Saint Luc 8
8
1Da baï mi gui mahana ka on, ko̱ pélé aféké mi gui tou, Jésus mi sé guè bil loukou pouli da lélé pouli bon, ka sa mboura da to̱ko̱ bèlabaï a bilkaou a Ouone, da kli botoulè‐séré sé jing nè, 2da waïn hanali ko̱ mone kli mi haï jing jangmali da béké espritli; Marie a Magdala, kè on ko̱ zabololi difala‐séré mi tèn kala an bilè, 3da Jeanne, waïn a Chuza, njou‐bakara a Hérode, da Susanne, da waïn afékéli nyèta ko̱ nding bakara hi Jésus jing ba fèn klili.
4Da ko̱ ro̱kè njoukouli a pouli toutoul toutoul, mi ndoï jing hana da gui monè, kè sa ka ébèlbaï:
5Njou‐mèna mèrèn hana mbéo mi sé baï mèna mèrènfèn nèli. Da ko̱ kème yé mènakè, hanali mi ta lé bèl domboro: da njoukouli nda nè ka bo̱ko̱ kli, da ndoïli an nonkala mi gui da té nè. 6Da afékéli mi ta lé kon njaka bang kone: da ko̱ kème bou, kè ho̱ko̱ gata baï ko̱ mbi tane ti saonkè ya. 7Da kène afékéli mi ta lé kon woro nzara da nzara: mi ndé hon jing nè, ka ta toulè. 8Da afékéli mi ta lé kon bèla koukoula: da lang mone ka hon da lé lénakè ténakè mbéo. Da afal ko̱ kè sa fèn aïnli kè wan njaka: Kè on ko̱ soukè mi outa dadaon an kème la.
9Da njou‐séna bong nèli mi oui nè ba ébèlbaï on mi sa ba fèn lé? 10Da kè sa: Da abaï baï touna didissi fèn toul bilkaou a Ouone; da ba baï a gara njoukou afékéli bon, mi ko̱ fènli bon to̱ko̱ ka ba ébèlbaïli, baï ko̱nakè yé kli ba ko̱nakè tang tiya, da lanakè yé kli ba tounakè nguite tane tiya.
11Saou a ébèlbaï aïn ba: Mèrènkè ba baïnjaka a Ouone. 12Da kli on ko̱ mi ta lé bèl domboro, kli mahana ka njoukouli on ko̱ la, da zabolo gui da ya baïnjaka a go̱ro̱ kli, an klime tane la bilaou ka kou ya. 13Kli on ko̱ mi ta lé an njaka bang kone, kli mahana ka njoukouli on ko̱ ya baïnjaka ka jangnandaï; da bo̱ko̱ kli tiya baï ko̱ kli la bilaou bongkè diya, da ko̱ fèn yaknafèn mi gui kli yèng mborokè. 14Da kli on ko̱ mi ta lé an bil nzara, kli ba kli ko̱ la, da ko̱ kli sé mboro kli fèn kli, bina hang kli toul pina klili, da nguèra mi mong kli, tèn jangnandaï a yana mi koung kli tou, da mono mi ko̱ kli tane lé bèla lénakè ya. 15Da kli on ko̱ mi ta lé bèla koukoula ba kli on, ko̱ mi la baïnjaka bi laou go̱ro̱ kli, ka bèla go̱ro̱ mbonatoul, da kli mi pèngnakè, ka lé lénakè ka laïnabi.
16Da njoukouna ko̱ mi bi hèlè lampe, ma goukou nè bo̱ko̱ ili ya, maléba bina nè bo̱ko̱ toko ya; da kème bi nè toul gangnafèn baï an kli on ko̱ mi ri bilkè ma ko̱ takanafèn. 17Baï ko̱ fèna mbéo ba mouna tane tiya, ko̱ ma tèn kala ya, da dèkèra baï hana mbéo ka foli tane tiya, ko̱ kli ma tou ya, ka tèn ba none sé. 18Mono on, oui pèng mone baï bèlta guè mboro aïn ko̱ ouime la; baï ko̱ njoukouna ko̱ mi yé jing fèna, yé kli ma hi aféké hi nè, da njoukouna ko̱ mi tane ti jing fèna ya, yé kli ma ya fèn on guèfal an ndo̱kè, ko̱ kè kèrè ba mana ndo̱kè.
