Lu-kâ 22

Sat-hoi Yâ-sû ke Yîm-mèu

(Mâ-thai 26:1-5; Mâ-khó 14:1-2; Yok-hon 11:45-53)

1Chhù-kau-chiet (yu ôn-to Phàn-ko-chiet) voi to lé. 2Chi-sṳ̂-chóng lâu kîn-ho̍k kau-sṳ̂ yîn-vi kiâng mìn-chung, chhiu yîm-mèu oi ngióng-pân sat-hoi Yâ-sû.

Yù-thai Chhut-mai Yâ-sû

(Mâ-thai 26:14-16; Mâ-khó 14:10-11)

3Ke-sṳ̀, Sat-tan chin-ngi̍p Kâ-lio̍k-ngìn Yù-thai ke sîm. (Yù-thai he Yâ-sû sṳ̍p-ngi-ke ho̍k-sâng ke yit-ke.) 4Yù-thai hi thùng chi-sṳ̂-chóng lâu sṳn-thien ke kín-ví-chóng chhâm-siòng, oi ngióng-pân chiông Yâ-sû kâu-pûn kì-têu. 5Kì-têu fî-sòng fôn-hí, yu tap-yin nâ chhièn pûn kì. 6Yù-thai chhiu thùng-yi, khôi-sṳ́ chhìm kî-fi, oi chhai mò chung-ngìn chhai-chhòng ke sṳ̀-chiet chhut-mai Yâ-sû.

Chún-phi Phàn-ko-chiet ke Vân-chhôn

(Mâ-thai 26:17-25; Mâ-khó 14:12-21; Yok-hon 13:21-30)

7Chhù-kau-chiet khì-kiên, chhṳ̀ Phàn-ko-chiet kâu-yòng ke-ngit to lé. 8Yâ-sû phai Pí-tet lâu Yok-hon chhut-hi, fûn-fu kì-têu kóng: “Ngì-têu hi thoi ngài-têu chún-phi Phàn-ko-chiet ke vân-chhôn.”

9Kì-têu mun-kóng: “Ngì oi ngài-têu chhai nai-vi chún-phi?”

10Yâ-sû kóng: “Ngì-têu ngi̍p-sàng hi, voi tù-tó yit-ke ngìn tai-tén yit-kon súi; ngì-têu chhiu thèn-tén kì, to kì ngi̍p-hi ke vuk-tú, 11mun ke kâ ke chú-ngìn kóng: ‘Sîn-sâng kóng: Ngài lâu ngài ke ho̍k-sâng sṳ̍t Phàn-ko-chiet vân-chhôn ke hak-thâng chhai nai-vi?’ 12Kì voi tai ngì-têu hi khon lèu-táng yit-kiên pu-chṳ-hó ke thai fòng-kiên; ngì-têu chhiu chhai ke-vi chún-phi.”

13Kì-têu chhiu hi; só tù-tó ke chhiòn-phu lâu Yâ-sû tui kì-têu kóng ke khiung-yong; kì-têu chhiu chhai ke-vi chún-phi Phàn-ko-chiet ke vân-chhôn.

Chú ke Vân-chhôn

(Mâ-thai 26:26-30; Mâ-khó 14:22-26; Kô-lìm-tô Chhièn-sû 11:23-25)

14Sṳ̍t-ya ke sṳ̀-kiên to lé, Yâ-sû ngi̍p-hi, sṳ́-thù ya thùng kì khiung-ha chhô-chok. 15Kì tui kì-têu kóng: “Ngài yit-chhṳ̍t hî-mong chhai su-nan yî-chhièn thùng ngì-têu khiung-ha sṳ̍t liá Phàn-ko-chiet ke vân-chhôn. 16Ngài lâu ngì-têu kóng, mò tén-to liá vân-chhôn ke yi-ngi sṳ̍t-hien chhai Song-ti koet, ngài chhie̍t-tui m̀-voi chai sṳ̍t liá-ke vân-chhôn.”

17Yèn-heu, Yâ-sû chiap-ko pî-é, kám-chhia Song-ti heu, kóng: “Ngì-têu nâ-hi, thai-kâ pûn-tén lîm. 18Ngài lâu ngì-têu kóng, chhiùng-kîm yî-heu, mò tén-to Song-ti ke koet lìm-to, ngài chhie̍t-tui m̀-voi chai lîm liá phù-thò-chiú.”

