʉ̂r o b'á pɨpála binteme byɔ́ɔ́ bá, gúmó dáá dí yɨ́ ɨ́ Bétɛlɛhɛm. Yé á be ó, yé mû témé pum. 9Nó éngeles mé Dâ ntɔ̂ʼ pyâl bê. Mentyɛnwa mé Nzyɛ̌m ntɔ̂ʼ pan ɨ́ gúmó bé á be yɨ́. Bé ntɔ̂ʼ táare ésâʼ ɨ́ bʉ́á. 10Nó ó éngeles á nze lɛ́ɛ e bé ó: «Ayɨ́ kpɛ́ɛ gâ. Paá bee gâ: mɨ́ nze bɨ́n e Mbɨambɨa Lɔ́ɔ! Bʉr ó kúl bʉ̂r yɨ́n, bɨ́bɛ̂h, bé óbuú soho wê. 11Ɨ́ pum wɨ̂ʼ ɨ́ nkana mé David, Tiʼbʉr wɨ́n, nyɨ́ byɛ̂l! Nye ó Mʉ̌r Nzyɛ̌m á lœm múló mé jwɨ́ɨ nyá. Nye ó dí ntémé Tî gá wɨ́ná! #2.11: Ekǎn é lwib grɛ̂k dí edwirɔɔ ó: Tî gá wɨ́ná: lɨ́, lé óbɛ̌m dwirɔɔ ntémé ó «Nzyɛm», ebě, ɨ́ jɔʼ bʉ̂r ó Rôm, bé á sɨsêʼle njwɨ́ɨ̌ nɨ́nɨ́ɨ́ wɔ́ɔ́ Kɛ́ɛza Agûst le ekǎn é «Tî» yɨ́, yé á be ó wɔ́ɔ́ mbi élɛ́ɛ ó, nye ó Nzyɛ̌m. Tó kœb ntémé ó, oYʉ́den, ɨ́ jɔʼ bé á dwir «Yahvêh» ɨ́ lwǐb grɛ̂k yɨ́, bé á belan ntémé ó, le ekǎn egwár laá: «Tî». 12Paá bee gâ: bɨ̌n bé ódweʼe nyé ó ɨ́ jwɨʼ yɨ̂: bɨ̌n bé ókœb mwân, nyé osí díblɔɔ ɨ́ kán, ndyéʼá gúmó bítab dí ede méde yɨ́.»
13Tyé e tyé yaá, sɔ́má bééngeles, yê nzě duho ɨ́ jʉ́o kʉ́, nzě kœb éngeles waá. Bé e nɔ́ɔ́ bɨ́bɛ̂h ntɔ̂ʼ gúmlǒ Nzyɛ̌m. Bé ó:
14«Kûm mé Nzyɛ̌m, nye lɨ́ elóŋlǒ
jʉ́ó dí elaǎ jʉ́o le ejwoo le baántɛ́n yɨ́.
Bʉr ó sí, bé díʼee e mepyɛbla páʼ nyɔ́ɔ́,
ebě, Nzyɛ̌m, nyɨ́ bee bé mbɨ̂mbɨá.»
15Jɔʼ bééngeles, bé á líʼe bê, ntɔ̂ʼ báʼǎ bérɔɔ ɨ́ jʉ́o kʉ́ yɨ́, nó ó ópála o bínteme, bé á nze lɛ́ɛla páʼ nyɔ́ɔ́ ó: «Ncʉ̂ʼ gá Bétɛlɛhɛm. Mɨná tô bee gá sâ syɛ́ɛ́ gʉ̂ʼ yɨ́, mpʉ̌ Dâ Nzyɛ̌m tɨ́é mɨ́ná gá yɨ́.»
