GÉNESIS 8
8
Actomjaclha nelha yingmin acvanyam
1Inlhanvocmec nic nat apvalhoc Dios Apyimtalhnamo apmolhama Noé najan aclhamoclhojo asoc alyinatem congne barca yamit aysicsic. Aptimescasquic nic nat alhcajayam Dios Apyimtalhnamo. Invayventac nic nat netin yingmin. 2Inmasquec nic nat acyova yingmin. Inmasquec nic nat acpayvam ayimpejic yingmin. Inmasquec nic nat acmamay. 3Am nic nat coymacac quilhvo. Invayventac nic nat yingmin acvaycmo 150 acnim. 4Invocmec nic nat 7 piltin najan 17 acnim. Inticlhicvoctac nic nat barca yamit aysicsic netin inquilhe acvisay Ararat. 5Invayventac nic nat mocjam yingmin. Invocmec nic nat 10 piltin acvocmo lhama acnim. Inquilyipjongvoctac nic nat ayitsicsaoc inquilhe alvinatem.
6Invocmec nic nat 40 acnim. Apliquic nic nat Noé atong ayitcoc barca yamit aysicsic. 7Aptipcasquic nic nat mama apyayem. Aplhinquic nic nat lhalhma anco. Aptajingvoctac nic nat mataa mama apyayem. Apquitamquic nic nat acyamacoclhilhma. 8Lhama ilhnic nat apvactamo mama apyayem. Aptipcasquic nic nat Noé lhama valhaay, yoyam elanojo acyamacoclhilhma. 9Apvoctac nic nat mocjam valhaay. Am nic nat etaa apyancaclha. Am nic nat coyipjongvoctac lhopactic. Am nic nat coymacac mocjam. Apyasquic nic nat apmic Noé. Aptalhnesquic nic nat valhaay congne barca yamit aysicsic.
10Apquiljalhnec nic nat mocjam Noé acvocmo 7 acnim. Aptipcasquic nic nat mocjam valhaay. 11Intalhnacmoc nic nat apvactamo mocjam valhaay. Apsantac nic nat yamit ava acvisay olivo. Apmaoc nic nat apsanta. Apyasamcoc nic nat Noé acyamaca as nalhpop. 12Apquiljalhnec nic nat mocjam Noé acvocmo 7 acnim. Aptipcasquic nic nat mocjam valhaay. Am nic nat evoctac mocjam valhaay.
13Invocmec nic nat 601 años aptiyascam Noé. Inyamacac nic nat ilhma lhalhma anco. Invocmec nic nat lhama acnim año alhnancoc. Apliquic nic nat ayitsicsic barca yamit aysicsic. Pilapcasquic nic nat Noé apvita acyamay ilhma. 14Invocmec nic nat apcanit piltin najan 27 acnim. Inyamac'ac nic nat lhalhma anco.
15Aptomjac nic nat Dios Apyimtalhnamo apcanya Noé: 16—Ityip sat barca yamit aysicsic lhip najan aptava najan apquitquic najan apnatamcaa. 17Ilantipquis sat aclhamoclhojo asoc lhip apquillhalhmaa. Ilantipquis sat aclhamoclhojo nata najan ninatoscama najan asoc alpilhyevaycam nalhpop. Colyacsic sat lhalhma anco. Colhamiclhac sat ayitcaoc lhalhma anco— nic nat aptomjac.
18Aptipquic nic nat Noé najan aptava najan apquitquic najan apnatamcaa. 19Inquilantipquic nic nat aclhamoclhojo ninatoscama najan asoc navjac najan asoc alpilhyevaycam nalhpop najan nata. 20Apquillanac nic nat Noé apvatnamaclha asoc macmescama Dios. Apcajac nic nat lhama mataa: moclhama actemaclha apnatoscama (najan asoc navjac) najan moclhama actemaclha nata. Apquilvatnec nic nat asoc acmatnam actemaclha macmescama Dios. 21Inticjancasquic nic nat Dios Apyimtalhnamo actemaclha acmasis.
Intomjac nic nat apvalhoc Dios Apyimtalhnamo: —Motvacsejec sat mataa as nalhpop ayinyema apquilsilhnanomap apanco enlhitaoc. Asomcoc mataa alquitamsama apquilvalhoc enlhitaoc ayenmo aptemaclha apquitcoc. Motvacsejec sat mataa aclhamoclhojo asoc aleyvam lhalhma anco. Motniclhejec sat mocjam sictomjaclha alhta.
22Am sat ancoc comascac as nalhpop,
comasquejec sat mayinayclha actic najan acnaclhamalhca.
Comasquejec sat acmajat najan mapsamangi.
Comasquejec sat piyam najan mocjitma.
Comasquejec sat acnim najan alhtaa—
nic nat intomjac apvalhoc Dios Apyimtalhnamo.
Šiuo metu pasirinkta:
GÉNESIS 8: ENHL
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės