Matɨyu 2
2
A'amu huno engo'njo Anɨtuye hungkungo mupa'nyo mofehi'nyo si'mofapiso'mjo sohwa Jisasɨ'mo uhwonɨmentohofofoho.
1Hwe yofe engo'njo Helout kako hwaho Jutiya mokosyohumamojo sohonta oso hwaho ango Mpetɨlehem sopo Maliya Jisasɨmo aswo ma'mentisofoho. Hwangku sohonta a'amu temtitofo kengo mta'ango fihwa hofɨko hwaho mofehi'nyo sɨ'mofapiso mta'ango sohwa hntokwaliyo uhwonontɨfi huno engo tɨpema'mentohofo sohwa Jelusalem si'mofapontɨfi a'amu sohwamo ulɨmentohofi, 2Mehomi milongo a'amu Jutafe hwe yofe engo'njo hwaho mokosyohumayo'ne sohwo imo'nɨngkohoho. Oso huhwo sohwo ntɨ'mo humaho. Kakoe sɨkuno imo'nyo'ne so'no hntokwaliyo mofehi'nyo sɨ'mofapiso sohohnta'ni ahwomo somo uhwonontani nakwo kakine'no hwomtame ulohofo'ne pɨhwono. 3Ose ulahonɨngkofi hwe yofe engo'njo Helout nupa'nonto yomo engo imentisofoho. A'amu Jelusalem humamotofoso nupa'nontɨfi yomo engo imentohofofoho. 4Hwe engo Helout kako a'amu yofe engo'njo tajo ango syoho'njo sohwanji a'amu honɨngkano hungkuno lutɨhwamotofo sohwanjimo joho ulonto ulohonɨmento, Kɨlais hwe Anɨtu uhwosopento nakwoe hwahopono uhwatɨmentiso sohune'no nakwo a'amu Juta so'nwi uhwontohumayo sohwo ango ntɨpo u'mofapmmontolo. 5Ose ulahonɨngki ulɨmentohofi, Hwaho Jutiya ango Mpetɨlehemnoho. A'amumo Anɨtu hungkuno uyahonɨngki lɨmotofo sohwa ole mtɨ'mokumentohofi,
6U, Mpetɨlehem, sekwo ango we'e soku, sekwo hwaho Jutiya sopo ango yofe we'e pa'nyo'maho.
O'o, hwe yofe engo'njo nje a'amu Isɨlael somo mokosyohumane sohwo sekwoe angopo imo'nonefoho.
Hohonta ose mtɨ'mokumentohofofoho.
7Oso'no Helout a'amu mofehi'nyo sɨ'mofapiso hohnta'ango sohwamne'no joho hiyaso lutɨmanto Heloutɨ'nji uhu'mokontɨfi Helout hwe huhwo sohwamo hntokwaliyo hiso i'mofapmmentiso sɨkuno so'no ulohonɨmentisofoho. 8Ulohonɨngkahonɨngki hofɨko Heloutɨmo hungkuno asomo ulahonɨngkofi Helout ulɨmento, Sekwo ango Mpetɨlehem sopo nowekuji hafɨhafe fɨtɨpmno. Sekwo notɨpemafɨkuji hungkuno hiso ngkiyepono wapono. Ngko nupa'nɨ'mo kakine'no hwomtame uloho'mne'no selohono. Oso hwasyo hungkuno hiso ulonto Mpetɨlehemne'no luhwatɨmentisofoho.
9Oseso hofɨko Heloutɨye hungkuno upa'nontɨfi umentohofofoho. Nowentanɨngkofi hntokwaliyoso hofɨkoe angopo uhwonɨmentohofo hiso apa'no i'mofaponto hofɨkimo sɨmo'mo upeehonɨngki hofɨko tɨfi inɨngkamentohofofoho. Oso hntokwaliyoso nowento ango hwomu wentanjo antɨfe sopo lɨmentisofoho. 10Hofɨko hntokwaliyo hiso uhwonontɨfi yomo yontɨfi sɨmeho wopɨngo umo'nɨmentisofoho. 11Sɨmeho wopɨngo umo'nɨngkahonɨngki hofɨko ango homo somo noswontɨfi hwomu kona'wohi Maliya'nji siko'inta'imo uhwonɨmentohofofoho. Nuhwonontɨfi hwomtame ulohofontɨfi kakoe yofe ho'noma'mentohofofoho. Hofɨkoe ipofo nofijontɨfi yo'mayo wonyoangkafo hamniyoho engo mpe iyo so'no uyɨmentohofofoho. Sojo wonyoangkafo so'nji nom'neso hwamno pa'nyo akino wopɨngo'ne so'nji hwone mijo wonyohofiyo'nji uyɨmentohofofoho. 12Oso hohosohonta hofɨko wojo honɨngkanɨmentohofoso Anɨtu ulɨmento, Sekwo Heloutɨyepono asomo nukutoho. Ose honɨngkanontɨfi hofɨko honɨngkano nom'nemo ikitokwawentɨfi hofɨkoe angopono umentohofofoho.
Jousepɨ'ya'u sikoe hwomu'nji hwaho Ijipmne'no hiyaso motamentisiyefoho.
