От Луки 23
23
Иисус Сивуңани Пилатым
1Та̄хкын қамахлъютың та̄кут агӷистыт ныкывӯлъютың Иисус агля̄тка̄т Пилатым сивуңанун. 2Пилат пика̄т: «Лӣтаҳпут ӯм югым сыӷлытун иглыӷутақыфтӣ юпут. Налогмың лъивикиснаниӷақыфтӣ Кесарымун, лъңаның лъю пӣқуқ Христосыңунилюни, умӣлык».
3Пилатым а̄птыка̄: «Умӣлъката̄н Иудеит?»
Иисусым кӣмсиқа̄: «Лъпык та̄наңунӣҳпыңа».
4Та̄хкын Пилатым пикӣ первосвященнигытлъю, юлӷутыҳлъягытлъю: «Уна ю̄к анахутылъҳитуқ».
5Иўырңа ўата сягиқутка̄т: «Тамаҳа̄ни Иудеями апыҳтуӷилъыӷмикун сыӷлылӣӷутыстыҳлъягақӣ югыт. Пӣнлиӷлюни Галилеями, хўа̄ ма̄вык ка̄туқ».
Иисус Сивуңани Иродым
6Пилатым нагалъюки а̄птыкӣ: «Уна ю̄к Галилеяӷмӣңўа̄?» 7Лӣсямигу Иисус, Иродым иглыӷутка̄ның пиңутаңа, агля̄тыстыка̄ Иродымун. Лъңалъю Иерусалимымымылңуқ тама̄ни пилъыӷни. 8Иродым ысҳаӷьямигу Иисус, қуяҳлъякақ. Ысҳаӷьюпихтақыхкаңа қаюҳлъяк нагақуӷақыхкаңа, сиӷимакыхка̄лъю алъя̄ҳлъюхўаҳтисқылъюку. 9Ынка̄м а̄пқуӷа̄ҳта̄ка̄, иўырңа Иисусым кӣмсӣмаңилъкаңа. 10Первосвященнигытлъю, апыҳтуӷикаюгытлъю Лӣлиҳтӯсяның ыснываӷлютың угумиюпихлъютың Иисус анахутыҳлъягуманилюку пика̄т. 11Иродылъю пилъюўаҳтыкулъҳӣт асиста̄қа̄т лыгасӣӷўа̄ткума̄н. Та̄хкын а̄тыслъюкык акитупихлъыҳӣк аткуя̄ӷык, ӯтҳутыстыка̄т Пилатымун. 12Таўани аӷныӷми Иродылъю, Пилатылъю илялӣӷуткак; сивунӷани аңуякусялӷӣк.
Пилатым Туқусяҳқа̄ҳтыстыкаңа Иисус
13Та̄хкын Пилатым қырңуҳтыстыкӣ первосвященнигыт, иглыӷутистыт, югытлъю. 14Пикӣ: «Хўаңамнун тагитаҳси уна ю̄к қаюҳлъяк сыӷлытун иглыӷутиңуникыси югнун. Сивухпысини а̄пқуӷа̄ӷьяқыхка анахунъилъыҳпысиның, та̄ўа лӣгикақа анахутылъҳитыфтуқ. 15Талўа Иродым анахунъилъҳита̄ ынка̄м ӯтҳутыста̄ хўаңкунъун. Та̄ўа уна ю̄к аваңитуқ туқусяҳқа̄люни. 16Ынка̄ңам аӷью̄ӷмихта̄слъюку итымутыслъықақа».
17 Аюмиқулъық тамаҳа̄н Пасхами, пӣқылъыӷмыгыстун Пилатым итымутысяҳқақыхкаңа ата̄сиқ анусимиңлъяӷақ югның. 18Иўырңа қамахлъютың юлӷутыҳлъягыт акилӷӯткат: «Туқутыстигу! Варавва итымутыстигу хўаңкунъун!» 19(Варавва анусимиңлъяқақыхкаңат қаюҳлъяк илятңака̄лӷӣ сыӷлылӣҳқӣҳлъяк пӣқңан Иерусалимыми, юхталъыӷмунлъю.)