19Da ma a Jésus tèn yine nèli mi gui baï nzana nè, da kli ma baï guèna monè ya baï ko̱ njoukouli mi nyè maïya. 20Da kli sa hi nè: Ma no da yine noli mi o kala, kli ji baï ko̱na mo. 21Da kème féré sa, ka sa hi kli: Ma ni da yine nili mi ba kli on ko̱ la baïnjaka Ouone, ka nding mahana ko̱ kè sa.
22Da baï mi gui mahana ka on, name mbéo hana, kè hé ka sé bil kombone, tèn njou‐séna bong nèli. Da kè sa hi kli: Gui an name sé guè mboro lèkè a loukou mbi, da kli héré kombone yan none mbi. 23Da ko̱ klime pane hérakè, da kè naname, da koukouna bine‐té mi kou yan none mbi, da mbi mi nding baï mbana bil kombone, da kli diya jing houl. 24Da kli gui monè ka tome nè, ka sa: Njou‐to̱ko̱nafèn, njou‐to̱ko̱nafèn, yé na hou. Da kè tome, ka to koukouna da wouna mbi on, da wouna mbi on ko̱ mi wou nyèta mi koung, da guèl mi na chiou. 25Da kè sa hi kli: Tounassaon abaï an hane dé? Da waou mi i kli ta, da laou kli mi sé siya, da kli bakèdakè jing hana! Da on njoukou on ba guè, ko̱ kème sa bi njaka hi koukouna da loukou mbi on, da kli ndé la baï nè lé?
26Da kli tèn guèl an Gérasénienli ko̱ na bèl guèl Galilée. 27Da ko̱ kè diri gui koukoula tou, kè woutoul jing njoukou hana ko̱ gui ka pou, jing zabololi, da bongkè dita kè tane ga bou la ya, da kè tane kaou an bil voulou ya, da kè bi amè ba an bil pal kone. 28Da ko̱ kème ko̱ Jésus, kè wan njaka ka lé bou koukoula an mbèlè. Kè wan njaka mingta guè siya, ka sa: Fème ko̱ mbèl mo jing mi lé, Jésus, mo Goune a Ouone a Sèkèrè Guèl Ndèk? Mè sa jo̱jo̱ no an mome tane zara mi ya. 29Baï ko̱ kè sa bi njaka esprit dakame an kème tèn kala an bila njoukou on. Baï ko̱ esprit dakame on kaou jing nè bongkè dita, ka mba njakè ta; da kli pèng nè ka gna nè jing sal léme ka dou kana kon bo̱kè, da kè dourou sal léme da haou kana guèfal, da zabolo mi ni nè sé guè woropa. 30Da Jésus mi oui nè: Ling‐o ba fèn lé? Da kè sa: Rokokèli. Baï ko̱ zabololi nyèta mi ri sé an bilè. 31Da kli sa jo̱jo̱ a Jésus an kème ni kli sé guè bil loukou loko on yilime. 32Da ngo̱yali ro̱ko̱ta makaou an toul souraguèl on baï sona laka an soko. Da zabololi on mi sa jo̱jo̱ nè an kème yèng kli, an klime sé guè bila ngo̱yali on. Da Jésus mi ji bo̱ko̱kè. 33Da zabololi on mi tèn kala an bil an njoukou on, da kli ri sé guè bila ngo̱yali, da ro̱kè ngo̱yali bon on mi ourou an toul souraguèl, ka ngou gata diri sé njaka loukou mbi, da kli lé bil mbi da hou. 34Da ko̱ njou‐ko̱ra ngo̱yali mi ko̱ fèn on, kli ngou sé ka to̱ko̱ falkè an bil loukou pou tèn goune pouli an njaka waka. 35Da klime tèn kala ka gui baï ko̱na fèn on ko̱ mi tèn. Da kli gui mona Jésus, da ko̱ njoukou on ko̱ zabololi mi tèn an bilè tou, da kè kaou an mbèla Jésus ka bou la, da nonè mi taka tou; da waou mi i kli ta. 36Da kli on ko̱ mi ko̱ fèn aïn, kli to̱ko̱ falkè hi kli fèn mèlé jing njoukou aïn ko̱ mi jing zabololi ambèl jinguèl da monè mi haï. 37Da njoukouli bon an guèl a Gérasénienli da ndo̱ko̱ pouli ko̱ diya jing rou, kli sa jo̱jo̱ nè an kème ourou an bil sél koukoula kli, baï aïn ko̱ waou mi i kli nyèta.