13Nohumpeehonɨngkofi Jousep huhwo kako wojo honɨngkanɨmentisoso a'amu ahwomo mta'ango Jousepɨmo u'manto ulɨmento, Kɨko hwomu'nji kona'wohi'nji nomahoji hwaho Ijipmne'no hiyaso motawe. Ijip sopo nohumentanɨngkiji nom'ne ango sopone'no hano iyo so'no hwangku hungkuno apa'no wakilɨmonnoho. Hwapɨngoso Helout jɨje hwomu sohumo wofonjahumonto tɨpeelofoho. 14Ose ulahonɨngki Jousep oso sɨkwo'miyo somo kako Maliya'nji kakoe hwomu'nji nomanto Ijipmne'no womentohofofoho. 15Jousep hwaho Ijip sopo nohumentanɨngki Helout poyo pe'nɨmentisofoho. Oseso hungkuno hohontajo hwe fihumo Anɨtu uyahonɨngki lɨmojo sohwo mtɨ'mokumentiso hiso ne imo'nɨmentisofoho. Hungkuno ole,
Nje hwomu Ijip nohumentanɨngki lutɨma'mentohefoho.
Oso hohosohonta oso hungkunoso ne imo'nɨmentisofoho.
Helout kakoe a'amu itokuso'njo sohwamo hungkuno ulahonɨngki hwomu milongo pi'nɨngo engoso fongkumeeo'mentohofofoho.
16A'amu mofehi'nyo sɨ'mofapiso hohnta'nɨngo sohwa Heloutɨye hungkuno mehomi songo imo'nɨngkiso'enoho ngkimo ntohapmno, ose ulɨmentiso somo hwe huhwo sohwa tɨfi minɨngkayo'njo yahonɨngkofi Helout nupa'nonto sɨmeho tohino umnɨmentisofoho. Sɨmeho tohino umnɨmentiso so'no kako a'amu itokuso'njo sohwamo ango Mpetɨlehem'nji ango mofone sopone'no uhwojahonɨngki hofɨko hwomu hopi'nono soswo hufa'u muyakolofe'njo sohwamo fongkumeeo'mentohofofoho. Hwapɨngoso hwe hntokwaliyo uhwonɨmentohofo sohwa ole ulɨmentohofi, Hntokwaliyo hiso sɨmo'mo imo'nɨngkahonɨngki soswo hufa'u uyakolo'mentiso so'no ulɨmentohofofoho. 17Helout oso wonyo hiso imentiso sohonta hungkuno hohontajo hwe Jelemaiya sohumo Anɨtu hungkuno uyahonɨngki lɨmojo sohwo mtɨ'mokumentisoso ne imo'nɨmentisofoho. 18Hungkuno hiloso ole,
Ango Lama Mpetɨlehem mofone sopo mampaho ho'nɨmentisofoho.
Mampaho hiloso humotaho we'e ho'nɨmentiso'maho.
Jekoupɨye ape Lesel kakoe imuso hofɨkoe mehomi sohwamne'no humotaho lalokwofo.
Hofɨkoe sɨmeho wopɨngo apa'no mmo'nonehoho.
Hofɨkoe mehomi nɨhu'nahone poyo imo'nɨngkahonɨngki humotaho ne'no lalokwofo.
Ose mtɨ'mokumentisofoho.
Jousepɨ'ya'u sikoe hwomu'nji hwaho Ijip ulɨko'mantɨfi ango Nasalet sopo asomo i'mofapmmentohofofoho.
19Hwangku Helout poyo pe'nɨngkahonɨngki a'amu Anɨtu mta'ango sohwo Jousep hwaho Ijip nohumentanɨngki i'mofaponto Jousepɨmo wojo'mo ulɨmento. 20Nolɨkafohoji kɨko hwomu'nji kona'wohi'nji nomahoji hwaho Isɨlael sopone'no asomo fɨwanɨmno. A'amu hopi'nono mehomi wofonjosyantɨfi imentohofo sohwa poyo moi'wonoho. 21Ose ulahonɨngki Jousep nolɨkafonto hwomu'nji kona'wohi'nji nomanto hwaho Isɨlael sopo ne'no asomo womentohofofoho.
22Jousepɨ'montohwa nowentɨfi upa'nɨmentohofoso hwe Akelaus sohwo kanɨngkwohwo Heloutɨye yofe engo nto ma'maho. Ose upa'nonto iyoho unɨngkahonɨngki olo hwaho lopo mohumamonehono nolonto apa'no wojo honɨngkanɨmentisoso Anɨtu Jousepɨmo hungkuno nom'ne ulahonɨngki kako hwaho Ngkaliline'no umentisofoho. 23Kako hwaho hopo sopo ango Nasalet sopo humamentisofoho. Oso hiso'no hungkuno hohontajo nom'ne hwe sohumo Anɨtu hungkuno uyahonɨngki lɨmojo sohwo mtɨ'mokumentisoso ne imo'nɨmentisofoho. Hungkuno hiso ole,
Hwe Nasaletnnta'ango hweho wolantɨfeho, lɨmentisofoho.
Currently Selected:
Matɨyu 2: apzNT
Tya elembo
Share
Copy
Olingi kobomba makomi na yo wapi otye elembo na baapareyi na yo nyonso? Kota to mpe Komisa nkombo
© 2013, Wycliffe Bible Translators, Inc. All rights reserved.