ଯୋହନ୍ 10
10
ମେଣ୍ଢା ପଡ଼୍ପାନଣ୍ଡ୍ ୱେଷଡ଼୍
1“ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ବେନ ହାର୍ଇସ୍ ମେଣ୍ଢା ଗୁଡ଼ୁସା ତାଗ୍ ନେଙ୍ଗଣ୍ଡ୍, ମାତର୍ ଗୁଡ଼୍ସାତିଙ୍କ୍ ତୁଲି ନେଙ୍ଗୀତଣ୍ଡ୍, ଅଣ୍ଡ୍ ଡଙ୍ଗାଲ୍ ବା ଡକାଇତ୍; 2ବାତେଙ୍କ୍ ଇତ୍କେ ବେନ ହାର୍ଇସ୍ ଆଦ୍ତଣ୍ଡ୍ ଅଣ୍ଡ୍ ମେଣ୍ଢା ମେଇତାନଣ୍ଡ୍ । 3ମାର୍ ତେର୍ତାନଣ୍ଡ୍ ଆୱିନ୍ ମାଇଦିଙ୍କ୍ ମାର୍ ଟେଣ୍ଡିଦ୍ତଣ୍ଡ୍, ମେଣ୍ଡେ ମେଣ୍ଢା ଅନାଦ୍ ଲେଙ୍ଗ୍ କେଞ୍ଜିତା, ମେଣ୍ଡେ ଅଣ୍ଡ୍ ନିଜ୍ତାଉ ମେଣ୍ଢାକିଂଙ୍କ୍ ପେଦେର୍ ପଇସ୍ କାର୍ଙ୍ଗି ବାଇଦେ ପେସ୍ପି ଆଦ୍ତନ୍ । 4ଅଣ୍ଡ୍ ନିଜ୍ତାଉ ମେଣ୍ଢାଙ୍କ୍ ବାଇଦେ ପେସ୍ପ୍ତେ ପେର୍କେ ଆୱିନ୍ ମୁନ୍ ଆଦ୍ତନ୍ ନୁ ମେଣ୍ଢା ଅନ୍ ପେର୍କେ ଆଦ୍ତା, ବାତେଙ୍କ୍ ଇତ୍କେ ଆଉ ଅନାଦ୍ ଲେଙ୍ଗ୍ଦିଙ୍କ୍ ପୁନ୍ତାଆ; 5ବାତେଙ୍କ୍ ଇତ୍କେ ଆଉ ପୁନ୍ୱେ ନାରିନ୍ ପେର୍କେ ବେସୁଙ୍କ୍ ବା ଅନ୍, ମାତର୍ ଆଉ ଅନାଗାଙ୍କ୍ ମିରିତା, ଆଉ ପୁନ୍ୱେ ନାରୁନ୍ ଲେଙ୍ଗ୍ ହେନ୍ସ ।”
6ଜିସୁ ଅଡ଼୍କିଂଙ୍କ୍ ହିଦ୍ ଗଟି କେତ୍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ଅଡ଼୍କିଂଙ୍କ୍ ବାତ୍ ବାତ୍ କେସ୍ମାତ୍ତଣ୍ଡ୍, ଆଦ୍ ସାରେ ବାତେଏ ଅଡ଼୍ ବୁଜେମ୍ ଆୟ୍ୟଡ଼୍ ।
ଜିସୁ ସାଏତ୍ ମେଣ୍ଢା ପୋଡ଼୍ପାନଣ୍ଡ୍
