Yoˇhaˬ 4
4
Saˬmaˬliˆ zaˬ miˬ zaˬ tiˬ gʼaˬ-ahˇ Yeˬsuˇ tahˬ puˬ-euˬ
1Yoˇhaˬ-euˬ mehˬ nah caw teh-eu deuˬ myaˆ maˬ tseˇ, Yeˬsuˇ-euˬ mehˬ nah caw teh-awˇ Yeˬsuˇ neh iˇ cuꞈ bi shawˇ nehˬ-euˬ tsawˇ haˬ deuˬ myaˬ dzehˬ-eu gaˇ kawˆ, Paˬ liˬ sehˇ deuˬ-ahˇ gaˬ keuˆ leˇ-euˬ meh. 2(Aˬ diˇ aˬ maˇ ehˇ naˇ, Yeˬsuˇ aˬ yawꞈ-euˬ mawˇ do iˇ cuꞈ shawˇ nehˬ-euˬ maˬ ngeuˇ-a. Aˬ yawꞈ-euˬ zaˬ lahˇ deuˬ shawˇ nehˬ-eu tehꞈ meh.) 3Aˬ cawˬ kʼoeˇ loꞈ-ehˇ ehˇ-eu Yeˬsuˇ ya gaˬ ngeh, Yuˇdaˆ miˇ kʼahˬ-ahˇ neh doˆ-iˇ-awˇ, Gaˬliˬlehˇ miˇ kʼahˬ-ahˇ gʼoꞈ leˇ-euˬ meh. 4Aˬ yawꞈ gʼoꞈ leˇ ngeh, Saˬmaˬliˆ miˇ kʼahˬ paw neh gʼoꞈ leˇ-euˬ meh.
5Saˬmaˬliˆ miˇ kʼahˬ laꞈ kʼoeˇ, Suˇkaˬ lehˇ kuˇ-eu meuˬ tiˬ meuˬ-ahˇ aˬ yawꞈ iˇ keuˆ-euˬ meh. Meuˬ kʼoeˇ meuˬ-aˬ, Yaˬkoˆ neh aˬ yawꞈ-euˬ aˬ li Yoˇsehˆ-ahˇ biꞈ tsehˆ nehˬ-euˬ deh yaˇ miˇ tsaˬ dawˬ peh jaˆ-eu meh. 6Yaˬkoˆ-euˬ lah duˬ kʼoeˇ gaˇ jaˆ-eu meh. Yeˬsuˇ gaˇ ma cah doeˇ laꞈ-euˬ miˇ neh, lah duˬ dawˬ peh nuiˇ-euˬ meh. Kʼoeˇ-aˬ, nah loˆ ceh ngeh yamˬ meh.
7Saˬmaˬliˆ tsawˇ haˬ zaˬ miˬ zaˬ tiˬ gʼaˬ iˇ cuꞈ kʼawꞈ le gaˇ, “Ngaˬ-ahˇ iˇ cuꞈ ui cuiˆ bi dawˇ laꞈ sheˇ” lehˇ Yeˬsuˇ ehˇ nehˬ-euˬ meh. 8(Aˬ yawꞈ-euˬ zaˬ lahˇ deuˬ-aˬ, dzaˬ dzaˬ dawˇ dawˇ zeuˇ-eu gʼaˇ duˬ meuˬ-ahˇ le uˇ-euˬ meh.)
9Zaˬ miˬ zaˬ kʼoeˇ gʼaˬ ehˇ-eu, “Nawˇ-aˬ, Yuˇdaˆ tsawˇ haˬ meh. Ngaˇ-aˬ, Saˬmaˬliˆ tsawˇ haˬ ma. Nawˇ ngaˬ-ahˇ aˬ joˆ-ehˇ iˇ cuꞈ shaˇ dawˇ kʼmˬ-eu nya.” (Yuˇdaˆ tsawˇ haˬ deuˬ-aˬ, Saˬmaˬliˆ tsawˇ haˬ deuˬ-ahˇ nui daˆ daˆ-awˇ, kʼmˬ maˬ hawˇ-eu ni tseuˆ tiˬ gaˇ maˬ taꞈ nahˇ-a.)
