iLuku 1
1
Irọkhasẹ
1Ebubu ẹgbọ e she rọshẹka kẹkẹ emini e bhale ya tsẹ nya ẹghẹghẹ oyi anye. 2Ẹzẹzẹ abi ẹgbọ eni ẹ gue ungmemhi oyi Ẹshinẹgba le, ni e rọte igbaekẹle ri ẹloe mẹ wẹ abi e li de, ighọ e li gue wẹ yẹ anye, ni anye rọ lighọ kẹkẹ wẹ. 3Aborọkhia khi eni ingme ena, khi rọte igbaekẹle mhi te tọwẹ ọkpẹ, lọli o rọ ti mhẹ ẹloe, ni mhi kuegbe-a kẹkẹ abi e li de ghi ẹ, yẹyẹ iTiofilọsi ni a ri ekpẹ ẹ na, 4Isheghọ ni u rọ ya lẹsẹ egbegbi ingme ni e la emini a sẹsẹ ẹ.
A guele shi ekẹ khi, a ya bia iJọni
5Ọkpodalo-ugamhi ọyi Ẹshinẹgba ọghuo ni a lu iZakaraya ọ ya la ọ ẹghẹghẹ oyi oghie ni a lu Erọdu ni ọ mhuẹ ekẹ iJudia. Ọni iZakaraya ọ khi ọtuọghuo igbhogbho ekpodalo-ugamhi eyi Ẹshinẹgba ni Abija ọ li la. A lu ughuẹ ọli Enizabẹti ni ọ khi omiomi Erọni.#1.5 Li zẹ 1 Okhẹ 24.10. 6Ọni ọmọse ọna ali ughuẹ ọli, e khi ẹgbọ ni e pfuasẹ shi odalo oyi Ẹshinẹgba, ni e ri ishi eyi Ẹshinẹgba á gbe akanya. 7Ẹa bia ọmọ itobọ khi Enizabẹti aga ọ khi. Wẹwẹ ava-ava e she womhẹ.
8Ẹlẹghuo, khi ugamhi o tẹ iku ẹgbọ ekpodalo-ugamhi eyi Ẹshinẹgba ni iZakaraya ọ la, 9obọ o mu iZakaraya khi lọli ọ ya lo Owa oyi Ẹshinẹgba ya tosẹ ituale afu ẹẹra ukhomhi atẹtẹ. Ighọ eni igbhogbho ekpodalo-ugamhi eyi Ẹshinẹgba e kie kpẹ ẹ li. 10Abi ẹghẹghẹ ni a rọ ọ tosẹ eni ituale o rọ ramhi, eni ẹgbọ ni e bhale shi oni ugamhi, e legba atukpapfẹ, e sọ iromhi.
11Ighọ agẹni ọyi Ẹshinẹgba ọ bhale ya migha ukiẹkiẹ obọ ita oni adido ni a la tosẹ ituale. 12Abi iZakaraya ọ rọ mẹ ọni agẹni, ọ yila, ulishi oo mu ọli. 13Ama ọni agẹni ọọ li, “Khi zẹ ni ulishi o muẹ, Ẹshinẹgba ọ she suọ iromhi ni u sọ. Ughuẹ Enizabẹti, o ya bia ọmọ nẹ. IJọni khi eva ni u ya lu ọli. 14Ọni ọmọ, ọ ya ri oghẹlẹ ali iregbemu ghi ẹ. Ebubu ẹgbọ e ya ghẹlẹ shi ubiamhi oyọli. 15Irari khi ọ ya fu shi odalo oyi Ẹshinẹgba. Ọ́ khi tigbe da onyọ ni o toto ghue. Rọte ẹlẹ ni a te ya bia li, ọ te ya mhuẹ Ayẹmhẹ-nọ-pfuasẹ. 16Ẹgbọ iZirẹni ebubu ọ ya mu pfi bhale deba Ẹshinẹgba Ọnọmhuẹ ọyẹwẹ.#1.16 Li zẹ iNọba 6.3. 17Ọnọmhuẹ ọ ya ghie ọli ralo, ọ mhuẹ ekpabọ ali ayẹmhẹ enabi eyi Elaja. Ọ ya mu udu oyi eni e khi ita pfi ni e ke nono ingme oyi imi wẹ. Ẹgbọ eni ẹa kpẹ ẹ suọ esọ na Ẹshinẹgba, ẹẹ suọ esọ na Ẹshinẹgba abi egbegbi ẹgbọ ẹẹ li. Ọ̀ gbo mu ẹgbọ egbe shi ekẹ khẹ Ẹshinẹgba.”#1.17 Li zẹ iMala 4.5.