7ଆଗାଙ୍କ୍ ଜିସୁ ମେଣ୍ଡନ୍ନ୍ଦାମ୍ କେତ୍ତଣ୍ଡ୍, “ସତ୍ ନାନ୍ ମିକିଂଙ୍କ୍ କେସମିନ୍ଦେନ୍, ନାନ୍ ନିଜେ ମେଣ୍ଢାକିନ୍ ହାର୍ । 8ବେସ୍କ୍ ତଡ଼୍ ନା ମୁନେ ୱାସ୍ମିନ୍ଦେଡ଼ି, ଅଡ଼୍ ସାରେତଡ଼୍ ଡଙ୍ଗା ବା ଡକାଇତ୍, ବାତେଙ୍କ୍ ଇତ୍କେ ସାରେ ମେଣ୍ଢା ଅଡ଼୍ ଗଟି କେଞ୍ଜ । 9ନାୟାଦ୍ ମାର୍ ଇସ୍, ଯଦି ବେନ ନା ଆଲାଇସ୍ ଆଦ୍ତନ୍, ଆଲେକେ ଅଣ୍ଡ୍ ରକ୍ଷା ଜିୱେଦର୍କିତ୍ ନୁ ଲୋପେୱାସ୍ ନୁ ବାଇଦେଆଞ୍ଜ୍ ତିନ୍ଦାନାହୁ ଦର୍କିତ୍ । 10ଡଙ୍ଗାଲ୍ ୱାଦ୍ତଣ୍ଡ୍ ଡଙ୍ଗାଙ୍କ୍, ଆୱୁକାନଙ୍କ୍ ନୁ ଦଂସ ମାଡ଼ାଙ୍କ୍, ନାନ୍ ୱାତ୍ତାନ୍ ମିକିଂଙ୍କ୍ ଜିୱୁଣ୍ଡ୍ ହିଦାନ୍ ସେଙ୍ଗେ, ମିଡ଼୍ ବେଲାକି ଜିୱୁଣ୍ଡ୍ତେ ଗାଟି ତିପାଲ୍ମାଡ଼େ ପାର୍ତିଡ଼୍ ।”
11“ନାନ୍ ସାୟେତ୍ମେଣ୍ଢା ମେଇତାନନ୍; ସାୟେତ୍ମେଣ୍ଢା ମେଇତାନନ୍ ମେଣ୍ଢାନ୍ ମାଇଦିଙ୍କ୍ ନିଜେତ୍ ଜିୱୁଣ୍ଡ୍ ହିଦ୍ତାନ୍ । 12ବେନ ମୁଲ୍ୟ ଆସ୍ ମେଣ୍ଢା ମେଇତିତଣ୍ଡ୍, ଅଣ୍ଡ୍ ମେଇତାନଣ୍ଡ୍ ଆୟ୍ୟ, ଅଣ୍ଡ୍ କୁକାଲ୍ ୱାଦାନାଦ୍ ଉଡ଼ି ମେଣ୍ଢାଙ୍କ୍ ୱିଡ଼୍ସି ମିର୍ତଣ୍ଡ୍, 13ବେନ ମୁଲ୍ୟ ଆସ୍ ମେଇତିତଣ୍ଡ୍, ଅଣ୍ଡ୍ ମିର୍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ଗଲାଲ୍ ମେଣ୍ଢାନ୍ ମାଇଦିଙ୍କ୍ ଚିନ୍ତେ ମାଡ଼ଣ୍ଡ୍ । 14#ମାତିଉ ୧୧:୨୭; ଲୁକ ୧୦:୨୨.ନାନ୍ ସାୟେତ୍ ମେଣ୍ଢା ମେଇତାନନ୍ । ବାବାଲ୍ ବେଲା ନାକିଂଙ୍କ୍ ପୁତ୍ତଣ୍ଡ୍ ନୁ ନାନ୍ ବାବଙ୍କ୍ ପୁତ୍ତାନ୍, 15ଆଦ୍ଲେକାମ୍ ନାନ୍ ନା ନିଜେତ୍ ମେଣ୍ଢାଙ୍କ୍ ପୁତ୍ତାନ୍, ମେଣ୍ଡେ ନାୟାୱୁ ନିଜେତ୍ ମେଣ୍ଢା ନାକିଂଙ୍କ୍ ପୁତ୍ତା, ମେଣ୍ଡେ ମେଣ୍ଢାନ୍ ମାଇଦିଙ୍କ୍ ନାନ୍ ନାୟାଦ୍ ଜିୱୁଣ୍ଡ୍ ଇଦ୍ତାନ୍ । 