KEW 2
2
Alla la Nii Sɛniman jiira lemɛniya mɔɔilu kan
1Pentekoli#2.1 Pentekoli kɔrɔ Taminkunna Sali a ra tamin tele biloolu, waati wo le rɔ ii ka sumanka damira. Pentekoli kɔrɔ gbɛrɛ a ye, a ri fɔ waati mɛn ma Dabundɛɛ. lon sera ka ii bɛɛ ladɛnnin tɛrɛn yɔrɔ kelen dɔ. 2Mankan ba do bɔra sankolo rɔ i kɔrɔ, ka kɛ ikɔ fɔɲɔ ba mankan. Lemɛniya mɔɔilu siini bon mɛn na, mankan ka bon wo lafa. 3Ii ka fen do yen, mɛn kɛni ikɔ ta mɛlɛn. A bɔni nɛnkun na, a ka a rafara ka a maa lemɛniya mɔɔ kelen kelenna bɛɛ la. 4Alla Nii Sɛniman jiira ii kan. Ii bɛɛ kumara ii jɛrɛ yɛ kan gbɛrɛ rɔ ikomin Alla Nii Sɛniman ka ii dɛmɛn kuma la ɲa mɛn ma.
5Wo ka Yahudiya siyaman jiyani tɛrɛn Jerusalɛmu, mɛnilu ye Alla ɲɛsilanɲɛbailu ri. Ii bɔni dunuɲa jamana bɛɛ rɔ. 6Ii ka mankan wo mɛn tuma mɛn na, ii siyaman nara ii ladɛn ka kɛ jama ba ri. Ii seni ye, ii kabannakoyara, ka a masɔrɔn ii kelen kelenna bɛɛ ka ii fa kanilu mɛn woilu da rɔ. 7Ii kabannakoyara kosɛbɛ ka a fɔ i ɲɔɔn yɛ ko: «Mɛnilu ye kumala ɲin, ii bɛɛ tɛ Kalilekailu le ri wa? 8Ɲa ɲuman de an kelen kelenna bɛɛ ye an sinmin kan mɛnna?» 9Nba, Paritikailu tɛrɛ ye jama wo rɔ, a ni Medikailu, Elamukailu, Mesopotamikailu, Judekailu, Kapadɔsikailu, Pɔntikailu, Asikailu, 10Firikikailu, Panfilikailu, Misirankailu a ni Libikailu, mɛnilu siini Sirɛni fan dɔ. Rɔmukailu fanan tɛrɛ ye a rɔ. Doilu tɛrɛ Yahudiyailu le ri. Doilu tun tɛ Yahudiyailu ri, kɔni ii tun da don Yahudiyailu la dina rɔ. 11Kɛrɛtikailu ni Arabuilu fanan tɛrɛ ye jama rɔ ye. Ii bɛɛ ka a fɔ ko: «Alla ra kabannako mɛnilu kɛ, ii ye woilu fɔla an fa wara kanilu rɔ. Nfen kɛni wo rɔ?» 12Ii bɛɛ kabannakoyara ka ɲakɛ, fɔɔ ka i ɲɔɔn maɲininka ko: «Wo kɔrɔ ye nfen di?» 13Kɔni doilu ka lemɛniya mɔɔilu mayɛlɛ ko ii ra dɔlɔ min kojuuya.
Piyɛri ka mɔɔilu kawandi
14Wo le rɔ, Piyɛri ni talibidenba tɔ tan ni kelen ka ii lɔ. Piyɛri ka a kan nabɔ ka a fɔ mɔɔilu yɛ ko: «Ai Yahudiyailu a ni mɔɔ tɔ mɛnilu ye Jerusalɛmu yan bi, ai ye ɲin lɔn ka ai tolo malɔ n kan na. 15Ai ra a fɔ ko mɔɔ ɲinilu ra dɔlɔ min ka ii ɲa laminin. Wo tɛ de! Ai ma a yen? Waleha le ten, mɔɔ ti se dɔlɔ minna ka ii ɲa laminin. 16Kɔni mɛn sɛbɛni Alla la kitabu kɔndɔ Nabi Jowɛli bolo, wo le ra dafa ai ɲana bi. A fɔra ko:
17‹Alla ka a fɔ ko: laban tuma na, n di n Nii Sɛniman lajii adamadenilu bɛɛ kan.