18IZakaraya ọ rọ mhila ọni agẹni, “Sẹẹ o li ya khuese mhẹ khi igẹsikia u ngme? Irari khi mhẹmhẹ ali ughuẹmhẹ anye she womhẹ.”
19Ọni agẹni ọọ li, eva oyẹmhẹ khi iGebulẹni. Mhẹmhẹ mhia migha odalo oyi Ẹshinẹgba. Lọli ọ ghie mhẹ mhi ka nu ẹ ngme, mhi gue oni usomhi onete ona yẹ.#1.19 Li zẹ iDan 8.16; 9.21; iMat 18.10. 20Ama ungmenu u kẹ ya melea ramhi ẹghẹghẹ ni oni ungmemhi ona o rọ bhale ya tsẹ, itobọ khi u waa mie emini mhi gueyẹ suọ ni ó bhale ya tsẹ shi ẹghẹghẹ oyọli.
21Ẹghẹghẹ ni a ngme ena, ẹgbọ e kie migha olase khẹ iZakaraya. Abọ e sha wẹ, irari khi ọ she ke tẹsẹ oni elemhi Owa oyi Ẹshinẹgba dọsẹ. 22Abi ọ ke rọ lasele ọa ke ngme unu. Eni ẹgbọ e te ododẹ lẹsẹ khi imekẹ ọ mẹ oni elemhi Owa oyi Ẹshinẹgba irari khi obọ ọ ke rọ nu wẹ ngme.
23Abi ogbẹlẹ ni iZakaraya ọ rọ ya ga oni ugamhi e rọ gba, ọ je apfẹ. 24Ighọ, ughuọli Enizabẹti ọọ mẹ. Ọ la ufui owa iki ishe, ọa ke lasele ni ẹgbọ e mẹ. 25Ọni ọkpotso ọọ, “Ẹshinẹgba ọ she riẹlẹ onana na mhẹ. Ọ mhuẹ isomhelemhi na mhẹ, Ọ rue mhẹ omama egbe le ukpẹloe oyi ẹgbọ.”
Agẹni ọ guele abi a liẹ bia iJesu
26Uki onuzi-esesa o gba ni Enizabẹti ọ te e mẹ, Ẹshinẹgba ọ ghie agẹni ni a lu iGebulẹni bhale ẹoli iNazarẹti ni o la ekẹ iGalili. 27Ọni agẹni ọ bhale deba ọmueshi ni ọa lẹsẹ ọmọse ne ni a lu iMeli ni ọmọse ni a lu iJosẹfu ọọ gue. Unuẹkpẹ oyi iDefidi iJosẹfu ọ khi.#1.27 Li zẹ iMat 1.18. 28Ọni agẹni ọ bhale deba iMeli. Ọ tsẹ ọli, ọọ li, “Moo mueshi! Ẹshinẹgba ọ she khivọsẹ nẹ! Ẹshinẹgba ọ nuẹ la!”
29Oni otsẹ ona o ri abọ sha iMeli irari khi ọa lẹsẹ emini otsẹ onana o ngme. Egbe ẹa ke sheshe ọli. 30Ama ọni agẹni ọọ li, “Khi ke zẹ ni ulishi o muẹ, irari khi Ẹshinẹgba ọ she mhọli isomhelemhi nẹ.” 31U ya ke mẹ, u bia ọmọ ọmọse, iJesu wa lu eva oyọli.#1.31 Li zẹ iMat 1.21. 32Ọgbọ ọniẹmhi ọ ya khi, Omi Ẹshinẹgba nọ Yagha nẹ Nya a ya ke lu ọli. Ẹshinẹgba ọ ya rue ukpẹkhomhi eghiele oyi itali iDefidi na li. 33Ọ ya mhuẹ omhẹsẹ shi ọmhuẹ-apfẹ oyi iGiekọpu agbọagbọ. Eghiele oyọli ọa ya mhuẹ ukpẹsẹ.#1.32-33 Li zẹ 2 iSam 7.12,13,16; Aza 9.7.
