Ranehlö 1
1
Istōri Vinīlö Ngih Panam Töm Halīöngö
1Vīlö ngam halīöngö ngam Tēv tumlat inrē, ik raneh. 2Ötlēn ngam tumlat, öt aṅhavkūö inrē; singūlö ök ikui ngam mai: ngaich ngam Fanöinylö ngam Tēv nö halöinyköre nö ikui minë mak.
3Ngaich ngöṙô ngam Tēv, Hanātö yēḵ; hanātö ngaich ök umuh. 4Ngaich ngam Tēv, nömeuk ök hanātö, tö e nölöök: ngaich ngam Tēv nö harēvngö ngam hanātö töm singūlö. 5Sakāmö ngö ngam Tēv nö kaheuk ngam hanātö, Hatööm, ngö Anga-aṅ nö kaheuk ngam singūlö. Harap ngaich ök umuh, peuheū inrē, hĕng sakāmö. 6Ngaich ngöṙô ngam Tēv, Taṙul yēḵ, ellōn minë mak, hökngen e inrē nö harēv minë mak töminë mak.
7Ngaich ngam Tēv nö vīlö taṙul, elkatòh ngam taṙul töminë mak minë lātulöng töm taṙul: ngaich ngatī angū-ö. 8Halīöngö, ngö ngam Tēv nö kaheuk ngam taṙul. Harap ngaich ök umuh peuheū inrē; innëtö sakāmö.
9Ngaich ngöṙô ngam Tēv, Hökngen minë mak yēḵ elkatòh ngam halīöngö nö mūlngö nö hĕngkangchūök, ane inrē hökngen ngam tanyô nö meūkö: ngaich ngatī angū-ö. 10Tumlat, ngö ngam Tēv nö kaheuk ngam tanyô; Mai, ngö Anga-aṅ nö kaheuk minë tömūlngö mak: ngaich meūkö e ngam Tēv nö löök. 11Ngaich ngöṙô ngam Tēv, Hökngen ngam tumlat yēḵ nö aṅkūö tö kiyôp; kunchōn inrē tökulölu; chōn inrē töṙôngu, kö i mihëṙöre tö-aṅhav tö kulölre; ing tumlat: ngaich ngatī angū-ö. 12Ngaich ngam tumlat nö sīöplö aṅkūö tö kiyôp; Kunchōn tö kulölu ṙòng, kö i mihëṙöre, ane inrē chōn töṙônguvö kö i mihëṙöre, tö-aṅhav tö kulölre: ngaich ngam Tēv nö meūkö e nö löök. 13Harap ngaich ök umuh peuheū inrē, linūöyö sakāmö.
14Ngaich ngöṙô ngam Tēv, Eāṅvö yēḵ el taṙul ngam halīöngö nö harēvngö ngam sakāmö töngam hatööm; ngaich hökngen u nö minkahngö, nö ṙētak, nö sakāmö ane inrē samyeūheu: 15Ngaich hökngen u nö ëāṅvö el taṙul ngam halīöngö nö kētö hanātö ikui ngam tumlat: ngaich ngatī angū-ö. 16Ngaich ngam Tēv nö vī tökiröng ëāṅvö, nët; ngam tökiröng eāṅvö hayöng ngam sakāmö, ngam tökūöṅnö ëāṅvö hayöng ngam hatööm: vī minë taneūsömat Anga-aṅ inrē. 17El taṙul ngam halīöngö tī ngam Tēv tö u nö kētö hanātö ikui ngam tumlat, 18Nö hayöng ngam sakāmö, hatööm inrē, harēv ngam hanātö inrē töm singūlö: ngaich ngam Tēv nö meūkö e nö löök. 19Harap ngaich ök umuh peuheū inrē; finënö sakāmö.
20Ngaich ngöṙô ngam Tēv, Hökngen minë mak nö pōyen aṅ tö mahalöinyköre tö-aṅ, tönup tönômuvö, hökngen chehechōn inrē nö kiteū ikui ngam tumlat, el ngam tönyāṅknyi taṙul ngam halīöngö. 21Ngaich ngam Tēv nö vī tökiröng kāḵ, kauheūtlöre tö-aṅ mahalöinyköre, nup töpōyen aṅ minë mak, kö i mihëṙöre, keuheūtlöre inrē tö sanëòku chehechōn nö kö mihëṙöre: ngaich meuk ngam Tēv tö e nö löök. 22Ngaich ngam Tēv nö hakôlò u, nö ngöṙô, Mikūönlö yēḵ, ṙūölöre ṙôken inrē, hatöölö në mak el minë mai, hökngen chëhechōn inrē el tumlat nö ṙūölöre ṙôken. 23Harap ngaich ök umuh peuheū inrē, tinneūyö sakamö. 24Ngaich ngöṙô ngam Tēv, Hökngen ngam tumlat nö aṅkūö tö tö-aṅ kö i mihëṙöre, nuā töṙeūla chehen, ane inrē töfënö kalröön aṅ ngam tumlat nö kö i mihëṙöre: ngaich ngatī angū-ö. 25Ngaich ngam Tēv nö vī töfënö kalrööm aṅ ngam tumlat nö kö i mihëṙöre, nup nuā inrē i mihëṙö u, keuheūtlöre inrē töṙeūla ikui ngam tumlat nö kö i mihëṙöre: ngaich meūkö e ngam Tēv nö löök.
26Ngaich ngöṙô ngam Tēv, Tā-a töi vī tarik nösā Hī, nö tösā Hī: ngaich hökngen cha nö minā-aṅv ikui kāḵ el ngam mai ane inrē ikui chehchōn el ngam kuföt, ikui nuā, ikui në tumlat nö ṙòkhöre, ikui töṙeūla chëhen nup ṙameūla nö el tumlat. 27Vī tarik ngaich ngam Tēv nö sāre tī, sā ngam Tēv tī Anga-aṅ nö vīlen ò; kikōnyö kikānö inrē tī Anga-aṅ nö vīlen cha. 28Hakôlò cha ngaich ngam Tēv: ngöṙô inrē ngam Tēv töcha, Mikūönlö yēḵ, ṙūölöre ṙôken inrē, hatöölö ngam tumlat, hayöngö e; minā-aṅv inrē, ikui kāḵ ël ngam mai, ikui chehechōn el kuföt, ikui nup tö-aṅ chehen mahalönyköre el tumlat. 29Ngaich ngam Tēv nö ngöṙô, Yĕh meuk, ngaich Chin kē-ĕkūö nāṅ tö kunchōn tö kulölu ṙòng, nö keuheūtlöre, në aṅkūö ngam tumlat nö ṙòkhöre, keuheūtlöre inrē chōn nup töṙônguvö, chōn tökulölu ṙòng; nyā-aṅkūö nāṅ min anū-ö: 30Keuheūtlöre inrē töfënö kalröön el tumlat, keuheūtlöre chehechōn el kuföt; keuheūtlöre töṙeūla chëhen ikui ngam tumlat, nup tö-unhôṅmu, ngaich Chin kētö nyā-aṅkūö u tönup tö-uhāv kunchōn: ngaich ngatī angū-ö. 31Ngaich ngam Tēv nö keuheūtmatre nö ngëichkö nup tövīlöng tö Ò, yĕh meuk, ngaich löök takô anū-ö. Harap ngaich ök umuh peuheū inrē, tinfūölö sakāmö angū-ö.
Šiuo metu pasirinkta:
Ranehlö 1: CANIBSI
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Car Nicobarese (Re-edited) Bible - TÖHET LĪPÖRE
Copyright © 2010 by The Bible Society of India
Used by permission. All rights reserved worldwide.