ลามูลา 12

ตูฮัด ญา ปาเงน อับราม

(ปือบูวัจ 7.2-5)

1ตูฮัด บือซัยํ เดะ อาตัซ_ มือเลา ฌางัน อับราม จะ_ “เกา กือนา ตีงัน นังฆรี นะ เกา_ โกะ อาดี บราดี นะ เกา_ ฌางัน รูมัฮ นะ อาโปก เดะ เกา_ กือนา ฌาลัด ปี กะ นังฆรี อาซิก_ นู กู นะ ปลีฮัจ กะ เกา. 2กู นะ บูวัจ บรี เกา ฌาดี บักซา บือซัยํ. กู นะ บรี ซือลามัจ กะ เกา_ นะ บรี ปือนามา นะ เกา ฌาดี บือซัยํ. เกา นะ ตูโลก ซือมียา อาซิก_ นะ บรี ซือลามัจ กะ กูญา. 3ซือมียา ดีฮา_ นู บรี ซือลามัจ กะ เกา_ กู นะ บรี ซือลามัจ กะ ซือมียา อีตู เลอ. ดัฮ อาดา ซือมียา_ นู อาโบยํ กะ เกา_ กู โปด_ นะ อาโบยํ กะ ซือมียา อีตู ฌูฆา. กู นะ บรี ซือลามัจ_ กะ โกะ ลูมอฮ บักซา_ ราตา เดะ ดือนียา_ กรานา เกา เลอ”_ ตูฮัด ญา จะ.

4กะฆีเตอ อับราม_ ญา ตรือเบะ ปี_ ตูโรจ นู ตูฮัด บือซัยํ เดะ อาตัซ ซูโรฮ กะ ญา ดัฮ. โลด โปด_ ญา ปี ซามา. กาลา อับราม ตรือเบะ เดะ นังฆรี ฮาราน อีตู_ อูมอยํ นะ ญา ตูโฌฮ ปูโลฮ ลีมา (75) ตาโฮด. 5อับราม บาวา ซารัย_ บีนี นะ ญา_ ฌางัน โลด_ นานะ นะ อาดี เดะ ญา_ บือปี ซามา. ญา บาวา บือนา บารัก นะ กูญา บือปี ฌูฆา_ ฌางัน ลูมอฮ ปราโซฮ นะ กูญา_ นู กูญา บือเลฮ มียา เดะ นังฆรี ฮาราน ดัฮ. กูญา ซือมูฮา ตรือเบะ ปี_ นะ ปี กะ โซะ นังฆรี คานาอัน.

กาลา กูญา รอจ กะ นังฆรี อีตู ดัฮ_ 6อับราม โปด บือฌาลัด ลาลู ตือปัจ ตือกอซ อีตู_ มาแรฮ รอจ กะ ตูโปะ เซเคม_ ฌาดี จะ เดะ ปูโฮด กายู กรามัจ เดะ โมเร. วะตู อีตู อาดา ลูมอฮ บักซา คานาอัน_ ดูโดะ เดะ นังฆรี อีตู.

7กาลา อีตู_ ตูฮัด บือซัยํ เดะ อาตัซ มาแรฮ ปลีฮัจ กะ อับราม_ มือเลา จะ_ “กู นะ บรี นังฆรี อีนี กะ บือแนฮ นะ เกา เลอ”_ ตูฮัด ญา จะ. กะฆีเตอ_ โซะ อีตู_ อับราม บูวัจ ตือปัจ มือญือมัฮ_ กะ ตูฮัด บือซัยํ เดะ อาตัซ_ นู ปลีฮัจ กะ ญา ดัฮ.

8ลือปัซ อีตู_ ญา บือฌาลัด ปี กะ บูเกะ_ เดะ โซะ ตีมอยํ เดะ ตูโปะ เบดเอน. ญา ตืองะ รูมัฮ กาฌัก กาเยด นะ ญา_ อาดา ตูโปะ เบดเอน เดะ โซะ บารัจ_ อาดา ตูโปะ อัย เดะ โซะ ตีมอยํ. โซะ อีตู_ ญา บูวัจ ตือปัจ มือญือมัฮ กะ ตูฮัด บือซัยํ เดะ อาตัซ_ มือญือมัฮ ตรือเบะ ปือนามา นะ ตูฮัด บือซัยํ เดะ อาตัซ.

