मर्कुस 1
1
बप्तिस्मा दिन्या युहन्नाले अर्या प्रचार
(मत्ति ३:१-१२; लुका ३:१-१८; युहन्ना १:१९-२८)
1परमेस्वरका चेला इसु ख्रिस्टका बारेमि असल रइबार यसेरि सुरु हुन्छ। 2यसइया अगमबक्ताका किताबमि यसेरि लेखिया छ,
“हेर मु मेरा दुतलाइ तेरा अगाडि अगाडि पठाउन्या छु,
जो तेरो बाटो तयार अद्द्या छ।#मलाकि ३:१
3सुन्, उजाड ठउँरमि एक जनाले ठुला स्वरमि यसो भुन्नाछ,
‘परमप्रभु आउन्या बाटो तयार पाड,
उनु हिट्टया बाटो सिदा बना!’”#यसइया ४०:३
4बप्तिस्मा दिन्या युहन्ना उजाड ठउँरमि धेकिया, रे उनुले मान्सलाइ यसेरि प्रचार अर्यो, “तमु पस्साताप अरिबर पाप छाड रे बप्तिस्मा लिय,” पइ परमेस्रवले तमरा पाप छिमा अद्द्या छन्। 5यहुदिया छेत्र रे यरुसलेमका सप्पइ मान्स युहन्नाका वा आया। रे तिनुले आफना आफना पाप सुइकार अरिबर युहन्नाबटहइ यर्दन नदिमि बप्तिस्मा लियो।
6युहन्ना उँटका रउँबटहइ बुन्या लत्ता लाउथ्या, रे कमरमणि छालाको पट्को बादन्थ्या, सलह रे बन मह खान्थ्या। 7तनले यसो भन्नाइ प्रचार अर्यो, “जो मु भन्ना पाछा आउन्नाछन् उनु मु भन्ना सक्तिसालि छन्, रे मु त निउणबर उनरा जुताका ताना फुकाउन्या लाइको लइ आथिन्। 8मुइले त तमलाइ पानिले बप्तिस्मा दिया छु, तर उनुले तमुलाइ पबित्तर आत्माले बप्तिस्मा दिन्याछन्।”
इसुको बप्तिस्मा रे परिछ्या
(मत्ति ३:१३—४:११; लुका ३:२१-२२; ४:१-१३)
9युहन्नाले प्रचार अद्दारया बेलामि इसु गालिल छेत्रको नासरत भन्न्या सहरहइ आया, रे युहन्नाबटहइ यर्दन नदिमि बप्तिस्मा लियो। 10इसु पानिनुहइ बाइर आइसक्या पाछा अग्गास उघण्यो रे पबित्तर आत्मा ढुकुरका रुपमि आफुमि आउन्नारया धेक्यो। 11पइ अग्गासहइ यसो भुन्न्या आबाज आयो, “तु मेरो प्यारो चेलो हइ, तु सङ मु भउतइ खुसि छु।”
12तइपाछा पबित्तर आत्माले इसुलाइ तुरुन्तइ उजाड ठउँर लइग्या, 13उनु चालिस दिनसम्मइ उजाड-ठउँरमि जङ्ङलि जनावरसितइ रया, रे उनुलाइ सइतानले पापमि फसाउन खोज्यो। पइ स्वर्गदुत आया रे उनरो सेबा-सत्कार अर्यो।
इसुका पइला सिस्या
(मत्ति ४:१२-१७; लुका ४:१४-१५)
14युहन्ना पक्राउमि पण्यापाछा परमेस्वरको असल रइबार प्रचार अद्दइ इसु गालिलमि आया। 15उनुले भुन्यो, “समय पुरा भया छ, रे परमेस्वरको राज्य नजिकइ आइरइ छ! पस्साताप अर रे असल रइबारमि बिस्वास अर।”
16गालिल समुन्दरका किनारइ किनार जान्ज्या इसुले सिमोन रे तनरा भाइ अन्द्रियासलाइ समुन्दरमि जाल हान्नारया धेक्यो, क्यालाइकि तिनु जालहारि थ्या। 17इसुले तिनुलाइ भुन्यो, “मेरा पाछा लाग्, अइलसम्म तमु माछा माद्दयावाला थ्या, तर आब मु तमुलाइ मान्स मेरा वा ल्याउन्यावाला बनाउन्या छु।” 18तिनुले उन्जेइ आफना जाल छाड्यो रे उनरा पाछा लाग्या।
19पइ थोक्काइ पल्तिर जान्याबेला इसुले जब्दियाका दुइ चेला याकुब रे युहन्नालाइ नाउमि बसिबर जाल टाम्दारया धेक्यो। 20इसुले तिनुलाइ लइ तुरुन्तइ बोलायो, रे तिनुले आफना बा जब्दियालाइ काम अद्द्यासितइ नाउमि छाडिबर इसुका पाछा लाग्या।
इसुले भुत लाग्या मान्सलाइ निको बनायो
(लुका ४:३१-३७)
21तइपाछा इसु आफना सिस्यासित कफर्नहुममि गया, रे अर्खा बिस्राम दिनमि सभाघरमि पसिबर उन सिछ्या दिन लाग्या। 22इसुका सिछ्या सुनिबर मान्स अचम्म पण्या, क्यालाइकि उनुले अउर धर्म-गुरुकि जसेरि हइन, तर अधिकारसित सिछ्या सिकायो।
23तसइबेला सभाघर भित्तर एक जनो भुत आत्मा लाग्या मान्स थ्यो, 24तइले चिच्च्याइबर यसो भन्यो, “हे नासरतका इसु, हामुलाइ तमसङ क्या सरोकार? तम हामुलाइ सर्बनास अद्दाइ आया हउ? मु तमलाइ चिन्नउ, तम परमेस्वरका पबित्तर जन हउ!”
