Lucas 10
10
Ginpapanaw ni Jesus ro 72 Pa Gid ku Anang mga Sumueunod Agod Magwali ag Magpamayad
1Pagkataliwan it pilang adlaw, si Jesus hay nagpili it 72 pa gid nga ka tawo halin sa tanan nanang mga sumueunod. Ginpapanaw nana sanda it tig daywa-daywa ag ginpaadto sa tanan nga mga banwa ag lugar nga ana nga aeadtunan sa ulihi. 2Bago nana sanda ginpapanaw hay ginbilinan nana sanda, “Kaabo-abo kunta ro tawo nga gustong magtuo kakon pareho it gianyon nga bugana pero kueang ro manog-ani. Ngani pangamuyo kamo sa Ginuong Dyos, nga tag-ana it gianyon, nga padaehan nana it mga manog-ani ro anang aeanyon. 3Sige, panaw eon kamo. Pero mag-andam kamo ay ginapaadto ko kamo sa mga mapintas nga tawo ag ro inyong kapareho hay mga tiyo it karnero nga ginpadaea sa lugar nga abo ro mga mabangis nga sapat. 4Ayaw kamo magdaea it kahita o bag o sandalyas, mageuwas eang sa inyong ginasuksuk. Ayaw man kamo it pundo ag makig-istorya bisan kanyo sa daean. 5Kon ginabaton kamo sa sangka baeay, hambaea anay ninyo ro tagbaeay it makaraya, ‘Kabay pa nga rondayang panimaeay hay taw-an it Dyos it katawhayan.’ 6Kon nalipay sanda sa pagbaton ku katawhayan ngato hay taw-an gid sanda it Dyos karon. Pero kon owa sanda naila magbaton hay indi man sanda pagtaw-an it Dyos.#10:6 Sa Griniyego raya hay “mabalik ron kinyo.” 7Ayaw kamo it saylo-saylo it daeayunan. Idto eang kamo magtenir sa ratong panimaeay nga nagbaton kinyo. Ayaw kamo maghuya-huya nga magbaton kon ano ro andang ginapakaon ag ginapainom kinyo tungod nga nagakabagay eang nga suhuean ro nagakabudlay.#10:7 Basaha sa Deut 25:4, 1 Cor 9:8-12 ag 1 Tim 5:18. 8Ag kon mag-adto kamo sa bisan siin nga banwa ag ginaabi-abi kamo ku mga tawo, kan-a ro andang ginadat-on kinyo. 9Pamayara ninyo ro mga nagamasakit sa ruyong banwa ag sugiri ro mga pumueuyo, ‘Iya eon kinyo ro oportunidad nga matapoe sa mga sinakpan it Dyos.’ 10Pero kon mag-adto kamo sa bisan siin nga banwa ag indi nanda kamo pagbatunon, adto kamo sa kon siin may abong tawo ag ihambae ninyo ra: 11‘Tungod owa ninyo kami pagbatuna, maskin ro tapu-tapu sa inyong banwa nga nagadukot sa among mga siki hay among ginapagpag bilang tanda nga, sa mata it Dyos hay pareho kamo it mga tawo nga owa nagakilaea kana. Pero tandai ninyo nga gintaw-an kamo it oportunidad nga matapoe sa mga sinakpan it Dyos.’ 12Ginahambae ko eagi kinyo nga kon mag-abot ro adlaw it paghukom, ro pina nga batunon ku mga indi ngato magbaton kinyo hay mas grabi pa sa pina it mga tagaSodoma.”#10:12 Ro Sodoma ag Gomora ro pinakamaeaot nga syudad sa ratong tyempo (Gen 18:20 ag 19:1-29). Ro ginhambae ngara ni Jesus hay nagapakita nga kon indi pagbatunon ro mensahi hanungod sa Maneueuwas, raya hay mas grabi nga saea kaysa sa kasae-anan nga nahimo ku mga pinakamaeaot nga tawo kato anay ag magaresulta ra sa mas grabi nga pina.
