Matta 10
10
Yesu tə Ɗəmtsə Shawa Kwabəmətləu
(Mar 3:13-19; Luk 6:12-16)
1Yesu tə nga shawa nyi kwabəmətləu tə mbwar zhang, ga nənda gyalkur nə gədləbiya shanguɗə ɗimi, ana nda mbandə dəhə shiləka ana njir tar yiyingkur. 2Janə tləmər changhabal kwabəmətlə inda, Shiman (nda njo nga Bitrus) ana zamə nyi Andrawus, Yakubu ana zamə nyi Yohana nguli Zabadi, 3Filibus ana Batalamaus, Toma ana Matta, ndər tsəm tsachi, Yakubu zər Halfa, ana Tadawus, 4Shiman ndər nyida hə'i nyi ana Yahuda Iskərayoti ndə nda tə tləɗanda Yesu.
Yesu tə Tsau Nyi Bar nə Changhabal Kwabəmətlə inda
(Mar 6:7-13; Luk 9:1-6)
5Yesu tə sə kwabəmətlə inda ana tsaubar ina, “Ngwa hya da yatə hə'i nda kəla nə njir Yahuda ndara mələm njir Samariya wa. 6Kəl ndara hya ma'i yada kətəng sasa nə njir Isra'ila. 7Təra ma hya ki bəzə ənda, ‘Təlkur huɗamələm ɗa ti ləhəu.’ 8Mbandə ma njir shiləka, hya hya'andə nji kuɗəkuɗa, mbandə ma njir bibi, ana hya gədləbiya məlləm. Ga'a dləutsi hi gyalkur nga, hya nənda ga'a tsəu. 9Ngwa hya da hə gəna bəjingha ndara azurfa ndara ndzə ku hipə kəhi wa. 10Ngwa hya da hə mbəl, ndara vanya ləkutə, mada ɓiɓi, ndara zəwa ka ma'i wa. Aka mbwa nda ndə kwa mər tlər ti, tangnda shala səm nyi.
11“Ma hya gu məlləm ndara giwa, hya gwa'a ndə nda kwa i cha dləutsə hi, hya ngya kə'i cha ba'a tə bəji nda hyo da ngyar mbwa nda ti. 12Ma hya gwa ku ki, hya usa nda. 13Ma nji'inda ku ki nda tə dləutsə hi, piyarɗufəu nə Hyel cha ngya təkəra nda, kəl ja, ma nda ngyar dləutsə hi, piyarɗufəu kəhi cha ɓəl yada hi. 14Madawa tsəu tə ngyar dləutsə hi ndara cha ngyar səhimi da ɓwanya kəhi, ma hyo ngyar ki nda ndara mələm nda, hya dəgənda bərbər mbwa nda tə hya hi. 15Tsa'anyata yo nar hi, atə pəchir nəuma Hyel kwa chari təhuɗə nyi nə njir Sodom ana Gomora matsa njir mələm nda.
Məndza'u nda kwa Shili
(Mar 13:9-13; Luk 21:12-17)
16“Janə ya kwa sə hi tang wi ngə tə kətəng ku huɗa ularvwa. Aka ənga hya ngya na dəma tang wi pwabu, kəl nda ana kwya'akur wi mbətla.
17“Ngya ma na ɓəla, aka njo da yi na hi huɗə nəuma, ya nda kwa tlatə hi na wuɗa ku vi pətlənya Hyel kənda i. 18Atə nya ɗa, njo yi na hi mar nji'inda na gyalkur hə'i ana ka təl i, aka hya dəkə ɓwanya təkəra ya nə nda ana nji'inda pa'a njir Yahuda. 19Manda yi nahi huɗə nəuma, ngwa hya da ɗəngha sənda hyo dəka ana ənda hyo dəkə nyi wa, aka njo nə hi sənda hyo dəka ma bəji tə shili. 20Aka ɓwanya nda hyo yi pəa a da nəkəhi nda wa, aka Shanguɗə nə Adanə hi nda kya huɗamələm ngə kwa ɓwanya təwanə hi.