10Yeˬsuˇ ehˇ-eu, “Miˬyehˇ neh biꞈ leꞈ-euˬ jeˬ hawˇ-eu nawˬ-ahˇ iˇ cuꞈ shaˇ dawˇ-eu gʼaˬ-ahˇ nawˇ siˬ nya law nmˇ-aˬ, nawˇ aˬ yawꞈ-ahˇ iˇ cuꞈ shaˇ dawˇ-awˇ, aˬ yawꞈ nawˬ-ahˇ dehꞈ-eu saꞈ laˇ biꞈ-eu iˇ cuꞈ bi dawˇ laꞈ tehꞈ-a.”
11Zaˬ miˬ zaˬ kʼoeˇ gʼaˬ ehˇ-eu, “Saˬ laˬ-oˇ, nawˇ iˇ cuꞈ kʼawꞈ doˆ-eu gʼaˇ duˬ iˇ cuꞈ bahˬ keuˆ maˬ ahˇ-eu uˬ taꞈ, lah duˬ heu duˬ naꞈ dui dui-eu meh. Dehꞈ-eu saꞈ laˇ biꞈ-eu iˇ cuꞈ kʼoeˇ nawˇ aˬ gaˇ kʼawꞈ laˬ-iˇ-eu duˇ teˬ. 12Aˬ dui-euˬ aˬ poeˬ Yaˬkoˆ neh lah duˬ heu duˬ nga maꞈ-ahˇ biꞈ taˬ yaꞈ-euˬ meh. Aˬ yawꞈ maˬ ehˇ, aˬ yawꞈ-euˬ aˬ li deuˬ maˬ ehˇ, aˬ yawꞈ-euˬ jeˬ zaˬ deuˬ maˬ ehˇ, dawꞈ tawˆ luꞈ lah duˬ heu duˬ-ahˇ dawˇ-euˬ meh. Nawˇ Yaˬkoˆ naˆ maˬ tseˇ huiˬ dzehˬ ma lehˇ ehˇ mawꞈ-eu maˬ ngeuˇ-eu paˬ. Ngeuˇ te loˇ.”
13Yeˬsuˇ ehˇ-eu, “Iˇ cuꞈ heu dawˇ-eu tsawˇ haˬ iˇ cuꞈ paˇ mehꞈ laˇ tehꞈ-a. 14Ehˇ kʼawꞈ, ngaˬ neh biꞈ-euˬ iˇ cuꞈ dawˇ-eu tsawˇ haˬ-aˬ, iˇ cuꞈ mehꞈ laˇ-eu maˬ paˇ baw-aˇ. Ngaˬ neh bi dawˇ-euˬ iˇ cuꞈ kʼoeˇ-aˬ, aˬ yawꞈ laꞈ kʼoeˇ dehꞈ-eu saꞈ laˇ biꞈ-eu iˇ cuꞈ yoeˇ doˆ-eu iˇ cuꞈ iˇ byoe pyeuꞈ-iˇ-awˇ, mˬ maˬ maˬ byaˆ zaˇ ziˇ dehꞈ-eu jeˬ aˬ yawꞈ-ahˇ biꞈ tehꞈ-a.”
15Zaˬ miˬ zaˬ kʼoeˇ gʼaˬ ehˇ-eu, “Saˬ laˬ-oˇ, ngaˇ iˇ cuꞈ mehꞈ laˇ-eu maˬ paˇ baw-ehˇ, heu gaˇ oe-awˇ iˇ cuꞈ maˬ paˇ ya kʼawꞈ le ni, nawˬ-euˬ iˇ cuꞈ kʼoeˇ ngaˬ-ahˇ bi dawˇ laꞈ-awˬ.”
