От Матфея 6
6
Апыҳтӯсяқ Тӯнилъыӷмың Аклъюмалӷӣнун
1Иисусым апыҳтӯсяни нагныӷуткӣ: «Ўатаҳлъяк пинитун пилъыси ысҳаҳсяқыхпынаки. Ысҳаҳсяқыхкуфсики Атахпыси қилягмылңӯм акилыҳтуӷна̄нӷитӣси.
2Ынка̄м тӯникувык аклъюмалӷӣнун, пинӣюгныӷыстун пихпынаң. Қалӷиҳтаҳтыстикаюгӯт тӯнивагилгамың ысҳӣсқылъютың. Таўатын пӣқут, синагоганилъю, тумынилъю усюқысқылъютың. Ипа уңипа̄тамси акилыҳтӯсяңўа̄ӷлютың аюқут. 3Иўырңа тӯникувык аклъюмалӷӣнун, кина алңунак уңипа̄тыхпына̄н, 4китумун алңунак налъюкысқылъюку тӯнӣлъҳын. Атахпык ысҳапагақа̄тын ынка̄м акилыҳтуҳлъықа̄тын».
Апыҳтӯсяқ Юӷалъыӷмың
5«Юӷаныҳпысини пинӣюгныӷыстун пихпынаси. Юӷаӷьюныҳтӯт ныкывӷаӷмың синагоганилъю, тумынилъю ысҳӣсқылъютың югнун. Ипа уңипа̄тамси акилыҳтӯсяңўа̄ӷлютың аюқут. 6Иўырңа юӷаӷнақныҳпыни, итыӷлютың ныхпынун ӯмгулъютын юӷаӷақи Атахпынун алӣнъыӷилгуӷмун. Атахпык лӣсимака̄ аксяқлъюку сялъҳын ынка̄м акилыҳтуҳлъықа̄тын.
7Юӷаныҳпысини Кияӷныпигмун манигӯсигалңуӷыстун пихпынаси. Юӷаныӷмыхни утыҳпахтаӷақӣт акузитыт сямың писӣнӷилңӯт. Сюмыӷмыхни акузилъыҳлъягмыхтыхун кӣмсиҳлъықнилюки юӷалъытың пӣқӣт. 8Лъңистун аюқыхпынаси қаюҳлъяк Атахпыси лӣсимака̄ аклъюкыхкаҳси, талўа а̄птыстыхпынаси.
9Ынка̄м хўатын юӷаӷақитык:
“Хўаңкута Атавут қилягмылңуқ памани,
аглыӷналӷӣ а̄тҳын қӯлвалъыңли.
10Юӷаҳтукут Атаныҳпагулъҳын тагисқылъюку,
пиюкылъҳынлъю апыӷӣӷысқылъюку нунами хўани,
катам қилягмылңуӷыстун.
11Ныӷьяҳқалитақыҳтикут аӷныӷми хўани.
12Сыӷывутаҳтики сыӷлыҳқылъыпут,
сыӷывусималюки сыӷлытун пистыпут.
13Нанӷӣқулъыңыстыхпына̄мта,
иўырңа югуликут та̄хкын Сыӷлыӷмың.
Атаныҳпагулъық, аҳтуӷьяҳқа̄нӷилъық, ниӷуҳқылъық,
лъпык пикатын қӯнпырухлъяк. Аминь”.
14Сыӷывускуфсики сыӷлытун пистыси, Атахпыси қилягмылңӯм сыӷывулъықӣси. 15Иўырңа сыӷывунъыӷилъкуфсики сыӷлытун пистыси, Атахпыси сыӷывунъа̄нӷитӣ сыӷлыҳқылъыси».
Апыҳтӯсяқ Посталъыӷмың
16«Постаныҳпысини ӣлъқысюгниҳқыхпынаси пинӣюгныӷыстун. Аӷмигигатут, мысю̄наңигатут лӣгикысқылъютың постаңунилютың. Ипа уңипа̄тамси, акилыҳтӯсяңўа̄ӷлютың аюқут. 17Постаныҳпыни аӷмигақилъю, мысю̄на̄қилъю, 18иляхпынун налъюкысқылъюку посталъҳын. Иўырңа Атахпык алӣнъыӷилңӯм лӣсимака̄ ся̄қутын ынка̄м акилыҳтуҳлъықа̄тын».
