Luka 6
6
UJesu uchasisa umlayo weSabatha
(Mat 12:1–8; Mark 2:23–28)
1Kwathi ngeSabatha edabula emasimini abafundi bakhe bakha izikhwebu, badla bezihlikihla ngezandla.#Dute 23:25 2Kodwa abathile babaFarisi bathi kubo: Lenzelani lokhu okungavunyelwa ngeSabatha na? 3UJesu waphendula wathi: Kalifundanga yini ngokwenziwa nguDavida mhla elambile yena lababelaye#1 Sam 21:1–6 4ukuthi wangena endlini kaNkulunkulu, wathatha izinkwa ezahlukaniselwe uNkulunkulu ezingavunyelwanga ukudliwa muntu, ngaphandle kwabapristi bodwa, wadla, wanika ababelaye na?#Levi 24:9 5Wathi kubo: INdodana yomuntu iyiNkosi leyeSabatha.
UJesu usilisa ngeSabatha
(Mat 12:9–14; Mark 3:1–6)
6Kwathi ngelinye iSabatha wangena esinagogeni, wafundisa. Kwakukhona umuntu lapho osandla sakhe sokunene sasitshwabhene. 7Ababhali labaFarisi baqaphela ukuba babone ukuthi uzakusilisa ngeSabatha yini, ukuze bazuze izaba lokummangalela. 8Kodwa wayazi imicabango yabo, wathi kuyo indoda elesandla esitshwabheneyo: Sukuma, ume phakathi. Wasukumake, wema. 9UJesu wathi kibo: Ngiyalibuza, kuvunyelwe yini ngeSabatha ukwenza okulungileyo, ingabe ukwenza okungalunganga, ukusilisa ingabe ukubulala na? 10Wabathalaza bonke wathi kuye: Yelula isandla sakho. Wenza njalo, lesandla sakhe sasila. 11Bathukuthela kakhulu, bakhulumisana bodwa ngokuthi bangamenza njani uJesu.
Ukukhethwa kwabaphostoli
(Mat 10:1–4; Mark 3:13–19)
12Kwathi ngalezonsuku waphuma waya entabeni ukuyakhuleka; wahlala ubusuku bonke ekhuleka kuNkulunkulu. 13Kwathi sekusile, wabiza abafundi bakhe, wakhetha kubo abalitshumi lambili, wabaqamba ngokuthi ngabaphostoli, 14uSimoni owamutha ibizo lokuthi nguPetro, loAndreya umfowabo, loJakobe, loJohane, loFiliphu, loBartolomewu, 15loMathewu, loTomasi, loJakobe indodana kaAlfewu, loSimoni owayethiwa ngumZelothi, 16loJudasi indodana kaJakobe, loJudasi Iskariyothi owamnikelayo. 17Wehla labo, wema esigcawini; kwakukhona ixuku elikhulu labafundi bakhe lexuku elikhulu labantu abavela kulo lonke laseJudiya, laseJerusalema, langasolwandle lwaseTire leSidoni, ababezile ukumuzwa lokusiliswa ezifweni zabo; 18lalabo ababekhathazwa ngomoya ababi basiliswa. 19Ixuku lonke lafuna ukumthinta, ngoba kwaphuma kuye amandla abasilisa bonke.
Ababusiswayo labangabusiswayo
(Mat 5:3–12)
20Wasekhangela ngakubafundi bakhe, wathi:
Libusisiwe lina bayanga, ngoba umbuso kaNkulunkulu ungowenu.
21Libusisiwe lina elilambileyo khathesi, ngoba lizakusuthiswa.
Libusisiwe lina abakhalayo khathesi, ngoba lizakuhleka.
22Libusisiwe, nxa abantu belizonda lanxa belixotshela ngaphandle, belithuka, belidela ibizo lenu ngokungathi libi ngenxa yeNdodana yomuntu.#1 Pet 4:14
23Thokozani ngalolosuku, leqe ngokuthokoza; ngoba khangelani, umvuzo wenu mkhulu ezulwini; ngoba okhokho babo babesenza njalo kubaprofethi.#2 Lan 36:16; Seb 7:52
24Kodwa maye kini lina elinothileyo! ngoba selikwamukele ukuthokoziswa kwenu.
25Maye kini lina elisuthiyo khathesi! ngoba lizakulamba. Maye kini lina elihlekayo khathesi! ngoba lizakulila.
