APAN AQAO: 7
7
Daqid Shi" Ra" Khyo
1 Asang wa Noa re ni" yham byu alhab' geim" ai: qid sang pho khug khyo vao ye: ge,- ngo wa mug: myid alhab' geim" mae din:man" ra" khyo" kad' yaug nao dayaug za: ngad: rure myao va". 2San sin" ra" gug'nyhug' ja: khao: ngo" mae" daja: mae" nhad' zam" zam" we' masan masin" ra" gug'nyhug' ja: khao ngo" mae" kam" wa daja: mae" dazam" zam" re nao we' daga" jhui: wa,- 3Ngho' ja: khao: ngo" mae" re: daja: mae" nhad' zam" zam" re jhui: wa, gug'nyhug' ja: khao: ngo" we' ngho' ja: khao: ngo" wa xo' daui: na mung: myid gaung dao mae dam: myo" laug: li" nhao genae" qhid' mae" ceru: kad' wa,- 4Ana" mae" nhad' ba thao re ngo phan" to" ra" daui: na: ra" gu: alhab' re phyo' pye' nae" qhid' mae" ngo wa byid xe myi byid xe ba mug: re qu nhao: ke' nae"- ga: ta" ra". 5Noa wa Asang: yang byid' ra" amyin" ja: khao: ngo" re kad' ra".
6Myid gaung khyo daqid shi" ke' ra" au:- Noa apyad wa khyaug' yo zin ngad: ra". 7Daqid shi" rumae" loe; beim nae" qhid' mae" yao: we' yao" yham sang myhi" yao" yauggai zo: qe we' yao: bam: yham sang myhi" bam wa qid sang pho khug khyo vao ye" ako". 8-9Mao"So amyin" byid' to" ru we' dakhyo:- san sin" ru masan sin" ru gug'nyhug' ja: khao: ngo" we' ngho' ja: khao: ngo" mae" apho" we' amyhi" wa Noa we' daga" qid sang pho khug khyo vao ye" ako". 10Nhad' ba thao re daqid shi" lo: ra".
11Noa apyad khyaug' yo zin dau: ra" ba lho" shid' khye' ein: khye' daxe: nhad' ba ein: ba mae myid gaung khug mae" qid jham baug: sheim: thug' li" mung:- mug:gaung mae" qid kham: jham bung" lo: ra". 12Amung: byid xe myi byid xe ba myid gaung dao mae mug: qu byid' ra". 13Ai: ba mae yao: Noa we' yao" yham sang myhi" wa yao: tao: yauggai zo: sam zo: ngad ko" ra". Shem- Ham Yaphed we' yao: bam: yham sang myhi" qe we' daga" qid sang pho khug khyo vao ye" ako". 14Gug'nyhug' ja: khao: ngo"- gug'nyhug' mai" gug'nyhug' lae" aqi:- angai we' ngho' ja: khao: ngo" wa yao: bam we' daga" qid sang pho khug khyo vao ye" ako". 15-16Mao"So amyin" byid' to" ru we' dakhyo:- daui: na: ra" ja: alhab' mae" apho" we' amyhi" jham wa Noa we' daga" qid sang pho khug khyo vao ye" ako". Ailao" Asang wa Noa bin: vao ye: we' kham: pyid' pye' ra".
17Daqid wa byid xe ba lam: lam: xo' mung: qid wa sang pho qo" myung sho' no; li" ra". 18Qid wa je: no; do, li" mung: qid sang pho wa qid dao mae myung: jo; ra". 19Qid wa saung" no; do, li" mung: myhao: thao" ra" bam jham re nhai" pye' ra". 20Qid wa bam au: jham tho' mae shid' xe: ngo" pe: ko myhao sho' do, li" ra". 21Myid gaung dao mae daui: na: ra" ja: alhab' ngho' ja: cao jab gug'nyhug' ja: cao jab byu yaug khao: ngo" wa shid: lo" ako". 22Myid gaung dao mae so' she: ra" ja: alhab' shid: lo" ako". 23Asang wa myid gaung dao mae daui: na: ra" ja: alhab' xao su byu alhab' gug'nyhug' jham alhab' re jhad' kad' pye' ra" dang: ra" mo, wa Noa we' daga" qid sang pho khug mae bo: ra" mo, za: ngad: ako". 24Qid wa dayo: ngo" xe ba lam: lam: dang: jo; ra".
Šiuo metu pasirinkta:
APAN AQAO: 7: LHCL
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Bible Society of Myanmar 2009