Матвей 9
9
Иисус шумбралгавтызе катаронть
1Теде мейле Иисус озась венчес, печтизе мекев эрькенть ды сась ошонтень, косо эрясь*. 2Тосо совавтсть Тензэ ацамо лангсо мадезь аштиця катар ломань. Сынст кемемаст неезь, Иисус мерсь сэредицянтень: «Эйдем, иля пеле! Нолдазь тонь пежететь». 3Сестэ зярыя Койс тонавтыцят арсесть эсь пачкаст: «Те ломанесь Пазонть нарьги-покорды!» 4Иисус чарькодинзе сынст арсемаст, секс мерсь тенст: «Мекс тынк седейсэ истят апаро арсемат? 5Мезесь седе шождыне меремс: “Нолдавить тонь пежететь” эли: “Стяк ды якак”? 6Истя тынь содадо, масторлангсо Ломантнень Цёранть ули азорксчизэ пежетень нолдамскак». Теде мейле пшкадсь катардыцянтень: «Стяк, саить ацамот ды азё кудов!» 7Се стясь ды тусь кудов. 8Тень неезь, ломантне дивасть, ды сынь кармасть шнамо Пазонть, кона макссь ломантненень истямо азорксчи.
Иисус тердизе Матвеень
9Ошсто лисемстэ Иисус несь каявксонь-налогонь пурнамо кудонть вакссо озадо аштиця ломань, конань лемезэль Матвей*, ды мерсь тензэ: «Мольть Монь мельга». Сон стясь ды тусь мельганзо. 10Мейле Иисус ярсась Матвеень кудосо. Тозонь састь каявксонь ламо пурныцят, пежетев лия ломантькак, конатне ярсасть Иисус ды тонавтницянзо марто. 11Тень неезь, фарисейтне мерсть тонавтницянстэнь: «Кода истя тынк тонавтыцянк каявксонь пурныця ды лия пежетев ломань марто вейсэ ярсы-сими!» 12Иисус маризе тень ды мерсь каршост: «Ормаменстиця эряви сэредицянень, аволь шумбра ломаннень. 13Азёдо, чарькодинк Пазонь Сёрмадовксонь неть валтнэнь смустест: “Монь мельс тукшны седеймарямонк, аволь Монень кандозь печкезь ракшань аноксонк#9:13 анокс – жертва”. Секскак Мон сынь тердеме велявтомс Пазонтень пежетевтнень, аволь видечисэтнень».
Постто кевкстемась
14Сестэ састь Иисуснэнь Нававтыця Иоаннонь тонавтницянзо ды кевкстизь: «Мекс истя: минь ды фарисейтне сеедьстэ постоватано, а вана Тонь тонавтницят а постовить?» 15Иисус мерсь каршост: «Арази свадьбань инжетне мелявтокшныть-ризнэкшныть, зярс урьвакстыцясь мартост? Сы шка, зярдо урьвакстыцясь ули саезь юткстост, ды сестэ сыньгак кармить постовамо. 16Кияк ташто оршамос а панды апак озавто од коцтонь панкс. Эдь сестэ од панксось сезьсы таштонть, ды тееви седеяк покш варя. 17Истя од винаяк а кайсить ташто кедень кескавс. Бути истя теят, сестэ кескавоськак сезеви, винаськак валови. Арась, од вина кайсить од кедень кескавс, сестэ сынь кавонест ванстовить».
Прявтонь тейтерь ды сэредиця ава
18Зярс Иисус яла кортась тенст, сась Сонензэ тосонь вейке прявт, прась кумажа лангс ды мерсь Тензэ: «Монь тейтерем ансяк кулось. Ялатеке мольть, путыть кедеть лангозонзо, нама, сон вельми!» 19Иисус стясь, тусь мартонзо. Тонавтницянзояк мольсть мартонзо.
20Сестэ ве ава, кона пиштсь кемгавтово иеть верень чудемасо, мольсь Иисус удалов ды токизе ланга оршамонзо цёконть. 21Эдь авась арсесь эсь пачканзо: «Бути токаван куш Сонзэ оршамос – пичкан». 22Иисус велявтсь, неизе сонзэ ды мерсь: «Сазором, иля пеле! Кемемат шумбралгавтынзеть тонь». Авась секе шкастонть пичкась.
23Зярдо Иисус сась прявтонть кудос, неинзе кулозенть велькссэ вешкемасо седицятнень ды шалныця-авардиця ломантнень 24ды мерсь тенст: «Лиседе тестэ! Тейтернесь эзь куло, сон уды». Сынь кармасть пейдеме лангсонзо. 25Зярдо ломантне ульнесть панезь, Иисус совась икельце кудос, саизе тейтерненть кедте, ды тонась стясь. 26Теде кулясь сравтовсь се ёнксонть келес.
Кавто сокоронь шумбралгавтома
27Зярдо Иисус тусь тосто, мольсть мельганзо кавто сокорт, конат сеересть: «Иисус, Давидэнь Цёра, ульть седеймарицякс миненек!» 28Зярдо Сон совась кудос, сестэ сокортнэ мольсть ваксозонзо, ды Иисус кевкстинзе сынст: «Тынь кемтядо, Мон тенк лездан?» Сынь мерсть Тензэ: «Эно, кемтяно, Азоро!» 29Сестэ Иисус токинзе сельмест ды мерсь: «Улезэ тенк кемеманк коряс!» 30Сынст сельмест кармасть нееме. Иисус казямосто кардынзе сынст: «Ванодо, киненьгак илядо ёвтне теде». 31Сынь тосто тусть ды ялатеке ёвтнесть Иисусто весе се ёнксонть келес.
Акортыцянь шумбралгавтома
32Сокортнэнь туемадо мейле ветясть Иисуснэнь идемевсень колавт ломань, кона ульнесь а кортыця. 33Иисус панизе эйстэнзэ идемевсенть, ды а кортыця ломанесь кармась кортамо. Весе дивсесть: «Истямо тев Израильсэ зярдояк арасель!» 34А вана фарисейтне тень каршо кортасть: «Сон идемевстнень прявтост* вийсэ панси идемевсть».
Иисусонь седеезэ маряты ломантнень кисэ
35Иисус якась весе оштнэва, весе велетнева, тонавтсь ломантнень тосонь синагогатнесэ, пачтясь Кенярксов куля Менельсэнть Инязорксчидензэ, шумбралгавтнесь эйсэст эрьва кодамо ормадо ды моцень арасьчиде. 36Зярдо Иисус неинзе пурнавозь ломантнень, седеезэ марятотсь кисэст: сынь ваныцявтомо реве ладсо вийтемельть ды сравтнезельть. 37Сестэ Сон мерсь Эсензэ тонавтницятненень: «Сюрось чачсь ламо, ансяк нуицятнеде аламо. 38Секскак энялдодо нуемань Азоронть икеле, кучозо Эсензэ паксяв седе ламо важодицят».
Šiuo metu pasirinkta:
Матвей 9: ОВ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© Библиянь ютавтомань институтось,
Хельсинки 2006