16Bê nzě tô e mikám, tó beɔɔ̌ Maria, bé e Yóseb ndu e mâ tyéé, ndyéʼá gúmó bítab dí ede méde yɨ́. 17Jɔʼ ópála o bínteme, bé á nze bee bé yɨ́, bê nzě lɛ́ɛ bé lɔ́ɔ́ wɨ́wɛ̂h, lɨ́ ebáʼǎ lɛ́ɛ mékǎn bééngeles bé á lɛ́ɛ bé, dumo e mwân waá má. 18Bʉr bɨ́bɛ̂h o b'á jóʼo lɔ́ɔ waá bá, bê nzě buú kámɔɔ̌ sá ópála o bínteme bé á lɛ́ɛ, dumo e milɔ̌b myaá yɨ́. #2.18: OYʉ́den, bé á bé abee: ópála o bínteme: mbɨ̂mbɨá. Bé á nʉnʉa bé bɨ́bɛ̂h ó, mpʉ bʉ̂r o bíbɛr. 19Maria nyɨɛ nzě baʼle mílɛ́á myaá mímyɛ̂h ɨ́ lémé wé, nzě gɔ́na le epahle myé ɨ́ puuu. 20Píe tɨ̂, opála o bínteme nzě mɔa, swíʼɔɔ. Bê nzě tô le edwě Nzyɛ̌m kûm ɨ́ buo buo ɨ́ lɔ̌b bísá bé á jóʼo le ebee bí. Bisyɛ́ɛla byaá bíbyɛ̂h, byé á kʉ be ó mpʉ bééngeles bé á pa lɛ́ɛ bé yɨ́.
21Píe jɔ̌ʼ Yésʉs á byɛ̂l yɨ́, lɨ́ elú é mwôm, yé ntɔ̂ʼ pyâl ɨ́ jɔʼ bé á jala le etíʼe nyé mpʉ́n yɨ́. Bé ntɔ̂ʼ tíʼe nyé nyǎ, le ejwɨr nyé díe ó, “Yésʉs”, ebě, díe laá ó éngeles á lɛ́ɛ bê, Maria dína apǎ nʉa ébum yɨ́.
Yésʉs lɨ́ etô mpáh Nzyɛ̌m
22Píe tɨ̂, jɔ̌ʼ Maria, bé e Yóseb, bé á jala le elóŋlo métié mé Moyɨ̂z yɨ́, yê nzě pyâl. Moyɨ̂z á tyêl baábyɛɛ́ etié ó, ábyɛɛ́ nyɨnyɛ̂h nyɛ́ɛ tó pubɔɔ píe byɛɛ́ ɨ́ mpáh Nzyɛ̌m. Bê nzě tô e mwân wɔ́ɔ́ Yerʉ́zalɛm, tó lɛ̂ʼlɔɔ̌ Dâ Nzyɛ̌m nyǎ. 23Yé ó mpʉ yé dí cɛmá ɨ́ Mekaná mé Nzyɛ̌m yɨ́. Yê cɛmá ó: “Mwân esôʼ ótáare ébyɛ̂l mâ mʉrʉ̂m nyá, nye ɨ́ jala le edweŋɔɔ̌ Dâ Nzyɛ̌m.” 24Bé ntémé, bé á si to dwe mindwéá Mékaná mé Nzyɛ̌m, mé á lɛ́ɛ ó, bé dwêʼ mí. Yê cɛmá ɨ́ Mekaná mé Nzyɛ̌m ó: “Dwéʼ gá Nzyɛ̌m mindwéá, nkʉ̂ bidúdúó bíbá, nkʉ̂ mepɨbaa mebá.”
25Ɨ́ Yerʉ́zalɛm, yé á be ó e nyʉ́ʉ́ mʉ̂r, díé lé Siméon. Nye á be ó tîtyěl mʉr le ebuú dwáawǒ Nzyɛ̌m. Nye á didi ó, lɨ́ ebóno mʉ̂r ngá báʼǎ gbâ bʉ̂r o b'Ɨ́zraɛ̂l nkul ɨ́ miléme nyá. Sísǐm mé Nzyɛ̌m, wé á be ó e né. 26Sísǐm mé Nzyɛ̌m, wé á si boo lɛ́ɛ e né ó, nye apǎ dwe, nye óbee mʉ̂r Nzyɛ̌m á lœm múló mé jwɨ́ɨ nyá. 27Jɔʼ yaá, nye ntɔ̂ʼ tô mpáh Nzyɛ̌m, mpʉ̌ Sísǐm mé Nzyɛ̌m wé á tɨ́e nye yɨ́. Nó ɨ́ jɔʼ óbyɛ̂l mé Yésʉs bé á pyâl e mwân wɔ́ɔ́ lɨ́ enzě lóŋlo étié Mékaná mé Nzyɛ̌m mé á tyêl obyɛ̂l o bwá ó bʉrʉ̂m lɨ́ yɨ́, 28Siméon nzě nkɛ́ɛ mwân waá ɨ́ mebó mé, nzě dwě Nzyɛ̌m kûm. Nye ó:
29«Dâ ɛ̌, gʉ́ kʉ́ sâ mpʉ gó á pa kɛʼ me yɨ́.
