Génesis 8
8
Enka iurhentperakua k'amakurhipkia
1Diósï, Noéni miántaspti ka iámentu manakorhichani enkaksï icharhutarhu jápka. Diósï p'units'ïtaspti itsïni ka itsï uénaspti kétsentani. 2Ka auanta míkorhespti ka ióspti. 3Sánhani arhispti kétsentani itsï ka iumu tsimani ekuatse ka témpeni jurhia jimpo kétsentaspti, 4Ka iumu tsimani kutsï ka témpeni iumu tsimani jurhiatekua jimpo, k'éri icharhuta Ararati juátarhu jimpo pakanharhikuspti. 5Ka itsï sánhani arhispti sánteru kétseni témpeni kutsï jimpo, ka ma jurhiani témpeni kutsï juátechaksï xarhantaspti.
6Tsimani ekuatse jurhiatekua jimpo, Noé mítaspti erajpatakuani enka k'éri icharhutarhu jukapka. 7K'uákini ma axaspti eska nirani japirinka exeni na enka jatini itsï nóteru jatapirinkia. 8Ka máteru jipunheni ma axaspti eska exepirinka eska k'arhintepirinkia. 9Jipunhe no nani úspti antatserani ka ménteru k'uanhatsentapti k'éri icharhutarhu, jimpoka útasï itsï jatarixapka, Noéni antak'ueraspti jipunhe ka ima incharantapsti icharhutarhu.
10Erokorhespti máteru iumu tsimani jurhia ka ménteru axaspti jipunheni. 11Jipunhe xatini k'uanhatsentaspti olibu ch'kurhi ma jukamutini, Noé isï jamani, mítesti eska itsï k'étsentaspkia. 12Erokorhespti máteru iumu tsimani jurhia, ka axaspti máteru jipunhheni ka ima nóteru k'uanhatsespti.
13Jurhiani inchamani, kutsï inchamani uéxurhini, enka ma irepeta ka témpeni ekuatse ka ma (601) uéxurhini enka Noé irekuepka, k'arhintentaspti Noé p'enots'ïtaspti k'éri icharhutani ka exespti eska k'arhintespkia. 14Ma ekuatse ka iumu jurhiani, kutsï tsimani iámu k'arhintentaspti. 15Diósï uantaxepsti Noé jinkuni ka arhispti: 16Uénhe k'éri icharhutarhu chéti uarhiti, uáp'echa, ka chéti uáp'echeri tempecha enkaksï t'unkeni jinkuni jaka. 17Késkua iámentu manakorherichani enkaksï t'unheni jinkuni jápka, káratichani, k'arhiri anhatsïchani, antsikorhetichani ka irentsï je parhakpenirhu ka uánekua sapichani kánkorheje ka uáne je.
18Kétsespti Noé tempani jinkuni ka uáp'echani ka uáp'echeri tempechani jinkuni. 19Ístuksï uenhentaspti iámentu manakorherichani, k'arhiri anhantsïcha ka iámentu káraticha ka iámentu enkaksï antsikorhek'a. 20Noé úspti nani enka komu arhinhapirinka ACHA, erakuaspti p'inp'inharhati manakorheri káratichani ka no káratichani ka ACHAni kétsïtakuspti. 21Enka ACHA sïpirupka, mintsita jinkuni uantaspti: Nóteru méni jámaaka ikichakueni arhini echerini k'uiripuni jimpo, jimpoka k'uiripu tumpirini uénasïnka no sési eratseni mintsitarhu, ka nóteruni jámaaka tsípekua k'amak'uni, ísï eskani na úka.
22Enka xáni parhakpeniuaka,
eska mentu ísï jauati ampe jatsinhani
ka ampe p'ikunhantani,
tsírakorhekua ka aparhekua
janikua ka k'arhinta, chúrekua ka jurhia.
Šiuo metu pasirinkta:
Génesis 8: BI-PURHE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Biblia en P´urhépecha, Michoacán, México © Sociedad Bíblica de México, A.C.