Luka 15
15
Okulahlekileyo: imvu, uhlamvu lwesiliva, lendodana
(Mat 18:12–14)
1Kwasekusondela kuye bonke abathelisi lezoni ukumuzwa.#Luka 5:29–30 2AbaFarisi lababhali basola besithi: Umuntu lo wamukela izoni, adle lazo.
3Wasebatshela lumfanekiso, esithi: 4Nguwuphi umuntu kini ongathi elezimvu ezilikhulu, alahlekelwe ngenye yazo, angazitshiyi ezingamatshumi aficamunwemunye lezificamunwemunye egangeni, ayedinga elahlekileyo, aze ayifumane na? 5Athi eseyifumene, ayetshate ethokoza. 6Esefikile ekhaya ameme abangane bakhe lomakhelwane bakhe, athi kibo: Thokozani lami, ngoba ngiyifumene imvu yami ebilahlekile. 7Ngithi kini: Ngokunjalo kuzakuba khona ukuthokoza ezulwini ngesoni sinye nje esiphendukileyo kulabalungileyo abangamatshumi aficamunwemunye labaficamunwemunye abangasweli ukuphenduka.
8Loba nguwuphi owesifazana othi elenhlamvu zesiliva ezilitshumi uba elahlekelwa luhlamvu lunye, angalumathisi isibane, athanyele indlu, aludingisise, aze alufumane, na? 9Athi ukuba alufumane, abize abangane bakhe, athi: Thokozani lami, ngoba sengilufumene uhlamvu lwami obelulahlekile. 10Ngithi kini: Ngokunjaloke kukhona ukuthokoza phambi kwezithunywa zikaNkulunkulu ngesoni sinye nje esiphendukayo.
11Wasesithi: Kwakukhona umuntu othile owayelamadodana amabili. 12Encinyane yawo yathi kuyise: Baba, akunginike isabelo selifa esiqondene lami; wawahlukanisela impahla yakhe. 13Kwathi ngemva kwensuku ezilutshwana indodana encinyane yabutha konke, yasuka yahamba, yaya elizweni elikhatshana, lapho eyachitha khona impahla yayo ngenhlalo embi. 14Yathi isichithile konke, kwavela indlala enkulu kulelolizwe; yaqala ukuswela. 15Yasuka yayakhonza komunye umuntu walelolizwe owayithumela emasimini akhe ukuba yaluse ingulube. 16Yafisa ukuzisuthisa ngamakhasi adliwa zingulube; kwakungaselamuntu oyinika ulutho. 17Kwathi sekusile kuyo, yathi: Zingaki izisebenzi zikababa eziqatshiweyo ezilokudla okunengi, kanti mina ngiyafa yindlala lapha. 18Ngizakusuka, ngiye kubaba, ngithi kuye: Baba, ngonile koPhezulu laphambi kwakho; 19kangisafanele ukuthiwa ngiyindodana yakho; ngenza ngibe njengomunye wezisebenzi zakho eziqatshiweyo. 20Yasisuka, yaya kuyise; kodwa kuthe isekhatshana, uyise wayibona, wayihawukela, wagijima, wayisingatha, wayanga. 21Indodana yasisithi kuye: Baba, ngonile koPhezulu laphambi kwakho; kangisafanele ukuthiwa ngiyindodana yakho. 22Kodwa uyise wathi encekwini zakhe: Phangisani lilethe ingubo enhle kulazo zonke, liyambathise, lifake isongo esandleni sayo lamanyathelo enyaweni zayo; 23lilethe ithole elinonisiweyo, lilihlabe, sidle, sithokoze; 24ngoba indodana yami le ibifile, isibuye yasila; ibilahlekile, ifunyenwe. Basebeqala ukuthokoza.
25Kodwa indodana yakhe endala yayisensimini; yathi isiza isondela endlini, yezwa ukuhlabelela lokusina. 26Yasibiza omunye wezinceku, yabuza ukuthi kutshoni lokhu. 27Wathi kuyo: Umnawakho ufikile, loyihlo uhlabile ithole elinonisiweyo, ngoba ubuyile esasila. 28Kodwa yathukuthela, yala ukungena. Uyise wasephuma, wayincenga. 29Kodwa yaphendula yathi kuyise: Khangela, iminyaka engaka ngikusebenzela: kangizanga ngeqe umlayo wakho, kodwa kawuzanga unginike lezinyane lembuzi nje ukuba ngijabule kanye labangane bami; 30kodwa kuthe ukuba ifike lindodana yakho eyachitha impahla yakho lezifebe, wayihlabela ithole elinonisiweyo. 31Wasesithi kuyo: Ndodana, wena uhlala lami njalo; konke okungokwami kungokwakho. 32Bekufanele ukuba sijabule, sithokoze, ngoba umnawakho lo owayefile usebuye wasila; wayelahlekile, usefunyenwe.
Šiuo metu pasirinkta:
Luka 15: BE1978
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of Zimbabwe 1978