Lucas 10
10
Jesús qanchis chunka iskayniyoj yachachisqankunata kachan
1Chaymanta qhepaman Tukuyta Kamachej Jesús qanchis chunka iskayniyoj runakunata ajllarqa. Chantá paykunata iskaymanta iskay kacharqa, paypa ñawpaqenta rinankupaj tukuy llajtaman, tukuy ranchoman ima, maymanchus rinan karqa, chayman.
2Jesustaj nerqa: Sut'ita niykichej: Poqoyta oqharinaqa ashkhamin, oqharejkunatajrí pisilla kanku. Chayrayku Chajrayojmanta mañakuychej astawan ashkha oqharejkunata kachamunanpaj.#Mt 9.37-38; Jn 4.35. 3Qankunaqa puririychej ari. Noqa kachashaykichej, corderokunatapis atojkunaj chawpinman kachashayman jina.#Mt 10.16. 4Ama qolqeta, wayaqata, nitaj waj juk'utatapis apakuychejchu. Ñanta rishaspataj, ama pitapis napaykunaykichejpaj sayankichejchu.#10.4 Usunkuman jina pita napaykuspaqa, chay runaj wasinman yaykoj kanku parlarikuspa chayrí imatapis mikhuspa. Jesustajrí yachachisqankunata nerqa ama ajinata qhepakunankuta, manachayqa ruwanankuta usqhayta junt'anankuta. 2 R 4.29.
5Mayqen wasiman chayakuspa, ñawpajta wasiyojkunata napaykuychej: Diosmanta sonqo tiyaykuy kay wasipi kachun, nispa. 6Sichus chaypi tiyakojkuna napaykusqaykichejta jap'ikunapaj jina kanku chayqa, napaykusqaykichejqa paykunapi qhepakonqa. Manachayrí, qankunaman kutimponqa. 7Ama wasimanta wasi puriychejchu. Mayqen wasipichus wajyarikusorqachej, chay wasillapi qhepakuychej, imatachus qosusqaykichejta ch'inmanta mikhuspa, ujyaspapis, imaraykuchus llank'ajqa ruwasqanmanta mikhunanpuni kashan.
8May llajtaman chayajtiykichej, sichus chaypi tiyakojkuna wajyarisunkichejman chayqa, mikhuychej imatachus jaywarisunkichej, chayta. 9Chaypi kaj onqosqa kajkunata qhaliyachiychej, niychejtaj: Diosman kutirikuychej, imaraykuchus janaj pachamanta Dios kay pachapi kamachinanpaj wakichisqaña kashan, nispa. 10Sichus may llajtaman yaykojtiykichej mana wajyarisunkichejmanchu chayqa, callenkunaman llojsispa, ajinata niychej: 11Llajtaykichejmanta chakiykuman jallp'a k'askaykojtapis thalarakuyku, jinamanta yachayta qospa qankuna mana allin runa kasqaykichejta. Chantapis yachaychej: Qankunaman Diospa kamachiynin qayllamusunkichejña, nispa. 12Noqa niykichej: Jaqay juicio p'unchaypeqa, Sodoma #Gn 19.24-28; Mt 11.2. llajtayojkunaraj aswan pisita ñak'arenqanku chay llajtayojkunamanta nisqaqa, nispa. Ajinata Jesús kachankunata kacharqa.
Jesuspi mana atinikojkuna
(Mt 11.20-24)
13Jesús nillarqataj: Ay, Corazín llajtayojkuna, qankunamanta imallachus kanqa. Ay imallachus kanqa qankunamantapis, Betsaida llajtayojkuna. Sichus Tiro llajtapi, jinataj Sidón llajtapi pipis qankuna ukhupi kay ruwasqay t'ukunata ruwanman karqa chayqa, maypachaña Diosman kutirikunkuman karqa. Qhashqa p'achata churakuspa, ushpha patapi tiyaspataj, Diosman kutirikusqankumanta yachayta qonkuman karqa. 14Chayrayku niykichej: Juicio p'unchaypeqa, Tiro llajtayojkunapaj, Sidón llajtayojkunapaj ima aswan pisi ñak'ariy kanqa. Qankunapajrí aswan sinch'i ñak'ariy kanqa. 15Jinallataj qankuna Cafarnaún llajtayojkuna, yuyankichejchu janaj pachakama oqharisqa kanaykichejta? Manapuni, astawanqa ukhu pachakama#10.15 Ukhu pacha: Griego rimaypi “Hades” niyta munan, maypichus wañojkuna kashanku, chay cheqa. Is 14.13-15. wijch'uykusqa kankichej, nispa.
16Yachachisqankunatatajrí Jesús nerqa: Pichus qankunata uyarejqa noqata uyariwan, pitajchus qankunata qhesachajqa noqata qhesachawan. Noqata qhesachawajrí, Diostapis qhesachallantaj, nispa.
Jesuspa kachankuna kutimunku
17Maypachachus Jesuspa qanchis chunka iskayniyoj kachankuna kutimorqanku chaypacha, mayta kusikuspa nerqanku: Tukuyta Kamachej, sutiykipi kamachejtiyku, supaykunapis kasuwayku, nispa.
18Jesustajrí nerqa: Noqaqa Kuraj Supay Satanasta lliuj lliujta jina janaj pachamanta urmamojta rikorqani. 19Noqataj atiyta qoykichej katarikunata, atojsillokunatapis sarunaykichejpaj. Jinallataj awqaj tukuy kallpantapis atipankichej, manallataj imapis imanasonqachejchu. 20Chaywanpis, ama supaykuna kasususqaykichejllamantachu kusikuychej. Astawanpis sutiykichej janaj pachapi qhelqasqa kasqanmantamin kusikuychej.
Jesusqa Tata Diosninman pachis nin
(Mt 11.25-27; 13.16-17)
21Chaypacha, Jesusqa Santo Espiritunejta may kusisqa kaspa, Diosta nerqa: Tatáy, janaj pachata kay pachatawan kamachej Dios, noqa jatunchayki, imaraykuchus kay imakunata yachayniyojkunamanta, yuyayniyojkunamantawan pakarqanki, wawa jina kajkunaman sut'inchanaykipaj. Arí Tatáy, qan ajinata munarqanki, nispa.#1 Co 1.26-28.
22Chantá Jesús chaypi kajkunata nillarqataj: Tatayqa tukuy imata qowan. Mana pipis yachanchu pichus Churi kasqanta. Chaytaqa Tatalla yachan. Nillataj pipis yachanchu pichus Tata kasqanta, manachayqa Churillan yachan, jinallataj pimanchus Churi rejsichiyta munan, chaypis, nispa.
23Wajnejpi sapankupi kashajtinku, Jesús yachachisqankunaman kutirispa, nerqa: Kusikuyniyojmin kankichej imatachus ruwasqayta rikusqaykichejmanta. 24Diosmanta ashkha ñawpa sut'inchajkuna, kuraj kamachejkuna ima qankunaj rikusqaykichejta rikuyta munarqanku, manataj rikorqankuchu. Jinallataj imatachus uyarishankichej, chayta uyariyta munallarqankutaj, nillataj uyarerqankuchu, nispa.
Samaria llajtayoj k'acha runamanta rijch'anachina
25Chantá Diospa kamachisqanmanta yachachej uj runaqa Jesús allintachus kutichenqa manachus, chayta yachayta munaspa, taporqa: Yachachej Wiraqochi, imatataj ruwayman wiñay kawsayniyoj kanaypajri? nispa.
26Jesustaj kutichispa taporqa: Imataj Diospa kamachisqanpi qhelqasqa kashanri? Imatataj ñawirinkiri? nispa.
27Chay runataj kuticherqa: Diospa Qhelqachisqanpeqa kay jinata nin: Tukuyta Kamachej Diosniykita munakunki tukuy sonqoykiwan, tukuy almaykiwan, tukuy kallpaykiwan, tukuy yuyayniykiwan ima. Jinallatataj runa masiykitapis qan kikiykita jina munakunki,#Lv 19.18; Dt 6.5. nispa.
28Chantá Jesús nerqa: Maychus kajta kutichinki. Chaytachus ruwanki chayqa, wiñay kawsayta tarinki,#Lv 18.5. nispa.
29Chay runatajrí ruwasqan allillan kasqanta rikuchiyta munaspa, kuticherqa: Chantá pitaj runa masiyri? nispa.
30Jinapi Jesús uj rijch'anachinawan kuticherqa: Uj runa Jerusalén llajtamanta Jericó llajtaman rishajtin, suwakuna payta jap'iykusqanku. Chay suwakunataj tukuy imanta qhechuspa, sumajta maqaykuytawan, parti wañusqata saqerparisqanku.
31Chantá uj sacerdote chay ñannejta rishallasqataj. Chaywanpis chay runata rikuspa, ripullasqa. 32Jinallatataj, uj levita chaynejta rishasqa, chay runata choqarayashajta rikushaspapis, ripullasqa.
33Chantá Samaria llajtayoj uj runa chaynejta rishaspa, chay parti wañusqa runata rikusqa, mayta khuyakuspataj, qayllaykusqa. 34Payqa maqasqa runaj k'irinkunata aceitewan, vinowan ima jampiykusqa. Chantá burronman wicharichispa, tamboman apasqa, chaypitaj allinta jampichisqa. 35Q'ayantintaj Samariamanta runa manaraj ripushaspa, iskay jornal jina qolqeta tamboyojman jaywaspa, nisqa: Kay onqosqata qhawaripuway, kutimuspataj tukuy gastasqaykita qopusqayki, nispa.
36Chantá Jesús chay yachachej runata taporqa: Chay kinsamanta mayqentaj rijch'asunki runa masin kasqanta suwajkunawan maqachikojpatari? nispa.
37Diospa kamachisqanmanta yachachejtaj kuticherqa: Mayqenchus khuyarqa, chay, nispa. Jesustaj nerqa: Ajinapuni, kunantaj qanpis kikillantataj ruwamuy, nispa.
Jesusqa Martata Mariatawan watukamun
38Ñanta rishaspallapuni, Jesús uj ranchoman chayarqa. Jinapi Marta sutiyoj uj warmeqa Jesusta wasinman wajyarikorqa. 39Martajtataj uj ñañan karqa María sutiyoj, paytaj Jesuspa ñawpaqenman tiyarikuspa, yachachisqanta uyarisharqa. 40Martarí mikhunata wakichispa musphasqanrayku, Jesusman qayllaykuspa, nerqa: Wiraqochíy, manachu rikunki ñañay mana ruwaysishawasqanta? Yanapanawanta niy ari, nispa.
41Jesustajrí kuticherqa: Ay Marta, imaraykutaj tukuy imamanta phutikuspa, ajinata musphashankiri? 42Ujllamin aswan allin kajqa. Mariaqa chay aswan allin kajta ajllakun, chaytataj mana pipis paymanta qhechonqachu, nispa.
Šiuo metu pasirinkta:
Lucas 10: DQDC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Revisión Biblia Quechua Boliviano © Sociedad Bíblica Boliviana, 2017.