25तर इसुले तइलाइ यसो भनिबर हकार्यो, “चुप लाग्, रे यइ मान्सबटहइ निकल्बर जा!”
26तन्जेइ तइ मान्सलाइ लछाडपछाड अरिबर, त्यो भुत आत्मा ठुला स्वरले कला हालि निकल्बर गयो। 27तबइ सप्पइ जनाले अचम्म मान्यो, रे तिनु यसो भुन्नाइ एक अर्कामि सोदासोद अद्द लाग्या, “यो क्या हो? यो त नयाँ सिछ्या रइछ! यिनले त अधिकारसित भुत आत्मालाइ लइ आग्या अद्द्यारइछन्, रे तिनुले त यिनरो आग्या मान्या रइछन्!”
28पइ तन्जेइ इसुको चर्चा गालिलका चारइ छेत्रतिर फिजियो।
इसुले भउतइ बिमारिलाइ निको पाण्यो
(मत्ति ८:१४-१७; लुका ४:३८-४१)
29आब इसु तन्जेइ सभाघरबटहइ निकल्बर याकुब रे युहन्नासित, सिमोन रे अन्द्रियासका घर गया। 30सिमोनकि सासु जरले थला पडेइ थिन्, रे इसु आउन्जेइ ताँका मान्सले यो कुरा उनुलाइ सुनायो। 31इसु नजिक आइबर बिमारिको हात समाइबर तिनलाइ उठायो, पइ जरले तन्जेइ तिनलाइ छाड्यो। तइपाछा तिनले उनरो सेबा सत्कार अरिन्।
32तइका बसाइतिक घाम ओछाया पइतर मान्सले इसुका वा बिमारि, रे भुत लाग्या भउतइ मान्सलाइ लेइबर आया। 33पइ सहरभरिका मान्स घरका खलामि जम्मा भया। 34भउतइ किसमका रोगले ग्रस्त भया बिमारिलाइ इसुले निको पाड्यो, रे भुत लाग्या मान्सबटहइ लइ इसुले भुत निकाल्यो, रे भुतले उनुलाइ चिन्या हुनाले इसुले तिनुलाइ बोल्लइ दिएइन्।
एकान्तमि इसुको प्रार्थना
(लुका ४:४२-४४)
35ब्याहान उजालो हुनाहइ पइल्लि, इसु उठिबर बाइर सुनसान ठउँर गया, रे ताँ प्रार्थना अद्द लाग्या। 36सिमोन रे तिन सङ हुन्याले उनुलाइ खोज्जइ गया। 37इसुलाइ भेट्या पाछा तिनुले भुन्यो, “सप्पइले तमलाइ खोज्जा छन्।”
38तबइ इसुले तिनुलाइ भुन्यो, “आस, हामु नजिकइका सहरमि जाउँ, रे ताँ लइ मु प्रचार अद्द सकु। क्यालाइकि यसइ कामकि निउति मु आया हुँ।”
39सारा गालिलभरि तिनरा सभाघरमि प्रचार अद्दइ रे भुत निकाल्लइ इसु हिट्या।
इसुले कोड रोग लाग्या मान्सलाइ निको पाड्यो
(मत्ति ८:१-४; लुका ५:१२-१६)
40एक जनो कोड रोग लाग्या मान्स इसुका वाँ आयो, रे उनरा खुट्टाइनु पडिबर बिन्ति अर्यो, “तमले चायाले मुलाइ निको पाड्ड सकन्छउ।”
41तबइ दयाले भरिबर इसुले आफनो हात पसारिबर तइलाइ छोयो, रे तइखि भुन्यो, “मु चाहानउ तु निको होइजा।” 42तसइबेला तइको कोड रोग तइबटहइ हट्यो रे त्यो निको भयो। 43रे उनुले तइलाइ कडा आग्या दिबर यसो भुनि छिट्टाइ पठायो, 44“हेर्, तुइले यो कसइलाइ जनभुनेइ, रे जाइबर तु आफुइलाइ पुजारिका वा धेका रे तु निको भया प्रमाण मान्सलाइ दिनाइ मोसाको आग्या अन्सार बलि चडा।”
45त्यो मान्स निकलबर गयो, यइ बिसयमि खुल्लम खुल्ला प्रचार अद्लाग्यो, तबइलाइ इसुले अज सहरमि खुल्ला रुपले प्रवेस अद्द सकेइन्, रे एकान्त ठउँरतिर बस्स लाग्या तर चारइतिरबटहइ मान्स इसुका वा आया।
Šiuo metu pasirinkta:
मर्कुस 1: DOTY
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 (Active), Mother Tongue Translators Society and Wycliffe Bible Translators, Inc. All rights reserved.