Ginpaandaman ni Jesus ro mga Pumueuyo it mga Banwa nga Owa Magtalikod sa Saea
(Mat 11:20-24)
13Pagkatapos kato, naghambae si Jesus, “Makaeueuoy kamo nga mga tagaCorazin ag mga tagaBetsaida, ay makangingidlis gid ro matabo kinyo sa ulihi tungod owa't-a kamo magtalikod sa inyong mga saea. Kon ginhimo ko't-a kunta sa Tiro ag Sidon#10:13 Ro mga tagaTiro ag Sidon hay mga bukon 't-a it Judio. ro mga milagro nga ginhimo ko iya kinyo hay kabuhay eo't-a sanda nga nagsuksuk it magaeas nga eambong, ag naglingkod sa abo bilang tanda ku andang pagtalikod sa saea. 14Ngani kon mag-abot ro adlaw it paghukom, ro pina nga inyong dangaton hay mas grabi pa kaysa sa pina nga dangaton ku mga tagaTiro ag Sidon. 15Ag kamo man nga mga tagaCapernaum, ayaw eon kamo magpaabot nga itue-og kamo sa eangit agod padunggan it Dyos,#10:15 Eaom siguro nanda hay dayawon sanda ay ro andang banwa ro ueulian ni Jesus kada maghalin imaw sa anang mga pagpamanawon sa Galilea. dahil idto gid kamo sa impyerno#10:15 Sa Griniyego, raya hay “Hades.” Basaha sa Luc 16:23-24. itagbong agod pinahan.”
16Naghambae pa gid si Jesus sa anang mga sumueunod, “Ro nagapamati kinyo hay sa minatuod, ako't-a ro andang ginapamatian. Ro owa nagabaton kinyo hay sa minatuod, ako't-a ro andang owa ginabatuna, ag ro owa nagabaton kakon hay sa minatuod, ro Dyos 't-a nga nagpaadto iya kakon ro owa nanda ginabatuna.”
Nagbalik ro 72 ka Sumueunod nga Ginpapanaw ni Jesus
17Pagkatapos ku andang misyon, nagbalik ro 72 nga ginpapanaw ni Jesus ag nalipay sanda it duro. Hambae nanda, “Ginuo, pati gali ro mga demonyo hay nagatuman kamon kon among suguon sa imong ngaean.” 18Nagsabat si Jesus, “Hakita ko ngani si Satanas nga matsa kilat it dasig nga nahueog halin sa eangit. 19Tandai ninyo ra. Gintaw-an ko eon kamo it gahom agod perdihon ro mga maeain nga espirito pareho it gatapak sa mga sawa ag tibaba. Perdihon ninyo ro tanan nga gahom ku aton nga kaaway nga si Satanas, ag owa gid it bisan ano nga sarang makahalit kinyo. 20Pero ayaw kamo it kalipay dahil nagatuman kinyo ro mga maeain nga espirito kundi magkalipay kamo dahil ro inyong ngaean hay ginlista eon it Dyos idto sa eangit.”
21Ku rato man mismo nga oras, si Jesus hay ginpalipay it duro ku Espirito Santo ngani nagpangamuyo imaw, “Ama, ikaw nga Ginuo ku tanan sa eangit ag sa kalibutan, ginapasaeamatan ko ikaw tungod nga ginlipod nimo rondayang mga kamatuuran sa may mga tinun-an nga nagaeaom nga mga maaeam sanda, pero ginpahayag mo ra sa mga tawo nga mapainubuson ag naila magpaturo pareho it mga unga. Tama ring ginhimo ngaron, Ama. Ginhimo mo nga makaruyon ron dahil nakapalipay ron kimo.”
22Pagkatapos ni Jesus it pangamuyo hay naghambae pa gid imaw, “Ro tanan-tanan hay gintugyan kakon ku akon nga Ama. Owa it nakakilaea it mayad kakon mageuwas sa akong Ama. Owa man it nakakilaea it mayad sa akong Ama kundi ako eang nga anang Unga ag ro bisan sin-o nga gusto nakon nga pakilaeahan kana kon mauno gid imaw.” 23Nagbalikid dayon imaw sa anang mga sumueunod ag naghambae it mahinay nga sanda eang ro makabati, “Bulahan kamo ay kita't-a ninyo makaron ro akong mga ginahimo. 24Ginahambae ko kinyo nga abo nga mga propeta it Dyos ag mga hari kato anay ro naghandom nga hikita ag hibatian ro inyong mga hakita ag habatian, pero owa gid ron nanda hakit-i ag habatii.”