Ai dencɛilu ni ai denmusoilu ri Alla la kuma lase mɔɔilu ma.
Ai la kanbarenilu ri koyenna ikomin sibo.
N di sibo la ai la mɔɔbakɔrɔilu ɲa ma.
18Wo tuma, n di n Nii Sɛniman lajii n na jɔnilu kan, cɛman ni musoman.
Ii ri n na kela lase mɔɔilu ma.
19N di kabannakoilu kɛ sankolo rɔ,
ka tɔɔmasereilu kɛ duukolo kan.
Woilu ri kɛ ikɔ jeli, a ni ta ni a sisiba.
20Tele ri fin ka kɛ dibi ri.
Karo ri wulen ikɔ jeli,
yani Allabatala la lon ba ni se.
Wo ri kɛ lon ba ri, mɛn makabani.
21Wo tuma, mɛnilu wa Allabatala kili dɛmɛn kanma, woilu bɛɛ ri kisi.›»
22«Isirayɛli cɛɛilu, ai tolo malɔ kuma ɲin di. Alla le ka Isa Nasarɛtika kelaya. Alla ra wo yiraka ai ri kabannakoilu ni ko masilannilu ni tɔɔmasereilu kɛ a ka mɛnilu kɛ ai tɛma ikomin ai jɛrɛ ka lɔn ɲa mɛn ma. 23A donda ai bolo. Alla ka a lɔn ka a la ko latɛɛ. Siya gbɛrɛ mɔɔilu ka ai dɛmɛn ka a gbɔngbɔn jiri kan ka a faa. 24A faani kɔ, Alla ka a lawuli ka a hɔrɔya saya tɔrɔya ba ma. Fanka mɛn ye saya la, wo ma se Isa marala. 25Nba, mansa Dawuda ka sɛbɛli do kɛ Isa la ko rɔ kitabu kɔndɔ ko:
‹N ka Allabatala yen n ɲɛ tuma bɛɛ rɔ.
A ye n bolokininma.
Wo rɔ, n tɛ jilanjilanna n na kandanin.
26Wo le kosɔn, n jusu sɛwani kosɛbɛ!
N kan ye sɛwakan de ri.
N faribanku, a tɔni kɛndɛya rɔ ka a la jiiya la a rɔ.
27Baa, i ti sɔn n nii ye to saya dibi rɔ.
I ti sɔn i la Mɔɔ sɛniman su ye mɛn kaburu rɔ ka toli.
28Sila mɛnilu ye bɛnna ɲenemaya jɛrɛ jɛrɛ ma, i ra woilu yiraka n na.
I ri n nawasa sɛwala i ɲakɔrɔ.›»
29Piyɛri ka a fɔ ko: «N badenmailu, n di a fɔ ai yɛ ko an benba Dawuda ra sa. Sika tɛ wo rɔ: a su donda. Hali bi a kaburu ye yan. 30Ka a masɔrɔn Dawuda tɛrɛ nabi le ri, a ka a lɔn ko Alla ka lahidi ta ka a kali a yɛ ko a ri Dawuda bɔnsɔn do lasii a la mansaya siifen dɔ a kɔ. 31Alla tun di mɛn kɛ sini natɔ, Dawuda ka wo yen. Wo rɔ, a kumara Mɔɔ Ɲenematɔmɔnin lawuli ka bɔ saya rɔ ko kan. A ka a fɔ ko a ma to saya dibi rɔ; a su ma mɛn kaburu rɔ ka toli.
