Buraambi 3
3
Khuwonesebwa khw'omusaani umuleme
1Shifukhu shitweela, Petero ni Yohana baaba baniina khuutsya mu Lisaayilo Likhulu mu saawa ye khuloombelamo, saawa nga syeenda tse kumuusi. 2Ne abawo umusaani uwaba umuleme khukhwaama khu khusaalikhana khweewe, nga asutibwatsaka busa n'areebwa ambi ni kumulyaango kwe Lisaayilo Likhulu kukulaangiwa KUMUMILIWU, nio bari asabilise tsinusu khukhwaama khu baandu babaaba benjila mu Lisaayilo Likhulu. 3Aryo umusaani yuno n'abona Petero ni Yohana nga benjila mu Lisaayilo Likhulu, wabaloomba ari bamuwekho tsinusu. 4Ne Petero ni Yohana bashuusa tsimoni tsaawe bamulola. Lwanyuma Petero wamulomela ari, “Iwe n'ukhuloleelele ifwe.” 5Aryo umusaani wabomiisilakho tsimoni tseewe nga ambaasa khufunakho khakhaandu khukhwaama isi bali.
6Ne Petero wamulomela ari, “Ifeeza ni zaabu ise s'indi ni nabyo ta, ne sheesi ndi nasho sheesi ikhuwa: Mu lisiina lya Yezu Kristu uwe Nazareti, yinyukha ukyeende.” 7Aryo Petero wamuwamba kumukhono kumulayi, wamuyeeta khukhwinyukha. Lubaluba, bikyele by'omusaani ni tsiselenjele tseewe byelamo kamaani. 8Naye wesuta weema, warakikha khukyenda, wenjila ni nabo mu Lisaayilo Likhulu, nga akyeenda, nga esutaka, nga abuyila Wele. 9Ne babaandu boosi ni bamubona nga akyeenda, nga abuyila Wele, 10bamwofwasa bulayi bamanya nga niye umusaani uwekhalatsaka ambi ni kumulyaango kukulaangiwa KUMUMILIWU, nga asabilisa, baryo basamilila busa, beyaanga naabi, lw'esho shishakholekha khu musaani.
Petero akanikha isi babaandu babaaba mu Lisaayilo Likhulu
11Ne umusaani n'aba nga ashomela khu baarume Petero ni Yohana, babaandu boosi beetsa isi bali, nga beyaanga, babusanila mwitikiiyi lililaangibwa lya Solomoni. 12Petero n'abona babaandu wabaloma ari, “Babaandu ba Isiraeli, lwashiina shino shibeyaangisa? Namwe lwashiina mukhwoomisilakho ifwe tsimoni? Mwambaasa muri umuundu uyu akyeendile lwe kamaani keefwe, namwe lwe bukhosefu bweefwe? 13#Luky 3.15Wele wa Ibulayimu, ni Isaaka, ni Yakobo, lundi Wele we bakuuka beefwe, waweele Umwakaanisi weewe Yezu shiriifwa, uyo isi inywe mwawanayo isi be bunyala khukhwiiribwa, mwamwikaanila mu moni tsa Pilato, akhaba nga abe Pilato niye wakhalilewo khumulekhuula. 14#Mat 27.15-23; Mrk 15.6-14; Luk 23.13-23; Yoh 19.12-15Ne inywe mwekaana uyo umukhosefu lundi umukwalaafu, muryo mwaloomba Pilato abalekhuulile umwiiri. 15Muryo mweera umukhulu ureera bulamu, ne Wele wamulamusa khukhwaama mu bafu. Ni nafwe khuli bajulisi be shishiindu isho. 16Ne shino shibeele lwe khufukiilila mu lisiina lyeewe, kila umusaani isi mubona yuno lundi isi mumanyile, elilemo kamaani. Lili lisiina lya Yezu, ni khufukiilila, bibireere umusaani yuno khuwona khwelala.
17“Aso, ari be buulebe, namanyile ndi sheesi inywe ni bawuli beenywe mwakhola, mwashikholela mu khulekha khumanya ta. 18Ne Wele sheesi aboola khaale khubirira mu baŋoosi boosi ari Kristu weewe akhila khutaambisibwa, aryo wabyoolelesa. 19Nashiryo, ari ni mwibiiyise mushuukhe mwiile isi Wele nio manya abeyakhile bibyonako byeenywe, 20nio manya bifukhu bye khusangaala byaama isi Umukasya. Nalundi nio manya arumane Kristu uwareebwawo khulweenywe, niye Yezu. 21Niye uwakhila khurama mwikulu khukhwoolesa imbuka ni lyoola isi Wele alikoboselamo bibiindu byoosi bushaakha, nga Wele n'asuubisa khubirira mu baŋoosi beewe bakhosefu khaalekho. 22#Maka 18.15,18Lwekhuba Musa aloma ari, ‘Umukasya Wele alibasindikhila inywe Umuŋoosi nga n'aasindikha ise, naluundi alyaama mu bandaayeenwe babeene. Muli ni khulondelelaatsaka ibyo byoosi byeesi niye alibaboolatsakila inywe. 23#Maka 18.19Na buli umuundu yeesi ukhalirekeeresa byeesi Umuŋoosi uyo aliloma ta, alirusibwa mu baandu ahesebwe.’
24“Ilala ni baŋoosi boosi babaakanikha khukhwamila ilala khu Samweli, ni babamwiilakho boosi balomatsaka, baakanikhatsaka khu bifukhu bino. 25#Rak 22.18Inywe muli basikha be baŋoosi nalundi be ndakaano isi Wele akhola ni bakuuka beenywe. Wele alomela Ibulayimu ari, ‘Khubirira mu betsukhulu boowo, indiiwa babaandu boosi be mu shiibala ikhabi.’ 26Aryo Wele nga n'aarobola Umwakaanisi weewe, amwakaanisa khunyoowa isi inywe, abawe tsikhabi, nga ashuusa buli mutweela khurura mu ntsila tseewe tse bumoyaani.”
Šiuo metu pasirinkta:
Buraambi 3: LCE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Lumasaaba Catholic Bible © The Bible Society of Uganda, 2017.