Yahiya 6
6
Si Isa makan jama labi lima libu
(Matiyu 14.13-21; Malkus 6.30-44; Lukas 9.10-17)
1Luu jaꞌ daka dangoy ngallaw, lay na baw ga si Isa dutai taꞌ kumpit boꞌ da palintas pa dambilaꞌ Danaw Jalil ma pinag-awnan du Danaw Tiberias. 2Pag-anu siꞌ, yaꞌ na taambat manusiyaꞌ nusu bihing patuhut niiya. Kon meꞌ looy sabap bay na sila pingkaꞌ ngita iya mōꞌ pabuwatan kahaylan-haylan waktu na bay ngulian siga jama saki. 3Takka jaꞌ siꞌ si Isa ka ga mulit na pa dambilaꞌ danaw, lay na baw sila nukad punu boꞌ da ningkōꞌ ndooy. 4Jaman looy siꞌ, tapit na baw balik paballangan bangsa Yahudi, yana paballangan Ngalingkaꞌ. 5Pag ndaꞌ si Isa sakiyan na jama bahuklud pa mman na, yuk na ni si Pilip, “Nnoy tu la man tabi malli balanjaꞌ man makan ga jama naa?” 6Iya siꞌ bay nilaw, ndang luu na njawom pamiki na bong oy song pabuwat na. Sugaꞌ kon na nilaw man na jaꞌ nongkad pamiki si Pilip bong oy tampung na.
7Pag tampung si Pilip, “Daa busung Tuwan, san bilay kitabi bay kaballi tinapay hagaꞌ gadji wawum buwan, masi du yaꞌ sukup dangkeket padadangan meꞌ naa na eka manusiyaꞌ.”
8Pag-anu, yuk mulit si Isa disu, yana si Andru, danganakan si Saymon Pitel, 9“Luu baw bitu ntuu disu anak-anak bay moo limam batang tinapay ka duwa lisu du daying. Sugaꞌ meꞌ noy du taabut-abut na meꞌ naa na eka manusiyaꞌ?”
10Na taꞌ punu looy siꞌ, labung kuhun na. Dari yuk si Isa ni siga mulit na, “Sohoun bi ga baanan jama naa ningkōꞌ.” Na eka kalallahan siꞌ ndooy, luu ga lima libu, sarī gi karandahan ka ga anak-anak. 11Pag-anu, lay paku si Isa tinapay looy siꞌ, boꞌ pinagsukuhan pa Tuhan. Pag lupus, boꞌ lay sohoꞌ na ndean ga baanan jama looy ma ningkōꞌ. Ga daying looy pun, meꞌ looy du meꞌ na bay buwat. Sampay lay na sila labbasakayi kakakan sa-sso-sso da na. 12Sso jaꞌ siꞌ sila labbasakayi, yuk si Isa ni siga mulit na, “Kumpohun bi na inaa ma bay takapin. Daa pasensengan bi.” 13Pag kumpo da, poonan limam batang du, luu gi sapu-duwa bakaꞌ pannoꞌ leꞌ pisan tinapay.
14Lay jaꞌ siꞌ takita ga baanan jama ndooy pabuwatan kahaylan-haylan bay pabuwat si Isa, ilooy ma lay sila kapahalling, “Mattan du la lalla tuu nabi looy ma bay tinunaꞌ maruhuꞌ-ruhuꞌ pitu pa junyaꞌ.”
15Pag tabista si Isa luu niyat ga baanan looy ngalogos iya binuwat sultan da, lay ya magti lakka, boꞌ na lay pa dambilaꞌ punu looy dangan-dangan na.
Si Isa lumān taꞌ kuwit boheꞌ
(Matiyu 14.22-33; Malkus 6.45-52)
16Pag taabut mangalib, lay palūd siga mulit na pa danaw. 17Takka ndooy, lay sila ngagad iya sampay kasangoman na ga sila, sugaꞌ yaꞌ du luu si Isa bay patuhut. Dari lay na sila dutai taꞌ kumpit boꞌ da patuwak pa Kapelniyum ndooy ni dambilaꞌ danaw. 18Mindangoy ko, libut na baw lahat sampay paehe na ga lamba. 19Luu jaꞌ siꞌ ga lima batu lawak da man bihing, luu na takita da si Isa pasōng pa kumpit da lumān jaꞌ taꞌ kuwit boheꞌ, sampay tud sinawan na ga sila. 20Sugaꞌ yuk si Isa, “Aku bitu. Daa na kam tawu.” 21Dari lay jaꞌ siꞌ takale da meꞌ looy, ilooy ma lay na sohoꞌ da dutai si Isa. Lay jaꞌ siꞌ ya njataꞌ, sarunduun du sila lay takka pa lahat ma tiluꞌ da.
