Luka 12
12
Lak Ti Ɓin Tasi Mute i Rere
(Mat 10:26-27)
1Myan ima male' i ɗufal kaciwa' anggwe' si suɓut takyel andek, kol ta ima sin ɗwasan ti ɗiyai, unai Yeso tong findel ti fe i ro ames ni, “Shingat hun ta musut i hong i Farisiyawa, ima ayis mii rerei.” 2Shak aɗeng ima ma mavo ma wa matɓwai, shak ɗamam ima si mii mufot si wa matshang. 3Ɓurti andi, shak ɗamam ima si lak ta maɓing, ma wa mulangya na kweneng, ɗufal si haliya, shak ɗamam ima si lak ta mwal, ta wii i ɗwam si wa muɗu tasi ndung si lak ti ambas ɗufal si haliya shak.
4“I laksu hun myayun, ka hu mwen som ima si fwar lo' je, kaciwa' mbaitat i for ti rin amu ya kwa. 5I wa laksu ima ɓa hu mwenus fo. Mwen hun DeeƁwe fo, ɓurti ayis ndok u for maɗufal ya, takfai ti andi, u hwitus ya ta hum i man wii hwak. I laksu mwawei, mwen hun yus fo.
6“I nyai, si juwyalan ti avyash hara ya shak fo i kabo apil hoo? Shak ta andi, DeeƁwe nitima ti nin ta saa asus kwa. 7Shak ta sya i hai amui si mbe' ya shak. Ɓurti andi, ka hu mwen kwa, ɓurti hu ɓin manjangkala' shak.
8“I ma laksu hwak, shak maɗufal ima ka' fo amen ta kyel i ɗufal nyai ɓwetun, Al i Maɗufal ma wa ka'ti fo asussi ta wei i som lu' i DeeƁwe. 9Maɗufal ima ɓwinggilun ta saa ti ɗufal i wa ɓwinggil sus ta wei i som lu' i DeeƁwe.
10“Shak maɗufal ima lak findel mafwashi si Al i Maɗufal hai, si wa shwaisusi ya. Shak maɗufal ima lak findel i ale' ta si Rin Masapai hai, si wa shwaisusi ya kwa.
11“Na si yes tu ta mare i Ju, ta kyel i som i mbaitat ta som ima sima tasi kaitat hai, ka hu tirim tasi ngga' ima hu bum hai asu, hu aɗeng ima hu wa laki kwa, 12ɓurti Rin Masapai ma wa kofsu ti aɗeng ima ɓa hu lak ta si myani hai.”
Kaani tasi Haling Maramwayat
13Maɗufal nin ta saa ti ɗufali lak Yeso ni, “A Makofiti, laka nusun ɓa u kaar nin kop ima si honini na.”
14Yeso matussi ni, “A mwen, awe kinun mute ii ma totsu ɓur ahun ii ma kaar su kop hu nusa ya?” 15Unai lak ɗufali shak nyus, “Tehun ti shingat, mas hun maleng ti shak musut i yok, ɓurti kolti ɗam i naya hyang ayis mii wis ti mupwet kwa.”
16Unai lakus kaani mai ni, “Ai maramwayat nin ima yang ames fayus macwa hyang. 17Unai fur ambe' ta mulut ames, ni, ‘I mati kyel i shwaiti shak macwa amen ta kwa. I masi atini ndai ya?’
18“Unai lak haisus ni, ‘Awinoo! I shang aɗeng i masi. I wa nggwalan ti mii hotati ya, i ta' mbayai shini, i shu macwa i yang amen ta shak, hu ɗamam amen ta wii. 19I lak haisun i ni, “Ha mati macwa hyang ima ma wa kolsa wilyal hyang. Ɓurti andi, lafosa, ha ya cwai, ha woi, ha ya halti ɗat si ɓwi.” ’ 20Unai DeeƁwe nyus, ‘A haling! Ti fo' mai si ɓweti mupwet asa. Ɗak awe ma wa cwai ti shak ɗamam ima ha suɓut haisai ya?’
21“Angga' ima ma wa mute ta nai ti shak maɗufal ima suɓut haisus sufat na naya mai, kaciwa' sufat tasi ɗamam i DeeƁwe.”
Ka Hu Tirim Kwa
(Mat 6:25-34)
22Unai Yeso lak fe i ro ames ni, “I ma laksu, ka hu tirim ti ngga' i mupwet amu, hu aɗeng ima hu wa cwai, hu arom i lo' kwa. 23Ɓurti mupwet ti ɓin cwa, lo' ɓin arom. 24Ɗing hun avyash, si haan ahan kwa, si mati hotat i suɓut ti cwa kwa. Shak ta andi, DeeƁwe fayus cwa. Hun hu ɓin a avyash wa! 25Awe amu ɓurti tirim ames ndok u dya' myan ta si mupwet asus ya? 26Na hu wa shang ti masti ɗama mavaati fota mai kwa, ami kin hu tirim si anggumi hai ya? 27Ɗing hun ngga' ima mabuf sima ngye ta, kaciwa' ro i ɗama, hu ɗalat, kaciwa' tor ti haisus arom. I laksu Makai Solomon ta ramwayat asussi, ta arom ima ru'i shak, kol mabuf mii maɗesi kwa. 28Na DeeƁwe ma wa masti shala' i kyel na ya malem, shala' ima ka ɗingi kwai, wasan ka lu'i ya ti man. Yis ma wa ɗak tu u ɓin mabuf kwa haa? A som i fati mulut ndyong?
29“Ka hu kyan tirim tasi aɗeng ima hu wa cwai hu wo kwa, ka hu tirim kwa fweng. 30A aɗeng ima ɗufal i naya ima wa' si shang DeeƁwe si tital tifai nai shak. Hun, Deemu shangi nyai hu ma ɓweti ɗamami. 31Ɓurti andi, kin hun mulwat amu tasi far ti wur i kaitat i DeeƁwe, yis ma wa fasu ɗamam mii hwak.
Suɓut ti Ramwayat ta Fit
(Mat 6:19-21)
32“A fe i tutwai amen! Ka hu mwen kwa, ɓurti Dyo mati pipelat ti mulut ɓa u fu kaitati. 33Pwakhun ɗamam ima hu mati ya shak, hu kaar som i jyel cefi. Kin hun sufat amu ta rukulal ima ma wa wiwilat kwa, sufat ima ma wa mumbit kwa ndai, kyel ima asher ndok u shir kwa, kyel ima ɗam i lok si wa cwai ya kwa. 34Ɓurti kyel ima sufat i maɗufal mata, a kyeli mulut asus tiwa mute ta.
Ɗing ti Kyel i Yere
35“Tehun mweret, mukof amu yis cwai ti man. 36Tehun fota yarai ima si shwaiti mawur ames ɓa u humkyel ta kyel i got i kunggo, ɓurti na kunggwak kyel si ɓusiya abet. 37Ma wa ɗatsus hai na mawuri humkyel u wisus sin ɗing ti kyel. I ma laksu mwawei, ma wa ɗak ti haisus u fas cwa, ma wa laksus si te amun ta kyel i tebur i cwai ti cwa ɗak fas cwai ɗames. 38Ma wa ɗat ti yere mii, na ma mawuri humkyel, u wisus sin shwai sus, ta saa ti fo' ahun ta foi mwen. 39Shang huni nyai naɗin mawur shang myan ima asher ma wa yes, ma wa honti asheri u lang ta wur u masus shir hai kwa. 40Tehun mweret, ɓurti hu shang myan ima Al i Maɗufal ma wa yes kwa.”
Yere Mandyasi Hu Mafwashi
(Mat 24:45-51)
41Pita ni, “A Deembai, findel i kaani mai a tasi nin kek ahun a ɗufal shak ya?”
42Deembai nyus, “Awe a yere ma hya ti findel, mashingat hwak ima Dee mawur ames honus ɗing ti wur ta, ɓa u fa anggum i yarai cwa si myan hai ya? 43Maɗesi mata si yere ima mawur ames ma wa yes u wisus yis masti ro ames. 44I ma laksu mwawei, ma wa kinsus u te ii mbai maɗingsus ɗam i kyel ta wuri shak.
45“Na yerei mbe' ta mulut asus uni, ‘Mawur amen ma wa muhumkyel kang kwa,’ u langus ndash ti anggum i yaraiyi muryai ta murwafii, langus cwai ta woti likiti yis yus fyalan, 46mawur i yere mai na humkyel tasi myan ima wa' shangi, u ka'us tasi fwash hai ma wa masus andash mafwashi, u kinus ta kyel i som ima wa' si fa mwawei.
47“Yere ima shang aɗeng ima mawur ames ma ɓweti ɗak nggwes i masi ma wa woti andash hyang. 48Maɗufal ima wa' shang aɗeng ima mawur ames ma ɓweti, na mas aɗeng ima ndok andash, si wa ndash sus ndyong. Maɗufal ima si fas hyang, si wa ɓweti ta kyel ames hyang. Maɗufal ima si hyasi kyalak si wa ɓweti u hum ti ta andi hwak gilik.
