Mt 11
11
Jɔ̌n we nɨ nyaʼə nàʼ mɨnib nyaʼa tom mbi mə̀mə̀ə̀nɨ̀-ɨnû əsɨ Yeso
(Lk 7.18-35)
1Ənɨ Yeso nyaʼa maanɨ nɨ gha ɨnû mbɔ̂ əmbɨ mbi mə̀mə̀ə̀nɨ̀-ɨnû mbe wum chɔ̀b rɨ̀be, wɨ̀ nyaʼa nɔ̀ʼ rɨ əsɨ ze, wò kɔ chwi ɨnû bə̀ kɔ ghà ɨŋgam Ŋwiə̀ ɨŋga ɨsɨ mbe nɨ nyaʼa ɨban ɨban.
2Ənɨ Jɔ̌n we nɨ nyaʼə nàʼ mɨnib, nɨ nyaʼa ə nəb ndəŋ, nyaʼa zu ɨnû mbe nɨ Kristo nyaʼə ghɨ̀ə̀, wɨ̀ nyaʼa tom mbi mə̀mə̀ə̀nɨ̀-ɨnû əsɨ məd, 3ni mbɨ biirɨ ɨ bɔ ni, “Àwɔ̀ wa kɨə wə̀d we nɨ bə̂d ɨ̀kə̀n nyaʼə ghàə̀ ni wɨ̀ bɨrɨ yeʼe, kɨ̀ rɨ̀ wa wom wɨ cherə ə?” 4Yeso nyaʼa wììrɨ̀ əmbɨ mɨ̀mə̌d ni, “Mbə̀ wo ghà ɨnû mbe nɨ mbə̀ zu bə̀ zə əmbɨ Jɔ̌n. 5Mɨfɨgɨ̀ mbɨə sɨə zə ɨsɨ, bə̂d nɨə tèʼ ɨwu mbɨə sɨə yèn ɨchî chɔ̀m, əpabɨ ə mì i rɨ ənɨ bə̂d mbe nɨ nyaʼə wɔ̀n əpabɨ, mbɨ̀rɨko mbɨə sɨə zu ɨnû, ɨvɨ bə̂d zwemə, ɨ mbɨə bə̀ ghà ɨkə̂n chɔ̀m əmbɨ bə̂d ɨkwaŋ. 6Ŋwìə̀ zɨ əbɔrəbɔd ɨgun ə wə̀d we nɨ chəi wɨ̀ bid ənû ə mɔʼɔ ɨmbə̀ʼ əmɨ.”
7Ənɨ mə̀mə̀ə̀nɨ̀-ɨnû Jɔ̌n nyaʼə wò əwən, Yeso nyaʼa kɔ gha ɨmbə̀ʼ ə Jɔ̌n əmbɨ mɨnɔ̂n bə̂d mbe ni, “Mbə nyaʼa kaŋ jwɨ̀ wo zə ye ɨŋga ɨbad rɨkwàʼi ə? Mbə wa nyaʼa wo zə wə̀d nɨ yeʼ ɨghabɨ ɨfu sê nɨ ɨfə ə chìʼ ə? 8Mbə nyaʼa kaŋ jwɨ̀ wo zə ye ə? Mbə wa nyaʼa wo zə wə̀d nɨ zɨ ngywɨ̌ rɨ chɔ̀m ə? Mbə̀ zə ni bə̂d mbe nɨə zɨ̀ə̀ ngywɨ̌ rɨ chɔ̀m mbɨə chub ɨŋga tɔʼ. 9Mbə nyaʼa kaŋ jwɨ̀ wo zə ye ə? Mbə wa nyaʼa jwɨ̀ wo zə wə̀d ɨ̀kə̀n Ŋwìə̀ ə? Ee, mə ghà ɨ nən ni mbə nyaʼa zə wə̀d we nɨ che wə̀d ɨ̀kə̀n Ŋwìə̀. 10Jɔ̌n wɔ̂ yɨə wə̀d we nɨ mbɨ nyaʼa ŋwaʼnɨ ɨmbə̀ʼ əməd ni,
'Zə, mə bɨrɨ cha mɨ wə̀d tom ɨmbì ɨ ne.
Məd bɨrɨ tekɨ ɨnə̂njɨ̀ ɨ ne.'
