Marcos 9
9
1Chaymanta Jesús nillarqataj: Kayta sut'ita niykichej: Kaypi kajkunamanta wakinniykichej mana wañuyta rikunkichejchu, Diospa kamachiynin manchay atiywan jamojta rikunaykichejkama, nispa.
Jesús waj jinaman tukun
(Mt 17.1-13; Lc 9.28-36)
2Chaymanta sojta p'unchayninman, Jesusqa Pedrota, Santiagota, Juantawan imalla uj jatun orqoman pusarqa. Chaypitaj paykunaj rikunankuta Jesús waj jinaman tukorqa. 3P'achanqa k'ancharishaj, yuraj rit'iman jina tukorqa. Mana pipis t'ajsaspa chay jinata yurajyachiyta atinmanchu karqa. 4Chaymantataj Eliaswan, Moiseswan ima rikhurimuspa, Jesuswan parlasharqanku.
5Chantá Pedroqa Jesusta nerqa: Yachachej Wiraqochíy, walej kaypi kasqanchejqa. Chayrayku kunanqa kinsa ch'ujllata ruwasqayku: Ujta qanpaj, ujta Moisespaj, ujtataj Eliaspaj, nispa. 6Jesuspa yachachisqankuna sinch'i mancharisqa kasqankurayku, Pedro imatachus parlashasqanta mana yacharqachu.
7Chay jinallaman phuyu rikhurimuspa, paykunata p'ampaykorqa. Chay phuyu ukhumantataj Dios nimorqa: Kaymin munasqa Chureyqa. Paytamin uyariychej, nispa. 8Chay yachachisqakuna ujtawan muyuyninkuta qhawarispataj, manaña chay ujkunata rikorqankuchu, manachayqa Jesús sapallantaña.
9Chantá orqomanta urayk'amushajtinku, Jesús chay yachachisqankunata kamacherqa ama pimanpis imatachus rikusqankuta willanankuta, Runaj Churin wañusqamanta kawsarimpunankama. 10Ajina yachachisqankunaqa imatachus rikusqankuta sonqonkupi waqaycharqanku. Chaywanpis paykunapuralla tapunakorqanku imatachus Jesús niyta munasqanta: Runaj Churin wañusqamanta kawsarimponqa, nispa.
11Chantá Jesusta taporqanku: Imaraykutaj Diospa kamachisqanmanta yachachejkuna ninku Eliasraj kutimunan kasqanta manaraj Diospa kachamusqan jamushajtinri? nispa.
12Jesustaj kuticherqa: Cheqamanta Eliasqa ñawpajta jamuspa, tukuy imata maychus kananman churanqa. Chaywanpis imaraykutaj Diospa Qhelqachisqanpi nin Runaj Churin mayta ñak'arinanta, qhesachasqataj kanantari? 13Noqatajrí niykichej: Eliasqa jamorqaña, runakunataj munasqankuta paywan ruwarqanku, imaynatachus Diospa Qhelqachisqanpi kananta nerqa, ajinata, nispa.
Jesús uj waynamanta supayta qharqon
(Mt 17.14-21; Lc 9.37-43)
14Jesús, kinsa yachachisqankuna ima, maypichus wakin yachachisqankuna kasharqanku, chayman chayaspa, muyuyninkupi ashkha runata rikorqanku. Jinallataj Diospa kamachisqanmanta wakin yachachejkunapis Jesuspa yachachisqankunawan churanakusharqanku. 15Chaypi tantasqa runakunataj Jesusta rikuytawan t'ukorqanku, usqhayta rispataj, napaykorqanku.
16Chantá Jesús yachachisqankunata taporqa: Imamantataj paykunawan churanakusharqankichejri? nispa.
17Chaypi kajkunamantataj uj runa nimorqa: Yachachej Wiraqochíy, wawayta pusamorqayki, imaraykuchus payqa opayachej supayniyoj. 18Maypi kaspapis sichus chay millay supay wawayta jap'in chayqa, ujllata pampaman wijch'uykun. Wawaytaj kirunta k'arurakuspa phosoqota ajtumun, k'aspipachataj wijch'ukun. Jinapi noqa yachachisqaykikunata chay millay supayta qharqonankuta nerqani, manataj aterqankuchu, nispa.
