Luk'as Dooshishiyo 20
20
Iyesus kon alon b́finiruwok'o bín aatetsok'o
(Mat. 21:23-27; Mar. 11:27-33)
1Ik aawu Iyesus Ik'i mootse daatseyat ash ashosh doo shishiyo b́ keewufere kahni naashwotsna, Muse nemo danifuwotsnat eenashuwotswere bíyok bo weyi, 2Bowere «Aab noosh keewwe, keewanotsi kon alon nfiniruwok'ona?» ett bo aati. 3Iyesuswere hank'wa boosh bíet, «Taawere ik keewu iti aatuna, eshe aab taash aaniwere, 4Yohans gupo Ik'okike himó ashokike?»
5Bowere hank'o ett bo atsatseyo bo keewe, « ‹Ik'okike no› etala, ‹Beree eegishe bín amano it k'azi› etetuwe nosha, 6‹Ashokike› no etalmó ash jamo Yohansi nebiyi b́woto bo amantsotse shutsone noon bo togeti.» 7Mannsh «Aawokik b́ woto danatsone» ett bo aaniy. 8Iyesuswere, «Beree taawor kon alon keewanotsi t finiruwok'o itsh keewuratse» bí eti.
Weyini mitonat goshtsuwotsn ariyetso
(Mat. 21:33-46; Mar. 12:1-12)
9 #
Isa. 5:1 Manats dabt Iyesus ariyetsan ash ashosh keewo dek't b́ tuu, ash iko weyini mito b́toki, goshtsuwotssh krayik'rat k'osh datso k'az bíami, bí anerawono ayo b́ja'i. 10Woyiniyo b́shutsok'on weyiniman doonz b́ shuwotse b́bano bísh de'e b́weyish guuts iko goshtsuwotsok b́woshi, goshtsuwotsmo togdek't kishibashon faksh bok'ri. 11Mank'o ando k'osh guutso b́ woshere bínor tog boishí, ketidek't kishibashon damibok'ri. 12Ando aani keezl guutso b́woshere manowere togdek't gaawit kishdek't juubok'ri. 13Maniye hakonowere weyiniyo doonz «Eshe awuk'o k'alutak'una? T shuntso t naayi woshona, daneraka bín mangiyo k'ayatsne,» bíet. 14Ernmó goshtsuwots bín bobek'tsok'on bo atsatsewo hank'o bo eti, Eshe naatetuwo haniye, woore úd'k'rone! b́ datso nok wotituwe! 15Mansh b́ naayi woyniyi maniyre úratse kish dek't boúd'i. Eshe and weyiniman doonz goshtsmanotsi awuk'o boon b́k'alituwok'o arefa itsha? 16Weyni doonzo b́tokone b́ weti, goshtsuwotsnowere úd'nib́ishit, weyni mitmanowere k'osh goshtsuwotssh imk'rituwe. ashuwotswere man boshishtsok'on «Hanwo b́jamon wotk'aye» boeti.
17 #
Dub. 118:22 Iyesusmo bo maants s'iilfetst hank'o bí et,
«Eshe,
‹Gmbi agfwots gac'ts shútso shúts kup'o shútswotsi tungúshatse kaatsde detsetwo wotb́gutsi›
ett guut'etso eege b́kitsiri. 18Shúts manats dihitu jamo tishitwe, shútsman bíats b́dihitu ashonmo t'ars'etwe.»
Ereer dashi jangosh t'intsets aato
(Mat. 22:15-22; Mar. 12:13-17)
19Muse nemo danifuwotsnat kahni naashwotsn ariyets keewuman boatsats b́ keewtsok'owo dank'rat manoor bín deshdek'osh geyatni botesh, ernmó ash asho shatbowtsi. 20Mansh Iyesusi ash aalts aawots detsosh kotbodek'i. Naasho alonat bíats angshetuwok'o betsit nooni dáro bíatse datsosha bogefoni, mansh ash sheeng araarr b́ keewiru keewo mec'it ashuwotsi woshbok'ri. 21Keew mec'it ashuwots Iyesus maants t'int, hank'o ett bín boaati, «Danifono! nee n keewiruwonat n daniyruwon ar b́wottsok'o danfone, Ik'i weero arikone ndaniyiri bako konshor bogabogshratsne. 22Ab noosh keewwe! no nemok'on Rom nugúsosh ereer dasho wotitwamo woteratsa?»
