Génesis 4
4
Adán, Éva ore ape bajade u Caín, Abel ore nanique
1Enga jnani bajai, acoté e ore chisa ñane enga jé u uje jeque chequé bajé Éva enga abi déji ajei. Enga uaté abi base nanique enga Caín u nanique. Enga chequé bajé chojninga: "E yabi cuse to enga diyoqui. Enga Pangarádejnai Dupade gueranome yu." 2Udojo quigade enga chequé bajé jequepo rĩ. Enga ape ejoi i u Abel, enga Caín desai tu. Enga Abel tuté chucué dáyipie iji dajei nanique jetiga chirote áyasadie. Jé basa Caín uté chucué dáyipie to ujetiga utáca jne.
3Sequeredie jiei iji udojo quigade enga Caín tẽra dacade cucha adie petígome Pangarádejnai Dupade. 4Enga Abel jnopo dachidedie áyasai ape bajé omenie uñanie údi rĩ ome Pangarádejnai Dupade jetiga tẽrame Dupade. Enga Pangarádejnai Dupade chajire gueranenie áyasai udire enga irasique re ome uje tẽrame. 5Mu uje Caín di deranone cucha adie údi iji to mu Dupade chajire bisideque uje que pota gu. Uje Caín chimo uje Dupade chetaque gueranone enga jĩraque ajei dotãripise enga uredie niji. 6Enga jé u uje Dupade catecã́ri Caín enga chojninga: "¿Gotique gu a uje bajei dotãre? ¿Gotique to a uje baredie niji? 7A apésurásu cucha ujñapetade ome beranone enga benochai pajnotarase. Que cucha ujñapetaque gotique ome yu uje bẽra bacade cucha adie ome yu. Uje bayó yojningane gai ga pisijnaringué uté, jecute pisijnaringuéone e chirote ua ujetiga suépo babai jne rĩ. Mu jetiga bajéo enga be enga ajnuépise pisijnaringuéone gai."
8Enga chise diri nanique uje Caín dejéna desai Abel aja daquigade ujetiga ore chisõrape iji erámi. Enga jé u uje idája ore iji ore qui tuté enga jé u uje Caín chisa desai enga chujépise nanique.
9Udojo quigade enga Pangarádejnai Dupade catecã́ri Caín enga chojninga:
–Caín á, ¿déji rique besai Abel?–
Enga Caín chojninga:
–Que yiraja jogatique, a déji sañeque. A ca yajnei tu arĩ́e ujetiga yañuru yesai tuté guio uje e jnacare yoque jnese gu.–
10Enga Pangarádejnai Dupade chojninga:
–¿Gotique gu a uje bajé besai te que? Cho jetiga besai iyojna catecã́ri yu iji jnumi enga chojninga: "Yangarádejná, be enga jnutaque ua ome yu uje yurẽjai chujé yu que." 11Jecute a yiji uté uruode jne ome ua enga a yo yurúja ua jne. Boji erámi tudé uje jnumi tu gu uje tagu besai iyoi diríca uje bajé diríca. 12Uje utáca ua mu a bacade cucha tarata jnumi enga que suépo rĩ. A ca ácarapóji erámi te rĩ enga a bo, a bo jne iji erámi údode jnese jé aja beruénique jne jetiga atoi.–
13Jé u uje Caín chajnai Pangarádejnai Dupade uruode udore enga chojninga:
–¿Jé yo ringome baruode udore jne a, uje cuchadatei u ome yu ujetiga yidota yu ome baruode udore? 14Uje e bajócãre yu iji yiyaridi tudé gajneri. Ujetiga yi enga a idájapise yu jne iji ua. Enga a ca yise yiyaritique uñeque jne iji sañeque. Que gusu udore mu a yise pachamite uñeque enga a uñeque chujé yu jne.–
15Mu Pangarádejnai Dupade chojninga:
–Caín á, ujetiga gosi chujé ua mu a yopise yujuñame besṍri tuté gosi jne.–
Enga jé u uje Dupade doi nanique enga chicha darusãratígo aja Caín uté, ujetiga gosi tuangóa nanique enga chimo Dupade urusarane iji enga ca chujé nanique. 16Enga jé u uje Caín jnoji pijogadi tuté nanique uje Dupade, Caín ore catecã́ri ñane iji, enga Dupade chirógapo aja doi nanique. Enga qui tu guedé garani yui nanique, enga chise puniri uje i tu Nod uje puniri tuté déji Edén uéchai.