Gʉ́ sâ ó, me láŋaa ɨ́ twiʼ yɨ̂
le mepyɛbla ɨ́ léme.
30Ebě, míh mâm, mɨ́ beě twiʼ yô,
31twiʼ gó á komlo
ɨ́ míh bíkúl bí bʉ̂r bíbyɛ̂h yɨ́.
32Mwân nyâ, nye óbe ó njʉl ngá kʉn bíkúl bíswîh ó, byé gʉ́ŋaa go wɨ́.
Bʉr bô, bʉr o b'Ɨ́zraɛ̂l, bé óbuú sêʼlɔɔ ɨ́ nye.»
33Sɔ́ŋ, bé e nyɔ̌ŋ mé Yésʉs á be ó lɨ́ ebuú kâm mékǎn Siméon á cɨ, dumo e Yésʉs má. 34Píe tɨ̂, Siméon nzě syɛɛ bé metyéelé, lɨ́ elɛ́ɛ e Maria, nyɔ̌ŋ mé Yésʉs ó: «Mwán nyâ, nye ó waá Nzyɛ̌m á ntɨh ó, nye twêhlaa baá o dí ebeně Nzyɛ̌m bá, le egbɛl bʉ́ʉ́ sí, baá o dí ekpɛl nyé bá. Nye óbe ó le jwɨ̌ʼ, lɨ́ elɛ̂ʼle nkûl mé Nzyɛ̌m. Bʉ́ʉ́ bʉ̂r bɨ́ɛ, bé ósóŋlo nyê. 35Nye ó sá ngá lɛ̂ʼlě mbi bíjwɨʼ bʉ̂r dí esʉsol ɨ́ milémé myɔ́ɔ́ bí. Gua mʉmá nyâ, ebúʼ, lé ókpâhla gó ɨ́ léme mpʉ pâsoŋ ɨ́ jɔʼ gó óbee bé lɨ́ esâ nyé nó yɨ́.»
36Yé á be ntémé ó e nyʉ́ʉ́ mʉ́má ngwíha milɔ̌b mé Nzyɛ̌m, díé lé Ane. Nye á be ó mwân mé Fanuɛ̂l, ɨ́ mpóʼo mé Áser. Nye á be ó, nye mû sí buú jwɨm. Nye á si bâ nyʉ́ʉ́ mʉ́rʉ̂m, bé e njʉ̂m wé waá jaá dǐ njɨ mimbû nzaangbá, 37njʉ̂m wé ntɔ̂ʼ dwe, nyɨɛ ntɔ̂ʼ lîʼ kúho. Nye á didi ó nó, tótôʼ, tó kumo mímbû mekám mwom e mimbú mínâ. Nye á bé abɔ́ʼa e mpáh Nzyɛ̌m. Nye á sɨséa tɨ̂ʼ ó, móhó e pum. Nye á bɨbe ó, lɨ́ eti méde e bijɔʼ, lɨ́ esú lé éjɨʼla e Nzyɛ̌m. 38Nó mpʉ̌ Siméon á be lɨ́ elwib nó yɨ́, Ane ntɔ̂ʼ sîhle, nzě dwě Nzyɛ̌m kûm, nzě lwib e bʉr o bé e boo nɔ́ɔ́ nyé á didi bá. Bé ntémé, bé á si bóno mʉr ngá táǎ góo, le edwǐh kúl bʉ̂r o b'Ɨ́zraɛ̂l ɨ́ mpila ébébe nyá. Nye nzě lɛ́ɛ bʉ̂r ónɨ̌ bɨ́bɛ̂h sá yé á dumo e mwân waá yɨ́.