22Na kuwan siga baanan jama ma bay tamban ni dambilaꞌ danaw, ngabut sampay llaw disu, luu na pin ngagad si Isa. Sangka da masi ya lundooy sabap disu du kumpit bay takita da patuwak, boꞌ yaꞌ bay takita da si Isa bay dutai. Ilooy du bay takita da siga mulit na. 23Pag-anu siꞌ, luu na baw siga kumpit takka man Tiberias lay parungguꞌ tapit pa lahat looy man da bay mangan tinapay ma bay pinagsukuhan meꞌ Papuꞌ Isa. 24Pag ndaꞌ ga baanan jama looy tud yaꞌ na luu si Isa ka ga mulit na, ilooy ma lay na sila mmeꞌ taꞌ ga kumpit ndooy song pa Kapelniyum miha iya.
25Tatammu da jaꞌ siꞌ si Isa ni dambilaꞌ danaw, tilaw da niiya, “Tuwan, sumilan tu ko la bay takka pitu?”
26Pag tampung si Isa, “Sabana na, saꞌ na maksud bi miha aku sabap meꞌ bi bay ngita siga pabuwatan kahaylan-haylan. Ilooy du maksud bi pitu sabap meꞌ bi bay paasso ku ka tinapay looy. 27Sugaꞌ tinapay meꞌ looy ilay yaꞌ natas. Gam na balanjaꞌ ma natas saumu pagtuyuan bi, ma kasampulnaꞌ ni nyawa bi labba man junyaꞌ sampay pa ahirat. Balanjaꞌ looy ilay dari ndean meꞌ ku, yana Anak Manusiyaꞌ, ningkaam batan aku bay binuwanan kapatut meꞌ Mmaꞌ ku Tuhan.”
28Tilaw da niiya, “Bong kau, subay oy tu la pabuwat kami ma numan ni kahandak Tuhan?”
29Pag tampung si Isa, “Pabuwatan ma numan ni kahandak Tuhan yana pitsayaꞌ ni ilooy ma bay papitu na, yana aku.”
30Dari tilaw da, “Bong meꞌ naa, oy baw tu sipat kawasa Tuhan tapōꞌ nu? Noy mintu kami lay na ngita, boꞌ kami pitsayaꞌ kau bay pinapitu meꞌ Tuhan. Luu kina tapōꞌ nu sipat kawasa 31ma kaatu ni sipat bay pōꞌ Nabi Musa? Saꞌ ba, jaman kabboꞌ-bboan tabi ni lahat lau-lau yaꞌ maglumaꞌ, bay sila pingkaꞌ pinakan meꞌ na manna?#(6.31) Manna ilay yana makanan ma ingbas ka bastilaꞌ kayu ginigi bay llabuꞌ meꞌ Tuhan man sulgaꞌ man makan bangsa Yahudi jawom mpatpūꞌ taun llaw-llaw (ndaun Kitab Tawrat, Kalakka 16.4-36). Meꞌ halling sambat njawom kitab, ‘Bay ya makan sila ka makanan man sulgaꞌ.’ ”
32Yuk si Isa ninsila, “Baan ta kam banahan, saꞌ du silay Nabi Musa bay muwanan sila makanan looy man sulgaꞌ. Iya bay muwan yana Mmaꞌ ku. Boꞌ na pag batnaa, makanan sabanna na man sulgaꞌ dean na kaam, 33yana ituu na batnaa ma bay duwai mandooy, yana poonan kasampulnaan nyawa ni mimon manusiyaꞌ. Ituu ya situ makanan sabanna man Tuhan.”
34Pag halling da baw siꞌ tu, “Tuwan, bong anu, buwanan teꞌ kami makanan looy llaw-llaw.”