Jésus hé sé bil kombone da féré. 38Da njoukou on ko̱ zabololi mi tèn kala an bilè tou, kè sa jo̱jo̱ nè baï an kème sé ka kaou jing nè. Da Jésus pi nè féré fal, ka sa hi nè: 39Mo féré sé guè voulo̱ ka sa bong kakaïya fènli on ko̱ Ouone mi nding jing mo. Da kè sé ka sa bongkè mane bil loukou pou aïn bon, toul kakaïya fènli on ko̱ Jésus mi nding jing nè.
40Da baï mi gui mahana ka on, ko̱ Jésus mi kaïn féré, ro̱kè njoukouli mi pame nè, baï ko̱ kli bon mi voro nè. 41Da mono njoukou mbéo mi gui ling‐è ba Jaïrus, kè ba zaworo a synagogue. Kè lé bou koukoula bèl bo̱ka Jésus, ka sa jo̱jo̱ nè an kème gui bil voulè, 42baï ko̱ pomboï goune waïn nè ko̱ hèdi saka botoulè‐séré nding baï houl. Da ko̱ kème yé guèna ro̱kè njoukouli on mi chome nè.
43Da waïn hana mbéo makaou ko̱ séme mi tèn nè ma saka botoulè‐séré, da kème hi fèn kouna monè bon hi médecinli, da kli tane ma baï haïna monè ya. 44Kè gui ka kaïn a Jésus, ka da njaka la nè, da koukoulion séme on mi koung. 45Da Jésus mi sa: Guème ko̱ da mi lé? Da ko̱ kli bon mi njé ba njaka, Pierre da kli on ko̱ jing nè, klime sa: Njou‐to̱ko̱nafèn, ro̱kè njoukouli mi chome mo ka da mo, da mo oui ba: Guème ko̱ da mi lé? 46Da Jésus sa: Njoukouna mi da mi tou, baï ko̱ mème toutou njèran ni mi tèn kala an moni tou. 47Da ko̱ waïn on mi ko̱ ko̱ kème tane ma baï mounakè kan ya, kè gui da monè to̱ nè da kè lé koukoula an mbèla Jésus, ka sa bongkè, an nona njoukouli bon, baïfèn da kème da nè lé, da ko̱ monè mi haï koukoulion. 48Da Jésus sa hi nè: Goune waïn ni, mbo̱l tounassaon no mi ko̱ kou mo tou; mo sé ka go̱ro̱ iki.
49Ko̱ kème pane sana baï, njoukou an voula zaworo synagogue mi tèn gui ka sa: Goune waïn no mi hou tou! mo wan bo̱ka Njou‐to̱ko̱nafèn an kème gui bo̱on ya. 50Da ko̱ Jésus mi la baï on, kè féré sa hi nè: Mo tane ngou waou ya, ka la bilaou ka ho̱kè bo̱l, da kè ma kou. 51Da ko̱ kème gui kan voulou tou, kè mi tane ji an njoukouna mi ba nè sé bilkè ya bo̱l ba Pierre da Jacques tèn Jean, da baba a tikila on kira ma nè. 52Da kli bon mi lé léou ka wan njaka léou baï nè, da Jésus sa: Oui lé léou ya, baï ko̱ kème tane ga hou ya, kè na ba name. 53Da kli saka nè maïya, baï ko̱ klime toutou ba goune on mi hou tou. 54Da kème ba ndo̱ka goune aïn ka di nè, ka sa: Goune tikila, mo ourou siya. 55Da esprit nè mi féré gui monè tou, da koukoulion kè ourou siya da Jésus mi sa hi kli, an klime hi fèn sona hi goune tikila aïn. 56Da laou a baba a goune aïn kira ma nè mi sé siya, da Jésus mi gna bi njaka kli an klime tane sa hi njoukouna mbéo ya, fèn on ko̱ mi nding.
Šiuo metu pasirinkta:
Saint Luc 8: KBN1947
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Published by the British and Foreign Bible Society in 1947.