LUK 24
24
God Jisasaam kirapitakadid.
1Sande mwiya ganbab adiy kwulapwudadiy marasin kwurkuw, adi kawamiyaar yidiy. 2Yikuw, day vidaal adi dipwu kabakim takatipidadi nimadi kabaak vatimilsakiykuw, malaam ridik. 3Day dipwu kabakir ata wulakuw, day Jisas dikidi amwiy maa vi. 4Day pitaan wartaay tidaak a javik, duw vitiy jayib nak ata wakwubir dayawa walibab. Birakidiy kwusuw-biridiy wapwiy miyawa kariyadiy. 5-7Adiy taakw day samasam yagakuw, day makiy gwalikidaak abir duw dayak ata wabiridiy, “Agwa javik gwur kidiy kiyanadiy duw dayaki tamiyaam kwaki-nadiygwurik adi kip kwanadi duwak? Di kilim maa kwu. God bwutaay kirapitakadaad. Gwur lakwugwura di Galiliyaam tikuw, gwurak wadil maaj? Di wadidiygwur, ‘Day duw taakw dayadi Mwaam vaal yikwanadiy duw tabaam takadaak, maap tinadi miyaam katidaak, kiyakuw ridik, nyi mugwula yawaam God kirapitaka-kidaad.’” 8Adiy taakw ata wukin kariyadadiy, adiy tayir wadidiy maaj. 9Wukikuw, day adi kawamiy wapakuw, sibinin yikuw, day adiy Jisas dikidiy kalivadidiy tabatiy maan naka duwawa nuwukadiy duw takwak yarik yidadiy. 10Adiy taakw adiy Maria Maktala tipa kil, Jawanawa Maria, Jamis dikil amaay. Daywa nuwukadiy taakw adiy jaav Jisas dikidiy wayakididiy duwak yarik yidadiy. 11Aw adiy duw day wukidiy adiy taakw wadadiy maaj mwiya maaj maa wakuw, alik day maa wak. 12Aw li Pita rasikuw, adi kawamiyaar gipiyid. Di kwakitan dakuw, adi kawamiyaam Jisas dikidi wapwiyda vidid. Niki jaav maa vi. Vikuw, di ata diki wiyaar sibinin mawul vitiy katiy tikuw yad.
Yimayas tipa kibir duw sitakira-biril God bwutaay Jisasaam kirapitakadid.
(Mak 16:12-13)
13A nyi dayaam duw vitiy Yimayas wadana tipaar yidiy. A tip Jiruwsalimawa kwasa sikaam ral. 14Bir yitaay tibirik, bir awarwa bwulasakiy salabir adiy ababa javik. 15Bir atawa bwulataay tibirik, Jisas di diki walibab wakwukuw, nakamwiyib yidiy. 16Bir dim vikuw, aw bir mwiyir maa laakw dikim. 17-18Jisas birakik ata wadibir, “Agwa jaaval awarwa awarwa bwulasakiy salataay, wayibira?” Bir ata tawtaykuw, sarmabap tibir. Biraki duw nak, dikidi si Kiliyapas, ata bas sidid, “Ababa kipa Jiruwsalimaam kwanadiy duw taakw adiy jaav lakwudanadiy. Aw li min duw nak maa laakw kidiy jaav?” 19Di ata bas sidibir, “Agwa jaava?” Bir ata wabirid, “Adi Nasarit tipa kidi duw, Jisas, dim kwurdadiy jaav. Adi duw di God diki maaj wasapwiydi duw nak-ad. Aw dikidiy kwurdidiy yawiyawa kalivadidiy maaj mwiya yitaypik tidiy duw takwawa God dayadiy milaam. 20“Nyanadiy sapakwa nyanugw pris awa nyanadiy sapakwa nyanugw Jisas Roma tipa kidiy duwak kwiydaad day dim viyasipadakik. Aw day maap tidi miyaam katadaad. 21“Nyanadiy mawul wadiy God wayakidid nyan Yisrayil duw takwaam nyigildikik Roma gavman daya tabaam tibaak. A jaav kwurdaal nyab, nyi mugwul aka wana nibwulawa. 22-23“Nuwukadiy nyanadiy bapa taakw wadaak jaav nikik, pitaan warnadiyan. Mwiya ganbab day Jisas diki kawamiyaar yikuw, sibinin yakuw nyanak, wadanadiyan day dikidi amwiy maa vi. Aw day nyanak wadanadiyan day God diki maaj kardabir duw vitiy vidanabir. Aw bir dayak wabiradiy, ‘Jisas di kip kwanaad rasikuw,’ wakuw. 24“Nuwukadiy day nyanawa kwanadiy diki kawamiyaar yinadiy. Aw day adiy taakw wadana pik vidanaad. Aw day dim maa vi.” 25Jisas birikik ata wadibir, “Bir maa laakw? Birabir mawul pakwun tikuw, adiy God diki maaj wasapwiydiy duw dayadiy maaj bir kwasa kwasa wukijibir tinabirbir! 26“Day wadiy taay kupwarapa jaav God dikidi Tasakwudidi Duwaam yadaak, ginyir God ata kirapitakadik, di viyakita tipaar wuladik, abab day dikik wayapiy sikidanaad.” 27Taay Mawsis sukwudidiy majawa ababa nuwukadiy God diki maaj wasapwiydiy duw dayadiy sukwudadiy maaj Jisas ata abir duwak kalivadibir ababa dikik wadadiy maaj dayadiy maaw. 28-29Yibiril tipaar walibab kwurdaak, Jisas di kip yirib yikir kwurid. Aw li abir duw atawa vikuw, bir dikik ata wabirid, “Nyi ada gil pik ridanaad. Gaan aka kwusik tina. Alik tikuw, min anawa adakw ki gaan.” Wakuw wabirik, di biraki majib wukikuw, birikiwa kwakir nakamwiyib yad. 30Birikiwa yikuw, biraki wiyaar wulakuw, jabim daan ridiy. Kikipaat kikir ridaak, Jisas bret kwurkuw, kaysukwa-sukwakuw, Godak wayapiy sikuw, birikik kwiydibir kibirkikik. 31Atawa kwurdik, bir ata jayib nak lakwubirid. Bir lakwubirik, jayib nak di marid. 32Mardik, bir birikik ata wasakiy salabir, “Di nakamwiyib yabir anawa maaj bwulayakuw, di God diki maaj anak kalivadik, anabir mawul rakarak tinabir, ay?” 33-34Jayib nak rasikuw, Jiruwsalimaar sibinin yibir. Yikuw, bir Jisas dikidiy kalivadidiy duw tabatiy maan nak nuwukadiy duw takwawa sitakira-biridiy, day wataay tidiy, “Yitaypika Duw di bwutaay mwiya mwiyab rasinaad! Di Saymanak bwutaay maykaar wakwunaad!” 35Abir duw dayak ata wabiridiy biradiy yabim wukin vibiridiy javiwa Yitaypika Duw bret kwurkuw, kaysukwakuw, bir ata dikim lakwubiridiy maaj.
