Ioane 13
13
1Paseka nole aker kak, Iesu umele abara kerker tabarki ko bakeamulu geseplam tabara Abem, E emetu tabara boai omare gesepem, E uiabi omare, a mop ge tabarki.
2Kikem leuer ero, diabolo ikedi Iuda Isakariota ra nerkep, Simona ra uerem, ko abi keserkeser,
3Iesu umele Aba de nakuar abi tagem gaire lu uridili, pako E Adelam, a E Adim iako bakeam,
4Abelelam emetu leuer ero, E ekueda, a abara am uali adem; E mog uali esolu.
5E ni epaitere ezerem, a ditimeda ko dedered abara kaimeg giz ra teter, a itkir mog uali de abi asodalam.
6E Simona Peteruim toabukilu. E Iesuim detaut, kega, Opole, nako, ma kara neisi teter dedered?
7Iesu abi detaut, kega, Abele lu kaka ikeli, ma umer kak peirdi; mamoro ma niaiem umele.
8Peteru abi detaut, kega, Ma nole kara neisi teter dedered niai karem. Iesu abi detaut, kega, Ese kaka nole mari dedered, ma nole lu kak nagri kari dog.
9Simona Peteru abi detaut, kega, Opole, nole kara neisi teter tepteb, epe kara neisi tag, a kara kerem ko.
10Iesu abi detaut, kega, Abele le emetu dedered, nole lu kar iako abi dedered, epe neisi teter tepteb, ueakai kerkar eseamuda: uaba kerkar, epe nole uaba uridili.
11E opasereret abele le ko abi keserkeser: abelelam E detaut, kega, Uaba nole kerkar uridili.
12E emetu uiaba teter dedered, E iako tabara am uali tekalu, a iako emri, a uiabim detaut, kega, Nako, uaba umele abele lu kaka uabim ikeli?
13Uaba kari nabei, Ereuere le, a Opole, uaba debe detaut, abelelam kakanali.
14Ese kaka, Opole kar, a Ereuere le kar, a emetu uaba teter dedered, debele uaba uabu dedered uaba teter.
15Kaka emetu tonar uabi dekuarda, ueakai uaba ikerare abkoreb kaka uabi ikeli.
16Ageakar, ageakar, kaka uabi detager, kega, Memeg le nole aule tumem abara opole; a nole abele le namarida tumem abele le abi namarida.
17Ese uaba umele abele gaire lu, debe mop uabim ua se ikerare.
18Kaka nole uaba uridili detager: kaka umele gaire le kaka dabgered: ueakai bakedida mer detali kega, Abele le kari dog leuer ero, E emetu abara teter kari natiri.
19Kaka uabi detager, a nole bakedida abele lu, ueakai ese bakedida, uaba ko dikiapor kakanali.
20Ageakar, ageakar, kaka uabi detager, kega, Abele le egaret le kaka namarida, E kari egaret: abele le kari egaret, E abi egaret, kari namarida.
21Emetu Iesu abele detaut, abara lamar okasosok, E daratagerare, kega, Ageakar, ageakar, kaka uabi detager, nerute uabielam ko kari keserkeser.
22Kaimeg giz erkepu baskare, uiaba kok bagagarare, nete de abeida.
23Nerute abara kaimeg giz, Iesu ra marmot ge uteidilu, Iesu abi nasge.
24Simona Peteru abim opu batimeda, a abi detager, kega, Keribi detager na le E detaut.
25E dali, Iesu ra marmot uteidilu, egreemalu a abi detager, kega, Opole, nete?
26Ege Iesu detaut, kega, Le dali kaka ko mog leuer ikuar, ese emetu akmeilu. E emetu mog leuer akmeilu, E ekalu a Iuda ikuar, Simona Isakariota ra uerem.
27Abele mog leuer iobaru, Satana abi nerkep balu. Iesu abi detaut, kega, Abele lu ma ko ikeli, elele ikeli.
28Nole nerute le, uiabielam kemem Iesu leuer ero, umele nalugelam E detaut abele mer abim.
29Uader dikiapor, abelelam Iuda dog epei, Iesu abi detaut, kega, Ma erapei gaire lu meribi koreb abele uetpur ge: nerute, ko ikuar uader lu uiabim gaire le lu kak.
30E emetu mog leuer erpeilu, E sobkak eosmelu; a ki ge.
31E emetu eosmelu, Iesu detaut, kega, Peirdi, Le la Uerem despili, a Ade despili abielam.
32Ese E Ade despili, Ade ko abi despili, a ko elele abi despili.
33Omasker, teupei kaka uabi dog. Uaba ko kari naraimili; mokakalam kaka Iudaia giz detaut, mokakalam kaka uabi detaut peirdi, kega, Abele uteb kaka bakeamulu, uaba umer kak ko bakeam.
34Kaka uabi ikuar kerkar gelar, kega, Uaba dorge ko uabu omare: mokakalam kaka uabi omare, abkoreb uaba omare uabu.
35Ese uaba uabu omare, gaire le uridili ko umele uaba kara kaimeg giz.
36Simona Peteru abi detaut, kega, Opole, ma na gedim bakeam? Iesu abi detaut, kega, Peirdi ma umer kak kari narmili; niaiem ma ko kari narmili.
37Peteru abi detaut, kega, Opole, nalugelam kaka umer kak mari narmili peirdi? Kaka ko ikuar kara eded mara kes.
38Iesu abi detaut, kega, Eko, ma ko ikuar mara eded kara kes? Ageakar, ageakar, kaka mari natagere, kega, kimiar faul nole ereretikri, ma ko kekiam thri kari nasared.
Currently Selected:
Ioane 13: ulk1902
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Published by the British and Foreign Bible Society in 1902.