Luke 12
12
1အိမ်မာအချိန်ငါ ထောင်းပေါင်းများစွာက လူထုပရိသတ်ပြောင်စာ စုဝေးကို ဟူးဝါအိမ်ဟူးဝါ ပျက်မနီးဒင့်ယေ့ ငါ့လင်ကဟေ။ ကိုယ်တော်ယေရူစာ တပည့်တော်ရက်အင် မလားကင်းမ ငါ့ဟေကနာ "ဖာရိရှဲရက်က တဆေးဒေလေ သူတော်ကောင်းယောင်ဆောင်ဟေကားရက်အင် သတိပီကို ရှောင်ကြည်ယင့်။ 2ဖုံးကွယ်ကို့ပီလှုဟေကားအူဇာအငါ့ပါ(လ်)။ အိမ်မားအူဇာရက်အင်နာ တစ်ချိန်ချိန်ငါ ဖော်ယောဝန်ကဖြိုက်ဟေ။ 3မှဒေကအကြောင့် ထင့်မုတ်မုတ်အာ နနိန်ရက်ကငါဟေကစုတ်ရက်အင် အလင်းထဲငါယေ့ တတ်လင်ပိုကား။ အလုံပိတ်ပီကအခန်းထဲငါယေ ယုံ့ယုံ့ဆာငါ့တုန်းကအကြားရက်အင် ယေ့ ကိန်းဆာဟနိန်းငါချေးကို ဟော်ကိုငါ့ကဒေလေ ဖြိုက်လင်ကား"ငါ့ကို ငါ့လင်ကဟေ။ 4အယောက်ဟက်တာ ကိုယ်တော်နာ "မိတ်ဆွေရက် ၊နနိန်ရက်အင်ငါငါ့ကက်ကနာ၊ နနိန်ရက်က ကိုယ်ခန္ခာယင် ကတိုက်ကလူးဝင် အစက်ကအစိုးပါ(လ်)။ အမာရက်နာ နနိန်ရက်က ကိုယ်ခန္တာယင်လွဲကို အယောက်ကအူဇာရက်အင် အကတိုက်အန်လှုပါ(လ်)ကား။ 5ညီးင့ဒင့်ယေ့ နနိန်ရက်အစက်ပိုကလူးဟူး ဝါနာ ဘုရားရှင်တစ်ပါးတည်းမယ်ဖြိုက်ဟေ။ ဘုရားရှင်နာ နနိန်ရက်ကအဆက်အင် လာဓူ(ဖ်)လှုက တောင်မဒင့် ငရဲယာပါ(လ်)လှုကား အာဏာငါ့ဟေ။ မှအကြောင့် အမင်မယ် အစက်သင့်ဟေ။ 6အူဆီဆာ ငါးမှာယင် အဿရိဒင်္ဂါးနှစ်ပြားအိမ် အချေးဟေအရိလေ့။ ညီးင့ဒင့်ယေ ဘုရားရှင်နာ အူဆီဆာမာရာဒင့် တန်ဖိုးပီဟေ။ 7နင်ကအဟူးဖုံးငါကား အာဟူးမိန်အရေအတွက်အင်ဒင့် ဘုရားရှင်နာ ချေးဟေ။ မှအကြောင့် အစိုးရိမ်ငဲ့။ နနိန်ရက်နာ အူဆီဆာရက်တောင်မာဒင့် ပိုကိုအဖိုးထိုက်တန်ဟေ။ 8နနိန်ရက်အင် ငါငန်းကား၊ ငါကတပည့်အဖြိုက် လူးရက်ကရှေ့ယာ ဝန်ခံကလူးရက်အင် လူးအဆာဖြိုက်ဟေကား ငါယေ့ ဘုရားရှင်ကဟမန်းဒေဝါရက်ကရှေ့ယာ အမာနာ ငါ့ကတပည့်ဖြိုက် ကြောင့်ငင် ဝန်ခံငန်ကား။ 9ညီးင့ဒင့်ယေ့ လူးရက်ကရှေ့ယာ ငင်ငြင်းပယ်နဲ့က(လ်) အိမ်မားလူးနာ ဘုရားရှင်ကဟမန်းဒေဝါရက်ကရှေ့ယာ ငြင်းပယ်ကဟင်းလင်ပိုကား။ 10လူးသားတော်ယင် နူတ်အိမ် ပြစ်မှားကလူးရက်နာ အပြစ်ခွင့်လွတ်ကဟင်းပိုကယဲ့ ဉာဏ်အလင်းတော်ယင် ပြစ်မှားနဲ့က(လ်) အပြစ်အင်ခွင့်လွတ်အီလင်ကအရိ(လ်)ပါ(လ်)။ 11နနိန်ရက်အင် ဓမ္မာရုံရက်၊ ပြောင်ကလူးရက်အိမ် အုပ်ချူပ်က လူးရက်ကရှေ့ယာ စီရင်ကဇိစ်အော်ကယဲ့ အဆာမီချေပပြိစ်နက်ပိုကား အစိုးရိမ်ယေ့။ 12အိမ်မားအချိန်နာရီယာ နနိန်ရက်အဆာမီပြိစ်နက်ပိုကား ဉာဏ်အလင်းတော်နာ ဆနိန်အီလင်ကား"ငါ့ကို ငါ့လင်ကဟေ။ 13မှနောက်အာ လူထုပရိသတ်ထဲယာက ဟူးဝါနာ"ဆရာ၊အဗာ(ဖ်)နာ ငါ့ရက်ကအတွက် ပီဒက်ကအမွေရက်အင် မံအီကား ငါ့ရက်ကအပါးယင် ငန်း"ငါ့ကို ကိုယ်တော်ယင် လျှောက်တင်လင်ကဟေ။ 14ကိုယ်တော်နာ "မိတ်ဆွေ၊ နင်အိမ်နင်ကအပါးကြား အငြင်းပွားဟေက တရားစီရင်အီကဇိစ် ငင်အယူက(လ်) အာဏာလွဲကိုအီဒက်ကယား"ငါ့ကို ပြန်ကိုငါ့လင်ကဟေ။ 15မှနောက်အာ ကိုယ်တော်နာ လူထုပရိသတ်အင် "လောဘအကြီးယဲ။ နနိန်ရက်ကအဆက်နာ ဥစ္စာပစ္စည်းချမ်းသာကအပေါ်ဝါ မူတည်တုန်းကအရိ(လ်)ပါ(လ်)"ငါ့ကို ဆနပ်လင်ကဟေ။ 16မှနောက်အာ ကိုယ်တော်ယေရှုနာ လူထုပရိသတ်အင် ပုံဥပမာဆူးဝါအိမ် ငါ့ဆနပ်ကနာ "ဟက်တာကရပ် သူးဌေးဟူးဝါနာ အမာကလယ်ယာ အဆီပနှံဖြိုက်ကို 17အမာနာ "ငါက အဆီးပနှံရက်အင် သိုလှောင်ပီးဂါဇီး နေရာအငါဂို့ ငါအဆမှီလိစ်ပိုကာယား " ငါးဂို့ စဉ်းစားတုန်းလင်ဟေ။ 18မှနောက်အာ အမာနာ" ငါမဒေလေလုပ်ကား။ ငါကအင်ကဒိန်းငင် အစီးကို အင်ကဒိန်းပြောင် ပြုနက်အန်ကား။ အိမ်မာကဒိန်းငါ ငါကအဆီပနှံရက်အိမ် အယောက်ကမီဟေကား အူဇာရက်အင်သိမ်းပီကား။ 19မဒေငါ့နဲ့က(လ်) ငါက အယောက်ကနှစ်ပေါင်းများစွာအတွက် လုံလောက်ဟေကား အူဇာမီရက်ငင်နန်းရိကို အတတ်ပင့်စကို ငါသက်တောင့်သက်သာ အနားလာကို စားလိုက်၊ သောက်လိုက်အိမ် ပျော်ပျော်မယ်တုန်းကဟေ"ငါ့ကို