35Yuk si Isa, “Aku na situ makanan looy ma muwan kasampulnaan nyawa. Soysoy pa mman ku maka pitsayaꞌ niyaku, malaingkan yaꞌ na ya lingantu pabalik maka yaꞌ na du kuhi tohoꞌ kallong na saumu.#(6.35) Sagannap manusiyaꞌ ma mangaku tiksaꞌ nyawa da sampay doman mahap na pa Tuhan, pinag-awnan meꞌ si Isa jama lingantu ka tohoꞌ kallong da. Bong sila pitsayaꞌ na ni si Isa, yaꞌ na sila meꞌ karuha jama lingantu ka tohoꞌ kallong da sabap luu na kasampulnaan nyawa da. 36Sugaꞌ meꞌ halling sambat ku na siꞌ, san tu kam bay na ngita siga pabuwatan kahaylan-haylan, masi du kam yaꞌ pitsayaꞌ niyaku. 37Sugaꞌ sagannap ma bay sinukuꞌ leꞌ Mmaꞌ ku niyaku, mastiꞌ mmeꞌ jaꞌ sina niyaku. Boꞌ na, sagannap ma mmeꞌ niyaku, yaꞌ sina luu tuwak ku. 38Aku itu bay duwai man sulgaꞌ luꞌ pitu, saꞌ du man ku nulut kahandak ku, arapun bong pin taduwan ku jaꞌ kahandak Mmaꞌ ku ma bay mapitu aku. 39-40Kahandak na ina, subay ayaran ku sagannap ma bay sinukuꞌ meꞌ na niyaku mari yaꞌ hilang san disu man jawom okoman ku. Batan kahandak Mmaꞌ ku subay mimon ma pitsayaꞌ sampay mangando ni Anak na binuwanan kasampulnaan nyawa ma yaꞌ luu katapusan na. Dari san sila matoy, pag taabut llaw dambuli, pakallum ku du sila pabalik.”
41Na sabapan bay sambatan si Isa pasal iya makanan ma bay duwai man sulgaꞌ, ilooy ma magdubdub na sadjaꞌ siga Yahudi, 42yuk dangan pa dangan, “Saꞌ kina inaa si Isa, anak si Yusup? Nneꞌ-mmaꞌ na bilay la takila tabi. Pooy baw lay la meꞌ na sikatuwaꞌ halling na siꞌ, lay ya duwai man sulgaꞌ?”
43Yuk si Isa ninsila, “Ddong na teꞌ kam ba hangat magdubdub. 44Ndang yaꞌ du sina luu kapa-mmeꞌ niyaku bong sila yaꞌ bay lliyun meꞌ Mmaꞌ ku ma bay mapitu aku. Boꞌ sagannap ma mmeꞌ niyaku, meꞌ bay halling sambat ku na siꞌ, pakallum ku du pabalik pag taabut llaw dambuli. 45Ndang luu bay sinuwatan njawom kitab kanabi-nabihan, ilooy ma yuk na, ‘Mimon sila tinoan meꞌ Tuhan bbos-bbos.’#(6.45) Kitab Nabi Isaya 54.13. Intong na, sagannap ma pakale ni Mmaꞌ ku maka nganna tōꞌ na, mastiꞌ mmeꞌ niyaku. 46Sugaꞌ saꞌ baw lay siꞌ hantak bitsala ku ga luu jama bay pingkaꞌ ngita Mmaꞌ ku, batan yaꞌ luu manusiyaꞌ bay ngita Tuhan sarī man ilooy ma bay lakka mman na.
47“Baan ta kam banahan, soysoy pitsayaꞌ niyaku, luu na kasampulnaan nyawa na saumu-umu. 48Batan aku na situ makanan ma poonan kasampulnaan nyawa. 49San ilay kabboꞌ-bboan bi bay kakakan makanan man sulgaꞌ, yana manna ndooy ni lahat lau-lau, lay gi du sila matoy. 50Sugaꞌ batnaa luu na du balik makanan lay du pinaduwai man sulgaꞌ. Soysoy bay kakakan, yaꞌ na sina matoy.#(6.50) Hatiyan “yaꞌ na sina matoy” ni ayat tuu, yaꞌ na tiksaꞌ nyawa da saumu labba man junyaꞌ sampay pa ahirat. 51Boꞌ aku na situ makanan looy ma luu na bay duwai man sulgaꞌ. Aku itu makanan llum. Bong jama bay kakakan, malaingkan llum sila saumu-umu ni okoman Tuhan. Makanan ma awnan ku tu yana isi baran ku ma pinaglillaꞌ meꞌ ku kalnaꞌ mimon manusiyaꞌ supaya sila koleꞌ kasampulnaan nyawa saumu-umu.”
52Pag takale meꞌ siga Yahudi halling si Isa meꞌ looy, mangkin magsasōng na meꞌ da hipos sampay magjaw-jawap na ga, yuk da, “Uy la, pooy doꞌ na meꞌ lalla naa kabuwan isi na ningkitabi nohoꞌ kinakan?”