21“Aku bəji nda, ndə kwa tləɗanda zamə nyi ka nja tsəya nyi, ada tsəu kwa mərtə nyi tang wi nga nə zər nyi, ngulisha'a tsəu kwa tlə mwali nə njir yah nda, kwa gwa'atə njo tsəya nda. 22Dəhə nji kwa ngya hi, aka tləm ɗa. Kəl ja, kala ndə nda səsə'uti ba'a tə tə ɓəlnyi, cho uya mbəɗa. 23Ma nja ɗa məndza'u nahi ku vanya mələm, hwi ma yo vanyi. Jiri yo nar hi, a da hyo nau zhulitə mələm nda tə hə'i Isra'ila dəhə təvi Zər Ndə kwa shili wa. 24A shawa da kwa ndiya maləm nyi wa, mava tsəu da kwa ɗa dəgal matsa tlakə nyi wa. 25Mənakəkura cha, shawa cha ɗa wi maləm nyi, mava tsəu wi tlakə nyi. Macha njo nga tlakər ki na Ba'alzabul#10:25 Ba'alzabul: Vanya tləmər təl sərtakə nga. ya, sakwata nji'inda ku ki nyi nda ya.
Wa Ngə Njo Ləvəra?
(Luk 12:2-7)
26“Aka ənga ngwa hya da ləvər nda wa, a sə da tə ɗəwa da kəla kwa biya tə babal wa, ya a səda tə mbwa nda kəla kwa chabiyadzə wa. 27Sənda ya kwa dəkə nə hi tə ɗəwa, bəzə ma tə babal, ana sənda hyo ngatə chihəchihəu hya bəzə nya məa. 28Ngwa hya da ba'a ləvər ndə nda kwa tsəya kumər dza ya a da nda kwa nau tsəya mambəl wa. A təvəra ənga, hya ləvər ndə nda kwa tsəya kumər dza dəhə ka mambəl ku hu'u kəla tah. 29Kwambirata ya, a mətlə kwaba ma? Dəhə ka ənga a zhang da kwa təɗə hu'i kəla na zəndəkur Adan hi wa. 30Aka mada shishir kəra hi ma'a jigajiganyi. 31Əngə ja, ngwa hya da ləvər wa, mada aman ɗangkura kwambirata, a ndiya nda təhi, na səli zhaka ɗanghəu.
Dləukər na Kəristi Mar Nji
(Luk 12:8-9)
32“Dəhə ndə nda tə dəkar mar nji ənda na'a cha, əngə tanyi ya kwa mər nacha mar Ada ɗa nda kya huɗamələm. 33Kəl ja, kala ndə nda tə kəpal zəndə ɗa mar nji, naya tsəu yo kəpal zəndə nyi mar Ada ɗa nda kya huɗamələm.
Piyarɗufəu da wa kəl Katsakər
(Luk 12:51-53; 14:26-27)
34“Ngwa hya har bəra piyarɗufəu ngə ya shili nə tə dunəya wa. A da ya shili ka nja uya ngya mənakə tə dunəya wa, kəl nda katsakər. 35Ya shili ka ya daɓətə pama zər na ada nyi, ama na kwa nyi, mala zər ana səlkənyi. 36Njir dawa ndə tsəu kwa ɗa ku huɗa njir ki nyi. 37Dəhə ndə nda ndiya i ada nyi ana ama nyi matsa ya, a da cho kina ɗa ka na'a wa. Ya dəhə ndə nda ndiya i kwa nyi ndara zər nyi matsa ya, a da cho kina ɗa ka na'a wa 38Kala ndə nda pa'a da tə hətə taməngəla nyi ga nəu ɗa, a cha nji cha ɗa ka na'a wa. 39Madawa kwa gwa'a ɓəlati pya cha cho sanda, ndə nda tsəu kwa sanda pya cha ka ya, cho uya.
Wazəba
(Mar 9:41)
40“Kala ndə nda tə dləutsə hi na ta zhang, a dləutsə ɗa tə cha. Ya kala ndə nda tə dləutsə ɗa na ta zhang tsəu, a dləutsətə cha ndə nda tə sə ɗa. 41Dəhə ndə nda dləutsə ndər mətakər aka tlər nyi cho dləutsə wazəba wi nə ndər mətakər. Madawa tsəu tə dləutsə ndər mər sə tsa'atsa'a aka tlər nyi cho uya zhar wi nə ndər mər sə tsa'atsa'a. 42Dəhə ndə nda tə nənyi ɓiti mada ɗeɗika zhang nə ndə nda ndiya na kushu aka nacha shawa ɗa, jiri cho dləutsə wazəba nyi.”
Currently Selected:
Matta 10: hbbNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2018