11Mə ghà rəsìʼ ɨ nən ni, rəbɔʼ bə̂d mɨ̀jìm mbe nɨ məyi gywɨ, chəi wɨ mɔʼɔ əŋgu nɨ dabə chè ə Jɔ̌n we nɨə nàʼə̀ mɨnib. Àyɨə wə̀d we nɨ kə chè mbɨ mɨjìm ɨŋga ənû ɨfɔ̀n rɨkaŋ ə dabə chè əməd. 12Ɨ kɔ rɨ ənɨ ə nyùmə̀ we nɨ Jɔ̌n we nɨ nyaʼə nàʼ mɨnib nyaʼə ghà ɨkə̂n chɔ̀m yeʼe pè rɨ̀nîn, ənû ɨfɔ̀n rɨkaŋ fə kən zə ŋgəʼ. Bə̂d nɨ berɨ ɨka mbɨə kə̀b nyɨ ɨŋga ənɨ ɨka. 13Bə̂d ɨ̀kə̀n Ŋwiə̀ mɨ̀jìm mbɨ ɨnû mbe nɨ yeʼ ɨŋga tɨkə rɨ Mose nyaʼə ghà ɨmbə̀ʼ ənû ɨfɔ̀n rɨkaŋ yeʼe pè ənɨ nyùmə̀ Jɔ̌n. 14Mbə mɨ ghaʼ nɨ ben ənû zɔ̂, njɨ mbə̀ kyerɨ ni Jɔ̌n yɨ Èlaijà we nɨ bə̂d ɨ̀kə̀n nyaʼə ghàə̀ ni wɨ̀ bɨrɨ yeʼe. 15Wə̀d we nɨ tɨ̀ wɨ̀ zu ənû, wɨ̀ zu!
16“Mə kɨə wò mɨg ɨghə̀m bə̂d wɔ̂ rɨ̀nîn ənɨ ə ye ə? Mbɨ yɨ ɨghabɨ ə bɔn kwa nɨ chub ə sǎm mɨwin tɔŋə mbɨ cherə ghàə̀ ni,
17'Tɨ̀ nyaʼa fə mɨkyî ɨ nən,
àyɨə chəi mbə̀ nyaʼa binɨ.
Tɨ̀ nyaʼa kwerɨ mɨkyî ɨdì,
àyɨə chəi mbə̀ nyaʼa dǐ!'
18Jɔ̌n nyaʼa yeʼe, chəi wɨ̀ nyaʼə jɨgə kɨ̀ beə nɔə mɨnoʼ, əne mbɨ nyaʼa ghà ni, 'Əzwî rɨbɔ̀ŋ ə zɨ ɨŋga məd.' 19Wan Wə̀d nyaʼa yeʼe, ɨ wɨ̀ nyaʼə jɨgə bə̀ nɔə mɨnoʼ, əne mbɨ nyaʼa ghà ni, 'Mbə̀ zə, wɔ̂ yɨə ndarɨjɨg bə̀ fɔrɨ ətəd mɨnoʼ. Ɨ wɨə jɨg ə̀sə̀ʼ mbɨ ə bə̂d mbe nɨə fetɨ mɨ̀tagsɨ̀ fɔrɨ mbɨə bə̂d nɨə ghɨ̀ ɨnû rɨbɔ̀ŋ'. Àyɨə mbɨ bɨrɨ kyerɨ ɨwe Ŋwiə̀ tɨ ənɨ ɨchî nɨ bə̂d ə ghɨ̀ ɨnû nɨ kuʼnɨ.”
Ɨsɨ mbe nɨ chəi bə̂d nyaʼa ben ɨkə̂n chɔ̀m əŋgu
(Lk 10.13-15)
20Yeso nyaʼa kɔ gham əbɔʼ ɨsɨ mbe nɨ wɨ̀ nyaʼa ghɨ ɨnû yiirɨ nɔnɔʼ əŋgu, ɨmbə̀ʼ ɨghəm nɨ chəi bə̂d mbe rɨŋga ɨsɨ mbe nyaʼa beŋ tə fîŋ. 21Wɨ̀ nyaʼa ghà əmbɨ mɨ̀mə̌d ni, “Ŋgəʼ kyeŋ bɨrɨ nyɨ ɨgwɨ ne, àwɔ̀ Kòrazìn! Ŋgəʼ kyeŋ bə̀ nyɨ ɨgwɨ ne, àwɔ̀ Bètsaidà! À kɨ nɨ ɨnû yiirɨ mbe nɨ mbɨ nyaʼa ghɨ ɨŋga nən, yɨ mbɨ nyaʼa ghɨ ə Taì fɔrɨ ə Sidòn, njɨ bə̂d mbe rəŋgu nyaʼa fə bèŋ tə fîŋ rəŋwe, zɨ̀ tɨkurɨ ɨdì, bə̀ fùʼ əburɨ. 22Mə ghà ɨ nən ni, à bɨrɨ sɨ əni ze nɨ Ŋwìə̀ ə sob mɨsaʼi, wɨ̀ bɨrɨ diirɨ bə̂d mbe rɨ ə Taì mbɨ mbe rɨ ə Sidòn chè ɨchî nɨ tɨ̀ wɨ̀ dììrɨ̀ əwən! 23À yeʼ ɨmbə̀ʼ əwe, àwɔ̀ Kàpenàhom, mbɨ wa bɨrɨ nɔ əwe ɨkaŋ ə? Chə̂, mbɨ bɨrɨ swi əwe màʼ ɨŋga əbeŋ ɨvɨ bə̂d, ɨmbə̀ʼ ɨghəm nɨ à kɨ nɨ ɨnû yiirɨ mbe nɨ mbɨ nyaʼa ghɨ ɨŋga ne, yɨ mbɨ nyaʼa ghɨ ə Sodòm, njɨ Sodòm wɨə kɨrɨ i pè rə̀chɔ̀ŋ! 24Mə ghà rəsìʼ ɨ nən ni, à bɨrɨ sɨ əni ze nɨ Ŋwìə̀ ə sob mɨsaʼi, wɨ̀ bɨrɨ diirɨ bə̂d mbe rɨ ə Sodòm chè ɨchî nɨ wɨ̀ bɨrɨ diirɨ əwən!”
Mbə̀ wo zwììrɨ̀ əsɨ Yeso
(Lk 10.21-22)
25À nyaʼa ənɨ ə nyùmə̀ we, Yeso nyaʼa ghà ni, “Mɨ Mbǎʼ, Ə̀nùŋɨ̀sɨg ɨkaŋ fɔrɨ ɨgwɨ ə si, məben-əwe ni à fə nə̀m ɨnû mbɔ̂ rɨ əmbɨ ə bə̂d ɨwe bə̀ fɔrɨ rɨ əmbɨ məkyerɨ-ɨnû, sɨ chwiə yeʼ əmbɨ ə bɔn bɔd. 26Ee, kyɨə mɨ Mbǎʼ, à yɨ ɨchî nɨ à kəbɨ we.
27“Mɨ Mbǎʼ fə nàʼ ɨghɨjìm ɨ num. Chəi wə̀d mɔʼɔ əŋgu nɨ jeŋgɨ kyerɨ Wan chè rɨ ənɨ Mbǎʼ. Chə bəi wə̀d mɔʼɔ əŋgu nɨ bə jeŋgɨ kyerɨ Mbǎʼ chè rɨ ənɨ Wan fɔrɨ wə̀d mɔʼɔ we nɨ Wan də̀b nɨ chwi əməd ɨ bɔ.
28“Mbə̀ yeʼe əsɨ num, mbə̀n mɨjìm mbe nɨ fə bɔd bə̀ bèʼ ɨghɨ nɨ nirɨ, mə bɨrɨ ghɨ ni mbə̀ zwirɨ ə. 29Mbə̀ zuunɨ əmɨ, əne kwembɨ ɨnû rɨ num, ɨmbə̀ʼ ɨghəm nɨ mə wɨə bɔtɨə rɨ ə fîŋ bə̀ swiə mɨ ɨnyod ə si. Mbə mɨ ghɨ̀ əne, tə fîŋ bɨrɨ zùtɨ̀, 30ɨmbə̀ʼ ɨghəm nɨ ɨnû mbe nɨ mbə̀ berɨ nɨ ghɨ̀ rɨka se i, ɨkom we nɨ mə bɨrɨ bɨ naʼ ɨ nən ə bə̀ zàm.”
Šiuo metu pasirinkta:
Mt 11: mgo
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2013, Cameroon Association for Bible Translation and Literacy