19Chiap-tén, kì nâ-hí piáng-è, kám-chhia Song-ti heu, chhiu pak-khôi, pûn-pûn kì-têu, kóng: “Liá he ngài ke sṳ̂n-thí, he vi ngì-têu hî-sên ke; ngì-têu oi án-ngiòng hàng, lòi ki-ngiam ngài.” 20Sṳ̍t-páu heu, kì cheu-yong nâ-hí pî-é, kóng: “Liá pî he Song-ti ke sîn-yok, he yung ngài vi ngì-têu liù-chhut ke hiet só sat-li̍p ke.#22:20 Yû-têu kú-kién mò 19 chiet “he vi ngì-têu ... lòi ki-ngiam ngài” liá-ki fa, ya mò 20 chiet.

21“Ngì-têu khon, chhut-mai ngài ke ngìn thùng ngài khiung-chok! 22Ngìn-chṳ́ khok-sṳ̍t oi cheu Song-ti ke ôn-phài lòi su-hoi, chúng-he chhut-mai kì ke ngìn yû châi-fo lé!”

23Kì-têu chhiu pí-chhṳ́ kín-mun, to-tái he má-ngìn oi cho liá-khien sṳ.

Ho̍k-sâng Chên-lun Má-ngìn Chui-thai

24Ho̍k-sâng chûng-kiên fat-sên chên-lun, to-tái má-ngìn chui-thai. 25Yâ-sû tui kì-têu kóng: “Ngoi-pâng-ngìn ke kiûn-vòng yû khièn kón-hot kì-têu; kì-têu ke thúng-chhṳ-chá yu pûn-ngìn chhṳ̂n-cho kiu-sên; 26chúng-he ngì-têu m̀-he án-ngiòng. Ngì-têu tông-chûng chui-thai ke, fán-chón oi chhiong chui-se ke; cho liâng-chhiu ke, yin-kôi chhiong phu̍k-ngìn. 27He chhô-chok ke kha thai, ya-he fu̍k-sṳ kì ke kha thai nè? Kám m̀-he chhô-chok ke kha thai mâ? Chúng-he, ngài chhai ngì-têu chûng-kiên he fu̍k-sṳ ngìn ke.

28“Ngài su mò-lien ke sṳ̀, ngì-têu yit-chhṳ̍t thùng ngài khiung-ha. 29Ngâ Pâ yû su ngài yit-ke koet, liá-ha, ngài khiung-yong ya oi chiông liá-koet ke thúng-chhṳ-khièn su-pûn ngì-têu. 30Ngì-têu oi chhai ngài ke koet tî-poi thùng ngài khiung-ha lîm-sṳ̍t, ya oi chhô chhai pó-chho táng-kô sṳ́m-phan Yî-set-lie̍t ke sṳ̍p-ngi kî-chhu̍k.”

Yâ-sû Yi-ngièn Pí-tet M̀ Ngin Kì

(Mâ-thai 26:31-35; Mâ-khó 14:27-31; Yok-hon 13:36-38)

31Yâ-sû yu kóng: “Sî-mùn, Sî-mùn! Sat-tan yí-kîn yêu-khiù sṳ-tham ngì-têu, chhiong kâng-chung-ngìn chhî ma̍k-é án-ngiòng lòi chhî ngì-têu. 32Chúng-he, ngài yí-kîn vi ngì khì-tó, pûn ngì ke sin-sîm m̀-voi mò-thet hi. Ngì to-chón-lòi kûi ngài yî-heu, chhiu oi kiên-ku ngì ke-têu hiûng-thi.”

33Pí-tet kóng: “Chú â, ngài kâm-ngien thèn ngì hi chhô-kâm, thùng ngì khiung-ha sí!”

34Yâ-sû kóng: “Pí-tet, ngài lâu ngì kóng, kîm-pû-ngit kiê-é thài yî-chhièn, ngì voi sâm-pái kóng ngì m̀-sṳt ngài.”

Chhièn-pâu, Lî-hàng-thoi, Tô-é

35Yâ-sû yu tui kì-têu kóng: “Thèu-pái, ngài phai ngì-têu chhut-hi, ham ngì-têu m̀-hó tai chhièn-pâu, m̀-hó tai lî-hàng-thoi ya-he hài-è, ngì-têu sṳt khiam má-ke mò?”

Kì-têu en-kóng: “M̀-sṳt.”