34IMeli ọ mhila ọni agẹni, ọọ, “Sẹ ingme ni u ngme ena e li bhale ya tsẹ? Irari khi mhi aa lẹsẹ ọmọse ghue.” 35Ọni agẹni ọọ li, “Ayẹmhẹ-nọ-pfuasẹ ọ ya bhale debẹ, ẹghẹghẹ aghọ ekpabọ eyi Ẹshinẹgba nọ Yagha nẹ Nya e ya tsua rughuẹ, ọmọ ni u ya bia, ọni ọ pfuasẹ Omi Ẹshinẹgba a ya ke lu ọli. 36Enizabẹti inyọghuoẹ ni a kpẹ ẹ lu aga, ọ she liẹ mẹ umẹmhi, iki esesa o la memena, abi ọ tseku khia khi ọ she womhẹ eghọ, ọ ya bia ọmọ. 37Irari khi aa mẹ emini Ẹshinẹgba ọa dobẹ ẹ riẹlẹ.”#1.37 Li zẹ Igbae 18.14.
38IMeli ọọ li, “Ẹshinẹgba ọ mhuẹ mhẹ. O ka a tsẹ na mhẹ abi u li ngme ọli.” Ighọ ọni agẹni ọ li vu.
IMeli ọ ya fẹli Enizabẹti
39Ẹghẹghẹ ana iMeli ọ nyanya muno egbe, ọ je ẹoli ni e la epfepfẹ ute ena ekẹ iJudia. 40Ọ ramhi apfẹ oyi iZakaraya, ọ tsẹ Enizabẹti. 41Abi Enizabẹti ọ rọ suọ otsẹ oyi iMeli, ọmọ ni ọ la li elemhi ọ mu egbe nyenẹ. Ayẹmhẹ-nọ-pfuasẹ o bhale deba li. 42Enizabẹti ọ khueghie unu a leghe, ọọ li, “Ọni a khivọsẹ na u khi elemhi ikpotso. Ọni a khivọsẹ na ọmọ ni u ya bia ọ khi. 43Ọghuo mhi khi, ni inyọ Ọnọmhuẹ ọyẹmhẹ ọ kọ ya fẹli? 44Abi mhi rọ lẹsẹ suọ otsẹ oyẹ, ọmọ ni ọ la mhẹ elemhi ọ ri oghẹlẹ mu egbe nyenẹ. 45Ikhivọsẹ o khi na ọgbọ ni ọ mie ungmemhi ni Ẹshinẹgba ọ ngme khi ọ ya rọli tsẹ.”
Uwolo ikuẹghiẹ ni iMeli ọ to
46IMeli ọọ,
“Mhi ri ayẹmhẹ oyẹmhẹ
kuẹghiẹ Ẹshinẹgba.
47Mhi rọte elemhi ayẹmhẹ oyẹmhẹ
kuẹghiẹ Ẹshinẹgba Ọmiepfuese ọyẹmhẹ.
48Irari khi ọ yele mhẹ
ni mhia mu ẹloe le.
Rọte ana vu,
ẹgbọ kpa, e ya ke e lu mhẹ,
Ọni a khi vọsẹ na.#1.48 Li zẹ 1 iSam 1.11.
49Ipfuasẹ o khi
eva oyi Ẹshinẹgba nọ funẹ,
Irari khi ọ riẹlẹ
eminiẹmhi na mhẹ.
50Ọ mhuẹ isomhelemhi
na ẹgbọ nya ni ẹ na ulishi oyọli
rọte agbhotu ya je agbhotu.
51Ọ ri abọ eyọli
gbe ikanya ọnyaloa,
ọ vẹsẹ ẹgbọ ni e mhuẹ itiegbenga
elemhi isamhi udu eyẹwẹ kua.
52Ọ ti ighie tiemhile ekẹ,#1.52 Li zẹ iJobu 5.11; 12.19.
ama ọ yasẹ ẹgbọ ni
e ti egbewẹ tiemhie nga idane.
53Ọ ri eminete na ẹgbọ ni
okiamhi ọ́ọ́ gbe le.
Ama eni e pfue,
ọ ku wẹ ẹpfue abọ-a.
54Ọ she ri ishiobọ ni ọ shi
na itawa tsẹ.
Ọ bhale ya kpaghiẹ ẹgbọ iZirẹni
eni ẹẹ ga li obọ.
55Abi ọ li shi ishobọ
na agbọagbọ na Aburaamu
ali imimi ọli,#1.55 Li zẹ Igbae 17.7.
ni ọ gbo li nu
ititawa ngme ọli agbọagbọ.”#1.46-55 Li zẹ 1 iSam 2.1-10.
56IMeli ọ nu Enizabẹti la iki esẹ neni ọ je apfẹ.