Yeso Yes Kinti a Matkar
(Mat 10:34-36)
49“I yes ɓa i hwiti a man na naya, naɗin a ɓweti amen, naɗin tisi lu' mani! 50I mati batisma ima si wa masuni, mulut ti cwaisun fwet naɗin tisi mbit masuni! 51Hu ma ɗingi nyai i kolu a mute cala na naya ani? Wayou! I ma laksu, i yes ti a matkar. 52Nasi mwashi yes wei, ta wur i ɗufal hara, hu wa wisi si matkar apil, ataat sin wei ti apil, apil sin wei ti ataat. 53Dee ma wa wei ti al ames, ali hwak ma wa wei ti dees, naa ti wa wei ti al asut, ali hwak ti wa wei ti naa hi, kaa ti wa wei ti munza, yit munzai hwak ti wa wei ti kaasut.”
Piris ti Myan
(Mat 16:2-3)
54Unai Yeso lak ɗufali ni, “Na hu ɗing ri' fur ta ɓwai i ya, abet hu wa nyai, ‘Foon ma wa yes,’ andi foon u yes. 55Na se hatat ta ɓwai awuri, hu wa nyai, ‘Myan i malwa ru, kyel ti wa ɗa o,’ andi si masi. 56Hun som i rere, hu shang ngga' ima hu wa piris ti naya hu ri' ta, ami kin hu shang ngga' ima hu piris ɗamam ima si wa na myan i mwashi mai kwa ya?
57“Ami kin hun haisu hu ɓwet masti ambe' hu shang aɗeng ima ɗat hu masi kwa ya? 58Na ɗeng kola ta kyel i ɓur nya gɓwuk, hu ɗak ti ya hun ɗiri ta fisel. Na andi kwa ma wa mulang ta kyel i ma tot ti ɓur. Ma totti ɓur ma wa tuksa ta kyel i mbai, mbaiyi hwak u kina ta ra i mayal, mayali u kola ta wur i shitam. 59I ma laksa ha wa mulangya ta kyeli kaciwa' tal ti shak aɗeng ima si lefai kwa.”
Currently Selected:
Luka 12: AlisIRonNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2018
Luka 12
12
Lak Ti Ɓin Tasi Mute i Rere
(Mat 10:26-27)
1Myan ima male' i ɗufal kaciwa' anggwe' si suɓut takyel andek, kol ta ima sin ɗwasan ti ɗiyai, unai Yeso tong findel ti fe i ro ames ni, “Shingat hun ta musut i hong i Farisiyawa, ima ayis mii rerei.” 2Shak aɗeng ima ma mavo ma wa matɓwai, shak ɗamam ima si mii mufot si wa matshang. 3Ɓurti andi, shak ɗamam ima si lak ta maɓing, ma wa mulangya na kweneng, ɗufal si haliya, shak ɗamam ima si lak ta mwal, ta wii i ɗwam si wa muɗu tasi ndung si lak ti ambas ɗufal si haliya shak.
4“I laksu hun myayun, ka hu mwen som ima si fwar lo' je, kaciwa' mbaitat i for ti rin amu ya kwa. 5I wa laksu ima ɓa hu mwenus fo. Mwen hun DeeƁwe fo, ɓurti ayis ndok u for maɗufal ya, takfai ti andi, u hwitus ya ta hum i man wii hwak. I laksu mwawei, mwen hun yus fo.
6“I nyai, si juwyalan ti avyash hara ya shak fo i kabo apil hoo? Shak ta andi, DeeƁwe nitima ti nin ta saa asus kwa. 7Shak ta sya i hai amui si mbe' ya shak. Ɓurti andi, ka hu mwen kwa, ɓurti hu ɓin manjangkala' shak.
8“I ma laksu hwak, shak maɗufal ima ka' fo amen ta kyel i ɗufal nyai ɓwetun, Al i Maɗufal ma wa ka'ti fo asussi ta wei i som lu' i DeeƁwe. 9Maɗufal ima ɓwinggilun ta saa ti ɗufal i wa ɓwinggil sus ta wei i som lu' i DeeƁwe.
10“Shak maɗufal ima lak findel mafwashi si Al i Maɗufal hai, si wa shwaisusi ya. Shak maɗufal ima lak findel i ale' ta si Rin Masapai hai, si wa shwaisusi ya kwa.
