ṮAKWIIN 3
3
1Dhali tasha/ a’di kora e ki kor mo mmobola ris tombwaasho kun uḵu mo, uni gun uḵkina Tap̱a Arumgimis mo. A’di ki owa ’bom gwo mo ki: A/Arumgimis o gwo mo ki: Um mini mii dhalku/ cwan ṯal ’de/ ki shwa ’peni bwaagoŋ ’te/o? 2Dhala ’bom ki thoḵ tasha/ gwo mo ki: Aman dhalu bway mmoshwa aris maman cwa gi bwaagoŋ mo. 3Hili Arumgimis ki o gwo mo ki: Um mini mii dhalku/ ki shwa maman cwa jin di’d e bwaman gi bwaagoŋ mo, walla dhalku/ ki ta a’di is ki me’d mo gom isi ciki/ um mini wu mo. 4Hili tasha/ ki owa ’bom gwo mo ki: Um mini wu mo yisa. 5Haali/ Arumgimis mishki’d ki um mini shwa a’di mo tani em bum minu ḵa’d mo dhali um mina e wa ka Arumgimis mo mmonyiṯẖ jin ’boro’d dhali jin ta thus ki thus mo. 6Wakan ka ’bom ki p̱ar cwa e ki a’di ’bora’bor mmoshwa mo, dhali a’di ’kunya’kuny e jis/em piti mo, dhali cwa a’di iminu o bwa mmokar jan ṯal ’de/ mmoyuḵa yuḵ mo tani ayim ki bu’th maman cwa mo dhali shwa a’di, dhali ayim si’da/ ki c̱iki a’di ka kaṯẖim piti mo, dhali a’di shwaki’d mo. 7Dhali yan’ko’d uni su/ ḵa’dkunu em buni mo, dhali uni su/ mishki mo mo ki uni ’ko ki is ’te/ mo, dhali uni ki sho ’cemena p̱u/ mmonṯal ’de/ mo dhali uni ki uḵa romp̱a/ ’peni ’cemena p̱u/ gom is buni mo.
8Dhali uni ciḵki is gi Tap̱a Arumgimis mmoyakina a’di e bwam ma goŋ e mom’pimpili/ jin ’thup̱ ma tee she/ mo, dhali wathiŋ gwaṯẖ dhali ash uni bagki is buni ’peni buŋ’kus gi Tap̱a Arumgimis mo e bwanycwa gi bwaman gi bwaagoŋ mo. 9Hili Tap̱a Arumgimis yuḵki wathi/ mo dhali o a’di gwo mo ki: /E dini mana? 10Dhali a’di ki thoḵ gwo mo ki: Aha/ ciḵa is jin gwo /e e bwaman ma goŋ mo, dhali aha/ ḵo/kina is mo, haali/ aha/ dina is ’te/ mo, dhali aha/ bagkina is pem mo. 11A’di o gwo mo ki: Kaja iṯor /e gwo mo ki /e di is ’te/a? Ki /e ishwaki cwa jin ḵanka/ /e gwo mo ki: /E mini mii dhalku/ a’di ki shwa mo? 12Dhali wathi/ ki o gwo mo ki: A’bom a’di jin c̱ikina /e mmonyaḵ c̱a’b ki aha/ mo tani ayim a’di ic̱iki aha/ maman cwa mo dhali aha/ shwakina a’di mo. 13Dhali yan’ko’d Tap̱a Arumgimis ki owa ’bom gwo mo ki: Katinta sa/ jin miikina /e mo? Dhali a’bom ki thoḵ gwo mo ki: Tasha/ a’di imu’thki aha/ e mo dhali aha/ shwakina a’di mo. 14Dhali Tap̱a Arumgimis ki o tasha/ gwo mo ki:
Haali/ gom miim pini jin miikina /e kansan tan mo tani
monyjeem pini boli’da ris to/e kun uḵu e ki shi/ mo
dhali ap̱owa ris to/e kun ’koni bwaasho ’baar mo.
Dhali ka bor pini mo tani /e mini para bora ’cesh mo,
dhali bu’da’cesh mina /e shwa mo
ka risa tee gi mondiki/em pini ’baar mo.
15Aha/ mina kar mo jin dup̱u i bwaman /e mo dhala ’bom mo,
dhali e bwaman emen pini mo dhali emen ma yim mo.
A’di midi pwaṯẖ /e ’kup̱ pini mo
dhali /e mini ṯikina ṯiŋkilam piti ka ulmany mo.
16Eya ’bom mo tani a’di ki o gwo mo ki:
Isa nyor dho’th pini gom uc̱i mo tani miga/ mar is kagahara gom /e mo.
/e mini dho’th uc̱i ki isa nyor i e mo,
hili bwam pini mini mii o ka kaṯẖim pini mo
dhali a’di midi ta tap̱a ap̱o/ /e mo.
17Dhali a’di ki owa Aadam gwo mo ki:
Gom miim pini jin ciḵa /e ’twa/ gi ashim pini mo
dhali shwa cwa yansan jin ḵanka/ /e gwo mo ki: /E mini mii dhalku/ ki shwa a’di mo tani
mony’cesh jeenu mo gom /e mo be.
Aris to kun mina /e shwa mo tani uni mina /e gam ’peni mii jin mina /e ’kosha shir shir mo ka tee gi mondiki/em pini ’baar mo.
18A’de/ dhala liṯ uni mini ’ka gom /e mo,
dhali /e mini shwa to kun sinu ’peni bunto mo.
19/E mini shwa tonṯe/ ki jiṯi/ bwam/em pini mo
ntagi /e mini doḵ ki bu’da’cesh ka nyaŋ’ko’d,
haali/ ’peni bu’da’cesh mo tani /e bu’thkunu mo be.
/E ta bu’d gana/ mo,
dhali e bu’da’cesh mo tani /e mini doḵ ki a’di ka nyaŋ’ko’d mo.
20Dhali wathi/ ki yuḵ ash gway ka Hawwa mo, a’di jin ta ’pemen gwo jin onu ki: To jin di’d ki e mo, haali/ ayim ta’da ata’da ma ris to ’baar kun ’kon ki e mo. 21Dhali Tap̱a Arumgimis ki uḵ ka Aadam dhali gom ashim piti burrinye/ ’pena yi’c mo, dhali hi’thki uni i is mo.
22Dhali yan’ko’d Tap̱a Arumgimis ki o gwo mo ki: Hili mo mo ma, wathi/ a’di wakina e ki jan ṯal ’dem bana mo, mmomish jin ’boro’d dhali jin ta thus ki thus mo. Dhali shwane/ isi ciki/ ki a’di midi kar me’d piti dhali bu’th cwa gi mondiki/e si’da/ mo dhali shwa a’di mo dhali a’di midi c̱a’b ki e ki sule/ sule/ mo. 23Dhali gom gwo gi wakan mo tani Tap̱a Arumgimis ki kar a’di ’pen ka pije/ ’peni bwaagoŋ ma Idin mo, mmoya ḵora ’cesh ki me’d piti mo ’peni mo jin bu’thkunu a’di ’peni cine/ mo. 24A’di ki ur wathi/ ka pije/ mo dhali e mom’pesho’k gi bwaagoŋ ma Idin mo tani a’di ki dhu karubiim kun ta iman’doyu gwo mo dhali gandal jin kaaka jin shwa’d ki o’d ki bar bar mo a’di jin ṯu’kki’d ki washar washar ’ban kuku/ mo, mmoji bway gi maman cwa jin di ki e mo.
Currently Selected:
ṮAKWIIN 3: Udk
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
©Society for International Ministries, 2013