ଲୁକ 19
19
ଜିସୁ ନୁ ଜକୀୟ
1ପେର୍କେ ଜିସୁ ଯିରୀୟତାଗ୍ ଆସି ମିକା ଆଦ୍ ଆଲା ଇସ୍ ଆଞ୍ଜ ମାତ୍ତଣ୍ଡ୍ । 2ମେଣ୍ଡେ ଉଡ଼ାଟ୍, ଜକୀୟ ପେଦେର୍ ତଣ୍ଡ୍ ୱେରଣ୍ଡ୍ ନାରୁଡ଼୍ ମାତ୍ତଣ୍ଡ୍, ଅଣ୍ଡ୍ ୱେରଣ୍ଡ୍ ମୁକ୍ୟକରଗ୍ରାହୀ ନୁ ସାଉକାର୍ ନାରୁଡ଼୍ ମାତ୍ତଣ୍ଡ୍ । 3ଜିସୁ ବେନଣ୍ଡ୍, ଅଂକିଙ୍କ୍ ଉଡ଼ାଙ୍କ୍ ଅଣ୍ଡ୍ ଇଚ୍ଛା ଆସମାତ୍ତଣ୍ଡ୍, ବାତେଙ୍କ୍ ଇତ୍କେ ନାରୁଡ଼୍ ମାନ୍ଦେ ମାଇଦିଙ୍କ୍ ଉଡ଼୍ ପାର୍ୱ ମାତ୍ତଣ୍ଡ୍, ବାତେଙ୍କ୍ ଇତ୍କେ ଅଣ୍ଡ୍ ବୁଟି ମାତ୍ତଣ୍ଡ୍ । 4ଆଦିଙ୍କ୍ ଅଣ୍ଡ୍ ନାରୁଡ଼୍ତେ ମୁନେ ମିରିଆଞ୍ଜ୍ ଜିସୁଙ୍କ୍ ଉଡ଼ାନ୍ ସେଙ୍ଗ୍ ୱେରଡ଼୍ ତୟା ମାଡ଼େତାଗ୍ ତାର୍ତଣ୍ଡ୍, ବାତେଙ୍କ୍ ଇତ୍କେ ଆଦ୍ ହାର୍ ଇସ୍ ଜିସୁ ଆଦାନ୍ ମାତ୍ତେ । 5ଜିସୁ ଆଦ୍ ପଡ଼ିୟେତାଗ୍ ୱାସ୍ ପରୁ ଉଡ଼ି ଜକୀୟଙ୍କ୍ କେତ୍ତଣ୍ଡ୍, “ଜକୀୟ ସିଟ୍ପାଟ୍ ଡିଗି ୱାଡ଼ା, ବାତେଙ୍କ୍ ଇତ୍କେ ନେଣ୍ଡ୍ ନାକିଂଙ୍କ୍ ବେଲାମେଣ୍ଡେ ନି ଲୋନ୍ ମାନ୍ଦେୱେଇତିତ୍ ।”
6ଆଗାଙ୍କ୍ ଅଣ୍ଡ୍ ସିଟ୍ପାଟେ ଡିଗି ୱାସ୍ ୱେଡ଼୍କେତେ ଜିସୁଙ୍କ୍ ତାନ୍ ଲୋନ୍ କାର୍ଙ୍ଗି ହତ୍ତଣ୍ଡ୍ । 7ଆଦ୍ ଉଡ଼ି ସାରେତଡ଼୍ ତାମ୍ତାମ୍ ଲୋପେ ତିରିୟି କେତାଙ୍କ୍ ପସ୍ପ୍ତ୍ତଡ଼୍, “ଅଣ୍ଡ୍ ୱେରଣ୍ଡ୍ ପାପି ମାନେୟ୍ତେ ଲୋନ୍ ମାନ୍ଦାଙ୍କ୍ ଆଦୁତନ୍ ।”