Ro Istorya Parti sa Sangka Mabuot nga TagaSamaria
25Isaeang adlaw, may sangka maestro it Kasuguan nga gusto kunta nga testingan si Jesus. Nagtindog imaw ag nagpangutana kay Jesus. Hambae nana, “Maestro, ano ro akong obrahon agod makabaton it kabuhi nga owa it katapusan?” 26Nagsabat si Jesus, “Ano ro nasueat sa Kasuguan ay? Ano ro kahueugan karon kon kimo?” 27Nagsabat ro maestro, “Nasueat nga, ‘Higugmaa ro Ginuo nga imong Dyos sa bug-os nimong tagipusuon, sa bug-os nimong kabubut-on, sa bug-os nimong kusog ag sa bug-os nimong paino-ino.’#10:27 Deut 6:4-5. Nasueat man nga, ‘Higugmaa ro imong isigkatawo pareho ku paghigugma mo sa imong kaugalingon.’ ”#10:27 Lev 19:18b. 28Naghambae si Jesus kana, “Tama gid ro imong sabat ngaron. Tumana ron ag mabaton mo ro kabuhi nga owa it katapusan.” 29Pero gusto ku maestro it Kasuguan nga paguwaon nga tama nga pilion eang nana ro anang higugmaon ngani nagpangutana imaw kay Jesus, “Hay sin-o man abi ro akon nga isigkatawo nga dapat kong higugmaon?” 30Ginsabat imaw ni Jesus, “May isaeang ka tawo nga naghalin sa Jerusalem papanaog paadto sa Jerico. Gin-eambangan imaw it mga buyong, ginbuoe tanan ra daea pati ro anang ginasuksuk ag pagkatapos hay ginbakoe. Inaywanan dayon nanda imaw nga haeos owa it ginhawa. 31Kon ano ma't-a nga nakaagi dikato ro sangka saserdote ag pagkakita nana sa tawo ngato hay naglikaw 't-a imaw. 32May nahaagi man rikato nga isaeang ka Levita.#10:32 Ro mga Levita hay mga inapo ni Levi nga ro andang trabaho hay nagabulig sa mga saserdote (basaha sa Num 3:6). Pagkakita nana sa tawo ngato hay naglikaw man imaw. 33Ku ulihi hay may sangka *Samaritano#10:33 Samaritano ro tawag sa mga tawo nga nagaistar sa Samaria. Nagakueuntrahan ra sanda ku mga Judio. nga haagi man dikato, ag pagkakita nana sa ratong tawo hay naeuoy gid imaw it duro. 34Ana ra nga ginpaeapitan ag ginbueong it eana ag bino ro nina kara ag ginbugkusan. Pagkatapos hay ana ra nga ginpasakay sa ana mismong asno ag gindaea sa sangka baeay nga daeayunan, ag ana idto nga gindipara. 35Pagkaaga, gintaw-an nana ro tag-ana ku daeayunan it daywang ka pilak nga denaryo#10:35 Ro katumbas it sang denaryo hay sang adlaw nga sweldo it trabahador. kon tawgon. Ana ra nga ginbilinan, ‘Diparaha gid ro tawo ngaron. Kon kueang pa ro akong gintao ngaron kimo hay bayran ta ugaling pagbalik ko iya.’ ” 36Ginpangutana dayon ni Jesus ro maestro it Kasuguan, “Kon kimo, sin-o sa tatlo ngato ro nagpakita it matuod nga paghigugma sa ratong tawo nga gin-eambangan it mga buyong?” 37Nagsabat ro maestro, “Tag ratong nagkaeuoy 't-a kana ron.” Naghambae si Jesus kana, “Kon mawron hay makaruyon man permi ro imong himuon.”
Dapat natong Paeabyon ro Pagpamati sa mga Ginaturo ni Jesus
38Nagpanaw sanday Jesus ag ro anang mga sumueunod ag nakaabot sanda sa sangka baryo. May tagaidto nga bayi nga si Marta ro anang ngaean nga nagkangay kanday Jesus nga magdayon sa andang baeay. 39May manghod si Marta nga si Maria ro anang ngaean. Nagpungko si Maria sa may siki ku Ginuo ag nagpinamati sa ana kara nga ginaturo. 40Pero si Marta ma't-a hay nagapangungumang eon sa anang grabi nga pagpreparar it pagkaon para kanday Jesus. Ngani nagpaeapit imaw kay Jesus ag naghambae, “Ginuo, ham-an it baliwala ea't-a kimo nga ginapabay-an ako ku akong manghod sa mga oeobrahon iya? Hambaea man abi imaw nga buligan man ako.” 41Pero nagsabat ro Ginuo, “Abi gid-a si Marta ngara. Kon ano-ano't-a ro imong ginakabangtan ag ginapalitikan it ueo. 42Pero sangka butang gid lang ro importanti ag ruyon ro ginpili ni Maria ag indi ko ron igdimot kana.”
Currently Selected:
Lucas 10: akl
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
2024 (Active) Wycliffe Bible Translators, Inc.