Luka 20
20
1Nerute gerger, E ereuerem abele ged ge, muige zogo meta, a etomeret debe mer, a uiaba zogozogo le giz a aotale giz, a aule giz ekue;
2A uiaba abi detager, kega, Mase ma keribi detager, Nalu abele sirdam ma ikeli abele gaire lu? nete le mari ikuar abele sirdam?
3E uiabi detaut, kega, Kaka uabi itimer netate merem: ua kari natagerare:
4Nako Ioane ra bapataiso nagelam, nako kotorlam, nako lelam?
5A ui mer batagerare, kega, Ese meriba detaut kotorlam; mena E meribi detager, kega, Nalugelam uaba nole abi oituli?
6Ese meriba detager, kega, lelam; epe abele ged ge meribi bakeru ditimeda: abelelam ui ge dikiaporare Ioane perofeta.
7Epe uiaba detaut, kega, Keriba umer kak nagelam.
8Epe Iesu uiabi daratagerare, kega, Kaka umer kak uabi etomeret abele sirdam kaka ikeli gaire lu uridili.
9Ege E uiabi daratagerare abele mer babisdarie: Nerute le ikeli uina gedub, E uiabi nakuarare uader dorge ikeli abele gedub ge, a E bakeamu muriz gedim gaire gerger barkare.
10Ege nurge baruk, E uiabim, gedub le, emariklu nerute memeg le, abele uina turum ko tais: ege uader le, emeri abele gedub ge, uiaba abi damarik, abele le no akomelu nolea turum asis kak.
11A E ko emariklu nerute memeg le: a uiaba abi ko damarik, a abi dituaki, E ko akomelu nole turum asis kak.
12Ege E ko namarkare neisi netate le: a uiaba abi naresedare maike uaeeumidare, a ui ge abi adem bakeuidare.
13Ege abele gedub kem le lut dikiapore, kega, Nalu ka akailu? kaka namariklu kabara nasnas uerem: nako, uiaba abi erdali, a abi omare.
14A gedub le giz abi erdarare, ege uiaba mer batagerare, kega, Abkesem peike: mi abi apitare, iaueakai mi aisare abara ged.
15A uiaba adem emarikare sorem abele gedublam, a ui abi ipitare eumilu. Nalu lu gedub kem le lut uiabim ikeli abkoreb?
16E tabakeamulu, a gedub asesered le narsare, E ko nakuarare uina gedub uiabim uader le. A ui ge asorare, a uiaba detaut, kega, Nolea.
17E uiabi dasmer a detager, kega, Nalu mer emetu detali, Abele baker tonar tonar le lut adem batauered, a mena ais meta kop tum ge?
18Ese le ekesmeri abele baker ge tumem, a lid erapei; a ese baker etugered abi tumge, no obamuare.
19Ege zogozogo le giz, pako aotale giz, uiaba lagelag abi erpei abele haua ge; a uiaba au geum abele ged; abelelam uiaba umele, abele mer uiabim babisdarie.
20Ui ge deraimerare, a uader namarkare abi dasmerare, a uiaba bes oituli, iaueakai nagri mer, a uiaba ais ikuar opole ra tagem a sirdamem.
21A ui ge abi itimerare, kega, Ereuer le ae, keriba umele ma barkak detaut pako ereuer, ma nole omare nerute le, a dikaer nerute le, epe ma ereuerem ageakar Ade ra gab:
22Nako, abkoreb keriba ko ikuar Kaisaraim zegu lu, a nolea?
23A E umele uiaba dikiapore, ege E uiabi daratagerare, kega, Nalugelam uaba kari mirem?
24Debele ua kari denari natomertare. Nete ra op abele, pako abele detarda? Ui detagerare, kega, Kaisara.
25Ege E uiabi daratagerare, kega, Kaisara ra lu, Kaisaraim ikuar; Ade ra lu, Adim ikuar.
26Ui umer kak derpeirare abara mer le op ge abele ged ge: a ui abara mer damerare, a uiaba mer kak.
27Uader Sadukaio giz, abim tabakeuare, a ui dikiaporare, kega, Nole le ko eded akaida eudelam; a uiaba abi itimerare, kega,
28Ereuer le ae, Mose detali keribim, Ese nerute le la keimer eumida, abara kosker dikaerti, a nole uerem kak, abara keimer abele kosker egared, ko keimer kesem.
29Sefen keimer giz: narbet kekiam ko ispida abara kosker, epe eumid, nole kesem kak;
30A nerute keimer abele kosker egared, epe eumid, nolea kesem kak, mokakalam nerute keimer.
31A thri le ko ispid; mokakalam bakedida sefen le, uiaba eumida, nole kesem kak.
32A keubu, kosker eumida.
33Ese ko eded akaida tabarki, nete le uiabielam ais abele kosker? abelelam sefen le egared abele kosker.
34Iesu uiabim detaut, kega, Peirdi, abele eded, kimiar kosker ispid:
35A uiaba nagri debele, abele ko eded akaid, a nagri niaiem kerker, uiaba nole ispid kosker, a nole ispid kimiar:
36A uiaba nolea ko eumid: epe uiaba mokakalam angela; a uiaba Ade ra omasker, a le giz ko eded akaida.
37Abele ko eded akaida eudelam, Mose de natomertare abele lu, nerute lu dardar, ko etomeret Iehoua Aberahama ra Ade, a Isaaka ra Ade, a Iakobo ra Ade.
38E nole uiaba Ade, abele le eumida, epe le giz eded: abelelam le uridili eded abielam.
39Ege uader aotale giz abi detager, kega, Ereuer le ae, mara mer au barkak.
40Keubu uiaba nolea ko saserim abi itimer nerute lu.
41Ege E uiabi daratagerare, kega, Nako uader detaut, Keriso, Dauida ra uerem?
42Ege Dauida de detaut, Salamo jauali, E detager, kega, Iehoua, kara Opole detager, kega, Ma emeri kara tuter tag pek,
43Kaka ikeli uader mari derar, abele uteb ma teter emeri.
44Abele lu Dauida de etomeret abara Opole, nako ikeli abara uerem?
45Ege E uiabim detager, tabara kaimeg giz, a gaire le uridili abele ged ge, uiaba asarare,
46Ege uaba mamoro dasmerare gaire le aotale giz, uiaba digemeli perper am uali, ege uiaba lagelag gaire le uiabi omare pur uteb ge, pako aule bao sunago ge, a aule lu eidi abele uteb ge leuer eroare;
47Ege uader dedkoli mai kosker ra meta, a uiaba esorerapare au perper: E ispilu, a keubu uiaba au bodomalam.
Currently Selected:
Luka 20: ulk1902
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
Published by the British and Foreign Bible Society in 1902.