11“Na si yes tu ta mare i Ju, ta kyel i som i mbaitat ta som ima sima tasi kaitat hai, ka hu tirim tasi ngga' ima hu bum hai asu, hu aɗeng ima hu wa laki kwa, 12ɓurti Rin Masapai ma wa kofsu ti aɗeng ima ɓa hu lak ta si myani hai.”
Kaani tasi Haling Maramwayat
13Maɗufal nin ta saa ti ɗufali lak Yeso ni, “A Makofiti, laka nusun ɓa u kaar nin kop ima si honini na.”
14Yeso matussi ni, “A mwen, awe kinun mute ii ma totsu ɓur ahun ii ma kaar su kop hu nusa ya?” 15Unai lak ɗufali shak nyus, “Tehun ti shingat, mas hun maleng ti shak musut i yok, ɓurti kolti ɗam i naya hyang ayis mii wis ti mupwet kwa.”
16Unai lakus kaani mai ni, “Ai maramwayat nin ima yang ames fayus macwa hyang. 17Unai fur ambe' ta mulut ames, ni, ‘I mati kyel i shwaiti shak macwa amen ta kwa. I masi atini ndai ya?’
18“Unai lak haisus ni, ‘Awinoo! I shang aɗeng i masi. I wa nggwalan ti mii hotati ya, i ta' mbayai shini, i shu macwa i yang amen ta shak, hu ɗamam amen ta wii. 19I lak haisun i ni, “Ha mati macwa hyang ima ma wa kolsa wilyal hyang. Ɓurti andi, lafosa, ha ya cwai, ha woi, ha ya halti ɗat si ɓwi.” ’ 20Unai DeeƁwe nyus, ‘A haling! Ti fo' mai si ɓweti mupwet asa. Ɗak awe ma wa cwai ti shak ɗamam ima ha suɓut haisai ya?’
21“Angga' ima ma wa mute ta nai ti shak maɗufal ima suɓut haisus sufat na naya mai, kaciwa' sufat tasi ɗamam i DeeƁwe.”
Ka Hu Tirim Kwa
(Mat 6:25-34)
22Unai Yeso lak fe i ro ames ni, “I ma laksu, ka hu tirim ti ngga' i mupwet amu, hu aɗeng ima hu wa cwai, hu arom i lo' kwa. 23Ɓurti mupwet ti ɓin cwa, lo' ɓin arom. 24Ɗing hun avyash, si haan ahan kwa, si mati hotat i suɓut ti cwa kwa. Shak ta andi, DeeƁwe fayus cwa. Hun hu ɓin a avyash wa! 25Awe amu ɓurti tirim ames ndok u dya' myan ta si mupwet asus ya? 26Na hu wa shang ti masti ɗama mavaati fota mai kwa, ami kin hu tirim si anggumi hai ya? 27Ɗing hun ngga' ima mabuf sima ngye ta, kaciwa' ro i ɗama, hu ɗalat, kaciwa' tor ti haisus arom. I laksu Makai Solomon ta ramwayat asussi, ta arom ima ru'i shak, kol mabuf mii maɗesi kwa. 28Na DeeƁwe ma wa masti shala' i kyel na ya malem, shala' ima ka ɗingi kwai, wasan ka lu'i ya ti man. Yis ma wa ɗak tu u ɓin mabuf kwa haa? A som i fati mulut ndyong?
29“Ka hu kyan tirim tasi aɗeng ima hu wa cwai hu wo kwa, ka hu tirim kwa fweng. 30A aɗeng ima ɗufal i naya ima wa' si shang DeeƁwe si tital tifai nai shak. Hun, Deemu shangi nyai hu ma ɓweti ɗamami. 31Ɓurti andi, kin hun mulwat amu tasi far ti wur i kaitat i DeeƁwe, yis ma wa fasu ɗamam mii hwak.
Suɓut ti Ramwayat ta Fit
(Mat 6:19-21)
32“A fe i tutwai amen! Ka hu mwen kwa, ɓurti Dyo mati pipelat ti mulut ɓa u fu kaitati. 33Pwakhun ɗamam ima hu mati ya shak, hu kaar som i jyel cefi. Kin hun sufat amu ta rukulal ima ma wa wiwilat kwa, sufat ima ma wa mumbit kwa ndai, kyel ima asher ndok u shir kwa, kyel ima ɗam i lok si wa cwai ya kwa. 34Ɓurti kyel ima sufat i maɗufal mata, a kyeli mulut asus tiwa mute ta.
