Lut 4
4
Bowa:sate Lut gwaliyana gi
1A:pite Bowa:sate wete gwaleminiyana saba baiga ta ogosa tepama a:mama manayana. Amale Elimelek auwanapa dalagi enoba Bowa:sate lope layana dalagi pa:yana. A:mala Bowa:sate oba dima a:negelayana, na:pe sopodalagi, a: ma:mama pa:te mana. A:pite obate wete a:mama manayana.
2A:pite Bowa:sate a:ma baiga apeyana dala 10 iyata: alolote a:mama mitata gi danayana. Obai waelabega a mitatiyala, 3Bowa:sate oba auwanapa dalagi anayana, Naomi Mowa:b wale a gwama pa:yana, enobala oba iwiminano sa: auwanapa lumagi Elimelekepe a:i ewadolamalale. 4Enobala na: iwalelalowa a: ma:ma gi itawa elamalale. Enobala a: iwiminamalelona a: ma:mai mitatilina dalimunu sosoko palale wisale egelamalelo. Ameta a: pa:pa iwiminamalelona, a: la, gi ase ma:ma dalagipe lopala alela gima a: enoba lopanapa lumagi, a:pite na: a: gwalama:nowa.
A:ma dalagi gilala wisa eladele layana, ne wisale egelamalowa.
5Bowa:sate layana, sa:lebega, ameta Naomidila ma:ma a:i wisale egelelona tepala a: Mowa:banapa gaiya Lut iyata: wisale gwalilamalelo. Enobala a:ma a:ite ya:ma kaoyana dalagipe udaga gobala dololamalelo.
6A:ma dalagi Bowa:sape gilalama wisa eladele a:negelayana, ya:ma gi iwalelalowa, na: ya:ma a:i pa:pa egelamalowa, dololo, gi ase na:pe sege bapite pa:pa ya:ma a:i apeyana eda:madili. Enobala na: ya:ma a:i pa:pa egelamalowa, a: e wisale ege.
7 #
Diu 25:9 A:ma tepala Islaelana lumumunu eda: gi gobala, lopala ewada: gi gwama giwitada: gi guwila a:ma gi kakalemina gima, ewadolona lumagite obape a:i lopala menagi pikimite wisale egelelona lumagidima atamalelo. Ya:ma a:na:mina gile Islaelana lumate itawa eda:madili a:na:pi ya:ma gi a gibalama ewena.
8Enobala a:ma dalagite Bowa:sadima a:negelayana, a: e wisale ege, a:ma tepala obate obape a:i lopala pikimite Bowa:sadima atayana.
9A:pite amale Bowa:sate a:mala ediliyana baiga apeyana dalata: gwama eta:mi dalata:dima a:negelayana, ama kadepala ne Naomidile Elimeleketa: obape kakasi saki Kiliyonota: Mayalonota: obaimunu lopala waelabega alolowamena gima da: gibabana eda:madelewa. 10#Diu 25:5,6A:pite gwama Mowa:b wanapa susa:gi Lut, Mayalonope gaiya, obate na:pe susa:gi elelo, ma:ma gile ma:ma kaoyana dalagipe lopalata: udagata:le obape gagite pa:pa sawedelamadili obape baiga ya:bila. Ama kadepala asemite ma:ma gima da: gibabana eda:madelewa.
11Amale gaganabina dalata: a:mala ediliyana dala eta:mita: a:nege laiyana, eya gibalama, sa: enobai gibabana, LODope amowa gite a:pe susa:gidima pa:lamalelo, Lesuleta: Liyata: a:na:pi elamalelo. Obaite Ya:ikobidima sege waelabega aminiyana. Gwama ma:ma Beteliyem baigala Epalat wala a: ya:biya:bida:napa lumagi elamalelo, gwama luma waelabegaite a: gi itawada: bapi eda:madili. 12A:pite LODote ma:ma apela kanika:napa susa:gile a: dima apulamalelona segete Yudata: Tamata: obaimunu pulagi, Pelesepe noneya apeda: eda:madili.
Da:ibidipe sokatena luma gi
13Amale Bowa:sate Lut obape susa:gima gwalite weleyana obape genamama. A:pite LODope amowa gite oba dima peloyala obate oposoma ete dalagi pulagi amiyana. 14Eta:mi atote Naomidima a:nege laiyana, LOD ewamo, gi ase obate ama kadepala a: dima a:iwa a atawena, obate a: sa:lele tilamalelo. Gi awapa ya:ma pulagi Islaelana luma waelabegate oba gi itawada: bapi edelamadili. 15Gwama a:pe apilate a: awe iwalelale iwaleladele kabiginapa gi a a:na:miwina a: dima, a:na:pi 7 segete a: dima a:na:da:minamadilina gi kowabisege, gwama obate amapula a: dima a:iwa a atawena, obate a: dima kanika:napa kanika:wa atamalelo a:pite a:pe kabeyagi tepala a: sa:lele tilamalelo.
16A:pite Naomi a:ma pulagi kowabi gwalite gaowamiyana begamina gima. 17A:ma pulagi kowabi auwala ediliyana atote obape gagi Obed omoniyana. Amale obaite luma waelabega daniyana a:ma pulagite Naomidima eyana gi. Obed obate Yesipe wawa eyana. Yesi enoba Da:bidipe wawa.
18Ma:ma enoba Pelesepe sokate.
Peles enoba Eselonope wawa,
19Eselon enoba La:mipe wawa,
La:m enoba Aminadabipe wawa,
20Aminadab enoba Nayasonope wawa
Nayason enoba Salmonope wawa
21Salamon enoba Bowa:sape wawa,
Bowa:s enoba Obed pe wawa,
22Obed enoba Yesipe wawa
a:pite Yesi enoba Da:ibidipe wawa.
Šiuo metu pasirinkta:
Lut 4: GBOTP
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Gogodala Bible Translation Project © Bible Society of Papua New Guinea, 2016.