Caín ape disi ejode íode u udojo nanique
17Enga Caín, acoté ore chisa ñane nanique enga ore abi cuse to nanique uje i u Enoc. Enga Caín pésu idai nanique enga chĩ́care Enoc aja uté nanique, ga jé i tu to abi nanique. 18Enga Enoc ujnacari cusapo nanique rĩ enga i tu Irad. Enga Irad ujnacari cusapo to nanique rĩ enga i tu Mehujael. Enga Mehujael ujnacari cusapo to nanique rĩ enga i tu Metusael. Enga Metusael ujnacari cusapo to rĩ nanique enga i tu Lamec. 19Enga Lamec uté acotedie gare nanique. Uña i tu Áda, jé basa uña i tu Zíla. 20Lamec acoté Áda abi cusapo to nanique rĩ enga uté i tu Jabal nanique. Enga Jabal uté ape disi ejode u nanique uje ore iguíjnane u cárpa nanique, enga ore isagode u aquirájnanie nanique. 21Enga Jabal uté desai i tu Jubal. Enga Jubal uté ape disi ejode ore u uje ore chirajapise ujetiga ore chijocase dajocayade hárpai, jé aja dabuchugode to rĩ uje udore i u fláuta nanique. 22Enga Lamec uté acoté uñáraque atique cuse to uje uaté i u Zíla. Enga uaté abi i tu Tubal-caín. Enga Tubal-caín uté ape disi ejode ore u uje ore pésu cuchade iji guebéode. Enga ore chirajapise nanique ujetiga ore pésu cuchade iji guebeque uñai to rĩ uje i tu bronce, jé aja guebeque uñai te rĩ uje i tu hiérro. Enga Tubal-caín uté nena cuse to nanique uje uaté i u Naama nanique.
23Enga chise diri uje Lamec chijna dacotedie, Áda, Zíla óraja re nanique enga chojningame ore:
"Angachopísi yuruode jne uje quene yujé ayorérique que, mu que yibárique cucha cuse.
Chamáñaje jnacaripítai tuté chisa yu gu enga chujé yúdode enga jé u uje yujé to, enga jé u uje yujépise.
24Mu uacamóño uje yocai Caín bai cuse nanique mu jé Dupade chirota nanique. Enga chojninga nanique: 'Ujetiga gosi chujé ua jne enga a yopise yujuñame besṍri uté gosi jne.'
Jé basa ga uyu ga que yibárique cusipise go.
Jecute ujetiga uté urásarigo ore jnutaque ore ome yu jne, mu a Dupade doi datéringane ome udore gosode jne."
Adán, Éva ore abi Set basája baja casica Abel jogadi nanique ome daté
25Enga Adán nonapo dacoté rĩ enga jé u uje jequepo rĩ. Enga abi base enga ore pésu i enga i tu Set. Enga jé u uje chequé bajé Éva chojningame dabai: "¡Jé cajire to! Dupade tẽrapo yabi tome yu rĩ ujetiga basája baja casica Abel jogadi te rĩ, uje Caín chujé nanique."
26Enga Set uté ujnacari cusapo to nanique rĩ enga i tu Enós. Enga bajaque Enós, urasade ore nanique uje ore catecã́ri Dupade ome raque.
Currently Selected:
Génesis 4: Ayore
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2021 Ethnos360