8ଜକୀୟ ନିସ୍ ମିକା ପ୍ରବୁଙ୍କ୍ କେତ୍ତଣ୍ଡ୍, “ହୋ ପ୍ରବୁ ଉଡ଼େ, ନାୟାଦ୍ ସମ୍ପତ୍ତି କନ୍ସ୍ ଆଦ୍ ଦାନ ନାନେ ଗରିବ୍ ନାରୁଡ଼୍କିଂଙ୍କ୍ ଇଦୁତାନ୍, ମେଣ୍ଡେ ଯଦି ଅନ୍ୟାୟତେ, ବେନନାଗାଙ୍କ୍ ବାତ୍ତେ ଅସ୍ମାତ୍କେ, ମେଣ୍ଡେ ନାଲୁ ଗୁଣତେ ଆଦ୍ ମାଲ୍ପିଦୁତାନ୍ ।”
9ଆଦିଙ୍କ୍ ଜିସୁ ଅଡ଼୍ ବିଷୟତେ କେତ୍ତଣ୍ଡ୍, “ନେଣ୍ଡ୍ ଇଦ୍ ଲୋନ୍ ପରିତ୍ରାଣ ୱାତ୍ତେ, ତ ଇଣ୍ଡ୍ ମିକା ୱେର୍ଣ୍ଡ୍ ଅବ୍ରାହାମ୍ତେ ମାର୍ । 10#ମାତିଉ ୧୮:୧୧.ବାତ୍ ମାୟିମିନ୍ଦେ, ଆଦ୍ ମେହେକି ଗେଲ୍ସ୍ପାନ୍ ସେଙ୍ଗେ ନାରୁଡ଼୍ ପିଲେ ୱାସ୍ମିନ୍ଦେଣ୍ଡ୍ ।”
ସୁନା ରୂପାଡାବ୍ତେ ୱେଷଡ଼୍
(ମାତିଉ ୨୫:୧୪-୩୦)
11ନାରୁଡ଼୍ ଇଦ୍ ଗଟିସାରେ କେଞ୍ଜାନ୍ ୱେଲେ ଜିସୁ ମେଣ୍ଡେ ୱେରଡ଼୍ ୱେଷଡ଼୍ କେତ୍ତଣ୍ଡ୍, ଅଣ୍ଡ୍ ଯୀରୁଶାଲମ୍ ଗାର୍ରେ ଆଶେ ମାତ୍ତଣ୍ଡ୍ ନୁ ଇଶ୍ୱରତେ ରାଜ୍ୟ ଗାଟି ଯାପେ ତିଆର୍ ଆଦ୍ତେ ଇଞ୍ଜ ଅଡ଼୍ ହେର୍କା ମାଡ଼ମାତ୍ତଡ଼୍ । 12ଆଦିଙ୍କ୍ ଜିସୁ କେତ୍ତଣ୍ଡ୍, “ୱେରଣ୍ଡ୍ ବାଡ଼୍ୟଣ୍ଡ୍ ମାନେଇ ତାନ୍ ସେଙ୍ଗେ ରାଜପଦ ଦର୍ସ୍କି ମାଲ୍ସ୍ ୱାଦାନ୍ ମାତ୍ତେ ଅଣ୍ଡ୍ ଜେଏକେ ଦେଶ୍ ଆତ୍ତଣ୍ଡ୍ ।” 13ଅଣ୍ଡ୍ ତାମ୍ ଦଶ୍ଜାନ୍ ଦାସଡ଼୍କ୍ କାର୍ଙ୍ଗି ଅଡ଼୍କିଂଙ୍କ୍ ୱେରନ୍ ସୁନା ରୂପାଡାବ୍ ଇସ୍ କେତ୍ତଣ୍ଡ୍, “ନାନ୍ ୱାଦାନ୍ ଯାକ ବେପାର୍ ମାଡ଼ାଟ୍ ।” 14ବାତେଙ୍କ୍ ଇତ୍କେ ତାନ୍ ଦେଶ୍ ତେ ନାରୁଡ଼୍ ଅଂକିଙ୍କ୍ ପାସ୍କ ମାତ୍ତଡ଼୍, ମେଣ୍ଡେ ଅଡ଼୍ ଅନ୍ ପେର୍କେ ଦୂତ୍କିଂଙ୍କ୍ ରହସ୍ କେତ୍ତଡ଼୍, “ଇ ନାରୁଡ଼୍ ଯେ ମା ପରୁ ରାଜତ୍ୱ ମାଡ଼ିତନ୍, ଇଦ୍ ମାନ୍ ଇଚ୍ଛା ଆୟ୍ୟ ।”