26Maye kini, nxa abantu bonke bekhuluma kuhle ngani! ngoba okhokho babo babesenza njalo kubaprofethi bamanga.
Ukuthanda izitha
(Mat 5:38–48)
27Kodwa ngithi kini elizwayo: Thandani izitha zenu, lenze okuhle kwabalizondayo, 28libusise abalithukayo, likhulekele bona abaliphatha kubi. 29Okutshaya esihlathini, umphendulele esinye; lokwamuka ingubo yakho, ungali lesigqoko sakho. 30Umuphe ilowo lalowo ocela kuwe; lokwamuka impahla yakho, ungabuyi uyibize kuye. 31Njengalokho lithanda ukuba abantu benze kini, yenzani njalo kibo.#Mat 7:12
32Uba lithanda labo abalithandayo, lilokubongwa bani na? Ngoba lezoni zithanda labo abazithandayo. 33Uba lisenza okuhle kulabo abenza okuhle kini, lilokubongwa bani na? Ngoba lezoni zenza njalo. 34Uba liseboleka labo elithemba ukwamukela kibo, lilokubongwa bani na? Ngoba lezoni zeboleka izoni ukuze zamukele okungakho. 35Kodwa thandani izitha zenu, lenze okuhle, leboleke, lingalindeli mvuzo; lomvuzo wenu uzakuba mkhulu, libe ngabantwana boPhezukonke, ngoba yena ulobubele kwabangabongiyo lababi. 36Wobani lesihawu, njengoYihlo ulesihawu.
Ukwahlulela abanye
(Mat 7:1–5)
37Lingahluleli ukuze lingahlulelwa, lingalahli ukuze lingalahlwa; thethelelani, lani lizakuthethelelwa. 38Phanini, lani lizakuphiwa; lizakuphiwa esandleni isilinganiso esihle, sigqitshiwe, sahlukuzwa, sigcwele sithe kliki; ngoba ngesilinganiso elilinganisa ngaso lani lizakulinganiselwa ngaso.
39Wabatshela umfanekiso wokuthi: Isiphofu singakhokhela isiphofu na? Kabayikukhalakathela bobabili emgodini na?#Mat 15:14 40Umfundi kamkhulu kulomfundisi wakhe; kodwa ilowo lalowo esefundiswe waphelela uzakuba njengomfundisi wakhe.#Mat 10:24–25; Joha 13:16; 15:20 41Ukhangelelani ucezwana oluselihlweni lomfowenu, kodwa ungaluboni ugodo olukwelakho ilihlo na? 42Ungatsho kanjani kumfowenu ukuthi: Mfowethu, kahle ngikhuphe ucezwana oluselihlweni lakho; wena ungaluboni ugodo olukwelakho ilihlo na? Mzenzisi, qala ukhuphe ugodo olukwelakho ilihlo, kubeng’khonake uzakubona kuhle ukukhupha ucezwana oluselihlweni lomfowenu.
43Kasikho isihlahla esihle esithela isithelo esibi; futhi kasikho isihlahla esibi esithela isithelo esihle. 44Ngoba ileso laleso isihlahla saziwa ngesithelo saso. Kakuselwa umkhiwa emeveni, futhi kakukhiwa isithelo sevini evikaneni.#Mat 12:33 45Umuntu omuhle uveza okuhle enothweni enhle yenhliziyo yakhe, lomuntu omubi uveza okubi enothweni yakhe embi; ngoba umlomo wakhe ukhuluma ngokugcwala kwenhliziyo.#Mat 12:34
Umfanekiso wezindlu ezimbili
(Mat 7:24–27)
46Lingibizelani ngokuthi: Nkosi, Nkosi — lingakwenzi engikutshoyo na? 47Yilowo lalowo oza kimi, awezwe amazwi ami, awenze, ngizakulitshengisa lowo afana laye. 48Ufana lomuntu owathi esakha indlu yakhe, wemba watshonisa, wabeka isisekelo phezu kwedwala. Ekufikeni kwempophoma umfula watshaya kuleyondlu, kodwa wawungelamandla okuyinyikinya, ngoba yayakhiwe kuhle. 49Kodwa owezwayo engawenzi, unjengomuntu owakha indlu yakhe emhlabathini, ingelasisekelo; umfula wayitshaya, yahle yawa; kwaba kukhulu ukudilika kwaleyondlu.
Šiuo metu pasirinkta:
Luka 6: BE1978
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Bible Society of Zimbabwe 1978