16Yeˬsuˇ ehˇ-eu, “Nawˬ-euˬ kʼaˬ dzeˇ zaˬ kuˇ laˬ leˇ-awˇ oe-awˬ.”
17Aˬ yawꞈ ehˇ-eu, “Ngaˇ kʼaˬ dzeˇ zaˬ maˬ baw.”
Yeˬsuˇ ehˇ-eu, “Nawˇ kʼaˬ dzeˇ zaˬ maˬ baw lehˇ ehˇ-eu-aˬ, kʼaˇ ngeuˇ-eu loꞈ-ehˇ dawˇ coe ni ehˇ-eu meh. 18Nawˇ-aˬ, ngaˬ zahˇ iˇ paˇ gʼaˬ-euˬ zaˬ miˬ zaˬ tiˬ gʼaˬ pyeuꞈ-awˇ, nymˬ-mˇ nawˬ nehˬ-ehˇ jawˇ luꞈ-eu gʼaˬ kʼawꞈ, nawˬ-euˬ kʼaˬ dzeˇ zaˬ maˇ maˇ ni maˬ ngeuˇ-a. Nawˇ ngaˬ-ahˇ ehˇ-eu teu tsaˬ meh.”
19Zaˬ miˬ zaˬ kʼoeˇ gʼaˬ ehˇ-eu, “Saˬ laˬ-oˇ, nawˇ-aˬ Miˬyehˇ gʼaˇ duˬ ngehˬ dah-eu tsawˇ haˬ ngaˇ. 20Nga maꞈ Saˬmaˬliˆ tsawˇ haˬ-euˬ aˬ poeˬ aˬ bawˇ deuˬ gawˬ jawˬ heu jawˬ kʼoeˇ taˆ Miˬyehˇ-ahˇ uˬ duˬ tahˬ yaꞈ-euˬ meh. Ehˇ kʼawꞈ, Miˬyehˇ-ahˇ uˬ duˬ tahˬ-eu-aˬ, Yeˬluˇsaˬlehˬ meuˬ-ahˇ tahˬ-eu tsaˬ meh lehˇ naw maꞈ Yuˇdaˆ tsawˇ haˬ deuˬ ehˇ-eu meh.”
21Yeˬsuˇ aˬ yawꞈ-ahˇ ehˇ nehˬ-eu, “Zaˬ miˬ aˬ buˇ-oˇ, ngaˇ ehˇ gaˇ jah-awˬ. Gawˬ jawˬ heu jawˬ kʼoeˇ taˆ maˬ ehˇ, Yeˬluˇsaˬlehˬ meuˬ-ahˇ maˬ ehˇ, Aˬda-ahˇ uˬ duˬ maˬ paˇ tahˬ-eu aˇ nah keuˆ le tehꞈ-a. 22Naw maꞈ Saˬmaˬliˆ tsawˇ haˬ deuˬ-aˬ, yawˬ ha uˬ duˬ tahˬ luꞈ-eu gʼaˬ-ahˇ yaw duˬ duˬ-ehˇ maˬ siˬ nya-a. Aˬ jeˬ miˇ neh ehˇ naˇ, ka kʼoꞈ-eu jeˬ Yuˇdaˆ tsawˇ haˬ laꞈ kʼoeˇ neh doˆ le-euˬ meh. 23Ehˇ kʼawꞈ, Miˬyehˇ-euˬ Yaw sahˇ-euˬ baoˬ baˬ da neh, Aˬda-ahˇ siˬ duˬ-eu laꞈ kʼoeˇ uˬ duˬ tahˬ-awˇ, maˇ maˇ ni aˬ yawꞈ geuꞈ mawꞈ-eu uˬ duˬ tahˬ-eu jeˬ mˇ byah nya-eu aˇ nah keuˆ le luꞈ meh. Nymˬ-mˇ kʼawꞈ keuˆ le taˬ-euˬ meh. 24Miˬyehˇ-aˬ, Yaw sahˇ meh. Aˬ yawꞈ-euˬ Yaw sahˇ-euˬ baoˬ baˬ da neh tehꞈ-ehˇ, aˬ yawꞈ-ahˇ siˬ duˬ-awˇ uˬ duˬ tahˬ nya-eu meh.”