15ପେର୍କେ ଅଣ୍ଡ୍ ରାଜପଦ ଦର୍ସ୍କି ଆଗାଙ୍କ୍ ମାଲ୍ସ୍ ୱାତ୍ତଣ୍ଡ୍ । ବେନ୍ ଦାସଡ଼୍କ୍ ରୂପାଡାବ୍ ଇସ୍ ମାତ୍ତଣ୍ଡ୍, ଅଡ଼୍ ଲୋପେ ବେପାର୍ ମାଡ଼ି ବେନ ବେସର୍ ଲାବ୍ ମାଡ଼୍ତଡ଼୍, ଆଦ୍ ପୁନ୍ଦାଙ୍କ୍ ସେଙ୍ଗେ ଅଡ଼୍କିଂଙ୍କ୍ ତାନ୍ ଗାର୍ରେ କାର୍ଙ୍ଗି ତାତାନଙ୍କ୍ କେତ୍ତଣ୍ଡ୍ । 16ଆଗାଙ୍କ୍ ମୁନେଙ୍କ୍ ୱେରଣ୍ଡ୍ ୱାସ୍ କେତ୍ତଣ୍ଡ୍, “ପ୍ରବୁ, ନିୟାୱୁ ସୁନା ରୂପାଡାବ୍ତେ ମେଣ୍ଡେ ନାନ୍ ଦଶ୍ଟାନ୍ ସୁନା ରୂପାଡାବ୍ ଲାବ୍ ମାଡ଼୍ତାନ୍ ।” 17ଅଣ୍ଡ୍ ଅଂକିଙ୍କ୍ କେତ୍ତଣ୍ଡ୍, “ଲେକେତ୍, ସାୟେ ଦାସ, ନିମେ ଗାଟି ସୁଦୁର୍ ବିଷୟତେ ବିଶ୍ୱାସ୍ତ ଆଦାଙ୍କ୍ ଦଶ୍ଟାନ୍ ନଗର୍ ତେ ପରୁ ଅଦିକାର୍ ଦର୍କିତ୍ ।” 18ମେଣ୍ଡେ ଦ୍ୱିତିୟ ନାରୁଣ୍ଡ୍ ୱାସ୍ କେତ୍ତଣ୍ଡ୍, “ପ୍ରବୁ, ନିୟାୱ୍ ରୂପାଡାବ୍ନ୍ ଏଇଙ୍ଗ୍ ରୁପେୟ୍ ଲାବ୍ ମାଡ଼୍ତାନ୍ ।” 19ଅଣ୍ଡ୍ ଅଂକିଙ୍କ୍ ମିକା କେତ୍ତଣ୍ଡ୍, “ନିମେ ଆନ୍ତେ ଏଇଙ୍ଗ୍ ନଗର୍ତେ ପରୁ ଅଦିକାର୍ ଦର୍କ୍ତେ ।”
20ମେଣ୍ଡେ ୱେରଣ୍ଡ୍ ୱାସ୍ କେତ୍ତଣ୍ଡ୍, “ପ୍ରବୁ, ଉଡ଼େ, ଇଦ୍ ନିୱାଦ୍ ସୁନା ରୁପେୟ୍, ନାନ୍ ଇଦିଙ୍କ୍ ତୁୱାଲ୍ ତାଗ୍ ତହସ୍ ନେହେସ୍ ମାତ୍ତାନ୍ । 