36Yâ-sû kóng: “Chúng-he liá-ha, yû chhièn-pâu ya-he lî-hàng-thoi ke, oi tai-tén; mò tô-é ke, oi mai sâm hi mâi yit-kî. 37Ngài lâu ngì-têu kóng, Sṳn-kîn só kóng: ‘Kì sṳ̀n-tâm chhui-ngìn ke miang-yun’ ke-ki fa, yit-thin oi sṳ̍t-hien chhai ngài ke sṳ̂n-song. Sṳ-sṳ̍t-song, só-yû koân-he ngài ke ki-chai yí-kîn yin-ngiam-tén lé.”

38Ho̍k-sâng kóng: “Chú â, ngì khon, liá-vi yû lióng-kî tô-é.”

Yâ-sû kóng: “La lé!”

Yâ-sû Chhai Kám-lám-sân Khì-tó

(Mâ-thai 26:36-46; Mâ-khó 14:32-42)

39Yâ-sû chhut-sàng, cheu-sòng hi Kám-lám-sân; ho̍k-sâng ya thèn-tén kì hi. 40To ke só-chhai, Yâ-sû tui kì-têu kóng: “Ngì-têu oi khì-tó, miên-tet ham-lo̍k mì-fe̍t.”

41Yèn-heu, Yâ-sû lì-khôi kì-têu, yok yû te̍p yit-chak sa̍k-thèu án yén, khúi hâ-hi khì-tó, 42kóng: “Â-pâ â, Ngì na-he hén, chhiáng chiông liá-ke khú-pî sái-chéu; chúng-he, m̀-hó cheu ngài ke yi-sṳ, oi sṳ̀n-chhiòn Ngì ke chṳ́-yi.”

43Yû yit-ke thiên-sṳ́ tui thiên-táng hiong kì hién-hien, lòi kâ-thiâm kì ke li̍t-liong. 44Chhai khi̍t thung-khú chṳ̂ chûng, Yâ-sû hàn-kha pet-chhiet khì-tó; kì ke hon-súi chhiong thai-tiám ke hiet tit-tén lo̍k thi-nài.#22:44 Yû-têu kú-kién mò 43-44 chiet.

45Khì-tó heu, Yâ-sû hong-hí-lòi, chón-to ho̍k-sâng ke-vi, fat-hien kì-têu yù-sông ko-thu chhiu soi-thet-hi. 46Kì tui kì-têu kóng: “Ngì-têu cho-má-ke soi-thet-hi nè? Hong-hí-lòi, oi khì-tó, miên-tet ham-lo̍k mì-fe̍t.”

Yâ-sû Pûn-ngìn Chok-hi

(Mâ-thai 26:47-56; Mâ-khó 14:43-50; Yok-hon 18:2-11)

47Yâ-sû hàn kóng-tén fa ke sṳ̀, yû yit-khiùn ngìn lòi-to. Sṳ̍p-ngi-ke ho̍k-sâng chûng ke Yù-thai chhai thèu-chhièn tai-lu, kì chin-chhièn oi chîm Yâ-sû. 48Yâ-sû tui kì kóng: “Yù-thai, ngì yung chîm ngài lòi chhut-mai Ngìn-chṳ́ he-mò?”

49Thùng Yâ-sû khiung-ha ke ho̍k-sâng khon-tó liá-ke chhìn-hìn, chhiu kóng: “Chú â, ngài-têu cho-tet sṳ́ tô-é mò?” 50Khì-chûng yit-ke pâng-chhut tô-é, tui thai-chi-sṳ̂ ke phu̍k-ngìn phiak-ko-hi, siok-thet kì yu-phién ke ngí-kûng.

51Yâ-sû kóng: “Mo̍k chai thûng-sú!” Thèn-tén, kì chhûn-sú miâ ke-ngìn ke ngí-kûng, yî-hó kì.

52Yèn-heu, Yâ-sû tui ke-têu lòi chok kì ke chi-sṳ̂-chóng, sṳn-thien ke kín-ví-chóng, lâu chóng-ló kóng: “Ngì-têu tai-tén tô-é lâu kun-é chhut-lòi chok ngài, khon ngài cho khiòng-tho he-mò? 53Ngài tak-ngit thùng ngì-têu khiung-ha chhai sṳn-thien-tú, ngì-têu pin mò ha-sú chok ngài; chúng-he, liá-ha he ngì-têu vàng-hàng ke sṳ̀-chiet, vû-am chóng-khièn lé.”