စဉ်းစားတုန်းလင်ကဟေ။ 20ညီးင့ဒင့်ယေ့ ဘုရားရှင်နာ အမင် "နင်လူမိုက်၊ ယက်ထင့်နိုက်အာ နင်ဆိန်းပေါ်ကား။ နင်စုဆောင်းပီကား ပစ္စည်းဥစ္စာရက်နာ အယောက်ကလူးရက်ထနဲ့ ထုပ်လင်ငန်ကား"ငါ့ကို ငါ့လင်ကဟေ။ 21အမာနာ ဘုရားရှင်ကရှေ့တော်မှောက်အာ ကြွယ်ဝချမ်းသာကအရိ(လ်)ထမ်း အပါနာကအတွက်မယ် အူဇာရက်အင်သိုးလှောင်ပီကို ချမ်းသာဟေငါ့ကို အပါနာကအပါနာက ထင်တုန်းကလူးရက် ကြုံပေါ်ကား အရာမယ်ဖြိုက်ဟေ"ငါ့ကို ငါ့လင်ကဟေ။ 22မှနောက်အာ ကိုယ်တော်ယေရှုနာ တပည့်တော်ရက်အင် "မှဒေဖြစ်ဂို့ နနိန်ရက်အင် ငါ ငှားကက်ကားနာ နင်ဂါဘဝ အသက်ရှင်သန်ကဇီ အဇာက(လ်)ဆာပိုကား၊အဇာက(လ်) တူပိုကားငါ့ဟေကား အပူပန်ယေ့။ 23အစားတောင်မာဒင့် အဆက်နာ ပိုကိုအရေးကြီးဟေအရိလဲ။ အဝတ်စားတောင်မာ ခန္တာကိုယ်နာ ပိုကိုအရေးကြီးဟေအရိလဲ။ 24အူဟရက်အင်ယူးဝါး။ အမာရက်နာ အဖင်းအစုပ်ထမ်း၊ အဟန်ကအပြင် သိုလှောင်စရာ အူဟရက်အ(လ်) အငါ့ပါ(လ်)။ မဒေဖြိုက်ကဒင့် ဘုရားရှင်နာ အမာရက်အင် ကျွေးမွေးပီဟေ။ နနိန်ရက်နာ အူဆီရက်တောင်မာဒင့် ပိုကိုအဖိုးထိုက်တန်ဟေ အရိလဲ။ 25နင်ပူပန်တုန်းနဲ့ နနိန်ဂါးအဆက် တနာရီပိုပြောင်ဝန်ဂါလေ။ 26နနိန်ရက်နာ အတတ်ကဒေလေကား အသေးဖွဲကိစ္စရက်အင်ဒင့် အလုပ်လှုနဲ့က(လ်) အယောက်က ကိစ္စရက်အင် အဇာရိကပူပန်တုန်းကယား။ 27မလိမ်းငါကအပန်းငင် ယူဝင်း။ အမာရက်နာ အလုပ်အ(လ်)အလုပ်ပါ(လ်) ၊ပါဇူရက်အ(လ်)အတူပါ(လ်)၊ ညီးင့ဒင့်ယေ့ နနိန်ရက်အင် ငါငါ့ကက်ကနာ အတိတ်ကာလငါ့ဒက်က ရှောလမုန်ဘုရင်ကြီးက ပါဇူမီရက်ဒင့် မလိမ်းအပန်းရက်ဒေလေ အကာနင်းပါ(လ်)။ 28အို ယုံကြည်ချက်နည်းပါးကလူးရက်၊ဘုရားရှင်နာ အချိန်ကာလစိတ်ဆာမယ် ဆိမ်းကို အယောက်ယက်တာ ဗန်(ဖ်)ဗုံးထဲယာ မလောက်ကဟင်းပိုကား မလိမ်းအပန်းရက်အင်ဒင့် လှပတင့်တယ်ကဇိစ် ဖန်ဆင်းအီပီနဲ့က(လ်) နနိန်ရက်အင် ပိုကိုဖန်ဆင်းအီယန်ကအရိလဲ။ 