VITOUULA 5
5
Adam tubula liliusi
(1 Lil 1.1-4)
1Baisa yagasi matausina Adam tubula. (Avai tuta Yaubada eibubuli mina watanawa ibubuli makawala kala gigisa titoulela. #Vit 1.27-28 2Matauna ibubuli matausina tau deli vivila, ikabwaili matausina e idoki yagasi “Tomota.”) #Md 19.4; Mk 10.6 3Avai tuta Adam kala taitu iboda 130, matauna iuni guditala latula tau magudina kala gigisa makawala titoulela, e ivabu yagala Seti. 4E igau Adam isisu tuvaila 800 taitu. E matauna tuvaila iunai litula, 5e kala taitu komwaidona iboda 930 matauna ikaliga.
6Avai tuta Seti kala taitu iboda 105, matauna iuni guditala latula tau, yagala Inosi, 7e igau isisu tuvaila 807 taitu. E matauna tuvaila iunai litula, 8e kala taitu komwaidona iboda 912 matauna ikaliga. 9Avai tuta Inosi kala taitu iboda 90, matauna iuni guditala latula tau, yagala Kenani, 10e isisu tuvaila 815 taitu. E matauna tuvaila iunai litula, 11e kala taitu komwaidona iboda 905, matauna ikaliga. 12Avai tuta Kenani kala taitu iboda 70, matauna iuni guditala latula tau, yagala Maalaleli, 13e isisu tuvaila 840 taitu. E matauna tuvaila iunai litula, 14e kala taitu komwaidona iboda 910 matauna ikaliga.
15Avai tuta Maalaleli kala taitu iboda 65, e matauna iuni guditala latula tau, yagala Yaredi. 16E isisu tuvaila 830 taitu. E matauna tuvaila iunai litula, 17e kala taitu komwaidona iboda 895 matauna ikaliga.
18Avai tuta Yaredi kala taitu iboda 162 matauna iuni guditala latula tau, yagala Inoki, 19e isisu tuvaila 800 taitu. E matauna tuvaila iunai litula, 20e kala taitu komwaidona iboda 962 matauna ikaliga.
21Avai tuta Inoki kala taitu iboda 65 matauna iuni guditala latula tau, yagala Metusela. 22E Inoki isisu tuvaila 300 taitu, e iveyawa deli Yaubada. E matauna tuvaila iunai litula; 23matauna kala taitu komwaidona iboda 365. 24Matauna itugwali la tuta komwaidona deli wala Yaubada, e oluvi matauna itamwaumakava wala, paila Yaubada bogwa leikau matauna leilau. #Ib 11.5; Yd 14
25Avai tuta Metusela kala taitu iboda 187, matauna iuni guditala latula tau, yagala Lameki, 26e isisu tuvaila 782 taitu. E matauna tuvaila iunai litula 27e kala taitu komwaidona iboda 969 matauna ikaliga.
28Avai tuta Lameki kala taitu iboda 182, matauna iuni guditala latula tau, 29e ikaibiga kawala, “Metoya pwaipwaia makwaina, makwaina goli Guyau eibuloti e gwadi magudina igau bikiminum komwaidona kada mmayuyusi metoya komwaidona da pwaitukulasi,” mapaila ivabu yagala Nowa. 30Lameki isisu tuvaila 595 taitu. Matauna tuvaila iunai litula 31e kala taitu komwaidona iboda 777 matauna ikaliga.
32Avai tuta Nowa kala taitu iboda 500, matauna iunai litula taitolu, yagasi Sem, Am, deli Yapeta.
Šiuo metu pasirinkta:
VITOUULA 5: PNGKIR
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Kiriwina Bible (Buki Pilabumaboma) © Bible Society of Papua New Guinea, 2011.