Ɗing ti Kyel i Yere
35“Tehun mweret, mukof amu yis cwai ti man. 36Tehun fota yarai ima si shwaiti mawur ames ɓa u humkyel ta kyel i got i kunggo, ɓurti na kunggwak kyel si ɓusiya abet. 37Ma wa ɗatsus hai na mawuri humkyel u wisus sin ɗing ti kyel. I ma laksu mwawei, ma wa ɗak ti haisus u fas cwa, ma wa laksus si te amun ta kyel i tebur i cwai ti cwa ɗak fas cwai ɗames. 38Ma wa ɗat ti yere mii, na ma mawuri humkyel, u wisus sin shwai sus, ta saa ti fo' ahun ta foi mwen. 39Shang huni nyai naɗin mawur shang myan ima asher ma wa yes, ma wa honti asheri u lang ta wur u masus shir hai kwa. 40Tehun mweret, ɓurti hu shang myan ima Al i Maɗufal ma wa yes kwa.”
Yere Mandyasi Hu Mafwashi
(Mat 24:45-51)
41Pita ni, “A Deembai, findel i kaani mai a tasi nin kek ahun a ɗufal shak ya?”
42Deembai nyus, “Awe a yere ma hya ti findel, mashingat hwak ima Dee mawur ames honus ɗing ti wur ta, ɓa u fa anggum i yarai cwa si myan hai ya? 43Maɗesi mata si yere ima mawur ames ma wa yes u wisus yis masti ro ames. 44I ma laksu mwawei, ma wa kinsus u te ii mbai maɗingsus ɗam i kyel ta wuri shak.
45“Na yerei mbe' ta mulut asus uni, ‘Mawur amen ma wa muhumkyel kang kwa,’ u langus ndash ti anggum i yaraiyi muryai ta murwafii, langus cwai ta woti likiti yis yus fyalan, 46mawur i yere mai na humkyel tasi myan ima wa' shangi, u ka'us tasi fwash hai ma wa masus andash mafwashi, u kinus ta kyel i som ima wa' si fa mwawei.
47“Yere ima shang aɗeng ima mawur ames ma ɓweti ɗak nggwes i masi ma wa woti andash hyang. 48Maɗufal ima wa' shang aɗeng ima mawur ames ma ɓweti, na mas aɗeng ima ndok andash, si wa ndash sus ndyong. Maɗufal ima si fas hyang, si wa ɓweti ta kyel ames hyang. Maɗufal ima si hyasi kyalak si wa ɓweti u hum ti ta andi hwak gilik.
Yeso Yes Kinti a Matkar
(Mat 10:34-36)
49“I yes ɓa i hwiti a man na naya, naɗin a ɓweti amen, naɗin tisi lu' mani! 50I mati batisma ima si wa masuni, mulut ti cwaisun fwet naɗin tisi mbit masuni! 51Hu ma ɗingi nyai i kolu a mute cala na naya ani? Wayou! I ma laksu, i yes ti a matkar. 52Nasi mwashi yes wei, ta wur i ɗufal hara, hu wa wisi si matkar apil, ataat sin wei ti apil, apil sin wei ti ataat. 53Dee ma wa wei ti al ames, ali hwak ma wa wei ti dees, naa ti wa wei ti al asut, ali hwak ti wa wei ti naa hi, kaa ti wa wei ti munza, yit munzai hwak ti wa wei ti kaasut.”
Piris ti Myan
(Mat 16:2-3)
54Unai Yeso lak ɗufali ni, “Na hu ɗing ri' fur ta ɓwai i ya, abet hu wa nyai, ‘Foon ma wa yes,’ andi foon u yes. 55Na se hatat ta ɓwai awuri, hu wa nyai, ‘Myan i malwa ru, kyel ti wa ɗa o,’ andi si masi. 56Hun som i rere, hu shang ngga' ima hu wa piris ti naya hu ri' ta, ami kin hu shang ngga' ima hu piris ɗamam ima si wa na myan i mwashi mai kwa ya?
57“Ami kin hun haisu hu ɓwet masti ambe' hu shang aɗeng ima ɗat hu masi kwa ya? 58Na ɗeng kola ta kyel i ɓur nya gɓwuk, hu ɗak ti ya hun ɗiri ta fisel. Na andi kwa ma wa mulang ta kyel i ma tot ti ɓur. Ma totti ɓur ma wa tuksa ta kyel i mbai, mbaiyi hwak u kina ta ra i mayal, mayali u kola ta wur i shitam. 59I ma laksa ha wa mulangya ta kyeli kaciwa' tal ti shak aɗeng ima si lefai kwa.”
Currently Selected:
:
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© Wycliffe Bible Translators, Inc. and © The Nigeria Bible Translation Trust 2018