20Алъямың Пилатым пикӣ итымутысюгнилюку Иисус. 21Иўырңа югыт акилӷӯкат: «Қақӯраҳтыстигу, қақӯраҳтыстигу!»
22Пиңайӣткун Пилатым пикӣ: «Сяңан, сямың анахутка̄ўа? А̄пқуӷа̄ӷлюку лӣгиксяқыхка анахутылъҳитыфтуқ туқусяҳқа̄люни. Ынка̄ңам аӷью̄ӷмихта̄слъюку итымутыснақақа».
23Иўырңа араӷа̄талъҳат игляхтуҳтыңъинақақ Иисус қақӯрӣсқылъюку. Қынўат араӷа̄талъҳат а̄ҳтикақ. 24Ынка̄м Пилатым итагнақыхка̄ югыт пиюкылъҳат. 25Та̄хкын Пилатым а̄ныстыка̄ Варавва югыт пиюкылъҳистун. (Анусимиңлъяқақыхкаңат сыӷлылӣҳқӣлъыӷмунлъю, юхталъыӷмунлъю.) Ынка̄м Иисус пыхтыка̄ югнун пиюкылъҳистун писқылъюку.
Иисус Қақӯрақаңат
26Та̄хкын Римым пилъюўаҳтыңита Иисус а̄нутка̄т. Иглыҳсималютың налъяқа̄т ю̄к, а̄тҳа Симон, Киринеяӷмӣ, тагиңулӷӣ Иерусалимымун та̄гыхкын нунамың. Пилъюўаҳтыт акуқаӷлюку, Иисусым қақӯра̄ ӣсқаӷмихтыслъюку малихтыстыка̄т киңуңаның.
27Юлӷутыҳлъягыт малихтыка̄т Иисус, иляңита аӷнат ӯптыҳлъягумаӷмың қиякыхка̄т. 28Иўырңа Иисусым қӣвлюки пикӣ: «Аӷнӣтни Иерусалимым! Қиякыхпынаңа, иўырңа қиякитык лъпысиның, авақутаҳпысинунлъю. 29Қаюҳлъяк аӷныӷыт ука тагиңӯт югыт пилъықут: “Қуястыка̄гут аӷнат қумиңигалңӯт, таӷнуҳаңигалңӯт, мамаҳтиңигалңӯт!” 30Та̄хкын на̄йӷат пилъықӣт:
“Улъыӷвикикут!” қымитлъю пилъықӣт: “Ся̄пикут!”
31Югыт таўатын пикумың уқфик сюңаӷьюгулюку, сяңўа̄ сялъықа кӣнқан?»
32Тама̄нтыфтуқ ма̄лӷук югык лӣлиҳтӯсямың на̄фқӣкак. Иляңита пилъюўаҳтыт а̄нуткахкыт туқунъалюкык малигулъюкык Иисусымун. 33Ка̄сямың таўавык атилъқылӷӣмун: «Югым На̄сқўа», таўани қақӯрақа̄т. Та̄куклъю югык лӣлиҳтӯсямың на̄фқӣкак қақӯрақахкыт, ата̄сиқ аӷынқигныӷакун, иляңа сяӷумигныӷакун. 34Иисус пикақ: «Ата̄й, сыӷывутики, қаюҳлъяк на̄лъюкут ся̄қутсың».
Пилъюўаҳтыт атыҳтӣра̄ӷуткылъюки а̄ткӣ ныңӣткӣт. 35Ныкывгаӷмың югыт ысҳапакат. Таўани иглыӷутистыт лыгасӣӷўа̄ткыхка̄т Иисус хўатын: «Югулӣқӣ иляңи; йықай лъминың югулили Христосыңукуми, Кияӷныӷым Накмикыхка̄!»
36Пилъюўаҳтытлъю лыгасӣӷўа̄ткыхка̄т. Тагитка̄т қуўа̄лӷӣмың виномың, 37пика̄т: «Умӣлъкыңъукаңатын Иудеит, лъпының катам югули!» 38На̄сқўан қӯлңакун ныкыхтыка̄т хўатын игақңалӷӣ: «уна умӣлъка̄т иудеит».
