Матвей 10
10
Иисусонь кемгавтово апостолонзо
1Иисус тердинзе Эстензэ кемгавтово тонавтницянзо, макссь тенст азорксчи пансемс аванькс оймеялтнэнь ды шумбралгавтнемс эрьва кодамо ормадо ды моцень арасьчиде. 2Кемгавтово апостолтнэнь лемест истят: васенцесь Симон, конанень лиякс мерить Петра, ды Андрей сонзэ ялаксозо, Зеведеень цёратне Яков ды Иоанн, 3Филип ды Бартоломей, Фома ды икелень каявксонь пурныцясь Матвей, Алфеень цёразо Яков, Леббей, конанень путсть лем Таддей, 4Симон Кананит* ды Искариотонь Иуда, кона мейле миизе Иисусонь.
Ки лангс превс путомат
5Неть кемгавтовотнень Иисус кучинзе ды кармавтсь тенст: «Лия раськень ломаннень илядо яка, Самариянь ошоскак илядо сова. 6Азёдо васняяк Израилень раськентень, кона стадасто кадовозь ревень кондямо. 7Якамсто пачтядо кулянть: “Менельсэнть Инязорксчизэ сась малав!” 8Сэредицятнень шумбралгавтодо, кулозтнень вельмевтнеде, проказасо сэредицятнень ванськавтнеде, идемевстнень панседе. Стяко максозь тенк, стяко тыньгак макснеде. 9Илядо сае мартонк ки лангов сырнеяк, сияяк, каркссо ярмакткак, 10кансткак, кавонст оршамопельтькак, карсемапельтькак, кедьнежеяк: эдь важодицянтень ярсамопелесь максови важодеманзо кисэ.
11Кодамо ошос эли велес соватадо, васняяк кевкстеде, кинь ули мелезэ нолдамс тынк эстензэ, ды эрядо кедьсэнзэ тосто туемазонк. 12Кудонтень совамсто шумбракстнеде, арседе тосо эрицятненень сэтьмелув. 13Бути эрицятне тынк парсте васттадызь, сестэ тынк сэтьмелувось сы тенст. Бути тынк парсте а васттадызь, сестэ мекев эстенк велявты тынк сэтьмелувось. 14Бути косо кияк тынк парсте а васттадызь, валонккак а кунсолосызь, сестэ се кудостонть эли ошстонть лиседе ды пильгестэнк мик пулентькак чукадинк. 15Видестэ кортан тенк: Пазонь судонь чистэнть Содом марто Гоморранень ули седе шождыне се ошонть коряс».
Сы шкань пансемат
16«Вана Мон кучан эйсэнк реве ладсо верьгиз юткс. Тень кувалма уледе гуень кондят ёжовт ды гулькань кондят чевтеть-сэтьметь. 17Ванстодо прянк ломантнеде. Сынь кармить эйсэнк судс таргсеме, синагогасояк кармить эйсэнк локшосо керямо. 18Монь кисэ ветятадызь прявтнэнь ды инязортнэнь икелев, ды истя тынь карматадо ёвтнеме Монь эйстэ сыненст ды лия раськень ломантненень. 19Зярдо тынк ветятадызь судс, илядо мелявто сень кисэ, кода ды мезе тенк ёвтамс: се шкастонть максозь ули тенк, мезе ёвтамс. 20Секскак валтнэ, конатнень тынь ёвтасынк, улить аволь тынк. Сынст макссынзе тенк Тетянк Оймеялтось, кона карми кортамо тынк вельде.
21Вейкест-вейкест кармить максомо куломас лелят-ялакст, тетят-цёрат. Эйкакштнэ стить тетяст-аваст каршо ды маштнесызь сынст. 22Монь лементь кисэ весеменень авечкевиксэкс ультядо. Ансяк кона цидярды педе пес, се ванстови-идеви. 23Зярдо кармить мельганк пансеме ве ошсо, оргодеде омбоцес. Кемевтян эйсэнк: тынь а кенертядояк ёвтнеме Монь кулянть Израилень оштнэва, кода уш сы Ломантнень Цёрась.
24Тонавтницясь а эрси тонавтыцядонзо седе покш, кода важоськак – азородонзо. 25Тонавтницянтень саты, бути сон карми улеме эсь тонавтыцянзо кондямокс, важонтеньгак саты улемс эсь азоронзо кондямокс. Мериндеряйть кудазоронтень Вельзевул*, сестэ седеяк беряньстэ кармить мереме сонзэ кудораськенстэнь!»
Пеледе Паздо!
26«Тень кувалма илядо пеле ломантнеде. Весе, мезесь ней кекшезь, лиси лангс, ды весе салавансеськак карми улеме содавиксэкс. 27Мезе кортан тенк чоподасо, сень ёвтнеде чи валдосо, ды мезе кортави пилезэнк тошказь, седе кудо лангсто* сеереде. 28Илядо пеле ломантнеде, эдь сыненст куловтови ансяк рунгось, оймесь а куловтови. Седе пек пеледе Паздонть, конанень ёмавтови тоначинь толс рунгоськак, оймеськак. 29Весе содыть: вейке трёшникте рамавить кавто озязт. Ялатеке Тетянк мельтеме вейкеяк эйстэст а пры мастор лангс. 30Тынк жо пря черенккак весе ловнозь. 31Секскак илядо пеле: тынь ялатеке весе озязтнэде седе питнейтядо!»
Христосто видькстамо
32«Эрьванть, кие апак сёпо ломантнень икеле лови эсь прянзо Монь ломанекс, сень Монгак апак сёпо ловса менелень Тетянь икеле Эсень ломанекс. 33Кие жо ломантнень икеле велявты Монь эйстэ, сень эйстэ Монгак велявтан менелень Тетянь икеле.
34Илядо арсе: Мон сынь масторлангс ладямонь тееме. Аволь ладямо марто сынь – торо марто сынь. 35Мон сынь явомо цёранть тетястонзо, тейтеренть – авастонзо, урьванть – ававтстонзо. 36Ятокс теевить ломанентень сонсензэ кудораськензэ. 37Кие Мондень пек вечксы эсь тетянзо эли аванзо, се Монень амаштовикс. Истя, кие Мондень пек вечксы цёранзо эли тейтерензэ, сеяк Монень а маштови мельга молицякс. 38Кие а сайсы эсь крёстонзо ды Монь мельга а моли, сеяк Монень а маштови. 39Кие снарты эрямонзо ванстомс, се ёмавтсы сонзэ, а вана кие Монь кисэ сонзэ ёмавтсы, се мусы».
40«Кие тынк парсте васттадызь, се Моньгак парсте вастсамам. Кие Монь вастсамам, се Монь Кучицянтькак вастсы. 41Кие васты пазмариця секс, мекс сон пазмариця, сененьгак пандови пазмарицянь питне. Кие васты видечинь ломаненть секс, мекс сон видечинь ломань, сененьгак пандови видечинь ломанень питне. 42Кие куш вейкенень, неть Монь вишкине-асодавикс мельга молицятнень эйстэ, максы кельме ведь кече ансяк сень кисэ, мекс сон Монь мельга молиця, кемеде Монень, се питнень пандомавтомо а кадови».
Šiuo metu pasirinkta:
Матвей 10: ОВ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Библиянь ютавтомань институтось,
Хельсинки 2006