Mpúla lɨ́ etô Nazarɛ̂t
39Jɔʼ óbyɛ́l mé Yésʉs, bé á sil elóŋlo metié mé Dâ yɨ́, nó bé á nze swîʼ e né ɨ́ sí Galilê, tóŋɔɔ e né kwár nyɔ́ɔ́ Nazarɛ̂t. 40Mwân nzě gwɨ́e le elele. Nye á be ó lwɨ́ŋlá le ocwóó. Nye á be ó e metyɛʼ me mpóm mé Nzyɛ̌m.
Yésʉs ɨ́ mpáh Nzyɛ̌m
41Mimbú mímyɛ̂h, obyɛ̂l mé Yésʉs, bé á be lɨ́ etʉ̂tǒ Yerʉ́zalɛm, lɨ́ etó bwal nzɔ́ɔ Páska gʉ̂. 42Mpʉ̌ Yésʉs á be, nye mû e mimbû kám e mimbá yɨ́, nó ó bé á nze ka tô, bɨ́bɛ̂h, mpʉ tûm nyɔ́ɔ́, nyé á be yɨ́. 43Mpʉ nzɔ́ɔ á be, nyé osí síe yɨ́, nye nzě gbɛha, ojwóo bɨ́bɛ̂h lɨ́ eswîʼ, tóŋɔɔ ɨ́ mekwár mɔ́ɔ́. Obyɛ̂l mé Yésʉs, bé á be ntémé lɨ́ eswîʼ yɔ́ɔ́, Yésʉs nyɨɛ lɨ́ elîʼ bé píhe ɨ́ Yerʉ́zalɛm, bé l'agʉ́a. 44Bé á gʉgʉ́a nzɨ́ e nzɨ̌ ó, bé e boo nɔ́ɔ́ ó dí sɔ́má. Nó bé á nze tye móhó ntinɨ̂. Píe tɨ̂, bê nzě san nyê, ntɔ̂ʼ sáŋɔɔ nyé kwá mimbyɛ́l myɔ́ɔ́ le osó bɔ́ɔ́, ɨ́ sáa, sáa, abeɔɔ. 45Bé ntɔ̂ʼ tó swîʼ, tó sáa nyé ɨ́ Yerʉ́zalɛm. 46Bé á ka to bee nye ó, lɨ́ elú élɛ̂l, ɨ́ mpáh Nzyɛ̌m. Nye á be ó témé olɛ̂ʼla o métié. Nyɨɛ lɨ́ ejôʼlo bê, le edî bé metíá. 47Sá yɨ́yɛ̂h bé á jóʼo nye lɨ́ elɛ́ɛ yɨ́, bé á si kâm yê, ɨ́ wɨ́haá mbi ócwóó wé, le mimbi bíyalá nyé á yala mɔ́ɔ́ métíá bí. 48Jɔʼ óbyɛ́l bé, bé á bee nye yɨ́, bé ntɔ̂ʼ kâm nyê. Nyɔ̌ŋ wé nzě dî e né ó: «Mwánǎm, go ka sá bɨ́h mpʉʼ ɨ́ yé ɛ́? Paá bee: bɨ̌h e sʉ́ŋ, bɨ́ buú sáa gó, le esyɛ̌l bá.»
49Nó nyé á nze lɛ́ɛ e bé ó: «Bɨ̌n sáá mé ɨ́ yé ɛ́? Nzê bɨ̌n bé agʉ́a ó, yé jala ó, me díʼee ɨ́ mbɛ̌r mé Dâ ɛ̌?» 50Bɨ́ɛ l'agwá jóʼǒ sá nyé á pʉgʉ kpɛl elɛ́ɛ bé yɨ́.
51Nó bé e boo nɔ́ɔ́, bé á swîʼ, tô Nazarɛ̂t. Nye á si sâ bé mejóʼo. Nyɔ̌ŋ á be lɨ́ ebɨbaʼle mílɔ̌b myaá mímyɛ̂h ɨ́ lémé wé tʉ́ŋlʉ̌. 52Yésʉs nzě gwɨ́e ɨ́ páʼ nyʉ̂l, le etɔ́ma ɨ́ páʼ ócwóó. Nó ó, táare e Nzyɛ̌m, kumo e bʉr bɨ́bɛ̂h, bé á bee ó, nye ó dí mwân ebeɔɔ.
Currently Selected:
Luc 2: ozm
Tya elembo
Kabola
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo