Lucas 7
7
Jesús soldado kamachejpa uywasqanta qhaliyachin
(Mt 8.5-13; Jn 4.43-54)
1Chay runakunaman yachachiyta tukuspa, Jesusqa Cafarnaún llajtaman kutirerqa. 2Chaypitaj romano soldadokunaj capitanninkoj munasqa uywasqan onqosqa kasharqa, wañuy patapi jinaña. 3Jinapi chay capitán Jesusmanta parlajta uyarispa, judiokunamanta kurajkunata kacharqa, Jesusta pusamunankupaj paypa uywasqanta qhaliyachinanpaj. 4Jesusman qayllaykuspataj, paykuna maytapuni rinanta mañarikorqanku, nerqankutaj: Allinpuni kanman capitanta yanapanaykeqa, 5imaraykuchus payqa ayllunchejta munakun. Tantakuna wasitapis ruwachipuwanchej, nispa.
6Jinapi Jesús paykunawan khuska rerqa. Wasi qayllapiña kashajtinkutajrí, capitanqa kawsaqenkunata kacharqa Jesusta kay jinata ninankupaj: Wiraqochíy, ama wasiykamaqa jamuychu, imaraykuchus noqaqa mana wasiyman yaykunaykipaj jinachu kani. 7Chayrayku mana munarqanichu qanman jamuyllatapis. Aswanpis uj simillata niy, uywasqaytaj qhaliyaponqa. 8Yachani qhaliyapunanta, imaraykuchus noqapis kamachejniyoj kani, jinallatataj soldadokunatapis kamachini. Ujninta nini rinanta, paytaj rin. Wajta nini jamunanta, jamuntaj. Uywasqaytapis nini: Kayta ruway, nispa, paytaj chayta ruwanpacha, nispa.
9Chayta uyarispa, Jesusqa t'ukorqa. Chantá paywan rejkunaman kutirispa, nerqa: Kayta niykichej: Kay runa noqapi atinikusqanta jinaqa Israel ayllupi mana tarinichu, nispa.
10Chaymanta capitanpa kachasqan runakuna capitanpa wasinman kutipuspa, onqosqata qhaliyasqataña tariparqanku.
Jesús Naín llajtapi warmisapaj churinta kawsarichin
11Chaymanta Jesús Naín llajtaman risharqa, jinapitaj yachachisqankuna, ashkha runakuna ima paywan rerqanku. 12Llajta qayllapitaj Jesús tinkukorqa uj wañusqata p'ampaj apashajkunawan. Chay wañusqaqa warmisapaj uj k'ata churin karqa. Ashkha runataj llajtamanta chay warmiwan risharqanku. 13Jinapi Tukuyta Kamachej Jesús warmisapata sinch'ita waqashajta rikuspa, payta khuyapayarqa. Jesustaj nerqa: Ama waqaychu, nispa.
14Chantá Jesús qayllaykuspa, aya apanata llankharerqa, wantojkunataj sayarqanku. Jesustaj wañusqata nerqa: Wayna, qanta niyki: Sayariy, nispa. 15Jinallapi wañusqaqa tiyaykamuspa, parlarerqa. Jesustaj chay waynataqa kawsashajta mamanman qoporqa.
16Chayta rikuspa, tukuyninku mancharikorqanku, Diostataj kay jinata jatuncharqanku: Diosmanta may atiyniyoj uj sut'inchaj noqanchejmanta sayarin, nispa. Wajkunataj nerqanku: Diosqa ajinata ayllunta yanapaj jamun, nispa. 17Chantá Jesuspa chay ruwasqanqa tukuynin Judea jap'iypi, muyuynintinpi ima yachakorqa.
Bautizaj Juanpa kachankuna
(Mt 11.2-19)
18Chay tukuy imamanta Bautizaj Juanpa yachachisqankuna payman willamorqanku. Jinapi Juan paykunamanta iskayta wajyarqa. 19Jinaspataj, paykunata kacharqa Jesusta tapunankupaj: Qanchu kanki, pitachus Dios kachamunan karqa, chayqa, chayrí wajtachu suyasqayku? nispa.
20Chantá Jesusman rispa, paykuna nerqanku: Bautizaj Juan kachamuwayku qanta tapojta: Qanchu kanki, pitachus Dios kachamunan karqa, chayqa, chayrí wajtachu suyasqayku? nispa.
21Chaypacha Jesús ashkha runata nanayninkumanta, onqoyninkumanta ima qhaliyacherqa, runakunamantataj millay supaykunatapis qharqollarqataj. Jinallataj ashkha ñawsakunatapis qhawaricherqa.
22Chantá Jesusqa Juanpa kachankunaman kuticherqa: Kutipuspa, Juanman imatachus rikusqaykichejta, uyarisqaykichejta ima willamuychej: Ñawsakuna rikunku, suchukunapis puririnku, jinataj llejti onqoyniyojkuna llimphuchasqa kanku. Joq'arakunapis uyarinku, wañusqakuna kawsarimunku, wajchakunamanpis Diosmanta sumaj willay willakun. 23Kusikuyniyojmin pichus mana iskayrayaspa noqapi atinikojqa, nispa.
24Juanpa kachankuna ripusqankutawan, Jesusqa Juanmanta runakunaman parlayta qallarerqa: Qankuna ch'in pampaman imata qhawajtaj rerqankichejri? Wayraj wajtaykachasqan soqosotachu qhawaj rerqankichej? 25Manachayrí imatataj rikorqankichejri? Sumaj p'achayoj runatachu? Qankuna yachankichej, pikunachus sumaj p'achallisqa kaspa, chhika patapi kawsajkuna kamachina wasikunapi kashanku. 26Jina kajtenqa, imatapunitaj rikumorqankichej? Diosmanta sut'inchajtachu? Arí, noqatajrí niykichej Diosmanta sut'inchajmantapis aswanraj kasqanta. 27Juanmanta Diospa Qhelqachisqanpi kay jinata nin:
Willajniyta ñawpaqeykita kachamuni
ñanta wakichipusunanpaj,#Mal 3.1; Ex 23.20; Mt 11.10; Mc 1.2; Lc 1.76. nispa.
28Noqataj niykichej: Tukuy runamanta mana ujllapis Juanmanta nisqaqa aswan kuraj kanchu. Chaywanpis, Diospa kamachiyninpi aswan mana kasu ruwana kajqa paymanta aswan kurajraj, nispa.
29Chayta uyarispa, tukuy runa, impuestota cobrajkuna ima nerqanku Diospa ruwasqan cheqanpuni kasqanta, imaraykuchus paykuna Juanwan bautizachikuspa, Diospa kamachisqanta kasusqanku. 30Chaywanpis fariseokuna, Diospa kamachisqanmanta yachachejkuna ima, imatachus Dios paykunapaj munasqanta qhesacharqanku, imaraykuchus mana Juanwan bautizachikusqankuchu.
31Chantá Jesús nillarqataj: Kay tiempopi kawsaj runakunata imamantaj rijch'achiymanri? Imamantaj rijch'akunkuri? 32Paykunaqa plazapi pujllaj wawakunaman rijch'akunku, imaynatachus wawa masinkuta qhaparispa, ninku: Qenata tocapuyku, qankunarí mana tusunkichejchu. Chantá llakiy takiykunata takipuyku chaypis, mana waqankichejchu, nispa. 33Chayta niykichej, imaraykuchus Bautizaj Juan jamuspa, t'antata mana mikhojchu, nitaj vinota ujyajchu. Qankunataj nerqankichej: Payqa supayniyoj, nispa. 34Runaj Churin jamojtintajrí, mikhusqanrayku, ujyasqanraykutaj ninkichej: Kay runaqa anchata mikhun, ujyantaj, chantá juchasapakunawan, impuestota cobrajkunawan ima kawsakun, nispa. 35Jinapis noqanchej Dios yachayniyoj kasqanta reparanchej, yachachisqanta qhatejkuna imaynatachus kawsasqankuta rikuspa, nispa.
Jesusqa fariseo Simonpa wasinpi
36Uj fariseoqa Jesusta paywan mikhunanpaj wajyarikorqa. Jesustaj fariseoj wasinman rispa, mikhoj tiyaykukorqa. 37Chay llajtapi millay kawsayniyoj uj warmi karqa, paytaj uyarerqa Jesús fariseoj wasinpi kasqanta. Jinapi pay sumaj q'apashaj jawinata yuraj rumi yuritupi chayman aparqa. 38Chantá Jesuspa chakin qayllapi chukuykuspa, waqayta qallarerqa. Waqayninwantaj chakinta joq'ochaspa, chujchanwan ch'akicherqa. Jesuspa chakinta much'aspataj, sumaj q'apashaj jawinawan jawiykorqa.
39Chayta rikuspa, Jesusta wajyarikoj fariseoqa sonqonpi nerqa: Sichus kay runa cheqapuni Diosmanta sut'inchaj kanman chayqa, rejsinmanchá imayna millay kawsayniyoj warmichus payta llankhaykushasqanta, nispa.
40Jesustajrí nerqa: Simón, ujta nisqayki, nispa. Paytaj nerqa: Yachachej, niway ari, nispa.
41Chantá Jesús uj rijch'anachinata nerqa: Iskay runakuna qolqe manoj runaman manu kasqanku. Ujnin kajqa phishqa pachaj qolqe manu kasqa, ujnintaj phishqa chunkalla. 42Mana imaynamanta kutichipuyta atejtinku, manojqa iskayninkuta khuyaspa, manaña mañakapusqachu. Kunan niway ari: Chay iskayninkumanta mayqentaj chay khuyaj runata astawan munakonqari? nispa.
43Simontaj kuticherqa: Pichus astawan ashkha manu karqa, chaychá kanman, nispa. Jesustaj nerqa: Arí, allintamá ninki, nispa.
44Chantá warmiman kutirispa, Jesusqa Simonta nillarqataj: Rikushankichu kay warmita? Wasiykiman yaykumojtiy, qan mana chakiyta mayllakunaypaj yakullatapis jaywariwarqankichu. Payrí, waqayninwan chakiyta mayllan, chujchanwantaj ch'akichin. 45Qanqa mana much'aykuwaspa napaykuwarqankichu. Payrí yaykumusqaymantapacha chakiyta much'aspa mana sayk'unchu. 46Manallataj umayta sumaj q'apashaj jawinawan jawiwarqankichu. Paytajrí, chakiyta sumaj q'apashaj jawinawan jawin.
47Chayrayku niyki: Kay warmej may chhika millay ruwasqantaqa noqa pampachani, chayraykutaj paypis kayta ruwaspa, sinch'ita munakuwasqanmanta yachayta qon. Pichus juchan pisilla kasqanta yuyajrí, chay juchan pampachasqa kajtin, pichus pampachajta pisillata munakonqa, nispa. 48Chantá Jesusqa warmita nerqa: Juchaykeqa pampachasqaña, nispa.
49Jesuswan khuska mikhojkunarí paykunapura ninakuyta qallarerqanku: Pitaj kay runa kanman juchatapis pampachananpajri? nispa.
50Jesustajrí warmita nerqa: Noqapi atinikusqaykirayku qhespichisqa kanki. Chayrayku mana imamanta llakikuspa, ripuy, nispa.
Šiuo metu pasirinkta:
Lucas 7: DQDC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Revisión Biblia Quechua Boliviano © Sociedad Bíblica Boliviana, 2017.