16ନାୟାଉ ମେଣ୍ଡେ ବାଗାତାଉ ମେଣ୍ଢା ମିନ୍ଦେ, ବେନା ଇ ଗୁଡ଼ୁସେତ୍ ଲୋପେ ଇଲା । ଆୱିଙ୍କ୍ ମିକା ନାନ୍ ତାତେୱେଇତିତ୍ । ଆଉ ନାୟାଦ୍ କାର୍ଙ୍ଗା ନାଦ୍ କେଞ୍ଜିତା ନୁ ସାରେ ୱେରଡ଼୍ ଗଲାନ୍ ୱେରଡ଼୍ ଗୁଡ଼୍ସା ଆଶେ ମାନ୍ତା ।”
17“ନାନ୍ ନାୟାଦ୍ ଜିୱୁନ୍ ଇଦାଙ୍କ୍ ଇଚ୍ଛା ମାଡ଼୍ତାଙ୍କ୍ ବାବାଲ୍ ନାକିଂଙ୍କ୍ ପ୍ରେମ ମାଡ଼ିତନ୍, ନାନ୍ ନାୟାଦ୍ ଜିୱୁତିଙ୍କ୍ ହିତ୍କେ, ମେଣ୍ଡ୍ନ୍ ଦାମ୍ ନାକିଂଙ୍କ୍ ଜିୱୁଣ୍ଡ୍ ଦର୍କିତ୍ ନାୟାଦ୍ ହିଦ୍ ଅଦିକାର୍ ମିନ୍ଦେ । ନାନ୍ ନାୟାଦ୍ ବାବାନାଗାଙ୍କ୍ ଇଦ୍ ବୁଦ୍ତେ ଇସ୍ମିନ୍ଦେନ୍ । 18ବେନ ନାଗେ ଆଦ୍ ଆୟନ୍, ମାତର୍ ନାନ୍ ନିଜେତ୍ ଇଚ୍ଛାତେ ଆଦ୍ ଦାନ ୱାଟିତାନ୍ । ଆଦ୍ ୱାଟାନଙ୍କ୍ ନାୟାଦ୍ ଅଦିକାର୍ ମିନ୍ଦେ ନୁ ନା ବାବାନାଗାଙ୍କ୍ ଇଦ୍ ଗଟ୍ ଇସ୍ମିନ୍ଦେନ୍ ।”
19ଜିସୁନ୍ ଇୱୁସାରେ ଗଟିନ୍ ମାଇଦିଙ୍କ୍ ନାରୁଡ଼୍ ଲୋପେ ମେଣ୍ଡନ୍ନ୍ଦାମ୍ ମତବେଦ ଗଟେମ୍ଆତ୍ତେ । 20ବେସ୍କ୍ତୁଡ଼୍ କେତାଙ୍କ୍ ପସ୍ପ୍ତ୍ତଡ଼୍, “ଅଂକିଙ୍କ୍ ବୁତ୍ ପଇତେ, ଅଣ୍ଡ୍ ବାୟାଲ୍, ବାତ୍ତିଙ୍କ୍ ଅନ୍ ଗଟି କେଞ୍ଜୁତିଡ଼୍ ।”
21ବାଗାତଡ଼୍ କେତ୍ତଡ଼୍, “ଇଦ୍ସାରେ ଗଟି ତ ବୁତ୍ ପଇତେ ନାରୁନାଦ୍ ଆୟ୍ୟ; ବୁତ୍ ବାତେଏ କାନାଲ୍ ନାୟାୱୁ କଣ୍ଡାଙ୍କ୍ ସାୟେ ମାଡ଼୍ ପାର୍ତଣ୍ଡ୍ ?”