23Iyesusmó bo gondon bok'od'iruwok'o dank'rat boosh hank'o bí et, 24«Aab́ ambarmani taash kitsuwere, ambarmanats gedets aronat shútson konke?»
Bowere «Rom nugúsoke» boeti.
25Iyesuswere, «Eshe naashi naashoko naashi naashosh, Ik'oko Ik'osh imere» bíet.
26Bowere ash ash shinatse b́keewuts keewon bín detso falratsno, mansh boosh bíaniyor adt s'k etbowtsi.
K'irtsuwots k'iro da'ar botuwi jango
(Mat. 22:23-33; Mar. 12:18-27)
27 #
Wosh. 23:8 «K'irtsuwots tuuratsno» etef Seduk'awiyots Iyesusok t'int hank'o ett bo aati, 28#Iwi. 25:5 «Danifonó! Muse hank'o ett noosh guut're, ‹Ash iko b́máátsu atse na'o b́ shurawo k'iron b́k'aleyal bí eshu máátsmani de'er bí eshush shaato shegrshwee.› 29Shawat eshuwwots fa'ano boteshi, jametsuwotsitsi k'aabo máátso dek't na'o b́ shurawo k'irb́wutsi. 30B́ shutsonuwere máátsmani b́ dek'i. 31Keezlonuwere bin b́dek'i, mank'oon shawat wotsuwere bin dek't na'o boshurawo k'irbowtsi. 32Jametsuwotsiyere il máátsman k'irbwutsi. 33Shawatetsuwots taron bin máátso bodek'tsotse eshe k'irtsuwots bo tuwots ááwushe ááwushe mááts b wotiti?»
34Iyesuswere hank'o ett boosh bíaaniy, «Datsatsi ashuwots máátso dek'etunó, de'etuno, 35k'irtsuwotsitse tuur, weet dúron beet ashuwotsmó, máátso de'atsno, de'eratsno. 36Ik'i melakiwotskok'o bowotituwotse k'irratsno, k'irotsno bo tutsotsnowere Ik'o nana'úwotsye. 37#Kesh. 3:6 K'irtsuwots tuwi jangoshmo, Muse buush tawi jango b́keewu taarikiyotse, Doonzone ‹Abrahamko Izar Izewer, Isak'ko Izar Izeweri, Yok'obko Izar Izeweri› ett bín s'eegree. 38Manshe Ik'oniye kashetswotsko Izar Izeweri bakro Izar Izewer k'irtsuwotskaliye, jametsuwots bísh kashon beetúne.»
39Muse nem danifuwotsitse ik ikuots «Danifono! sheenge n keewi!» boet. 40Maniyere hakon aawo shu'ude Iyesusi aatosh falituwo boyitse konwor aaliye.
Mesiyo jangosh t'intsets aato
(Mat. 22:41-46; Mar. 12:35-37)
41Maniye hakon Iyesus hank'oa boosh bíet, «Aak'oneya Krstos Dawit naayiye boetiri? 42-43#Dub. 110:1 Dawit b́ tookon duubi mas'aafotse,
‹Doonzo t doonzsh
N t'alatuwotsi n tufi shirots neesh t gerfetsosh
T k'ani aaromants beewe bíeti› etfe.
44Eshe Dawit b́tookon doonza ett b́ s'eegiyakon bere Krstos Dawitsh aawuk'oneya b́ naay woto b́faliti?»
Iyesus Muse nemo danifuwotsatse atso korde'ere bí'ettsok'o
45Ash jamo b́ shishfere Iyesus b́ danifuwotssh hank'owa bíet, 46«Tahi geenz geenzo karde'er hake bako sha'o, gawuyotsno mangiyets jamo dek'o, Ik' k'oni mootse mangiyets jorwotsi, jiwoknowere mangts beyoko shunf Muse nem danifuwotsatse it atso kordere. 47Bowere be'ewosh bot'intsiru geenz wotts Ik' k'onats webdek't bokenih k'irts maatsuwotsi botes'iri, manshe iki gond keewe boon kotiri.»
Currently Selected:
Luk'as Dooshishiyo 20: BrnNTLtn
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
The Word for the World International Publishing PO Box 26363, Colorado Springs, CO 80919, USA