21ବାତେଙ୍କ୍ ଇତ୍କେ ନାନ୍ ନିକିଂଙ୍କ୍ ୱେର୍ତାନ୍, ବେଲାକି ନିମେ ୱେରନ୍ ଗାଡ଼୍ସିନ୍ ମାନେଇ, ବାତେଏ ନେହେସ୍ ମାନଡ଼୍, ଆଦିଙ୍କ୍ ପେହେକି ଆଦ୍ତିନ୍, ମେଣ୍ଡେ ବାତେଏ ୱିତୱେ ମାନ୍ତଡ଼୍, ଆଦିଙ୍କ୍ କଇଦ୍ତିନ୍ ।” 22ଅଣ୍ଡ୍ ଅଂକିଙ୍କ୍ କେତ୍ତଣ୍ଡ୍, “ରେ ଦୁଷ୍ଟ ଦାସ, ନି ମକମ୍ତେ ଗଟିନେ ନିୱାଦ୍ ବିଚାର୍ ମାଡ଼ିତାନ୍ । ନାନ୍ ୱେରନ୍ ଗାଡ଼୍ସିନ୍ ମାନେଇ, ବାତେଏ ନେୱକଟ ମାନ୍ତାନ୍, ଆଦିଙ୍କ୍ ପେହେକି ଆଦ୍ତାନ୍, ମେଣ୍ଡେ ବେଗେୱିତି ମାନନ୍, ଆଦିଙ୍କ୍ କୟଦ୍ତାନ୍, ଆଦ୍ ନିମେ ପୁଞ୍ଜ୍ ମାତ୍ତି । 23ଆଲାତ୍କେ, ବ୍ୟାଙ୍କ୍ ତାଗ୍ ବାତେଙ୍କ୍ ନାୟାୱ୍ ରୁପେୟ୍ ନେହେୱିନ୍ ? ଆଲାତ୍କେ ନାନ୍ ୱାସ୍ ଉଦାର୍ ତଡ଼୍ ଆଦିଙ୍କ୍ ଆଦାୟ ମାଡ଼େନ୍ ?”
24ମେଣ୍ଡ୍, ଆଦ୍ ବକେତ୍ ନିସ୍ ମାନ୍ଦାନ୍ ମାନେଇନଡ଼୍କ୍ କେତ୍ତଣ୍ଡ୍, “ଇନାଗାଞ୍ଚ୍ ଇଦ୍ ରୁପେୟ୍ ହସ୍ମିକା, ବେନନାଦ୍ ଦଶ୍ଟାନ୍ ରୁପେୟ୍ ମିନ୍ଦେ, ଅଂକିଙ୍କ୍ ହିମୁଟ୍ ।” 25ଆଗାସ୍ ଅଡ଼୍ ଅଂକିଙ୍କ୍ କେତ୍ତଡ଼୍, “ପ୍ରବୁ, ଅନାଦ୍ ତ ଦଶ୍ଟାନ୍ ରୂପାଡାବ୍ ମିନ୍ଦେ ।” 26#ମାତିଉ ୧3:୧୨; ମାର୍କ ୪:୨୫; ଲୁକ ୮:୧୮.ନାନ୍ ମିକିଂଙ୍କ୍ କେସମିନ୍ଦେନ୍, “ବେନ୍ ମାନେଇତିଙ୍କ୍ ମିନ୍ଦେ, ଅଂକିଙ୍କ୍ ହିଦ୍ତଡ଼୍; ବାତେଙ୍କ୍ ଇତ୍କେ ବେନନାଦ୍ ଇଲ୍ଲେ, ଅନାଗ୍ ବାତ୍ ମିନ୍ଦେ, ଆଦେ ମିକା ଅନାଗାଙ୍କ୍ ଆଦ୍ତଡ଼୍ । 27#ମାତିଉ ୨୫:୧୪-3୦.ବାତେଙ୍କ୍ ଇତ୍କେ, ନାୟାୱୁ ଇ ବେନ୍ ଶତ୍ରୁଡ଼୍ ନାନ୍ଅଡ଼୍ ପରୁ ରାଜତ୍ୱ ମାଡ଼ିତାନ୍ ଇଞ୍ଜ ଇଚ୍ଛା ମାଡ଼୍ୱେ ମାତ୍ତଡ଼୍, ଅଡ଼୍କିଂଙ୍କ୍ ଇଗେ ତାସ୍ ନା ମୁନ୍ନେ ହାୱ୍କାଟ୍ ।”