53Mangkin yuk si Isa ninsila, “Baan ta kam banahan, yaꞌ sina kam koleꞌ kasampulnaan nyawa bong kam yaꞌ bay mangan isi Anak Manusiyaꞌ ka nginum lahaꞌ na.#(6.53) Hatiyan mangan isi na ka nginum lahaꞌ na ntuu, yana pitsayaꞌ niiya. Intong na, bong ina mintu sila yaꞌ pitsayaꞌ baran na bay binasa kalnaꞌ sila maka lahaꞌ na bay tumpa man muwasan dusa da, yaꞌ sila koleꞌ kasampulnaan nyawa. 54Batan sagannap ma mangan isi ku sampay nginum lahaꞌ ku, luu na kasampulnaan nyawa da ma yaꞌ luu katapusan na. Maka pag taabut llaw dambuli, pakallum ku du sila pabalik. 55Isi ku yana makanan sabanna, damikiyan lahaꞌ ku yana inuman sabanna du. 56Soysoy mangan isi ku sampay nginum lahaꞌ ku, malaingkan tibuuk ka aku. 57Aku tu, luu kaallum ku sabapan Mmaꞌ ku ma bay mapitu aku, batan iya poonan kaallum. Damikiyan, soysoy mangan aku, koleꞌ du kaallum bahau sabapan ku. 58Batan aku na situ makanan sabanna man sulgaꞌ. Makanan tuu tu yaꞌ sibuꞌ ka ilooy ma bay kakan kabboꞌ-bboan tabi. Makanan looy ilay, san sila bay mangan, masi du sila bay matoy. Sugaꞌ soysoy mangan makanan tuu, llum saumu-umu.” 59Na si Isa siꞌ bay magnasihat meꞌ looy sasang na ni disu langga ndooy ni Kapelniyum.
60Pag takale jaꞌ meꞌ siga soheꞌ si Isa bitsala na, meka sila bay halling, “Awod bitu la sambatan na. Soy doꞌ tu kasogsog pakale bitsala meꞌ naa?”
61Pag tabista si Isa magdubdub siga soheꞌ na pasal bay bitsala na siꞌ, yuk na ninsila, “Ongoy, sarī kina parasahan bi ni bay bitsala ku siꞌ? 62Marean ta pitsayaꞌ du kam ni bitsala ku bong mintu takita bi na Anak Manusiyaꞌ, yana aku, nuwi-nuwi pa jataꞌ pa bay limpaꞌ man ku maruhuꞌ. 63Baan ta kam banahan, bong itu tud isi baran ku, mastiꞌ yaꞌ kabuwan kasampulnaan nyawa. Ilooy ya muwan kasampulnaan nyawa, yana Rū Sutsiꞌ. Boꞌ bay bitsala ku ilay siꞌ ningkaam, lakka man iya. Sangkon soysoy pitsayaꞌ ni bitsala ku koleꞌ kasampulnaan nyawa. 64Sugaꞌ masi kam luu yaꞌ kuhi pitsayaꞌ.”
Na si Isa ilay, labba man sibuwa, ndang katoonan na sagannap ma niyaꞌ kuhi pitsayaꞌ niiya sampay ilooy disu ma song nipu iya bbos-bbos. 65Ilooy silay siꞌ man na bay māꞌ yaꞌ luu kapa-mmeꞌ niiya bong sila yaꞌ bay lliyun meꞌ Mmaꞌ na.
66Dari sabapan bitsala si Isa llaw looy, meka na soheꞌ na lay nikutan iya sampay patatak. 67Pag ndaꞌ si Isa meꞌ looy, yuk na ni siga mulit na sikasapu-duwa, “Pooy tu la kaam? Doman du kam patatak?”
68Pag tampung si Saymon Pitel, “Uy Papuꞌ, soy lagi tiluꞌ kami? Isu-isu kau du bina poonan bitsala ma kasampulnaꞌ ni nyawa saumu-umu. 69Kami itu pitsayaꞌ jaꞌ ningkau maka katoonan kami kau na ilooy ma bay tinunaꞌ Mahasutsiꞌ lakka man Tuhan.”
70Pag-anu yuk si Isa, “Saꞌ ba, luu kam sapu-duwa bay peneꞌ ku? Sugaꞌ luu situ disu ningkaam sineytan.” 71Ilooy bay awnan si Isa yana si Judas, anak si Saymon Iskariyut, batan katoonan si Isa san si Judas tabeꞌ ni mulit na sikasapu-duwa, song hallom luu du masa na nipu iya.
Currently Selected:
Yahiya 6: sjm
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2021, Wycliffe Bible Translators, Inc. All rights reserved.