9กะฆีเตอ อับราม โปด_ ญา บือฌาลัด ปี_ กะ นังฆรี โซะ บารัจ ดายา.

อับราม ฌางัน ซารัย เดะ นังฆรี อียิบ

10วะตู อีตู_ อาดา ลาฆู บือตาฮัด บารัก มากัด_ เดะ นังฆรี คานาอัน. กะฆีเตอ_ อับราม บือฌาลัด ปี กะ นังฆรี อียิบ_ บีดา นะ มือนูปัก ดูโดะ ตือปัจ อีตู_ ซาเบะ เดะ นังฆรี คานาอัน_ อาดา ลาฆู บือตาฮัด บารัก มากัด โตระ เลอ. 11กาลา ดาปิก นะ มาโซะ กะ นังฆรี อียิบ_ อับราม โปด_ มือเลา ฌางัน ซารัย_ บีนี นะ ญา_ จะ “กู ตาฮู จะ_ เกา ฌาดี นีบีนี นู บือฆาจะ. 12กาลา โกะ ลูมอฮ อียิบ ลีฮัจ เกา_ กูญา นะ มือเลา จะ ‘นีบีนี อีนี ฌาดี บีนี นะ ญา.’ กูญา นะ บูนอฮ กู ตาปี เตด บูนอฮ เกา. 13กือนา มือญาเระ จะ_ เกา ฌาดี อาดี นีบีนี เดะ กู_ บีดา กูญา นะ บูวัจ บาฌิ ฌางัน กู กรานา เกา. กูญา นะ เตด บูนอฮ กู กรานา เกา.” 14กาลา อับราม มาโซะ กะ นังฆรี อียิบ ดัฮ_ โกะ ลูมอฮ ซือมียา นังฆรี อียิบ โปด_ ลีฮัจ จะ_ บีนี นะ ญา บือฆาจะ โตระ. 15กาลา โกะ กือปาลา นะ ราฌา ฟาโร ลีฮัจ นีบีนี อีตู ดัฮ_ กูญา มือเลา มือโอจ อาเกะ ญา_ บรี กะ ราฌา ฟาโร ตาฮู. กะฆีเตอ นีบีนี อีตู กือนา บาวา บือปี กะ ราฌา ฟาโร. 16โซะ ฟาโร โปด_ บูวัจ บาฌิ ฌางัน อับราม บาญะ โตระ กรานา นีบีนี อีตู. อับราม โปด_ บือเลฮ โกะ กาเมก_ ลือมู_ กูดา บาปา บาซา ดือมิ_ ฌางัน โกะ ปราโซฮ กีลากี_ นีบีนี_ โกะ กูดา อายา บาซา ดือมิ_ ฌางัน โกะ อูตัย ฌูฆา. 17ตาปี ตูฮัด บือซัยํ เดะ อาตัซ บูวัจ บรี อาดา บือฌาดี_ ปือญาเกะ เตด บือฆูนา บาญะ ฌือแนฮ_ กะ ฟาโร ฌางัน โกะ นะบรานะ นะ ญา_ ซาเบะ ลาฆู นะ ซารัย_ บีนี นะ อับราม. 18ฟาโร บลาโลก อับราม มาแรฮ_ มือเลา จะ “บูวัจ นามา เกา บูวัจ กะ กู กะฆีนี เลอ? บูวัจ นามา เกา เตด มือญาเระ กะ กู จะ_ ญา ฌาดี บีนี นะ เกา? 19บูวัจ นามา เกา มือเลา จะ ‘ญา ฌาดี อาดี เดะ กู’? กะฆีเตอ กู ซาโมจ ญา_ บีดา ฌาดี บีนี นะ กู. นี เลอ_ บีนี นะ เกา. กือนา ซาโมจ ดัฮ ตรือเบะ ปี เลอ.” 20กะฆีเตอ_ ฟาโร ปือซัด โกะ ลูมอฮ ปราโซฮ_ ปาซัน ลาฆู นะ อับราม. ลูมอฮ ปราโซฮ โปด_ บาวา อับราม บือฌาลัด บาลิ ปี_ มารือมา ฌางัน บีนี_ ฌางัน โกะ ซือบารัก ซือมูฮา นะ ญา.

Currently Selected:

ลามูลา 12: ULBIBLE

Tya elembo

Copy