ଜିସୁ ଯୀରୁଶାଲମ୍ତାଗ୍ ଆଦାନ୍ ଆର୍
(ମାତିଉ ୨୧:୧-୧୧; ମାର୍କ ୧୧:୧-୧୧; ଯୋହନ୍ ୧୨:୧୨-୧୯)
28ଜିସୁ ଇଦ୍ସାରେ ଗଟିକେସ୍ ତେର୍ସ୍ପ୍ତେ ପେର୍କେ ଶିଷ୍ୟଡ଼୍ ମୁନେ ଯିରୁଶାଲେମ୍ତା ଆଦାନଙ୍କ୍ ପସ୍ପ୍ତଣ୍ଡ୍ । 29ମେଣ୍ଡ୍, ବେସୁଟ୍ ଅଣ୍ଡ୍ ଜୀତ ମେଟେତ୍ ଗାର୍ରେ ବେତ୍ପାଗୀ ନୁ ବେତନିୟା ଗାର୍ରେ ହେଉତଣ୍ଡ୍, ଆସୁଙ୍କ୍ ଅଣ୍ଡ୍ ତାନ୍ ଶିଷ୍ୟନଡ଼୍ ଲୋପେଙ୍କ୍ ଇର୍ୱୁଡ଼୍କିଙ୍କ୍ ଇଦ୍ ଗଟ୍ କେସ୍ ରହତଣ୍ଡ୍, 30“ମି ମୁନେ ଆଦ୍ ନାର୍ଦାଗ୍ ଆନୁଟ୍; ଆଗେ ଅସାନ୍ ୱେଲେ, ବେନେ ତାନ୍ପରୁ କୁଦ୍ୱେ ମାନ୍ତଣ୍ଡ୍, ଇଦ୍ ରକମ୍ ଅଣ୍ଡୟ୍ ଗଦପିଲ୍ ତହସ୍ ମାନ୍ଦାନାଦ୍ ଉଡ଼ିତିଡ଼୍; ଆଦିଙ୍କ୍ ଲେହେସ୍ ତାଡ଼ାଟ୍ । 31ମେଣ୍ଡେ, ଆସୁଙ୍କ୍ ବେନ ମିକିଂଙ୍କ୍ ବାତେଙ୍କ୍ ଲେତୁତିଡ଼୍ ଇଞ୍ଜ ପାଚ୍ରା ମାଡ଼ିତଡ଼୍, ଆସୁଙ୍କ୍ ଇଲା କେତିତିଡ଼୍, ବାତ୍ତେଙ୍କ୍ ଇତ୍କେ ହିଦ୍ ପ୍ରବୁଙ୍କ୍ ଦର୍କାଡ଼୍ ମିନ୍ଦେ ।”
32ଆ ରହତ୍ତେ ଶିଷ୍ୟଡ଼୍ ଆଞ୍ଜ୍, ଅଣ୍ଡ୍ ଅଡ଼୍କିଂଙ୍କ୍ ବେଲାକେସ୍ ମାତ୍ତଣ୍ଡ୍, ଆଦେପୁଟୁଙ୍କ୍ ଉଡ଼୍ତଡ଼୍ । 33ମେଣ୍ଡେ, ଅଡ଼୍ ଗଦପିଲେତିଙ୍କ୍ ଲେତାନ୍ ୱେଲ୍ ଆଦିନ୍ ମାଲିକ୍ ହଡ଼୍କିଙ୍କ୍ ପଚ୍ରାମାଡ଼୍ତଡ଼୍, “ବାତେଙ୍କ୍ ଗଦ ପିଲେତିଙ୍କ୍ ଲେତୁତିଡ଼୍ ?”