19Jesustaj kuticherqa: Ay, noqapi mana atinikuyta atej runakuna. Mayk'ajkamataj qankunawan kasajri? Mayk'ajkamataj awantasqaykichejri? Chay waynata pusamuwaychejmá, nispa.
20Chantá usqhayllata chay waynata Jesusman pusarqanku. Chay supayrí Jesusta rikuytawan, chay kikinpi waynata sinch'ita thalarqa. Waynataj pampaman urmaspa, kayman jaqayman sunt'iykacharqa, siminmantataj phosoqota ajtumorqa.
21Jesustaj waynaj tatanta taporqa: Mashkha unayñataj ajinari? nispa. Paytaj kuticherqa: Wawamantapacha ajina. 22Sapa kuti millay supayqa wawayta ninaman, manachayqa yakuman wijch'uykun, payta wañuchiyta munaspa. Sichus qan imallatapis ruwayta atiwaj chayqa, khuyarikuwayku, ari, yanapariwaykutaj, nispa.
23Chantá Jesús nerqa: Imaraykutaj ninki: Atiwaj chayqa, nispari? Noqapi atinikojpajqa tukuy imapis atikun,#Mt 21.21; Mc 11.23-24; Lc 17.6. nispa.
24Chayta uyariytawan, waynaj tatanqa qhaparerqa: Qanpi atinikuni. Chaywanpis yanapaway ari, qanpi aswan sinch'ita atinikunaypaj, nispa.
25Chantá ashkha runakuna tantakamushajta rikuspa, Jesús chay supayta k'amerqa: Kay waynata opayachej, joq'arayachej supay, noqa kamachiyki: Llojsiy paymanta, amataj ujtawan payman kutiykunkichu, nispa.
26Jinallapi chay supayqa sinch'ita qhaparerqa, waynata ujtawan manchayta thalaraspataj, paymanta llojserqa. Waynatajrí wañusqa jina choqakorqa. Chayta rikojkunataj nisharqanku: Wañupun, nispa. 27Jesusrí waynata makinmanta jap'ispa, aysarerqa, waynataj sayarerqa.
28Chantá Jesús uj wasiman yaykojtin, yachachisqankunalla paywan kashaspa, payta taporqanku: Imaraykutaj noqayku chay supayta mana qharqoyta aterqaykuchuri? nispa.
29Jesustaj kuticherqa: Chay jina supaytaqa Diosmanta mañakuspalla qharqoyta atiwajchej, waj jinamantaqa mana, nispa.
Jesús ujtawan wañunanmanta sut'inchan
(Mt 17.22-23; Lc 9.43-45)
30Chaymanta llojsispa, Jesuswan, yachachisqankunawan ima Galilea cheqanejta rerqanku. Jesustajrí chayninta rishasqanta mana pipis yachananta munarqachu, 31imaraykuchus yachachisqankunamanpuni yachachiyta munasharqa. Paykunatataj ajinata nerqa: Runaj Churenqa runakunaj makinman jaywasqa kanqa, paykunataj wañuchenqanku. Chaywanpis kinsa p'unchayninmanta wañusqamanta kawsarimponqa, nispa. 32Yachachisqankunatajrí chay nisqanta mana entienderqankuchu, tapuytapis manchachikorqanku.
Pitaj aswan kurajpaj qhawasqa kanman?
(Mt 18.1-5; Lc 9.46-48)
33Chay qhepata Jesusqa Cafarnaunman chayarqa, wasipiña kaspataj, yachachisqankunata taporqa: Imamantataj ñanpi churanakusharqankichejri? nispa. 34Paykunarí ch'inlla karqanku, imaraykuchus ñanpi churanakushasqanku, Dios kamachishajtenqa paykunamanta pichus kurajpaj qhawasqa kananmanta. 35Chantá Jesús tiyarikorqa, chunka iskayniyoj yachachisqankunata wajyaspataj, nerqa: Pillapis kurajpaj qhawasqa kayta munajqa tukuypa qhepanpi kanan tiyan, tukuypa kamachintaj, nispa.
