Улон-вылон 16
16
16-тӥ ЛЮКЕТ
1Нош Сара, Аврамлэн кышноез, солы нуны уг вайы. Саралэн Египетысь вуэм Агарь нимо медо нылыз вал. 2Соку Сара Аврамлы шуиз: «Тани, Кузё-Инмар, нуны медам вайы шуыса, пушме ворсаз; мын ук мынам медо нылы доры, оло нош солэн нылпиез мыным нылпи луоз». Аврам Саралэсь верам кылзэ санэ понӥз. 3Аврамлэн кышноез, Сара, аслэсьтыз Египетысь вуэм Агарь нимо медо нылзэ, Аврам Ханаан музъемын дас ар улэм бераз, картэзлы, Аврамлы, кышнолы сётӥз. 4Со Агарь доры пыриз но, Агарь секытэн луиз. Секытэн луэмзэ адӟем бераз Агарь кузё кышнозэ синазькыль карыны кутскиз. 5Соку Сара Аврамлы шуиз: «Мон ӝоже усем понна тон янгыш; аслэсьтым медо нылме тынад гадь вылад сётӥ, нош со адӟиз аслэсьтыз секытэн луэмзэ но монэ синазькыль карыны кутскиз; Кузё-Инмар асьмелы судья мед луоз». 6Аврам Саралы шуиз: «Тани, медо нылыд тынад кияд; мар каремед потэ соин, озьы ик кар». Сара сое ёртыса возьыны кутскиз, соку Агарь со дорысь пегӟиз. 7Кузё-Инмарлэн Кылчинэз сое луоё кырысь ошмес дорысь шедьтӥз, Суре мынӥсь сюрес вӧзысь ошмес дорысь. 8[Кузё-Инмарлэн Кылчинэз] солы шуиз: «Агарь, Саралэн медо нылыз! Кытысь тон потӥд, кытчы мынӥськод?» Агарь шуиз: «Мон пегӟисько кузё кышноелэн, Саралэн, син азьысьтыз». 9Кузё-Инмарлэн Кылчинэз солы шуиз: «Кузё кышноед доры берытскы но солы тэрытскыса ул». 10Кузё-Инмарлэн Кылчинэз солы шуиз: «Тынэсьтыд выжыдэ йылэтыса йылэто, сокем трос луэмысьтыз сое лыдъяны ик уз луы». 11Кузё-Инмарлэн Кылчинэз солы шуиз на: «Тани, тон секытэн, пи нуны ваёд, солы ним сётод: Измаил; уго Кузё-Инмар кылӥз тынэсьтыд курадӟемдэ; 12адямиос пӧлын со кыр ишак кадь луоз; солэн киыз ваньмызлы пумит луоз, ваньмызлэн киыз солы пумит ӝутскоз; нош озьы ке но со вань агай-вынъёсыныз ӵош улоз». 13[Агарь] асэныз вераськись Кузё-Инмарлы таӵе ним сётӥз: «Тон монэ адӟись Инмар». Уго Агарь шуиз: «Мон зэм ик татысен монэ Адӟисез мышкысен адӟи». 14Соин ик со ошмес нимаське: Беэр-Лахай-Рои#16:14 Беэр-Лахай-Рои – «монэ Адӟисьлэн, Улэплэн ошмесэз» шуыса берыктӥське. Со интыяськемын Кадесэн Баред вискын.
15Агарь Аврамлы пи нуны вайиз; Агарьлэсь вордӥськем пиезлы Аврам Измаил ним сётӥз. 16Аврамлы тямыстон куать арес вал, Агарь солы Измаил пизэ вайыку.
Currently Selected:
Улон-вылон 16: УДМБИБ
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
(c) Библияез берыктонъя Институт, Хельсинки, 2013; 2016