Joha 13
13
UJesu ugezisa inyawo zabafundi
1Umkhosi wePhasika wawusuzafika. UJesu wayekwazi ukuthi isikhathi sakhe sasesifikile ukuba asuke kulumhlaba aye kuYise. Wayebathandile abakhe abasemhlabeni, wabathanda kakhulu. 2Sekudliwa, uSathane esekufakile enhliziyweni kaJudasi Iskariyothi, indodana kaSimoni, ukuba amnikele, 3uJesu wayekwazi ukuthi uYise unikele inzinto zonke ezandleni zakhe lokuthi wavela kuNkulunkulu, uyabuyela kuNkulunkulu; 4ngakho wasukuma ekudleni, wakhupha izingubo zakhe, wazikhwica ngelembu. 5Wasethela amanzi emganwini, waqala ukugezisa inyawo zabafundi, wazesula ngelembu ayezikhwice ngalo. 6Wafika kuSimoni Petro, uSimoni Petro wathi kuye: Nkosi, wena ugezisa inyawo zami na? 7UJesu wamphendula wathi: Engikwenzayo kawukwazi khathesi; kodwa uzakukuqedisisa emva kwalokhu. 8UPetro wathi kuye: Kawusoze ugezise inyawo zami lanini. UJesu wamphendula wathi: Uba ngingakugezisi, kawulasabelo lami. 9USimoni Petro wathi kuye: Nkosi, kakungabi zinyawo zami zodwa, kodwa lezandla zami lekhanda lami. 10UJesu wathi kuye: Ogezileyo kadingi ukugeza, kuphela ukugeziswa kwenyawo zakhe, ngoba uhlambulukile. Lina lihlambulukile, kodwa kakusini lonke. 11Ngoba wayemazi lowo owayezakumnikela. Ngenxa yalokhu wathi: Kalihlambulukile lonke.
12Esegezisile inyawo zabo wathatha ingubo zakhe, wabuya wahlala, wathi kibo: Liyakwazi yini engikwenze kini na?#Luka 22:27 13Lingibiza lithi: Mfundisi, Nkosi; liqinisile ngoba ngiyikho. 14Uba minake, iNkosi loMfundisi wenu, ngigezise inyawo zenu, lanike lifanele ukugezisana inyawo. 15Ngoba ngilinikile isibonelo ukuba lenze lani njengokuba ngenzile kini. 16Ngiqinisile, ngiqinisile ngithi kini: Inceku kayinkulu kulenkosi yayo, lothunyiweyo kamkhulu kulomthumileyo.#Mat 10:24; Luka 6:40; Joha 15:20 17Uba likwazi lokhu libusisiwe uba likwenza. 18Kangikhulumi ngani lonke; ngiyabazi engibakhethileyo; kodwa kakugcwaliseke umbhalo othi: Odla lami ungivukele.#Hubo 41:9 19Ngilitshela lokhu khathesinje kungakenzeki, ukuba nxa sekusenzeka, likholwe ukuthi nginguye. 20Ngiqinisile, ngiqinisile ngithi kini: Owamukela ongimthumileyo wamukela mina: lowamukela mina wamukela ongithumileyo.#Mat 10:40; Mark 9:37; Luka 9:48; 10:16
UJesu ukhuluma ngokunikelwa kwakhe
(Mat 26:20–25; Mark 14:17–21; Luka 22:21–23)
21UJesu esetshilo lokhu wakhathazeka emoyeni, waqinisa wathi: Ngiqinisile, ngiqinisile ngithi kini: Omunye wenu uzakunginikela. 22Abafundi bakhangelana bengaqondi ukuthi ukhuluma ngobani. 23Kwathi omunye wabafundi yena uJesu amthandayo, wayeyeme esifubeni sikaJesu. 24Ngakho uSimoni Petro wamqhweba wathi kuye: Sitshele ukuba ukhuluma ngobani. 25Yenake eyeme esifubeni sikaJesu wathi kuye: Nkosi, ngubani na? 26UJesu waphendula wathi: Yilowo engizakumnika ucezu lwesinkwa sengilutshebile. Ngakho eselutshebile ucezu, walunika uJudasi, indodana kaSimoni Iskariyothi. 27UJudasi eselwamukele ucezu uSathane wangena kuye. UJesu wasesithi kuye: Okwenzayo kwenze masinyane. 28Kodwa kakukho loyedwa kwababehlezi ekudleni owayekwazi ukuthi ukutsho ngani lokhu kuye. 29Kodwa abanye bacabanga ukuthi kungoba uJudasi wayephatha isikhwama, uJesu wathi kuye: Thenga esikufunayo emkhosini, loba ukuthi kabele abayanga okuthile. 30Wathi eselwamukele ucezu waphuma masinyane; kwakusebusuku.
UJesu unikwa udumo. Umlayo wokuthandana
31Ngakho, uJudasi esephumile, uJesu wathi: Khathesi iNdodana yomuntu inikwe udumo, loNkulunkulu unikwe udumo kiyo. 32Uba uNkulunkulu enikwe udumo kiyo, loNkulunkulu uzakuyinika udumo, njalo uzakuyinika udumo masinyane. 33Bantwana bami, ngiselani isikhatshana. Lizakungifuna, njengalokhu ngatsho kubaJuda ukuthi lapho ngiya khona lingeze leza lina, ngitsho njalo lakini.#Joha 7:34 34Ngilinika umlayo omutsha wokuba lithandane; njengalokhu ngilithandile mina, lani lithandane.#Joha 15:12, 17; 1 Joha 3:23; 2 Joha 5 35Ngalokhu bonke bazakukwazi ukuba lingabafundi bami, aluba lithandana.
Ukuxwayiswa kukaPetro
(Mat 26:31–35; Mark 14:27–31; Luka 22:31–34)
36USimoni Petro wathi kuye: Nkosi, uya ngaphi na? UJesu waphendula wathi: Lapho ngiya khona, ungengilandele khathesi; kodwa uzakulandela emva kwalokhu. 37UPetro wathi kuye: Nkosi, ngingekulandele ngani khathesi na? Ngizakudela ukuphila kwami ngenxa yakho. 38UJesu waphendula wathi: Uzakudela ukuphila kwakho ngami na? Ngiqinisile, ngiqinisile ngithi kuwe: Iqhude kaliyikukhala ungakangilanduli kathathu.
Šiuo metu pasirinkta:
Joha 13: BE1978
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of Zimbabwe 1978