34ଅଡ଼୍ କେତ୍ତଡ଼୍, “ବାତେଙ୍କ୍ ଇତ୍କେ ଇଦିନାଗ୍ ପ୍ରବୁନାଦ୍ ଦର୍କାର୍ ମିନ୍ଦେ ।”
35ମେଣ୍ଡେ, ଆଦିଙ୍କ୍ ଜିସୁନ୍ ଗାରେତାସ୍ ତାନ୍ପରୁ ନିଜେ ନିଜେତ୍ ସିଲେ ୱାଟି ଜିସୁଙ୍କ୍ କୁସ୍ପ୍ତଡ଼୍ । 36ମେଣ୍ଡେ, ଅନ୍ ଆଦାନ୍ ୱେଲେ ନାରୁଡ଼୍ ରୋଟିନାଗ୍ ସିଲେ ତାରାନଙ୍କ୍ ପସ୍ପ୍ତ୍ତଡ଼୍ ।
37ମେଣ୍ଡେ, ଅଣ୍ଡ୍ ବେସୁଙ୍କ୍ ଜୀତ ମେଟେତାଗ୍ ଡିଗୁଡ଼୍ ପଡ଼ିୱେତ୍ ଗାର୍ରେ ଏୱୁତଡ଼୍, ଆସୁଙ୍କ୍ ସାର୍ରେତଡ଼୍ ଶିଷ୍ୟଡ଼୍ ଉଡ଼ିମାନ୍ଦାନ୍ ସାରେ ଶକ୍ତିତାଦ୍ ପାଡ଼ିୟି ମାଇଦିଙ୍କ୍ ୱେଡ଼୍କେତେ ଗାଟିଲେଙ୍ଗ୍ଦେ ଇଶ୍ୱରତିଙ୍କ୍ ପ୍ରସଂଶା ମାଡ଼ଡ଼୍ ମାଡ଼ଡ଼୍ କେତ୍ତଡ଼୍, 38“ପ୍ରବୁନ୍ ପେଦେର୍ତେ ବେନ୍ ରାଜାଲଡ଼୍ ୱାସ ମିନ୍ଦେଡ଼୍, ଅଣ୍ଡ୍ ଦନ୍ୟ । ସ୍ୱର୍ଗତାଗ୍ ଶାନ୍ତି ନୁ ପ୍ରବୁନାଦ୍ ମହିମା ଆୟି ।”
39ଆଗାଙ୍କ୍ ବେସ୍କ୍ତୁଡ଼୍ ପାରୂଶୀଡ଼୍ ଅଂକିଙ୍କ୍ କେତ୍ତଡ଼୍, “ହୋ ଗୁରୁ, ନି ଶିଷ୍ୟଡ଼୍କିଂଙ୍କ୍ କଟ ଆଦାଙ୍କ୍ କେଲମ୍ ।”
40ଜିସୁ ଉତ୍ତର୍ କେତ୍ତଣ୍ଡ୍, “ନାନ୍ ମିକିଂଙ୍କ୍ କେସମିନ୍ଦେନ୍ ଇଡ଼୍ ଯଦି କଟ ମାତ୍କେ, କାଲ୍ ଆନ୍ତେ ଗଟି କେତିତା ।”
ଯୀରୁଶାଲମ୍ତେ ସେଙ୍ଗେ ଜିସୁନ୍ କେୟାନାଦ୍
41ମେଣ୍ଡେ, ବେସୁଙ୍କ୍ ଜିସୁ ଯିରୁଶାଲେମ୍ତାଗ୍ ୱାତ୍ତଣ୍ଡ୍, ଆସୁଙ୍କ୍ ନାର୍ତିଙ୍କ୍ ଉଡ଼ି ଆଦିନ୍ ସେଙ୍ଗେ କେୟି କେତ୍ତଣ୍ଡ୍, 42“ନିମ୍, ହଁ, ନିମ୍ ଯଦି ନେଣ୍ଡ୍ ଶାନ୍ତିତେ ବିଷୟତିଙ୍କ୍ ପୁଞ୍ଜ୍ମାନେନି, ମାତର୍ ଇଞ୍ଜେ ଆଉ ତ ତୋନ୍ଦକଟ ମିଞ୍ଜି ମିନ୍ଦେ । 43ତ ନି ପରୁ ମାନ୍ଦାନ୍ ଦୟାତାଦ୍ ସମୟ୍ ପୁନ୍ୱାଙ୍କ୍, ଶତ୍ରୁଡ଼୍ ନି ସାରେ ପାକେ ପେଟି ତହସ୍ ନିକିଂଙ୍କ୍ ବନ୍ଦି ମାଡ଼ିତଡ଼୍ ମେଣ୍ଡେ ନିୟାୱୁ ସାରେ ହାର୍ ବନ୍ଦ୍ ମାଡ଼ିତଡ଼୍ । 