25Zaˬ miˬ zaˬ kʼoeˇ gʼaˬ ehˇ-eu, “(Ka li lehˇ kuˇ-eu) Meˬsiˇya oe meh lehˇ ngaˇ siˬ nya ma. Aˬ yawꞈ oe keuˆ ngeh, aˬ dui-ahˇ yawˬ jeˬ na luꞈ ehˇ mehˬ nehˬ laꞈ tehꞈ-a.”
26Yeˬsuˇ ehˇ-eu, “Nymˬ-mˇ nawˬ-ahˇ dawˬ ngehˬ cawˬ luꞈ-eu ngaˇ-aˬ, aˬ yawꞈ ma.”
27Kʼoeˇ ngeh, Yeˬsuˇ-euˬ zaˬ lahˇ deuˬ gʼoꞈ keuˆ le-awˇ, aˬ yawꞈ zaˬ miˬ zaˬ tiˬ gʼaˬ nehˬ-ehˇ dawˬ ngehˬ cawˬ luꞈ gaˇ ya mawˇ ngeh, zahˬ leˇ-euˬ meh. Ehˇ kʼawꞈ aˬ yawꞈ maꞈ tiˬ gʼaˬ-iˬ zaˬ miˬ zaˬ kʼoeˇ gʼaˬ-ahˇ “Nawˇ aˬ jeˬ loˬ-eu nya” lehˇ maˬ naˇ haˬ-a. Yeˬsuˇ-ahˇ kʼawꞈ, “Nawˇ aˬ jeˬ miˇ neh aˬ yawꞈ-ahˇ dawˬ ngehˬ cawˬ te” lehˇ maˬ ehˇ nehˬ-a.
28Kʼoeˇ naˇ, zaˬ miˬ zaˬ kʼoeˇ gʼaˬ aˬ yawꞈ-euˬ miˇ tsaˬ oeˬ lahˬ taˬ yaꞈ-awˇ, meuˬ-ahˇ gʼoꞈ leˇ-awˇ, aˬ cawˬ-ahˇ heu loꞈ-ehˇ ehˇ gaˬ leˇ-euˬ meh. 29“Ngaˬ neh kʼaˇ mˇ dzeuˇ yaꞈ-euˬ yawˬ jeˬ na luꞈ ehˇ mehˬ laꞈ nya-eu tsawˇ haˬ tiˬ gʼaˬ-ahˇ haw le sheˇ. Meˬsiˇya maˬ ngeuˇ nga lehˇ maˬ ehˇ nya luꞈ-a.” 30Kʼoeˇ miˇ neh, aˬ yawꞈ maꞈ meuˬ-ahˇ neh doˆ-iˇ-awˇ, Yeˬsuˇ jawˇ gaˇ iˇ-euˬ meh.
31Kʼoeˇ ngeh, zaˬ lahˇ deuˬ Yeˬsuˇ-ahˇ ehˇ-eu, “Saˬ laˬ-oˇ, tiˬ jeˬ paˬ dzaˬ laˇ-awˬ.”
32Ehˇ kʼawꞈ, Yeˬsuˇ ehˇ-eu, “Naw maꞈ maˬ siˬ nya-eu dzaˬ-eu jeˬ ngaˇ dzaˬ gʼaˬ-euˬ ma.”
33Kʼoeˇ ngeh, zaˬ lahˇ deuˬ tiˬ gʼaˬ tiˇ gʼaˬ ehˇ-eu, “Tsawˇ haˬ tiˬ gʼaˬ na aˬ yawꞈ-ahˇ tiˬ jeˬ paˬ yuˇ leꞈ-awˇ bi dzaˬ-euˬ ngeuˇ-eu paˬ.”
34Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˬ-euˬ dzaˇ-aˬ, ngaˬ-ahˇ kʼehˇ gʼeh leꞈ-euˬ gʼaˬ-euˬ ehˇ dawˬ naˇ haˬ-awˇ aˬ yawꞈ neh bi mˇ laꞈ-euˬ gaˇ-ahˇ mˇ jiˇ-eu jeˬ pyeuꞈ-eu ma. 35‘Ba la oeˬ siˬ dzeuˇ naˇ cehˇ yehˬ-eu’ lehˇ ehˇ-eu dawˬ daˬ jaˆ-eu maˬ ngeuˇ loˇ. Ehˇ kʼawꞈ, cehˇ yaˇ-ahˇ yaw muiˬ paˬ-ehˇ haw sheˇ lehˇ, naw maꞈ-ahˇ ngaˇ ehˇ-eu ma. Cehˇ myah laˇ-awˇ yehˬ yamˬ tsaˬ laˇ taˬ-euˬ meh. 36Cehˇ yehˬ-eu gʼaˬ-ahˇ Miˬyehˇ aˇ poeˬ biꞈ-awˇ, mˬ maˬ maˬ byaˆ zaˇ ziˇ dehꞈ-eu jeˬ gʼaˇ duˬ cehˇ laˆ luiˆ-eu meh. Kʼoeˇ miˇ neh, siˬ yoeˬ sehˬ-eu gʼaˬ hawˇ-eu cehˇ yehˬ-eu gʼaˬ tiˬ kawˆ loꞈ-ehˇ laˬ kʼaˬ ya cehˇ tehꞈ-a. 37‘Tiˬ gʼaˬ sehˬ-awˇ tiˬ gʼaˬ yehˬ-eu’ lehˇ dawˬ daˬ daˬ taˬ-euˬ kʼoeˇ tsaˬ meh. 38Naw maꞈ neh maˬ mˇ taˬ-euˬ cehˇ yaˇ-ahˇ cehˇ bi yehˬ-eu lehˇ, naw maꞈ-ahˇ ngaˇ kʼehˇ gʼeh-euˬ ma. Aˬ cawˬ neh mˇ doˆ taˬ-euˬ gaˇ naw maꞈ ya yehˬ dzaˬ-eu meh.”
39Meuˬ kʼoeˇ meuˬ-ahˇ jawˇ-eu tsawˇ haˬ gʼawˬ mya ni Yeˬsuˇ-ahˇ jah laˇ-euˬ meh. Aˬ jeˬ miˇ neh ehˇ naˇ, “Ngaˬ neh kʼaˇ mˇ dzeuˇ yaꞈ-euˬ yawˬ jeˬ na luꞈ a yawꞈ ngaˬ-ahˇ ehˇ mehˬ laꞈ nya eu nga” lehˇ, zaˬ miˬ zaˬ kʼoeˇ gʼaˬ aˬ yawꞈ maꞈ-ahˇ ehˇ nehˬ-euˬ meh. 40Saˬmaˬliˆ tsawˇ haˬ deuˬ aˬ yawꞈ jawˇ gaˇ oe ngeh, aˬ yawꞈ maꞈ nehˬ-ehˇ tiˬ kʼehˬ jawˇ nehˬ laꞈ lehˇ Yeˬsuˇ-ahˇ shaˇ-eu miˇ neh, nyiˬ nah jawˇ nehˬ-euˬ meh.
41Yeˬsuˇ-euˬ dawˬ-ahˇ paˇ ya gaˬ-euˬ miˇ neh, tsawˇ haˬ gʼawˬ mya ni paˇ jah laˇ-euˬ meh. 42Kʼoeˇ naˇ, tsawˇ haˬ kʼoeˇ deuˬ zaˬ miˬ zaˬ kʼoeˇ gʼaˬ-ahˇ heu loꞈ-ehˇ ehˇ nehˬ-euˬ meh. “Nawˇ ehˇ-eu miˇ neh nga maꞈ jah-eu maˬ ngeuˇ. Nga maꞈ-euˬ naˬ bawˇ aˬ yawꞈ-euˬ dawˬ ya gaˬ-euˬ miˇ neh jah-awˇ, aˬ yawꞈ-aˬ, aˬ diˇ aˬ maˇ miˇ tsaˬ zaˬ-ahˇ ka kʼoꞈ-eu gʼaˬ pyeuꞈ-eu gaˇ kawˆ nga maꞈ siˬ duˬ-euˬ ma.”
Yaw huiˬ yaw mahˇ tiˬ gʼaˬ-euˬ aˬ li-ahˇ Yeˬsuˇ laˆ taˬ nehˬ-euˬ
43Kʼoeˇ gaˇ nyiˬ nah jawˇ gʼaˬ ngeh, Gaˬliˬlehˇ miˇ kʼahˬ-ahˇ Yeˬsuˇ iˇ-euˬ meh. 44Aˬ jeˬ miˇ neh ehˇ naˇ, “Miˬyehˇ gʼaˇ duˬ ngehˬ dah-eu tsawˇ haˬ-ahˇ, yawˬ ha-euˬ miˇ kʼahˬ laꞈ kʼoeˇ aˬ cawˬ yaw zeu maˬ baw-a” lehˇ, Yeˬsuˇ aˬ yawꞈ neh ehˇ taˬ-euˬ dawˬ jaˆ-eu meh. 45Aˬ yawꞈ Gaˬliˬlehˇ miˇ kʼahˬ-ahˇ iˇ keuˆ ngeh, kʼoeˇ gaˇ jawˇ-eu tsawˇ haˬ deuˬ aˬ yawꞈ-ahˇ laˬ kʼaˬ tiˬ cehˇ ha-eu meh. Aˬ jeˬ miˇ neh ehˇ naˇ, aˬ yawꞈ maꞈ Yeˬluˇsaˬlehˬ meuˬ-ahˇ Baˬ saˬ kaˬ bawˬ-iˬ gʼeh gaˇ le-awˇ, bawˬ-iˬ gʼeh luꞈ-eu aˇ yamˬ laꞈ kʼoeˇ Yeˬsuˇ neh kʼaˇ mˇ-euˬ jeˬ-ahˇ ya mawˇ yaꞈ-euˬ meh.
46Kʼoeˇ naˇ, Yeˬsuˇ-aˬ, aˬ yawꞈ neh iˇ cuꞈ-ahˇ aˬ gaꞈ dzaˇ uiˇ bi pyeuꞈ-iˇ-euˬ meuˬ pyeuꞈ-eu Gaˬliˬlehˇ miˇ kʼahˬ Gaˬnaˬ meuˬ-ahˇ gʼoꞈ-iˇ-euˬ meh. Sahˬ paˬ sahˬ ma-euˬ gaˇ mˇ luꞈ-eu yaw huiˬ yaw mahˇ tiˬ gʼaˬ kʼoeˇ gaˇ jawˇ luꞈ-eu meh. Aˬ yawꞈ-euˬ aˬ li-aˬ, Gaˬbeˬneˬoˬ meuˬ-ahˇ naˇ luꞈ-eu meh. 47Yeˬsuˇ Yuˇdaˆ miˇ kʼahˬ-ahˇ neh Gaˬliˬlehˇ miˇ kʼahˬ-ahˇ oe keuˆ-euˬ gaˇ kawˆ yaw huiˬ yaw mahˇ kʼoeˇ gʼaˬ ya gaˬ ngeh, Yeˬsuˇ jawˇ gaˇ le-awˇ, Yeˬsuˇ-ahˇ Gaˬbeˬneˬoˬ meuˬ-ahˇ oe-awˇ, shiˇ leˇ luꞈ-eu aˬ yawꞈ-euˬ aˬ li-ahˇ laˆ taˬ nehˬ laꞈ lehˇ shaˇ leˇ-euˬ meh. 48Yeˬsuˇ aˬ yawꞈ-ahˇ ehˇ nehˬ-eu, “Kʼaˆ jeˬ-ahˇ gʼeh-eu bi siˬ bi mawˇ-eu jeˬ hawˇ-eu zahˬ leˇ paˬ-ehˇ gʼeh-eu jeˬ maˬ ya mawˇ naˇ, naw maꞈ maˬ jah-a.”