ଜିସୁଙ୍କ୍ ଗ୍ରହନ୍ ମାଡ଼ଡ଼୍
22ଆସୁଙ୍କ୍ ଜିରୂଶାଲମ୍ ମନ୍ଦିର୍ ତିଆର୍ ପାଣ୍ଡୁମ୍ ଆସମାତ୍ତେ; ଆଦ୍ ଦିନାମ୍ ଶାଲ୍ କାଲାମ୍ ମାତ୍ତେ, 23ମେଣ୍ଡେ ଜିସୁ ମନ୍ଦିର୍ତାଗ୍ “ଶଲୋମନ୍” ମଣ୍ଡପ୍ତାଗ୍ ଉଡମାତ୍ତଣ୍ଡ୍ । 24ଆଗାଙ୍କ୍ ଯିହୁଦୀନଡ଼୍ ଅଂକିଙ୍କ୍ ତିଡ଼ିଇ ପାକେ ଉଡ଼ି କେତାଙ୍କ୍ ପସ୍ପ୍ତ୍ତଡ଼୍, “ମେଣ୍ଡେ ବେସ୍କ୍ ଦିନା ମାକିଂଙ୍କ୍ ଏର୍କା ତାଗ୍ ନେହେତିଡ଼୍ ? ଯଦି ନିମ୍ ମସିହ, ଆଲେକେ ମାକିଂଙ୍କ୍ ଇଟି ମିକା କେଲ୍ମ୍ ।”
25ଜିସୁ ଅଡ଼୍କିଂଙ୍କ୍ ଉତ୍ତର୍ କେତ୍ତଣ୍ଡ୍, “ନାନ୍ ମିକିଂଙ୍କ୍ କେସ୍ମିନ୍ଦେନ୍, ବାତେଙ୍କ୍ ଇତ୍କେ ମିଡ଼୍ ବିଶ୍ୱାସ୍ ମାଡ଼୍ୱିଡ଼୍; ନା ବାବାନ୍ ପେଦେର୍ ତେ ନାନ୍ ବେନ୍ ପାଡ଼୍ୟି ମାଡ଼ୁତାନ୍, ଆଦ୍ ସାରେ ନା ବିଷୟ୍ତେ ସାକ୍ଷ୍ୟ ଇଦୁତାନ୍; 26ବାତେଙ୍କ୍ ଇତ୍କେ ମିଡ଼୍ ବିଶ୍ୱାସ୍ ମାଡ଼୍ୱିଡ଼୍, ବାତେଙ୍କ୍ ଇତ୍କେ ମିଡ଼୍ ନା ଗୁଡ଼ୁସେତ୍ ମେଣ୍ଢାନଡ଼ି ଆୟୱିଡ଼୍ । 27ନା ମେଣ୍ଢା ସାରେ ନାୱାଦ୍ ଲେଙ୍ଗ୍ କେଞ୍ଜିତା ନୁ ନାନ୍ ଆୱିଙ୍କ୍ ପୁତ୍ତାନ୍, ମେଣ୍ଡେ ଆଉ ନା ପେର୍କେ ପେର୍କେ ୱାଦ୍ତା, 28ମେଣ୍ଡେ ନାନ୍ ଆୱିଙ୍କ୍ ସାରେଦିନାତ୍ ଜିୱୁ ଇଦ୍ତାନ୍, ମେଣ୍ଡେ ବେସୁଙ୍କ୍ବା ଆଉ ବିନଷ୍ଟ ଆୟ୍ୟ, ମେଣ୍ଡେ ବେନ ନା କାଇଦାଗାଙ୍କ୍ ଆୱିଙ୍କ୍ ଆଦ୍ ପାର୍ୱଡ଼୍ । 29ନା ବାବାଲ୍ ନାକିଂଙ୍କ୍ ବାତେଏ ଇସ୍ମିନ୍ଦେଣ୍ଡ୍ ଆଦ୍ ସାରେତାଗଙ୍କ୍ ଗାଟି ମୁଲ୍ୟ, ମେଣ୍ଡେ ବାବାନ୍ କାଇଦେ କନ୍ସ୍ ବେନବା ଆଦାଙ୍କ୍ ପାର୍ୱଡ଼୍ । 30ବାବାଲ୍ ନୁ ନାନ୍ ୱେରଣ୍ଡ୍ ।”
31ଇଦ୍ ଗଟ୍ କେଞ୍ଜି ନାରୁଡ଼୍ ଅଂକିଙ୍କ୍ ରେହେତାଙ୍କ୍ ମାଇଦିଙ୍କ୍ ମେଣ୍ଡନ୍ ଦାମ୍ କାଲ୍କ୍ ତାତ୍ତଡ଼୍ । 32ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, “ନାନ୍ ବାବାନାଗାଙ୍କ୍ ଗାଟି ସାୟେତ୍ ପାଡ଼୍ୟି ମିକିଂଙ୍କ୍ ତଅସ୍ ମିନ୍ଦେନ୍; ଆଦ୍ ସାରେ ପାଡ଼ିୟିତାଗାଙ୍କ୍ ନାକିଂଙ୍କ୍ କାଲ୍କିନ୍ ରେହେତାଙ୍କ୍ ଆଦୁତିଡ଼୍ ?”
33ଅଡ଼୍ କେତ୍ତଡ଼୍, “ସାୟେତ୍ ପାଡ଼୍ୟି ମାଇଦିଙ୍କ୍ ମାମ୍ମେ ନିକିଂଙ୍କ୍ କାଲ୍କିନ୍ ରେହମ୍, ବାତେଙ୍କ୍ ଇତ୍କେ ଇଶ୍ୱର୍ତେ ନିନ୍ଦେତ୍ ମାଇଦିଙ୍କ୍, ମେଣ୍ଡେ ନାରୁଡ଼୍ ଆସ୍ ନିଜେତିଙ୍କ୍ ଇଶ୍ୱର୍ ଇଞ୍ଜ୍ କେସମାନାଙ୍କ୍ ।”
34ଜିସୁ ଅଡ଼୍କ୍ ଉତ୍ତର୍ ହିତ୍ତଣ୍ଡ୍, “ମିୱାଦ୍ ଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍ କେତିତଣ୍ଡ୍, ‘ମିଡ଼୍ ଆଦ୍ତିଡ଼୍ ଇଶ୍ୱର୍ ।’ 35ବେନଡ଼୍ ପାକେ ଇଶ୍ୱର୍ତାଦ୍ ବାକ୍ୟ ମିନ୍ଦେ ଇତ୍କେ, ଅଡ଼୍କିଂଙ୍କ୍ ଯଦି ଅଣ୍ଡ୍ ଇଶ୍ୱର୍ ଇଞ୍ଜ କେତ୍କେ ମେଣ୍ଡେ, ଦର୍ମଶାସ୍ତ୍ର କଣ୍ଡନ୍ ମାଡ଼ାଙ୍କ୍ ପାର୍ୱଡ଼୍, 36ଆଲେକେ ବେନଙ୍କ୍ ଇଶ୍ୱର୍ ପବିତ୍ର ମାଡ଼ି ଜଗତ୍ତାଗ୍ ରହସିତ୍ତଣ୍ଡ୍, ଆଦିଙ୍କ୍ ବାତେଏ ମିଡ଼୍, ନାନ୍ ଇଶ୍ୱର୍ତେ ମାର୍, ଇଦ୍ ନାନ୍ କେଲ୍ନାଙ୍କ୍, ନିମ୍ ଇଶ୍ୱର୍ତିଙ୍ଗ୍ ନିନ୍ଦ୍ ମାଡ଼ୁତିନ୍ ଇଞ୍ଜ କେସମିନ୍ଦେନି ? 37ଯଦି ନାନ୍ ନା ବାବାନ୍ କାମ୍ସାରେ ମାଡ଼ନ୍ ଆଲାଇତ୍କେ ନାକିଂଙ୍କ୍ ବିଶ୍ୱାସ୍ ମାଡ଼୍ମାଟ୍; 38ବାତେଙ୍କ୍ ଇତ୍କେ ଯଦି ନାନ୍ ମାଡ଼ିତାନ୍, ଆଲାଇତ୍କେ ଆଗେଙ୍କ୍ ମିଡ଼୍ ନାକିଂଙ୍କ୍ ବିଶ୍ୱାସ୍ ମାଡ଼୍ମାଟ୍, ଆଗେକ୍ ବାବାଲ୍ ଯେ ନାୟାଗେ ମିନ୍ଦେଣ୍ଡ୍ ନୁ ନାନ୍ ବାବାନାଗ୍ ମିନ୍ଦେନ୍, ଇଦ୍ ବେଲାକି ମିଡ଼୍ ପୁତ୍ତିଡ଼୍ ନୁ ପୁନୁଟ୍, ଆଦିନ୍ ମାଇଦିଙ୍କ୍ କାମ୍ସାରେ ବିଶ୍ୱାସ୍ ମାଡ଼ାଟ୍ ।”
39ଆଗାଙ୍କ୍ ଅଡ଼୍ ଅଂକିଙ୍କ୍ ପଇତାନ୍ ମାଇଦିଙ୍କ୍ ମେଣ୍ଡନ୍ ଦାମ୍ ଚେଷ୍ଟା ମାଡ଼ାଙ୍କ୍ ପସ୍ପ୍ତ୍ତଡ଼୍, ବାତେଙ୍କ୍ ଇତ୍କେ ଅଣ୍ଡ୍ ଅଡ଼୍ କାଇଦେ ଦର୍କ୍ୱେ ପେଇସ୍ ଆତ୍ତଣ୍ଡ୍ ।
40 #
ଯୋହନ୍ ୧:୨୮. ଆଦିନ୍ ମାଇଦିଙ୍କ୍ ଅଣ୍ଡ୍ ମେଣ୍ଡନ୍ନ୍ଦାମ୍ ଯର୍ଦ୍ଦନ୍ତେ ମେଣ୍ଡନ୍ ପାକେ ଆଞ୍ଜ୍, ଯୋହନ୍ ବେନ୍ ପଡ଼ିୟେତାଗ୍ ମୁନେଙ୍କ୍ ବାପ୍ତିସ୍ମ ଇସମାତ୍ତଣ୍ଡ୍, ଆଦ୍ ପଡ଼ିୟେ ତାଗ୍ ୱାସ୍ ଆଗେ ମାତ୍ତଣ୍ଡ୍ । 41ମେଣ୍ଡେ, ନାର୍ଗେ ଅନାଗ୍ ୱାସ୍ କେତ୍ତଣ୍ଡ୍, “ଯୋହନ୍ ବାତେବା ବାକ୍ୱା ପାଡ଼୍ୟି ମାଡ଼ନ୍, ବାତେଙ୍କ୍ ଇତ୍କେ ଇ ନାରୁଡ଼୍ ବିଷୟ୍ତେ ଯୋହନ୍ ବେନ୍ ସାରେ ଗଟି କେତ୍ତଣ୍ଡ୍, ଆଦ୍ ସାରେ ସତ୍;” 42ମେଣ୍ଡେ, ଆଦ୍ ପଡ଼ିୟେତାଗ୍ ନାର୍ଗେ ନାରୁଡ଼୍ ଜିସୁଙ୍କ୍ ବିଶ୍ୱାସ୍ ମାଡ଼୍ତଡ଼୍ ।
Currently Selected:
ଯୋହନ୍ 10: NTKaa20
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The New Testament in Koya Language © The Word for the World International and Koya Translation Samithi, Malkangiri, Odisha 2020