Tegagia 2
2
1Kanandiomo i pinoko'umari langi ka tolino saru luwuno ihino. 2#Pel. 20:11; Ibr. 4:4, 10A oleo ko'opitu Dopoko'umariomo Ue Ala anggaa anu wineweu-Do. A oleo ko'opitu atuu Ondae menaa-naa inso a luwuno anggaa anu wineweu-Do. 3Ka Do'amba Ue Ala rumonsoo oleo ko'opitu atuu ka mokomemporio, hangano a oleomo atuu Dopenaa-naa inso a luwuno anggaa pompokogagia anu Doweweuomo.
Mia i bonde Paradesi
2:4-25
4Ndiomo tutuluno langi ka tolino tempono i ponokogagi.
Tempono Ondae Ue Ala mokogagio tolino ka langi, 5napi hina ewo pada hapamokoa i tolino ka pinopaho a lere napituwu, hangano Ue Ala napi Dopotiio usa i tolino, ka napihina mia anu umanggao wita. 6Sine hinao lahono uwoi mewuatako i wawono inso tolino ka bahoo luwuno wawowita i tolino atuu.
7 #
1Kor. 15:45
Ka Do'amba Ue Ala weweuo mia inso a awu wita, ka mompuuriakono penaa tuwua a laro engeno. Kanatuumo mia atuu gagi anu tuwu.
8Ondae Ue Ala moweweu bonde i Paradesi i sabaano oleo. I ra'aimo Donaao mia anu wineweu-Do. 9#Meng. 2:7; 22:2, 14Ka i'amba Ondae Ue Ala motuwuo inso a wita mperupa-rupa keu anu mompokosanaa mata ka moiko ba ikinaa wuano, keu tuwua mbo'u i tonggano bonde atuu saru keu ponto'oria mongkona anu moiko ka anu mosa'o.
10Hinao korono waa inso i Paradesi ka ibahoo bonde atuu. Inso i ra'ai korono atuu tetia opaa sampa. 11Anu amba-ambano neeno Pisoni. Korono andio lumimbuo luwuno wita Hawila po'iangano wulaa. 12Wulaa inso a wita atuu tekosi. I ra'ai hinao hulu bedola ka watu kirisopara. 13Korono ko'orua meneeako Gihoni, anu lumimbuo luwuno wita Kusi. 14Korono ko'otolu meneeako Tigirisi, anu mewaa isabaano oleo Asuri. Korono ko'opaa onaemo Eparata.
15Ondae Ue Ala umalao mia atuu ka numaao i bonde Paradesi umanggao ka mekariao bonde atuu. 16Ka i'amba Ondae Ue Ala mompowee parenta a mia, pau-Do, ”Wua inso a ngkeu a laro bonde andio moiko ukaano, 17sine wua inso a ngkeu ponto'oria mongkona anu moiko ka anu mosa'o, sii kaano, hangano itempono ukaano, manasa komate.”
18Ondae Ue Ala mepau, ”Nahi moiko mia atuu butu asa-asano. Aku mokogagiakono pontulungi, anu pototono.” 19Ka i'amba Ondae Ue Ala weweuo inso a wita luwuno kondehora mo'ila ka luwuno manu-manu i laro meene. Luwuno winawa a mia atuu ka ikitao, kana'umpe ipoponee ira. Mengkena kana nee anu iweeako ira mia atuu a sompo anu tuwu, kanatuumo needo. 20Mia atuu moweeako ira nee a luwuno pinotuwu, a manu-manu i laro meene, ka a luwuno kondehora mo'ila, sine onae nahi hinawe pontulungi anu pototono. 21Ka i'amba Ondae Ue Ala weweuo mia atuu tekoturi rodo. Tempono ipoturi, Ondae Ue Ala umalao asa wuku horino, ka i'amba po'iangano wuku hori atuu tinutuwiako ihi. 22Ondae Ue Ala weweuo wuku hori anu inala-Do inso a mia atuu, mokogagio asa beine, ka Do'amba wawao a mia atuu. 23Ka i'amba motaeomo mia atuu, ”Onaemo andio, wuku inso a wukuku ka ihi inso a ihiku! Onae ta nineeako beine, hangano onae inala inso a ntama.” 24#Mat. 19:5; Mrk. 10:7-8; 1Kor. 6:16; Eps. 5:31Onaemo pu'uno, asa tama ta bintao amano ka ineno ka ipe'asaakono beineno, ranta orua ira gagi me'asa ihi. 25Orua ira kolambe-lambe, mia atuu ka beineno, sine nahi mokoko'iido.
Šiuo metu pasirinkta:
Tegagia 2: XMZ
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės