Mǒhtûlû̌hǎhtûsa 5

Khûada akhlialè lò̤tutṳ̌ tǒ̤dǒ Khûnṳ̂̌a

1Lî̤ hǒnumî̌ ta̤wě̤mǎnǎ ǐ PhaAda akhlialè lò̤tutṳ̌ sîtokhlǒ awe̤akè.

Bǎ Cǒmaradû̌ bô̌lò̤ kòyòhǎkhû̌phû̌ akhanu a bô̌lò̤ asî asô̌sô̌kû̌ anǎ̤.#Mǒhtûlû̌hǎhtûsa 1:26, 27; Ěphěsu 4:24 2A bô̌lò̤ pwa̤mǒ̤ kû̌ pwa̤khû dě a ǐshowî̤ asî. Dǒ a bô̌ hto asî akhanu, a kaǎ asîmi̤ kû̌, “Kòyòhǎkhû̌phû̌.”#Mǒhtûlû̌hǎhtûsa 1:28; Matè̌ 19:4; Makǔ 10:6

3Bǎ PhaAda něô̌ tôya̤ kû̌ sushi akhanu, a phû̌ô̌ phû̌pwa̤khû tôpwa̤ dǒ asô̌sô̌kû̌ anǎ̤ dě a kaǎ ǐ lû̌mi̤ kû̌ Khûshěta. 4Bǎ Khûshěta ô̌phijǎlò̤ htodě Phaada ô̌htûpwa̤ sělě pô̤̌ aně ayalǐ̤sô̌, dě a phû̌ô̌ pô̤̌ phû̌pwa̤mǒ̤ phû̌pwa̤khû sîtokhlǒ. 5Lǒ̤bònu, PhaAda ô̌htûpwa̤ aně lǐ̤sô̌taya kû̌ sushi dě a sikè.

6Bǎ Phashěta něô̌ tôya̤ kû̌ yè̤̌ně akhanu, a phû̌ô̌ aphû̌pwa̤khû dǒ ami̤ kû̌ Khûěnû̌. 7Bǎ Phashěta phû̌ô̌ hto Khûěnû̌ dě a ô̌htûpwa̤ sělě pô̤̌ ayalǐ̤sô̌ kû̌ susô̌tôně, dě a phû̌ô̌nǐ̤ pô̤̌ phû̌pwa̤mǒ̤ phû̌pwa̤khû sîtokhlǒ. 8Lǒ̤bònu, Phashěta ô̌htûpwa̤ aně lǐ̤sô̌taya kû̌ shǐginǐ̤ně dě a sikè.

9Bǎ Khûěnû̌ ně ô̌ lǐ̤sô̌tishi akhanu a phû̌ô̌ Khûkenǎ. 10Bǎ Phaěnû̌ phû̌ô̌ hto Khûkenǎ dě a ô̌htûpwa̤ hènè pô̤̌ ya̤lǐ̤sô̌ kû̌ shǐyè̤̌ně, dě a phû̌ô̌ nṳ̌pô̤̌ phû̌mǒ̤phû̌khû dǒ ashǔshawa̤ tokhlǒ. 11Lǒ̤bò Khûěnû̌ ô̌htûpwa̤ a ně lǐ̤sô̌taya kû̌ yè̤̌ně dě a sikè.

12Bǎ Khûkenǎ aně ô̌ susô̌tishi akhanu a phû̌ô̌ Khûmahalela. 13Dě bǎ a phû̌ô̌ hto Khûmahalela nu, a ô̌htûpwa̤ sělě pô̤̌ aně ayalǐ̤sô̌ kû̌ lǐ̤shi dě a phû̌ô̌ pô̤̌ phû̌mǒ̤phû̌khû dǒ ashǔshawa̤ tokhlǒ. 14Phakenǎ ô̌htûpwa̤ aně lǐ̤sô̌taya̤ kû̌ shǐ dě a sikè. 15Bǎ Phamahalela ně ô̌ shǔshi kû̌ yè̤̌ně akhanu a phû̌ô̌ Khûjarè̌. 16A phû̌ô̌ hto Khûjarè̌ dě a ô̌htûpwa̤ sělě pô̤̌ aně ya̤lǐ̤sô̌ kû̌ sushi dě a phû̌ô̌ pô̤̌ aphû̌mǒ̤phû̌khû dǒ ashǔshawa̤ tokhlǒ. 17Phamahalela ô̌htûpwa̤nṳ̌ ya̤lǐ̤sô̌ kû̌ lǐ̤sô̌tishi kû̌ yè̤̌ně dě a sikè.