Jisas maykaar wakwud dikidiy kalivadidiy duwak.
(Mat 28:16-20; Mak 16:14-18; Jon 20:19-23; Aposel 1:6-8)
36Bir dayak yarik yitaay tibirik, Jisas di diki dayadiy nyidim wakwukuw, rasin tad. Dayak ata wadidiy, “Kwusidatakaan tikwana mawul gwuraam rawun kwakwa!” 37Aw day dim vikuw, yagakuw, pitaan wardiy, “Kad apawul-ad,” wakuw. 38-39Aw di dayak ata wadidiy, “Gwur agwa javik yaga-nadiygwurik? Yagakuw, niki mawul niki mawul wukibagwu-nadiygwurik? Gwur av wunabir tabawa wunabir manik! Adiy jaay katadadiy kaar vikuw, lakwu-kigwura wun wun-adiwun tinadiwun. Wun sipaam kaykitin av. Vikuw, alaakw apawul kwiyawa ap akis tikwanaad wuna pik.” 40Wakuw, di dikibir manwa dikibir taab dayak ata simakadidiy. 41Day rakarak samasam tikuw, dim mwiyir laakw maarkuw, wukibagwudiy. Alik day maa rav dim wukijibir titak. Alik tikuw, di dayak ata bas sididiy, “Gwuraam kamnaagw maa ri?” 42-43Day yaam tuwdaal kamiy kwurkuw, dikik kwiykuw, di a kamiy kwurkuw, kidil dayadiy mwutamaam. 44Jisas dayak ata wadidiy, “Tayir wun gwurawa tikuw, wun watuwadiygwur Mawsis diki lo awa ababa God diki maaj wasapwiydiy duw sukwudadiy majiwa, yitaypika duw Davit sukwudidiy song wakwadana Sam, dayadiy ababa wunak wadadiy maaj mwiya mwiyab tikwadiy.” 45Jisas mwugiydik, God diki lapa nyigaam rinadiy maaj dayadiy maaw ata maykaar wakwudiy dayak. Day ata mwiya lakwudadiy dayadiy maaw. 46Di dayak ata wadidiy, “Adiy lapa nyig wanadiy kagil samasam God dikidi Tasakwudidi Duw diki sipaam yilik, kiyakuw rikuw, God ata kirapitakakidaad nyi mugwula yawaam. 47“Dikidi saam duw taakw nuwukadiy duw takwak wasapwiykwadiy day dayadiy valik wukikuw, bwan kwiydaak adiy valik, God ata yibwiykidadiy dayadiy vaal. Ki yawiy bas taay Jiruwsalimaam kwurkuw, day ata nuwukadiy miyawa jaka tipaar yikwadiy. 48“Gwur gwura kidiy ababa jaav bwutaay vigwuradiy. 49“Tayir wunadi asaay aban takadil. Ginyir di dikidi Mawul gwurak wayaki-kidaad waad. Wun wuna gwurak wayaki-kituwaad. Aw li taay gwur kavin adakw Jiruwsalimaam yin diki adawur tip wapakida nyak ap gwurak kwiyik.”
Jisas dikidiy kalivadidiy duwaam wapakuw, God ata kwurin kawardid adawul tipaar.
(Mak 16:19-20; Aposel 1:9-11)
50Jisas taay tip wakwukuw, karaydidiy Bitaniy tip tamiyawa. Yikuw, alim di dikibir taab kirasikuw, di Godak bas sidid di yarakara kwurdikik dayaam. 51Di dayak Godak bas sitaay tidik, di dayaam wapakuw, God ata kwurin kawardid adawur tipaar. 52Day gaba maaj sukwukuw dikik, day rakarak tikuw, ata sibinin Jiruwsalimaar yidiy. 53Day nyanyi God dikidi wiyaam kwataay, Godak wayapiy sidiy.
Šiuo metu pasirinkta:
LUK 24: MLE
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2001, Wycliffe Bible Translators, Inc. All rights reserved.