36Chantá Jesús uj wawata oqharispa, yachachisqankunaj chawpinman sayaykucherqa, chaymantataj marq'arikuspa, paykunata nerqa: 37Pichus sutiypi kay wawa jina kajta, walejta jamunki, nispa jap'ikojqa noqata jap'ikushawan. Pichus noqata jap'ikuwajtaj, mana noqallatachu jap'ikuwan, aswanpis kachamuwajniy Tatayta,#Mt 10.40; Lc 10.16; Jn 13.20. nispa.
Jesuspa sutinpi waj runa t'ukunata ruwan
(Mt 10.42; Lc 9.49-50)
38Chantá Juanqa Jesusta nerqa: Yachachejníy, noqayku uj runata rikorqayku, sutiykipi supaykunata qharqoshajta. Noqaykurí ama ajinata qharqonanta kamacherqayku, mana noqanchejwan kasqanrayku, nispa.
39Jesustajrí nerqa: Ama jark'aychejchu. Pillapis sutiypi t'ukuna imakunata ruwajqa mana noqapaj sajrata rimanmanchu. 40Mana contranchejpi kajqa noqanchejman kutisqa.#Mt 12.30; Lc 11.23. 41Sichus pipis sutiypi uj vaso yakullatapis jaywarisunkichejman Cristojta kasqaykichejrayku chayqa, sut'ita niykichej: Diosqa payman t'inkata qonqapuni, nispa.
Juchallichejqa jasut'isqa kanqa
(Mt 18.6-11; Lc 17.1-2)
42Jesús nillarqataj: Sichus pipis noqapi atinikoj wawakunamanta ujllatapis juchallichinman chayqa, pay sinch'i jasut'isqa kanqa. Chay juchallichejpajqa aswan allin kanman molino rumita kunkanman wataykuspa, mama qochaman choqaykunankoqa. 43Chayrayku sichus makiyki juchallichisunki chayqa, khuchurpariy. Aswan allin kanman ch'ulla makilla kashaspa wiñay kawsayman yaykunaykeqa, iskaynin makiyoj kaspa lawrashaj nina qochaman yaykunaykimanta nisqaqa, maypichus nina mana wañunchu, chayman. 44Chaypeqa khurukunapis mana wañunkuchu, nitaj jayk'ajpis nina wañunchu.#Is 66.24.
45Sitajchus chakiyki juchallichisunki chayqa, khuchurpariy. Aswan allin kanman ch'ulla chakilla kaspa wiñay kawsayman yaykunaykeqa, iskaynin chakiyoj kaspa lawrashaj nina qochaman choqasqa kanaykimanta nisqaqa. 46Chaypeqa khurukunapis mana wañunkuchu, nitaj jayk'ajpis chay nina wañunchu.
47Chantá sichus ñawiyki juchallichisunki chayqa, orqhorpariy. Aswan allin kanman ch'ulla ñawilla kaspa Diospa kamachiyninman yaykunaykeqa, iskaynin ñawiyoj kaspa lawrashaj nina qochaman choqasqa kanaykimanta nisqaqa. 48Chaypeqa khurukunapis mana wañunkuchu, nitaj jayk'ajpis chay nina wañunchu.
49Tukuy runaman ñak'ariykuna nina jina jamonqa, imaynachus kasqanku sut'ita yachakunanpaj. 50Kacheqa sumajmin. Chaywanpis kachichus q'aymayanman chayqa, imaynatataj watejmanta k'araman kutinmanri? Jinallataj qankunapis sumaj kachi jina kaychej, ujkuna ujkunawantaj allinta kawsakuychej, nispa. Ajinata Jesús yachacherqa.
Šiuo metu pasirinkta:
Marcos 9: DQDC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Revisión Biblia Quechua Boliviano © Sociedad Bíblica Boliviana, 2017.