18Bǎ Phajarè̌ aně ô̌ tôya̤ kû̌ shishǔshi kû̌ ginǐ̤ně akhanu, a phû̌ô̌ Khûěnò̌. 19Bǎ Phajarè̌ phû̌ô̌ hto Khûěnò̌nu, a ô̌htûpwa̤ sělě pô̤̌ aně ya̤lǐ̤sô̌ dě aphû̌ô̌ pô̤̌ phû̌mǒ̤phû̌khû dǒ ashǔshawa̤ tokhlǒ. 20Phajarè̌ ô̌htûpwa̤nṳ̌ aně lǐ̤sô̌taya kû̌ shǔshi kû̌ ginǐ̤ně dě a sikè.

21Bǎ Phaěnò̌ aně ô̌ shǔshi kû̌ yè̤̌ně akhanu, a phû̌ô̌ Khûmatǔshelǎ. 22Bǎ a phû̌ô̌ hto Khûmatǔshelǎ akhanu, a ô̌htûpwa̤ bǒsû̌khǎkhô kû̌ Cǒmaradû̌ aně suya̤ dě a phû̌ô̌ nṳ̌pô̤̌ phû̌pwa̤mǒ̤ phû̌khû dǒ ashǔshawa̤ tokhlǒ. 23Phaěnò̌ ô̌htûpwa̤ aně suya̤ kû̌ shǔshi kû̌ yè̤̌ně. 24Phaěnò̌ ô̌htûpwa̤ bǒsû̌khǎkhô anǎ̤ kû̌ Cǒmaradû̌ htodě a hǎmǎkè tûû̌, ma̤titèhî̌dě Cǒmaradû̌ kaǎhtò̌kè yǎ.#Hebrǔ 11:5; Yǔda 1:14

25Bǎ Phamatǔshelǎ ně ô̌ tôya̤ kû̌ shǐlǐ̤sô̌ kû̌ susô̌tôně akhanu, a phû̌ô̌ Khûlamè̌. 26Phamatǔshelǎ phû̌ô̌ hto Khûlamè̌ dě a ô̌htûpwa̤ pô̤̌ aně susô̌taya̤ kû̌ shilǐ̤sô̌ kû̌ ginǐ̤ně dě aphû̌ô̌ pô̤̌ phû̌pwa̤mǒ̤ phû̌khû dǒ ashǔshawa̤ tokhlǒ. 27Phamatǔshelǎ ô̌htûpwa̤ aně lǐ̤sô̌taya kû̌ shisusô̌ kû̌ lǐ̤sô̌tôně dě a sikè.

28Bǎ Phalamè̌ něô̌ tôya̤ kû̌ shilǐ̤sô̌ kû̌ ginǐ̤ně akhanu, a phû̌ô̌ aphû̌ pwa̤khû tôpwa̤. 29Dě a kaǎ ǐ lû̌mi̤ kû̌ Khûnṳ̂̌a dě a hî̌ ǐtûû̌ yô̤̌sǎyô̤̌mû kû̌, “Hǎkhû̌ dǒ Cǒmara tûjû̌pwa̤ ǐshokè anu nî̌, pa bǎ wè̤ǎ lòdô̌lòde, bǎ wè̤jî̌wè̤jû̌ dě phû̌pwa̤khû nutôpwa̤ gǔ ma̤mô̤ma̤phi ge sô̌ pasǎphlǒ pě,” a hî̌ ǐtûû̌ pô̤̌nu. 30Phalamè̌ phû̌ô̌ hto Khûnṳ̂̌a dě a ô̌htûpwa̤ sělě pô̤̌ aně yè̤̌ya kû̌ lǐ̤sô̌tishi kû̌ yè̤̌ně dě phû̌ô̌ pô̤̌ phû̌mǒ̤phû̌khû dǒ ashǔshawa̤ tokhlǒ. 31Phalamè̌ ô̌htûpwa̤ aně susô̌taya̤ kû̌ susô̌tishi kû̌ susô̌tôně dě a sikè.

32Bǎ Phanṳ̂̌a a něô̌ yè̤̌ya̤ akhanu, a phû̌ô̌ Khûshemǎ kû̌ Khûhamǎ kû̌ Khûyaphè̌.#Mǒhtûlû̌hǎhtûsa 7:6

Currently Selected:

Mǒhtûlû̌hǎhtûsa 5: KXF

Tya elembo

Copy

Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo

Wycliffe USA

Yekola Koleka na Ntina ya Kawyaw New Testament