32«Alla ka Isa wo le lawuli ka a bɔ saya rɔ. Andeilu bɛɛ ye sereya le ri. 33Alla ka a kɔrɔta ka wa a sii a bolokininma. A ka Alla la Nii Sɛniman sɔrɔn a fa Alla bolo, mɛn lahidi tani tɛrɛ. Isa ka wo lana an ma. Ai ka mɛn yen bi, a ni ai ka mɛn mɛn, Alla la Nii Sɛniman de ka wo kɛ. 34Nba, Dawuda ma kɔrɔta ka wa sankolo rɔ, kɔni ale ka a fɔ kitabu rɔ ko:
Maari Alla ka a fɔ n na Maari yɛ ko:
I sii n bolokininma,
35haan n ye i juuilu bilala i sen kɔrɔ.
36«Ai, Isirayɛlika bɛɛ ka kan ka lɔn ka a lala ɲa mɛn ma ko Isa mɛn ii ka gbɔngbɔn jiri kan, Alla ra kɛ Maari ri a ni Mɔɔ Ɲenematɔmɔnin.»
37Ii ka wo mɛn tuma mɛn na, kuma wo donda ii jusu rɔ kosɛbɛ. Ii ka a fɔ Piyɛri ni talibidenba tɔilu yɛ ko: «An badenmailu, an ye nfen de kɛla sisen?»
38Piyɛri ka ii jabi: «Ai bɛɛ ye tubi ka na Alla ma ka sun ji rɔ Isa Ɲenematɔmɔnin tɔɔ rɔ, wo rɔ, ai la kojuu ri makoto. Wo wa kɛ, Alla ri a la Nii Sɛniman di ai ma. 39Alla ra Alla la Nii Sɛniman ɲin lahidi ta ai ni ai denilu yɛ, a ni mɛnilu ye fɔɔ yɔrɔ jan. An na Maari Alla ri mɛnilu kili, wo lahidi tani woilu bɛɛ yɛ.»
40Piyɛri ka kuma siyaman la wo kan, ka ii kawandi. A ka ii lali kosɛbɛ ko: «Bi mɔɔilu juuman. Ai ye ai jɛrɛ kisi ii ma!» 41Mɛnilu sɔnda a la kuma ma, woilu sunda ji rɔ. Mɔɔ waa sawa ɲɔɔn lara lemɛniya jamailu kan wo lon. 42Ii tunadiyani tɛrɛ ye ii tolo malɔla talibidenbailu la karankan na, ka i ɲɔɔn nadɛn badenmaya rɔ, ka dɔɔnnin kɛ i ɲɔɔn fɛ, ka Alla matara.
Lemɛniya mɔɔilu la duɲɔɔnya
43Talibidenbailu tɛrɛ ye kabannako siyaman ni tɔɔmasere siyaman kɛla. Mɔɔilu bɛɛ silanni tɛrɛ wo rɔ. 44Lemɛniya mɔɔilu bɛɛ bɛnni tɛrɛ. Mɔɔ si ma sɔn ka a bolofenilu kɛ a kelen ta ri. 45Wo rɔ, ii tɛrɛ ye ii la duuilu ni ii bolofenilu sanna, ka wo wodi di dɛsɛbatɔ mɛnilu ye ii tɛma ma. 46Lon lon, ii tora ii ladɛnna Allabatobonba jin kɔndɔ. Ii la miriya tɛrɛ ye ikomin mɔɔ kelen ta. Ii tɛrɛ ye buru latalanna ii ɲɔɔnna ii la bonilu la. Ii ka dɔɔnnin kɛ, ka i ɲɔɔn sɔ kosɛbɛ. Ii ka wo bɛɛ kɛ jusu lasɛwa ba a ni jusu lagbɛ rɔ. 47Ii tɛrɛ ye Alla tandola waati bɛɛ. Ii diyara so kɔndɔ mɔɔilu bɛɛ yɛ. Lon lon, Allabatala tɛrɛ ye mɔɔilu kisila ka woilu la lemɛniya mɔɔilu la dɛkuru kan.
Šiuo metu pasirinkta:
KEW 2: AKS
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/