29ဆားအူးဂါးအတွက် စိုးရိမ်ကိုအတုန်းယေ့။ 30ဘုရားရှင်ငင် အချေးကလူးရက်မယ် မှဒက်လေ စိုးရိမ်ပူပန်ပေါ်ဟေ။ ဆိုဆော် နနိန်ရက်က အဗာ(ဖ်)ဘုရားရှင်နာ နနိန်ရက်စိုးဟေကရက်အင် ချေးတုန်းဟေ။ 31မှအကြောင့် ဘုရားရှင်ကသာသနာတော်အတွက်မယ် ဦးစားအီကိုလုပ်အင်။ မဒေငါ့တောင်းမယ် နနိန်ရက်စိုးကက်ဟေကား အူဇာစုတ်ရက်အင် ဘုရားရှင်နာ ဖြည့်ဆည်းအီလင်ကား ဖြိုက်ဟေ။ 32"သိုးအုပ်စုဆာ၊ နနိန်ရက်ကအဗာ(ဖ်)ဘုရားနာ သာသနာတော်ယင် အီကဇိစ်စိတ်ဟေ ကားအတွက် အစက်ဂီးယဲ့။ 33ငါဟေကားဥစ္စာရက်အင် အချေးဂို့ ဆင်းရဲဆားရက်ဇီ မန်းအီယင်။ အဟိုကားတိပ်ရက်တုပ်ကို နနိန်ရက်က ဥစ္စာရတနာရက်အင် သူခိုးရက်အထုပ်ဗာ(ဖ်)လှုပါ(လ်)၊ အပူ(ဖ်)ဆာရက် အဖျက်ဆီလှုကား ရွှေမြို့တော်နာ ဘဏ္ဍာတိုက်ထဲယာ သိမ်းယင့်ဂီ။ 34အဇာကြောင့်နဲ့ နနိန်ရက်ကား ဥစ္စာရတနာငါဟေကား နေရာယာ နနိန်ရက်ကစိတ်နှလုံးယေ့ ထုပ်တုန်းကိုဖြိုက်ဟေ။ 35နနိန်ရက်ကား ခါးငင်စည်းဂို့ ဆီးမီးရက်အင် အဆင်သင့်ထွန်းယင့်ဂီး။ 36မဒေငါ့တောင်မယ် သခင်မင်္ဂလာဆောင်ပွဲငါဘင်းပြန်းဂို့ အဟင်းခေါက်ကားခါ ချက်ချင်းရိပ်ကို အဟာဖွင့်အီလင်လှုက ဖြိုက်ဟေ။ 37သခင်နာ အမာပြန်ငန်ကားအချိန်ငင် သတိအိမ်စောင်တုန်းက အငှားဆာရက်အင် ဆုလာဘ်ရက် အီလင်ကားဖြိုက်ဟေ။ ငါအမှန်ပေါ်နဲ့က(လ်) သခင်နာ ခါးပန်းအင်စည်းကို အိမ်မားအငှားဆာရက်အင် ဆာကဇမ်းရက်အိမ် မွတ်မွတ်အီလင်ကား။ 38ထင့်နိုက်အချိန်ဖြစ်စေ၊ အာရုံတက်ချိန်ဖြစ်စေ၊ ပြန်ဗန်(ဖ်)ကရပ် အဆင်သင့်စောင်တုန်းကအငှားဆားရက်အင် ပေါ်နဲ့က(လ်) သခင်နာ တဗျင်းဝမ်းမြောက်ဝမ်းသာဖြစ်လင်ကား။ 39သူခိုးအဆီအချိန်ငါဗန်(ဖ်)က ကြိုတင်ကိုချေးနဲ့ က(လ်) ကိန်းဆိမ်းနာ နိုးနိုးကြားကြားတုန်းကအတွက် သူခိုးနာ ကိန်းတာဟုန်းငါ ဆင်ကိုကူ(ဖ်)ကအလှု လင်ပါ(လ်)ကား။ 40မှအကြောင့် အချိန်မရွေး အဆင်သင့်ဖြစ်တုန်းယင့်ဂီး။ အဇာရိကိုငါ့နဲ့က(လ်) လူ့သားတော်ဖြစ်ဟေကား ငါနာ နနိန်ရက်မထက်မှတ်ကအချိန်ငါ ပြန်ကိုကြွဗန်(ဖ်)ကဖြိုက်ဟေ"ငါ့ကို ငါ့လင်ကဟေ။ 41မှအခါ ပေတရုနာ ကိုယ်တော်ယင် "ကိုယ်တော်၊ မှပုံဥပမာနာ ငါ့ရက်အတွက်မယ် ငါ့ပီကလဲ၊ လူတိုင်းကအတွက်လဲ" ငါးဂို့ ကတာလင်ကဟေ။ 42အိမ်မအခါ ကိုယ်တော်နာ "ကိန်းဆိမ်းရက်အင် အချိန်မှန်ဆာကဇမ်းပြင်ဆင်အီကဇိစ် သခင်နာ ခန့်အပ်ပီကား ဉာဏ်ပညာအိမ် ပြည့်စုံကို သစ္စာငါဟေကအငှားဆာ အယူဝါး။ 43သခင် ပြန်းငှားဂါးအချိန်ငါ အလိစ်လိစ်တုန်းဟေကား အငှားဆာရက်အင် ပိုနဲ့က(လ်) ဆုချီးမြှောက်လင်ကား။ 44နနိန်ရက်အင် ငါငါ့ကက်ကနာ၊ သခင်နာ အမာထနဲ့ငါဟေကားအူဇာရက်အင် အိမ်မားအငှားဆာဇိစ်အက်ကို စောင့်ရှောက်ဇိစ်လင်ကား။ 45ညီးင့ဒင့်ယေ့ အိမ်မားအငှားဆာနာ "ငါကသခင် ပြန်ကိုအဗန်(ဖ်)နန်းက" ငါ့ကိုထင်ကို အယောက်ကအငှားဆာရက်အင် ညှင်းဆဲကို အူဆာတုန်းနဲ့က(လ်) 46အိမ်မားအငှားဆာက သခင်နာ အမာအထင်မှတ်ကအချိန်ငါ ထုပ်ဗာ(ဖ်)ကို အမင် ပြန်းထန်က အပြစ်ဒဏ်ရက်အင်အီကို သစ္စာတရားအငါကား လူးရက်အိမ်မက်တာပီလင်ကား။ 47သခင်ကစိုးကက်ကချေးယန်ယန်အာ အပြင်ဆင်ပါ(လ်)၊ လုပ်ကိုအပီကအငှားဆာနာ ပြင်းထန်ကအပြစ်ဒဏ်ငင် အီကဟင်းလင်ပေါ်ကား။ 48ညီးင့ဒင့်ယေ့ သခင်ကအလိုတော်ယင် အချေးထမ်း အပြစ်လုပ်ဟေကားအငှားဆာနာ စိတ်ဆာမယ် အပြစ်အီကဟင်းလင်ပေါ်ကား။ ဆုကျေးဇူးရက်မွတ်မွတ်ခံစားပေါ်ကားလူးရက် တာဝန်ရက်ပိုကိုငါလင် ကား။ ကျီးနဲ့က(လ်) ယုံကြည်အပ်နှံမူရက် ဘောင်းကိုလှုကလူးရက်နာပိုကို ဘောင်းကိုစိန်ဟေကား ဟင်းလင်ပေါ်ကား။ 49ငါနာ မှလောကယင် ဗန်(ဖ်)ဟြုရ်ဇိစ်ကဗန်(ဖ်)ကဖြစ်ဟေ။ မှနေရာယာ ဗန်(ဖ်)ဟြုရ်ပြီးသား ဖြစ်ကဇိစ်အတွက် ငါအလိုငါဟေ။ 50ငါနာ မကြာခင်ငါ ပြင်းထန်ကဒုက္ခဝေဒနာအိမ် အိန်းမြုပ်မင်္ဂလာဆူဝါ လာပိုကား။ အိမ်မာအချိန်အထုပ်ဗာ(ဖ်)နိန့်ကအချိန်ထိ ငါစိတ်ဒုက္ခတဗျင်းထုပ်ငန် ကာဖြိုက်ဟေ။ 51ငါနာ မှလောကယာ ငြိမ်းချမ်းဇိစ်ကအတွက် ဗန်(ဖ်)ကငါ့ကိုထင်တုန်းဟေလဲ။ လုံးဝအရိ(လ်)ပါ(လ်)။ ငါဗန်(ဖ်)ကအကြောင်းအရာနာ လူးရက်အင် ခွဲခြားကဇိစ်ဗန်(ဖ်)က ဖြစ်ဟေ။ 52အတတ်ပင်စဂို့ လူငါးယောက်ငါဟေကားမိသားစုတစ်စုဝါ နိန်ဟူးနာဟိုက်တာ၊ ဆုံးဟူးနာဟိုက်တာ ဟူးဝါအိမ်ဟူးဝါ စိတ်ဝမ်းကွဲလင်ကား။ 53အဗာ(ဖ်)အိမ်အဆာ၊ အနူးအိမ်အဆာအိ၊ အယုံ့ဟာမာအိမ် အာနှင်းရက် ဟူးဝါအိမ်ဟူးဝါ စိတ်ဝမ်းကွဲလင်ကာ"ငါ့ကို ငါ့လင်ကဟေ။ 54ကျီးကအိမ် ကိုယ်တော်ယေရူနာ လူထုပရိသတ်အင် "နနိန်ရက်နာ အနောက်အရပ်အာက ထိန်းပါ(လ်)ကဟြင်ရ်ဂြိလ်ယင်ပေါ်နဲ့က(လ်) ဟြရ်ဗန်(ဖ်)ယန်ကဟေငါ့ကို ဟူးဝါအိမ်ဟူးဝါ ငါ့ထောင်း ဟေ။ နနိန်ရက်ကငါ့ကဒေလေ ဖြစ်ဟေ။ 55တောင်လေယက်ယိုးဝန်ဂါခါ ရာသီဥတုပူပြင်းငန်ကဟေ ငါ့ဟေကား နနိန်ရက်ငါ့ထောင်းဟေ။ နနိန်ရက်ကငါ့ဒေလေ ဖြစ်ဟေ။ 56သူတော်ကောင်းယောင်ဆောင် တုန်းကလူးရက်၊ နနိန်ရက်နာ ကောင်းဂါလက်အိမ် ကဇက်အင်ယူကို ရာသီဥတုယင် ခန့်မှန်းလှုကယေ့ အတတ်လက်ရှိယာ အဇာဖြစ်တုန်းဟေငါ့ဟေကား အဇာရိကိုခွဲခြားကိုအချေးကယား။ 57မှန်ကန်ကအူဇာရက်အင်လုပ်ကဇိစ် အဇာရိကို ဆင်ခြင်အသုံးသပ်ကယား။ 58လူးဟူးဝါနာ နင်ငင် တရားစွဲနဲ့က(လ်) တရားရုံးငါအထုပ်မီဘင်း ညှိနိူင်းကို ကျေအေးဇိစ်ကား ကြိုးစားယင့်ဂီး။ မှဒေအရိနဲ့က(လ်) တရားသူကြီးနာ နင်ငင် အပြစ်ငါဟေငါ့ကို သတ်မှတ်ကို တာဝန်ငါဟေကားလူးရက်က တာဟူးဝါအက်ကို နင်ငင် ထောင်းငါအဟြရ်လင်ကား။ 59နင်အီပေါ်က အကြွေးစုတ်ရက်အင် ပြန်ကိုမဆပ်မချင်း နင်ထောင်ငါဘင်းပြုလင်ပေါ်ကားအရိ(လ်)ပါ(လ်)"ငါ့ကို ငါ့လင်ကဟေ။
Šiuo metu pasirinkta:
Luke 12: ttpv-rv
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.