Қилягмылңӯт Аклъюңит
19«Нунами хўани кахпахпынаси аклъюңимың қаюҳлъяк киңугымлъю, анаҳта̄лъҳымлъю на̄фқылъықӣ, тыглыгнӣҳтытлъю на̄фқӣлютың тыглыхлъықут. 20Иўырңа лъпысиның катам қилягми кахпагитык аклъюңимың қаюҳлъяк молыңитуқ, анаҳта̄ңитуқ на̄фқӣяҳқамың, тыглыӷнӣҳтыңитуқлъю на̄фқӣлютың тыглыгуӷьяҳқамың. 21Сюмыҳтаӷа̄ткумаңинаҳлъықаҳси аклъюңихпысинун кахпагвихси».
Югусим Ниӷуга
22«Ийык кынылӷутастун аюқук югусимун. Ӣскыхтыкувык ӣңунаӷми югусин ниӷухлъягулъықуқ, 23иўырңа ийылъюгмыскувык ӣңунаӷми югусин мамлыхлъягулъықуқ. Ынка̄м ниӷук илюхпынилңуқ мамлыгукуми, ынңа̄талъ мамлыпихтуқ!»
Кияӷныӷынкук, Манинкук
24«Китум алңунак қыпҳа̄нъа̄нӷита̄к ма̄лӷук умӣлгык. Ма̄лӷугыгның умӣлылгукуми угумикылъықа̄ ата̄сиқ, пиниқылъықа̄ иляңа. Қа̄ткутңалъықуқ ата̄симун, пикаткынъа̄нӷита̄ иляңа. Ынка̄м пиниқна̄нӷитаҳси Кияӷнық пиниқумалюку мани.
25Тама̄кын апалъюқлъюку уңипа̄тамси, нулъқавӣӷуткыхпына̄н уңвалъыҳси, сямың ныӷылъыҳқаҳси, мыӷылъыҳқаҳси, налиӷмың сямың а̄тылъыҳқаҳси. Сюмыҳтаӷақаҳтыкқун, уңувалъық мыгнунаӷатаӷаҳтуқ нықмың, югусиқлъю мыгнунаӷатаӷаҳтуқ а̄тканың. 26Ысҳақаҳтыкиқун қаўа̄гыт, пӣтысиӷӣгатут, унатӣгатут, кахпагиңигатут. Нақамлъю Атахпыси қилягмылңӯм ныҳқақӣ! Лъпыси мыгнунаӷатаӷанӷитсӣ қаўа̄гның? 27Налиҳпыси нулъқавӣгуткылъюку уңувалъыни та̄куҳлъықагӯ?
28Сяңан нулъқавӣхтақыстык а̄сяҳқамың? Ысҳақаҳтыкиқун пӣтысиӷа̄т пӣтылъҳит, қыпҳӣгатут талўа а̄ткаңлъӣгатут лъңитның. 29Уңипа̄тамси талўа Соломон аклъюңиҳлъягмини а̄сигатуқ пӣтысиӷаӷыстун пиниҳтуткалӷӣмың. 30Кияӷныӷым а̄сиҳтуӷақӣ выга̄ӷыт, иўырңа ага уна̄ми қӯкақӣт. Кияӷныӷым а̄сиҳтуқаюгукаки выӷа̄гыт, а̄сиҳтуӷатаӷаӷна̄нӷитисӣ лъпыси? Ухпыӷьюкыхтуси қилъыҳқыста̄пигуси! 31Тама̄кын апалъюқлъюку нулъқавӣхтыхпынаси хўатын: “Сямың ныӷнақыста?” налиӷмың: “Сямың мыӷнақыста?” налиӷмың: “Сямың а̄нъақыста?” 32Язычнигыт тама̄на нулъқавӣгуткақа̄т. Атахпыси қилягмылңӯм лӣсимакӣ қамахлъюки аклъюкыхкаси. 33Тама̄кын апалъюқлъюку кияҳтылъыҳпысини мыгнуналъыҳпига̄ҳтыстыки Кияӷныӷым Атаныҳпагулъҳалъю, пиюкылъҳалъю. Таўатын пикуфси Кияӷныӷым тӯнылъықӣ қамахлъюки аклъюкыхкаси. 34Нулъқавӣгуткыхпына̄н уна̄милъыҳқақ, қаюҳлъяк уна̄мим сыӷлылӣӷи итагнаӷьяҳқа̄гут таўавык аӷныӷмун. Сыӷлылӣқ пикаюгӯқ аҳутаңа тамаҳа̄н, иля̄ӷатаӷаҳпына̄н уна̄мим сыӷлылӣлъыҳқа̄ның».
Currently Selected:
От Матфея 6: ess2
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2022, Wycliffe Bible Translators, Inc. All rights reserved.