ATÜNNAK 9
9
Noah Am Khanpughi Ah Ng’thumkhän
1Khanpughi naw Noah la a hta gui cu hriham pe gui neta, “Nangmi cu akda ah hta ne khomdek nami be sak vai nei. 2Ak ghing avan, kha avan, nga avan naw nangmi cu ning kyih gui khai nei. Cun gui avan cu nami kut ung ka ning ap gui ci. 3Ak ghing phung avan thui an ah mäih ah nami ei vai, avan cu nami ei vai ah ka ning pe gui ci. 4Cun ung phi si la si ah om nak ah asa cu kä nami ei vai, si ung ghin nak om ci. 5Chang ah hnun gui m’kat cicu m’kyuk nak gah khai. Khisa naw chang am kat ah a kyak ung kei naw sih nak pe ne ka m’kyuk khai. 6Chang cu Khanpughi ah mäih ah a tüisho ah kyak ci. Cun ah kyasei chang awn cicu amät chang naw ngawn tuba khai.
7“Nangmi cu akda ah nami hta vai nei, nami htangshon gui cu khomdek khan ah be ne om khai gui nei” cik ci. 8Cun kawn ah Khanpughi naw Noah la a hta gui am, 9“Nangmi la nami htangshon gui avan, 10a hnun ghing gui avan — kha gui avan la khisa gui avan la nangmi awn a täng ah htinpaw im ungka lut law ba ci avan am kei naw thumkhän ka pek ci. 11Shin ah ng’thu gui awn kei naw thukhän ka ning pe gui ci: Cän kawn ah tuiyiin mü sei a hnun ghing gui ah sih nak kä om ba khai. Khomdek m’di khai ah tuiyiin kä mü ba khai. 12Nangmi la a hnun ghing avan awn ka bi ah angtäi om ciah thukhän m’hnüt nak ah, 13Ka yapi cu khongmei ung ka ng’dang sak ci. Cun ah yapi cu khomdek la kei ah thukhän ah kyak khai nei. 14Kei naw khawmik cu khongmei awn ka shung law päng ung yapi cu dang lawk khai nei. 15Nangmi la ak ghing avan ung ka shaitaak cu ka shüm lä ci nei. Tuiyiin mü ne ak ghing gui cu kä m’di ba khai. 16Khongmei ung yapi angdang law ung kei naw hmu ne, kei la khomdek khan ak ghing gui ah ng’lak ung angtäi om ciah ng’thukhän cu ka shüm ba khai nei. 17Shin cu kei naw a hnun ghing gui ah khan ah ka bi ah shaitaak ah saksi ah kyak ci nei.
Noah La A hta Gui
18Htinpaw im ungka lut law ba ciah Noah ah a hta gui cu, Shem, Ham la Japheth ah kyak ci. (Ham cu Kanaan ah apa ah kyak ci. 19Shin ah Noah ah htapami thum cu, khomdek khan ung chang khli ah ng’shon lawk ci gui.
20Noah cu lo bi ne sapyit geit law htük ciah chang ah kyak ci. 21Ani cu sapyit tui aw ne, awktat ne, a suisak suut ne akplui ah ak pyu ah ng’yän ci. 22Kanaan ah kaa Ham naw ami pa akplui ah ang yän cu hmu neta, a nau goi am m’thein tu goi ci. 23Shem la Japheth cu ani suisak ani k’phleing ung khooi ne, a hnu täng ah law ni neta ani pa cu khuih ci goi. Ngani naw akpung täng ah mang ne khuih ci goi kya ne, ami pa ak plui cu kä hmuk ci goi. 24Noah naw ng’shüm law ba ne a hta hmawpi naw a m’htei cu hmu neta; 25Ani naw,
“Kanaam cu ka plahtaam ci nei,
ani cu a phäinau gui ah
changshäm ah kyak khai nei.
26Shem ah Khanpughi Bawipa cu
yei na vä,
Kanaan cu Shem ah
changshäm ah kyak khai nei.
27Khanpughi naw Japheth cu
hlüngtai sak sä.
A hta ng’shon gui cu
Shem ah chang gui awn
om ghawm u sä!
Kanaan cu Japheth ah
changshäm ah kya sä” cik ci.
28Tuiyiin a mü kawn ah Noah cu khawkum 350 ghing ba neta, 29a khawkum 950 ung sik ci.
Šiuo metu pasirinkta:
ATÜNNAK 9: CBC
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Cho Bible Common Language © Bible Society of Myanmar, 2016.