Neto'te 4
4
Kaïn bo Abél
1Mandum lo' nzwi i Eva, a lét, mbwe Kaïn. Ndùlala mènnzwi tshob ndù: Tshùaben ywimt'àm, me ghù ta' mén mandum. 2A bèn mbwe mba Abél, mfèt Kaïn. Abél be ngabéb bon nyàm nke'nke'e, Kaïn nke ndù' tsha'a. 3Ngelaṅ nke ntôge. A be mo' lé'njù Kaïn lo' ntàm fa' mi a tum mum tsha' là nèn yi mbwe Tshùaben, ndo' ngù ze ju bwôntù yi. 4Abél #Héb. 11.4num ze bag i, fà mbwe bon nyàm tse, mfà mba kua' nzit mube. Ndùlala Tshùaben bam Abél mba ze ju bwôntù. 5Là Tshùaben ke bam Kaïn, mba ze ju bwôntù.
Ntù Kaïn ya neshu, se i tshùaṅ. 6Tshùaben tshob Kaïn ndù: Numk'o nja ntù se o bèn ntshùaṅ à? 7O lo ngù mebwô mb'o ke' bù' tu o tù ké? L'a be z'o ke' ghù mebwô là, mba nukebwô ke là nzendà ndù a nô bwe ké? A tshwèt nkwabt'o, a bwô ndù o tô i.
8Mba #Mat. 23.35; Luk. 11.51; 1 Yoha. 3.12ndùlala Kaïn tshob mfèl i Abél ndù: Be nène; ndùlala ndùse bo yi be mà tshwèt là, Kaïn tsho' ngwù num mfèl i Abél, nzwi i. 9Tshùaben bètte Kaïn ndù: Mfèl o Abél b'a yà? A bùnte ndù: Me ke' lèn tshàm. Me b'a ngalôte mfèl àm ké? 10Tshùaben #Héb. 12.24bèn mbètte ndù: Ke z'o lo ghù à? Ju'u, lem mfèl o kua' num nsitsha'a nse' nkum mbwe àm ndù me yagte mba'a. 11Ndonni ndon num tu o num dù' tsha' z'a nu lem mfèl o tse bu o fètte là. 12O nsi ke dù' tsha'a, a ke bèn mfà fu' se wù. O nsi ke zine, be tshakendà num nsitsha'a.
13Kaïn tshob Tshùaben ndù: Yàm vù ntsha zi neshu, me ke ku'ni nefènte. 14O ta' àm num yen nsitsha' li sènni; me nsi lem tà ngùanesà num miag mu, me nsi zine, be tshakendà num nsitsha'a, mèn z'a yen àm nà zwi àm. 15Tshùaben tshob yi ndù: Nga, a be ze mèn zwi Kaïn là, mba me nsi yagte mba' Kaïn yoṅ sammbàa. Tshùaben yab keki num Kaïn ndù mèn z'a yen i là k'a zwi i. 16Ndùlala Kaïn lo mbwe Tshùaben nèn nke ntswe ngô Nod nze bag nka' Edèn z'a ke ntshù bag ntumnyam nà.
Nkùndà Kaïn
17Kaïn lo' nzwi i, a lét, mbwe Hénok. Kaïn kut ngô, njab lén ngô num se mén i ndù Hénok. 18Hénok bwe Irad, Irad bwe Mehujael, Mehujael bwe Metushael, Metushael bwe Lemek.
19Lemek so bènnzwi bàa: Lén mbwe i be Ada, lén mbatt'é be Tsila. 20Ada bwe Yabal: A b'a tànjam njoṅ benntùn fa bo be ntswe ntùm ntàb, mbaṅ bwoṅ nyàm nà. 21Lén mfèl i b'a Yubal: A b'a tànjam njoṅ benntùn fa bo be mbu' loṅe, nke ntô medub là. 22Tsila bwe ze Tubal-Kaïn: A b'a tànjam njoṅ tàlàm fa tse bo be ntswe tùn kwaba mba tùn nà; Naama b'a mfèt Tubal-Kaïn ze mènnzwi.
23Lemek tshob zwi tse, Ada bo Tsila ndù: Bin ju' nz'àm me zwi Lemek, bin kù' ntoṅ num ntshob màm: Mèn lab àm mba m'a' zwi ta' mèn, nzwi ta' mônke' num ta' mfaṅe. 24Yen #Mat. 18.22nà b'a ndù bo nsi yagte mba' Kaïn yoṅ sammbàa, là yagte mba' Lemek yoṅ ntshob sammbàa ṅam sammbàa.
25Adam lo' nzwi i Eva, a bwe mén mandum. Eva tshob ndù: Nsi bèn mfà mo' mén mandum me num dù' Abél ze Kaïn zwi i là. Ndùlala, a tswi lén se ndù Set. 26Set bwe ze mén mandum, ntswi lén se ndù Enosh. Bo to' netsiaṅ lén Tshùaben à num yen ngelaṅ nà.
Currently Selected:
Neto'te 4: BMa
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
La Sainte Bible en Bamiléké-Medùmba © Alliance Biblique du Cameroun, 1993. All rights reserved.