Pí-tet M̀ Ngin Yâ-sû

(Mâ-thai 26:57-58,69-75; Mâ-khó 14:53-54,66-72; Yok-hon 18:12-18,25-27)

54Kì-têu chok-tén Yâ-sû, tai kì hi thai-chi-sṳ̂ ke vuk-tú; Pí-tet yén-yén thèn-tén hi. 55Kì-têu chhai thìn-yen-tú hí yit-tôi fó, thai-kâ vì-tén fó chhô-tén, Pí-tet ya chhô chhai kì-têu chûng-kiên. 56Yû yit-ke sṳ́-ńg khon-tó Pí-tet chhô chhai ke-vi phoi-fó, chhiu chu-muk khon-tén kì, kóng: “Liá-ke ngìn ya he thùng kì khiung-ha ke.”

57Pí-tet féu-ngin kóng: “Fu-ngìn-kâ, ngài m̀ sṳt kì!”

58Ko mò kí-kiú, yu yû-ngìn chu-yi-tó kì, kóng: “Ngì me he kì-têu tông-chûng ke yit-ke.”

Pí-tet kóng: “Sîn-sâng, ngài m̀-he!”

59Chhâ-m̀-tô yit-tiám-chûng heu, nang-ngoi yû yit-ke ngìn yung kiên-thin ke khiéu-hi kóng: “Chhie̍t-tui m̀-voi chhâ, kì me he thùng ke-ngìn khiung-ha ke, yîn-vi kì he Kâ-li-li-ngìn!”

60Chúng-he Pí-tet kóng: “Ngì liá-ke ngìn â, ngài m̀-tî ngì kóng má-ke!”

Kì ke fa hàn-màng kóng-so̍t, kiê-é chhiu thài. 61Chú chón-sṳ̂n, chu-muk khon Pí-tet; Pí-tet chang sióng-hí Chú tui kì só-kóng ke fa: “Kîm-pû-ngit kiê-é thài yî-chhièn, ngì voi sâm-pái m̀ ngin ngài.” 62Pí-tet chhiu chéu-chhut-hi, kieu-to fî-sòng sông-sîm.

Yâ-sû Pûn-ngìn Met-sa pin Vú-yu̍k

(Mâ-thai 26:67-68; Mâ-khó 14:65)

63Chóng Yâ-sû ke ngìn met-sa kì, tá kì; 64êm-tén kì ke muk-chû, mun kì kóng: “Siên-tî â, chhṳ-thòn-khon, he má-ngìn tá ngì?” 65Kì-têu yu kóng chhin-tô fa lòi vú-yu̍k kì.

Yâ-sû Chhai Ngi-fi Su Sṳ́m-phan

(Mâ-thai 26:59-66; Mâ-khó 14:55-64; Yok-hon 18:19-24)

66Thiên-kông ke sṳ̀, Yù-thai-ngìn ke chóng-ló, chi-sṳ̂-chóng, lâu kîn-ho̍k kau-sṳ̂ chhiòn-phu chhi-si̍p khiung-ha, yèn-heu tai Yâ-sû to kì-têu ke ngi-fi hi. 67Kì-têu mun kì kóng: “Lâu ngài-têu kóng, ngì he m̀-he Kî-tuk?”

Kì en-kóng: “Ngài chhiu-he lâu ngì-têu kóng, ngì-têu ya m̀-voi siông-sin; 68na-he ngài mun ngì-têu, ngì-têu me voi m̀ fì-tap. 69Chúng-he, chhiùng-kîm yî-heu, Ngìn-chṳ́ oi chhô chhai chhiòn-nèn Song-ti ke yu-phién.”

70Thai-kâ kóng: “Án-ngiòng, ngì he Song-ti ke Lai-é lô?”

Yâ-sû kóng: “Ngài he, liá he ngì-têu kóng ke!”

71Kì-têu chhiu kóng: “Ngài-têu kám hàn oi-sṳ́ khì-thâ ke chṳn-kí nè? Ngài-têu yí-kîn thâng-tó kì chhîn-khiéu kóng ke fa lé!”

Šiuo metu pasirinkta:

Lu-kâ 22: THV12Rdb

Paryškinti

Dalintis

Kopijuoti

Norite, kad paryškinimai būtų įrašyti visuose jūsų įrenginiuose? Prisijunkite arba registruokitės

Sužinoti daugiau apie HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Lu-kâ 22

Populiarios Biblijos eilutės iš
Lu-kâ 22

Biblija:

Hakkafa (Roman script)

Versija: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Lu-kâ 22

Lu-kâ 22

Populiarios Biblijos eilutės iš Lu-kâ 22

Biblija:

Hakkafa (Roman script)

Versija: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Lu-kâ 22

Populiarios Biblijos eilutės iš
Lu-kâ 22