ATÜNNAK 12
12
Khanpughi Naw Abram A Khü
(Lt 7:2-5)
1 Bawipa naw Abram cu khü neta, “Na khaw na chang gui la napa ah im cu nawng shüt ne, kei naw ka ning m’hnuh ah khaw ah na hteh vai nei. 2Nang cu akda ah ka ning shon sak khai. Na htangshon cu pakhui küüi ah kyak khai. Hriham ning pe ne na ming ka ning thangsak khai. Nang cu chang gui ah hriham ah na kyak khai.
3Hriham ning pek ci cu, Hriham ka pek khai,
Ning plah taam ci cu, Ka plah taam khai,
Nang ung chang pakhui avan cu, Hriham ka pek khai” cine pyen ci.
4Abram cu a khawkum 75 law khätah Bawipa naw amcäi ah mäih ah Haran khaw nawng shüt ne hteit ci, Lotah phi hteit tuk ci. 5Abram cu akchu Sarai la atu Lotah ni, a changshäm gui ni, a khawh cham gui ni pawng püi ne, Haran khaw ungka naw Kanaan khaw ah hteit ci.
Ngami cu Kanaan khaw ah gawk u neta, 6Shekhem hmun theing, Moreh sing ghing aktheing ah kung ah gawk ne hteit ci gui. (Cun sang ung cun ah khaw ah Kanaan chang gui om yah ci gui.) 7Bawipa cu Abram ah ma ah dang law neta, “Shin ah khaw cu nang ah htangshon am ka pek ah khaw ah kyak ci nei” cik ci. Abram naw Bawipa angdang law nak ah hmun ung khawih kiang co ci. 8Cun kawn ah a htumtäng ungka naw, Bethlela mang gaw ah hni law lam khawgui ah ng’plon ba ne, hni kyak lam Bethlela la hni law lam Ai ah ng’lak ung phung tu ne om ci gui. A cun ung khawih kiang co ne Bawipa cu khawihnah ci gui. 9Ani cu ng’plon shüi shüi neta Kanaan khaw a htumtäng ah gawk ci.
Egypt Khaw Ah Abram
10Cun sang ung Kanaan khaw ah khaw yaw tuishek ci. Sheka law aih khäta Abram cu a htumtäng Egypt khaw ah a shäng om tuk khai ah hteit ci. 11Egypt khaw ah gawk law vai u neta, Abram naw a chu Sairai am, “Nang cu hnumi kyom ah na kyak ci,
12Egypt chang gui naw ning hmu u neta, kei ah chu ah ami ning hmat ah a kyak ung, kei cu na ngawn ne nang cu ning k’phyawn khai gui,
13Cun ah kyasei nang cu ka ning be ah na pyen vai. Cun ung nang ah hmai teng ne kei cu na k’phyawn ne, na m’hteihtang khai gui” cine pyen ci.
14Egypt khaw ah ami gawk ung Egypt chang gui naw, hmu u neta, “A chu kyom ci” cik ci gui.
15Bawi ng’vai gui naw phi hmu u neta, kyom aih ci, cine ghangpughang am m’thein u sei, ani naw mang im kyong ah la ne hteh püi ci.
16Ghangpughang naw cun ah hnumi ah phäh ah Abram cu khinchah na ne, htaw gui, me gui, vantang gui, sela gui, kala uk gui la changshäm gui akda cu pek ci.
17Ghangpughang naw Sarai a laak ah phäh ah, Bawipa naw ghangpughang la mang im kyong ah chang gui ah khan ah leigai yuk chah lawk ci. 18Ghangpughang naw Abram cu khü neta, “Nang naw kei ah khan ah a i hawkcha ah na bi ang? Ani na chu ah a kyak ah mawng cu, a i ah kyasei kä na pyen ang? 19A i ah kyasei ani cu kei naw ka lak vai ah na be ah na pyen ang? Na chu hteh püi ba ne hteit ba ä” cine pyen nak ci. 20Ghangpughang naw a chang gui m’cäi gui sei, ngami naw Abram cu la ne a chu la a khawh avan mah mah ah cun ah khaw ungka tüi ba ci gui.
Šiuo metu pasirinkta:
ATÜNNAK 12: CBC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Cho Bible Common Language © Bible Society of Myanmar, 2016.