44ମେଣ୍ଡେ ଅଡ଼୍ ନିକିଂଙ୍କ୍ ନୁ ନି ପାକେ ମାନ୍ଦାନ୍ ନାରୁଡ଼୍କ୍ ପୁରା ଦସଂ ମାଡ଼ିତଡ଼୍, ଅଣ୍ଡୟ୍ କାଲ୍ ବଦେ ମିକା ଅଡ଼୍ ପଡ଼୍ୟେତାଗ୍ ୱିଡ଼୍ସଡ଼୍, ବାତେଙ୍କ୍ ଇତ୍କେ ବେସୁଟ୍ ଇଶ୍ୱର୍ ରକ୍ଷା ମାଡ଼ାଙ୍କ୍ ୱାତ୍ତଣ୍ଡ୍ ନିମେ ଅଂକିଙ୍କ୍ ହେଞ୍ଚାଙ୍କ୍ ପାର୍ୱି ।”
ଜିସୁ ମନ୍ଦିର୍ତାଗେ ଆତ୍ତଣ୍ଡ୍
(ମାତିଉ ୨୧:୧୨-୧୭; ମାର୍କ ୧୧:୧୫-୧୯; ଯୋହନ୍ ୨:୧୩-୨୨)
45ମେଣ୍ଡେ, ଜିସୁ ମନ୍ଦିର୍ତେ ଲୋପେ ଆସ୍ତଣ୍ଡ୍, ୱାମ ମାନ୍ଦାନ୍ ମାନେଇକିଂଙ୍କ୍ ଇଲା କେସ୍ ପେସ୍ପାନଙ୍କ୍ ପସ୍ପ୍ତଣ୍ଡ୍ । 46“ଦର୍ମଶାସ୍ତ୍ରତାଗ୍ ଲେକାମିନ୍ଦେ, ଇଶ୍ୱର୍ କେତ୍ତଣ୍ଡ୍, ମାୱାଦ୍ ଲୋନ୍ ପ୍ରାର୍ତନାଲୋନ୍ ଆଦ୍ ତେ, ବାତେଙ୍କ୍ ଇତ୍କେ ମିଡ଼୍ ଆଦିଙ୍କ୍ ଡଙ୍ଗାଲଡ଼୍ ଲୋନ୍ ଲେକାମ୍ ମାଡ଼ିମିନ୍ଦେଡ଼ି ।”
47 #
ଲୁକ ୨୧:3୭. ମେଣ୍ଡେ, ଅଣ୍ଡ୍ ସାରେଦିନାମ୍ ଯିରୁଶାଲେମ୍ ମନ୍ଦିର୍ତାଗ୍ ଶିକ୍ଷା ହିସମାତ୍ତଣ୍ଡ୍, ମାତର୍ ବେଡ଼ିୟି ଯାଜକ୍ ନୁ ଶାସ୍ତ୍ରୀନଡ଼୍ ନାରୁଡ଼୍ତେ ନେତାଲଡ଼୍ ତଡ଼୍ ଅଂକିଙ୍କ୍ ଆୱୁକାନଙ୍କ୍ ଇଚ୍ଛା ମାଡ଼ମାତ୍ତଡ଼୍, 48ବାତେଙ୍କ୍ ଇତ୍କେ ମାନେଇ ସାରେତଡ଼୍ ଅଣ୍ଡୟ୍ମନ୍ ଆସ୍ ଜିସୁନ୍ ଶିକ୍ଷା କେଞ୍ଜମାତ୍ତଡ଼୍ ଆଦିଙ୍କ୍ ଅଡ଼୍ ବାତେଏ ମାଡ଼ିତଡ଼୍ ଆଦିନାଦ୍ ଉପାୟ୍ ଦର୍ସ୍କାଙ୍କ୍ ପାର୍ୱେମାତ୍ତଡ଼୍ ।
Currently Selected:
ଲୁକ 19: NTKaa20
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The New Testament in Koya Language © The Word for the World International and Koya Translation Samithi, Malkangiri, Odisha 2020