Ubutukilo 9
9
1Zambi yawahisa Noa ni ana jenyi a malunga ngwenyi: “Semenu nuliokese, nukazalise hashi heswe. 2Tushitu ni tujila ni yishi, eswe maakanuvwila woma. Eswe munukaayula. 3Haliabwila nanwaha tushitu eswe ha kulia, ngwe chize nanuhele mafwo eka ni eka a wisu. 4Shina Chuma chimuwika kunwahashile kulia, kashitu ni manyinga jenyi, mumu mwono uli mu manyinga. 5Nyi mutu mashiha mukwo, yami mungukala yoze hafwa. Mungukala mutu mweswe yoze maashiha kuli kashitu. 6Yoze mashiha mukwo, neye maakamushiha kuli mukwo weka, mumu Zambi yatanga mutu ni kulifwa nenyi.
7“Yenu Semenu nuliokese, nukalumbame hashi heswe.”
8Mba Zambi yaambila ngwenyi: 9“Yami ngunakolesa Usendo ni yenu ni vungu lienu lia kulutwe. 10Ngunakolesa Usendo ni eswe waze ali hamwe ni yenu: ni tujila, ni yimuna, ni tushitu a mu yambu, kulumbunuka eswe waze atuhukile mu ulungu. 11Ngunakolesa Usendo ni yenu ni maliji wano ngwami: Eswe waze akwete mwono keechi kafwa nawa ni sanga lia meya. Ndoo ku miaka yeswe sanga lia meya kulichi kwonona nawa akwa hashi. 12-13Ngunase kongolo yami mu lelwa ha kulweza yisemuko yeswe Usendo uze hinakolesa ni yenu ni tushitu eswe. Chinyingi chino muchibwa chilweza cha Usendo uze hinakolesa ni eswe waze ali hano hashi. 14Lieswe tangwa lize mungusolola malelwa kwilu, nyi kongolo wamoneka, 15-16mungwiwuluka Usendo uze hinakolesa ni yenu ni tushitu eswe ku miaka yeswe ngwami, sanga lia meya kulichi kwonona nawa eswe waze atwama hashi. 17Chino che chinyingi chize hinasa mumu hali eswe waze akwete mwono hano hashi.”
Noa ni ana jenyi a malunga
18Wano e ana ja Noa a malunga waze atuhukile mu ulungu: Sheme, ni Hame, ni Jafete. Hame mwe tato ya Kanana. 19Ana wano atatu a Noa e abwile tushakulu twa akwa hashi eswe.
20Noa mwe mutangu kulima mitondo ya vinyu. 21Yanda yimwe vinyu, yanwa, yazengewa, yabomba uselesele mu zuwo lienyi lia makubu. 22Muze Hame, tato ya Kanana, hamona uselesele wa tato, yaya ni kulweza ayayo. 23Mba Sheme ni Jafete yaanda hina, yaalikika lio ha yipaya. Yaaya unyimenyime ndoo mu zuwo, mba yaafuka tato hina lize. Yaatalikisa meso jo ku tenga, kaamwene ko uselesele wa tato. 24Noa, muze vinyu hiyamubatwoka, yahinduka, yevwa chize mwanenyi wa kanuke hamulinga, 25yamba ngwenyi:
“Kanana namushinga,
kumakabwa ndungo ya ayayo.
26Mwene Zambi ya Sheme afumane.
Kanana kumakabwa ndungo ya Sheme.
27Zambi okese Jafete.
Vungu lienyi akatwame hamwe ni vungu lia Sheme.
Kanana makabwa ndungo ya Jafete.”
28Muze sanga lia meya hilioma, Noa yatwama ni mwono miaka yikwo 350. 29Mba muze habwa ni miaka 950, Noa yafwa kwenyi.
Šiuo metu pasirinkta:
Ubutukilo 9: CHK1970
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.