39Лӣлиҳтӯсямың на̄фқӣстым а̄лъҳан қақӯралгутаңан лыгасӣӷўа̄ткыхка̄, пика̄: «Христосыңузӣн? Лъпының югули, хўаңкутуңлъю!»
40Иўырңа иляңан аӷью̄ӷмика̄: «Аликынӷисигӯ Кияӷнық? Қырңа̄мта пиңаюни та̄хкын ата̄симың аӷью̄лъыңукут. 41Нақамынрақ хўаңкутуң ылъқуӷулъютуң аӷью̄лъыңукуң, иўырңа уна ю̄к сямың анахусимаңитуқ». 42Та̄хкын Иисус пика̄: «Иисус, нықамикнакывңа Умӣлгулютын тагикувык!»
43Иисусым пика̄: «Ипа уңипа̄тамкын, аӷныӷми хўани хўаңамнилъықутын Райеми».
Иисусым Туқулъҳа
44-45Аӷныӷым қукаӷақа̄лъю сиқинық кӯкхунаниқақ ынка̄м нуна қамахлъюни мамлыҳқўа̄ҳлъякақ кынляңанун пиңаюмункылъя̄гмун. Сяфка̄ӷунлъю Храмымылңуқ пӣкақ малӷуҳқылъюни. 46Та̄хкын Иисус игляхтупихлъюни пикақ: «Ата̄й, таӷныӷахка афлъыңакылъыҳқаҳпынун пыхтахка!» Таўатын пилюни туқукақ.
47Пилъюўаҳтыт умӣлўа̄ӷита ысҳапаглюку таўатын пилъық, Кияӷнық усюқыхка̄: «Ипапыста̄қ уна ю̄к пинилӷӣңӯқ!»
48Юлӷутыҳлъягыт қырңуӷуткат ысҳапагналютың, ысҳапаглюки таўатын пилъҳыт нымыхнун агляҳтӯткат сякиматың тыңлюгмигумӣта. 49Қамахлъютың лӣсимакистыңита Иисусым, аӷнатлъю лъңанун малигуткат Галилеямың, уявақа̄нлъютың ныкывӷаӷмың ысҳапакӣт таўатын пилъҳыт.
Иисус Лъӣфқаңат
50-51Тама̄нтыфтуқ ю̄к а̄тҳа Иосиф Аримафеямың пиңуфтуқ Иудеямылңуӷмың. Ю̄к пинилӷӣ, малиҳқутақңалӷӣ Лӣлиҳтӯсянун, утақӣңулӷӣлъю Атаныҳпагулъҳанун Кияӷныӷым. Қайўа илятңаӷңа̄ӷми Агӷистынун, итагнақумаңилъкаңи агӷилъҳит, апыӷӣқӣтлъю Иисусымун. 52Та̄м югым Пилатымун туңсиӷьяҳтуқа̄ Иисусым югусӣ. 53Та̄хкын югусӣ қақӯрамың ӣклъюку укихтыка̄. Ӣмгулъюку қӣпаӷаҳқун лёныкун, лъӣфқа̄ ля̄ўа̄қакун уйӷагрухлъяхкун. Та̄на лъивық атуқумаңилңуқ. 54-56Аӷнат Иисусымун малигуткат Галилеямың, лъивыӷмун малихтыка̄т Иосиф. Таўани ысҳапака̄т натын югусӣ лъика̄таңа. Та̄хкын утыӷниӷлютың ята̄ҳқыхкӣт нықниҳся̄ситлъю, тыпыңлъя̄ситлъю аңиҳунъалюки Иисусым югусӣнун. Аӷнықыхкаңа ята̄ҳқутилъыҳқам Субботамун, хўа̄ Суббота пӣнлиӷнақылӷӣ. Ынка̄м аӷнат мыӷна̄ликат Лӣлиҳтӯсят қылылъҳистун.
Currently Selected:
От Луки 23: ess2
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022, Wycliffe Bible Translators, Inc. All rights reserved.