49Yaw huiˬ yaw mahˇ kʼoeˇ gʼaˬ Yeˬsuˇ-ahˇ ehˇ-eu, “Sahˬ paˬ-oˇ, ngaˬ-euˬ zaˬ maˬ shiˇ mi naˆ-ehˇ tiˬ poˆ oe nehˬ laꞈ-awˬ.”
50Yeˬsuˇ aˬ yawꞈ-ahˇ ehˇ nehˬ-eu, “Gʼoꞈ-iˇ-awˬ. Nawˬ li jawˇ saˇ doˆ laˇ gʼaˬ-euˬ meh.”
Tsawˇ haˬ kʼoeˇ gʼaˬ Yeˬsuˇ-euˬ dawˬ-ahˇ jah-awˇ, gʼoꞈ-iˇ-euˬ meh. 51Aˬ yawꞈ iˇ kahˇ gʼoꞈ-iˇ luꞈ ngeh, aˬ yawꞈ-euˬ zaˬ kʼaˆ deuˬ aˬ yawꞈ-ahˇ tahˬ puˬ laˇ-awˇ, “Nawˬ li jawˇ saˇ doˆ laˇ luꞈ meh” lehˇ tsaꞈ gaˬ laˇ-euˬ meh.
52“Ngaˬ li maˬ gaˇ laˇ-euˬ aˬ geu yamˬ-ahˇ-a” lehˇ aˬ yawꞈ naˇ haˬ ngeh, “Miˇ nah nah gʼahˇ paw naˬ liˬ tiˬ laꞈ kʼoeˇ yamˬ-ahˇ pyaˬ-eu tsehˆ leˇ-euˬ meh” lehˇ aˬ yawꞈ maꞈ ehˇ-eu meh. 53Yeˬ suˇ neh aˬ yawꞈ-ahˇ “Nawˬ li jawˇ saˇ doˆ laˇ gʼaˬ-euˬ meh” lehˇ ehˇ nehˬ-euˬ kʼoeˇ, aˇ yamˬ kʼoeˇ yamˬ nyiˬ paˆ-ehˇ tsaˬ-eu gaˇ kawˆ, aˬ da kʼoeˇ gʼaˬ siˬ duˬ-euˬ meh. Kʼoeˇ miˇ neh, aˬ yawꞈ hawˇ-eu aˬ yawꞈ-euˬ miˬ sawˇ zaˬ dawˬ tawˆ luꞈ, Yeˬsuˇ-ahˇ jah laˇ-euˬ meh.
54Heu-aˬ, Yeˬsuˇ Yuˇdaˆ miˇ kʼahˬ-ahˇ neh Gaˬliˬlehˇ miˇ kʼahˬ-ahˇ gʼoꞈ laˇ gʼaˬ miˇ tsa mˇ-euˬ, kʼaˆ jeˬ-ehˇ gʼeh-eu bi siˬ bi mawˇ-eu nyiˬ hmˬ tiˬ hmˬ pyeuꞈ-eu meh.
Šiuo metu pasirinkta:
Yoˇhaˬ 4: AHK
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Akha Bible Revision (Latin Script) © Thailand Bible Society, 2011.