Abi a li bia iJọni Ọni ọọ batazi ẹgbọ
57Ẹghẹghẹ o ramhi ni Enizabẹti ọ rọ ya bia, ọ ya bia ọmọ ọmọse. 58Idogbapfẹ ali ẹgbọ eyọli e suọ abi Ẹshinẹgba ọọ somhi elemhi ọli. E nu ọli ghẹlẹ. 59Ogbẹlẹ-elele o ramhi ni a rọ ya shẹlẹ ọni ọmọ a, ee nono ni e lu ọli iZakaraya ni o khi eva oyi ita li.#1.59 Li zẹ iLẹv 12.3. 60Inyọli ọọ wẹ, “Iiye! Eva oyọli khi iJọni.”
61Eni ẹgbọ ẹ ọli, “Ọgbọkhọghuo ọa la unuẹkpẹ oyẹ ni ọ kpẹ le eva onana ghue.”
62Ighọ e ri abọ nu ita ọni ọmọ ngme rọ mhila li abi a ya ke lu ọni ọmọ. 63Ọọ wẹ, e rue emini a kẹkẹ emhi ẹ shi ali ugba na luẹ. Ọ kẹkẹ khi, “Eva oyọli khi iJọni.” O ri abọ sha wẹ nya. 64Utoghuokpe, unu oyọli o khueghie-a, ọọ ngme, ọọ kuẹghiẹ Ẹshinẹgba. 65Ulishi oo mu idogbapfẹ eghọ nya. Oni ungmemhi ẹgbọ nya e ke ngme asha kpa ekẹ iJudia. 66O ri abọ sha ọgbọkpa ni ọ suọ oni ungmemhi. Ee mhila, “Ọmọ nabi sẹ ọna ọ ya khi?” Irari khi obọ oyi Ẹshinẹgba o nu ọli la.
Uwolo ikuẹghiẹ ni iZakaraya ọ to
67Ayẹmhẹ-nọ-pfuasẹ ọ tiemhile shi iZakaraya ita ọni ọmọ ọ. Ọọ ngme ungmemhi aguele, ọọ liẹ,
68“Ikuẹghiẹ o khi na
Ẹshinẹgba Ọnọmhuẹ ọyi iZirẹni,
itobọ khi ọ she
bhale ya pfa
ẹgbọ iZirẹni eyọli shi ekẹ.
69Ọ rọte unuẹkpẹ
oyi iDefidi, ọmọ ọyọli,
mu adenọmọ Ọmiepfuese
vule na anye.
70Abi ọ li rọte
unu emekẹguele
ni e pfuasẹ eyọli
ena ẹlẹlẹ shobọ,
71khi lọli ya tsumhi awa
obọ oyi ebe awa
ali eni ẹ biselemhi awa.
72Ali khi lọli ya somhelemhi itita awa,
ni sato ishobọ oyọli ni ọ shi na wẹ,
73ikhi isheli ni ọ romhi
shi emini ọ gueyẹ ita awa Aburaamu,
74khi lọli ya rue awa
obọ oyi ebe awa le,
ini awa khi ri
ulishi ga luẹ
75elemhi ipfuasẹ ali ingeli enete,
agbọagbọ kpa.
76Yẹyẹ omimhẹ,
a ya luẹ ọmekẹguele ọyi
Ẹshinẹgba nọ Yagha nẹ Nya;#1.76 Li zẹ iMala 3.1.
irari khi u ya ralo
ya bẹ odẹ-a khẹ Ọnọmhuẹ.
77Ni u rọ gueyẹ ẹgbọ eyọli khi
rọte igbe-olamhẹ-kua na wẹ,
e te ya mhọli imiepfuese.
78Irari khi Ẹshinẹgba ọyawa
ọọ mhọli ilẹlemhi,
ọ ya zẹ ni ovọ
imiepfuese oyọli
o te idane ngale shi awa ọ.
79Ali ni o rọte idane gẹ
nga eni e la alo ebili egbe
ali eni e la okhẹna eghuli.#1.79 Li zẹ Aza 9.2.
Ni ọ ri awa te odẹ opfọmhẹ.”
80Ighọ ọni ọmọ ọ lii fu, ọ lẹsẹ ingme. Ọ la ifui ọdagbe ifufu ramhi ẹghẹghẹ ni ọ rọ lasele tse abọ ungmemhi oyi Ẹshinẹgba yẹ ẹgbọ iZirẹni.
Currently Selected:
iLuku 1: atgNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2012, The Nigeria Bible Translation Trust and Wycliffe Bible Translators, Inc. All rights reserved.