Marcos 3
3
Jesús makin ch'akisqa runata qhaliyachin
(Mt 12.9-14; Lc 6.6-11)
1Watejmanta Jesús tantakuna wasiman yaykullarqataj, chaypitaj makin ch'akisqa uj runa kasharqa. 2Wakin runakuna chaypi kajkunamanta Jesusta wateqasharqanku, rikuyta munaspa samarina p'unchaypi qhaliyachenqachus, chayrí manachus, payta ch'ataykunankupaj. 3Jesustajrí makin ch'akisqa runata nerqa: Jamuy, kaypi kajkunaj chawpinpi sayay, nispa.
4Chantá Jesús runakunata taporqa: Samarina p'unchaypi ima ruwanataj allin kanman: Allin kajtachu, chayrí mana allin kajtachu? Runata yanapanachu, chayrí wañupojta saqenachu? nispa. Paykunatajrí ch'inlla karqanku. 5Chaymanta Jesusqa phiñakuspa, muyuyninpi kajkunata qhawarerqa, paykunamantataj llakikorqa rumi sonqo kasqankurayku. Chay onqosqa runatataj nerqa: Makiykita jaywariy, nispa. Paytaj makinta jaywarejtinkama, makin qhaliyaporqa. 6Chantá fariseokuna llojsiytawan, kuraj kamachej Herodesman sayasqa kajkunawan tantaykukuspa, Jesusta wañuchinankupaj yachachinakorqanku.
Ashkha runa qocha kantupi tantakunku
7Chantá Jesús yachachisqankunawan Galilea qocha kantuman riporqa, jinallataj ashkha runakuna Galileamanta, Judeamantawan paypa qhepanta rerqanku. 8Jesuspa t'ukunata ruwasqanmanta uyarisqankurayku runakuna Jerusalenmantapis jamullarqankutaj, Idumeamanta, Jordán mayu chimpamanta, chantá Tiroj, Sidonpa muyuyninmanta ima.
9Chhika runakunata rikuspa, Jesusqa yachachisqankunata nerqa: Boteta wakichipuwaychej, runakuna k'iskikamuspa ama ñit'imunawankupaj, nispa. 10Jesús ashkha runataña qhaliyachisqanrayku, tukuy onqosqa runa k'iskikamusharqanku Jesusta llankhaykunankupaj. 11Runakunapi kaj millay supaykunapis Jesusta rikuytawan, ñawpaqenman choqakuspa, qhaparej kanku: Qanqa Diospa Churin kanki,#Mc 1.24,34; 5.7; Lc 4.41. nispa. 12Jesustajrí paykunata mayta kamacherqa, pichus pay kasqanta ama sut'inchanankupaj.
Jesús chunka iskayniyoj kuraj kachasqankunata ajllan
(Mt 10.1-4; Lc 6.12-16)
13Chantá Jesús orqoman rispa, wajyarqa, pikunatachá munarqa, chaykunata, tukuy paykunataj Jesusman jamorqanku. 14Chaykunamantataj Jesús chunka iskayniyojta ajllarqa kuraj kachankuna kanankupaj. Chantá paykunata churarqa paywan purinankupaj, jinataj tukuynejman paymanta willaramunankupaj ima. 15Jinallataj paykunaman atiyta qorqa, supaykunatapis runakunamanta qharqonankupaj.
16Kaykuna kanku Jesuspa chay chunka iskayniyoj ajllasqan kuraj kachankuna: Simón, pitachus Jesús Pedro sutiwan suticharqa, chay. 17Chantá Zebedeoj churinkuna Santiago, wawqen Juanwan, pikunatachus Jesusqa Boanerges sutiwan sutichallarqataj, chaykuna. Chay suteqa “Qhon qhonpa churinkuna” niyta munan. 18Chaymanta kallarqankutaj: Andrés, Felipe, Bartolomé, Mateo, Tomás, Alfeoj churin Santiago, Tadeo, pitachus Simón cananita nillasqankutaj. 19Kallarqataj Jesusta jap'ichej Judas Iscariote ima.
Santo Espíritoj contranta rimajkuna
(Mt 12.22-32; Lc 11.14-23; 12.10)
20Chantá Jesús uj wasiman yaykorqa, ujtawantaj ashkha runakuna tantakamullarqankutaj. Chayrayku Jesús, yachachisqankunawan imaqa manaña mikhuytapis aterqankuchu. 21Jinapi Jesuspa ayllunkuna imachus kasqanta yachaspa, payta pusakapunankupaj jamorqanku, imaraykuchus mana yuyayninpichu kasqanta yuyarqanku.
22Jinapis Diospa kamachisqanmanta wakin yachachejkuna, pikunachus Jerusalenmanta jamusqanku, chaykuna nerqanku: Kay runapeqa Kuraj Supay Beelzebú kashan.#3.22 Beelzebú: Wakinkunaqa Kuraj Supayta “Beelzebú” sutichasqanku. Mt 9.34; 10.25; 12.24. Chayraykuchá Beelzebúj atiyninwan supaykunata qharqon, nispa.
23Jesustajrí paykunata wajyaspa, rijch'anachinawan nerqa: Imaynatataj Supay Satanasqa pay kikinta qharqokunmanri? nispa. 24Jesús nillarqataj: Sichus uj suyupi runakuna chejninakuspa t'aqanakunkuman chayqa, chay suyoqa manaña sayanmanchu, tukukunman. 25Uj wasi ayllupipis phiñanakuspa, maqanakunkuman chayqa, t'aqanakunkuman, manañataj khuska kayta atinkumanchu. 26Ajinallatataj, Supay Satanaspis payman sayasqa kajkunaj contranpi jatarispaqa, manallataj sayayta atinmanchu, aswanpis chinkapunman.
27Mana pipis kallpasapa runaj wasinman yaykuyta atinmanchu kapuyninta qhechoj, manachus ñawpajta kallpasapa runata wataykunmanraj chayqa. Wataykusparajpuni, chay runaj wasinpi kaj chhikata suwakapunman.
28Kayta sut'ita niykichej: Diosqa runakunaj ima juchankutapis, tukuy mana allin rimasqankutapis pampachayta atin. 29Santo Espíritoj contranta rimajpatarí, mana jayk'ajpis juchan pampachasqachu kanqa, manachayqa pay wiñaypaj juchachasqa kanqa,#Mt 12.32; Lc 12.10. nispa.
30Jesús chayta nerqa, imaraykuchus Diospa kamachisqanta yachachejkuna nisqanku: Payqa millay supayniyoj, nispa.
Jesuspa maman, wawqenkuna ima
(Mt 12.46-50; Lc 8.19-21)
31Chay qhepata Jesuspa maman, wawqenkuna ima chayamorqanku. Chantá, jawallamanta payta wajyajta kacharqanku. 32Jesuspa muyuyninpi tiyashajkunataj payta nerqanku: Mamayki, wawqe panaykikuna ima mask'ashasunku, nispa.
33Jesustajrí paykunaman kuticherqa: Pikunatataj mamaypaj, wawqeykunapaj ima qhawaniri? nispa.
34Chantá muyuyninpi tiyashajkunata qhawarispa, nerqa: Kaykunamari mamay, wawqeykunapis kanku. 35Pichus Diospa munayninta ruwan, chaymá wawqeyqa, panaypis, mamaypis, nispa.
Šiuo metu pasirinkta:
Marcos 3: DQDC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Revisión Biblia Quechua Boliviano © Sociedad Bíblica Boliviana, 2017.