انجیلِ مَتی 1
1
شَجِرَه نُومچَه عیسی مسیح
1شَجِرَه نُومچَه عیسی مسیح،
کُرِ داوود، کُرِ ابراهیم:
2ابراهیم بُوَه اسحق،
اسحق بُوَه یعقوب،
وَ یعقوب بُوَه یهودا وُ بِرارُونِش بی.
3یهودا بُوَه فِرِص وُ زِراح بی وَ نُومِ داآشُو تامار بی.
فِرِص بُوَه حِصرون
وَ حِصرون بُوَه رام.
4رام بُوَه عَمیناداب،
وَ عَمیناداب بُوَه نَحشون،
وَ نَحشون بُوَه سَلمون بی.
5سَلمون بُوَه بوعَز بی. نُومِ داآ بوعَز راحاب بی،
بوعَز بُوَه عوبید بی وَ نُومِ داآ عوبید، روت بی.
وَ عوبید بُوَه یَسا بی،
6یَسا بُوَه داوود پاتشا بی.
داوود بُوَه سِلِیمُو بی. داآ سِلِیمُو جِلوتِر زِئنَه اوریا بی.
7سِلِیمُو بُوَه رِحُبعام،
وَ رِحُبعام بُوَه اَبیّا،
وَ اَبیّا بُوَه آسا بی.
8آسا بُوَه یَهوشافاط
وَ یَهوشافاط بُوَه یورام،
وَ یورام بُوَه عُزّیا بی.
9عُزّیا بُوَه یوتام،
یوتام بُوَه آحاز،
وَ آحاز بُوَه حِزِقیا بی.
10حِزِقیا بُوَه مَنَسی،
مَنَسی بُوَه آمون،
وَ آمون بُوَه یوشیا بی.
11یوشیا بُوَه یِکُنیا وَ بِرارُونِش بی.
دِ ایی زِمُو یهودیا وِ بابِل تبعید بییِن.
12دِما تبعیدِ یهودیا وِ بابل:
یِكُنیا بُوَه شِئَلتیئیل،
وَ شِئَلتیئیل بُوَه زِروبابِل بی.
13زِروبابِل بُوَه اَبیهود،
اَبیهود بُوَه اِلیاقیم،
وَ اِلیاقیم بُوَه عازور بی.
14عازور بُوَه صادوق،
صادوق بُوَه اَخیم،
وَ اَخیم بُوَه اِلیود بی.
15اِلیود بُوَه اِلعازار،
اِلعازار بُوَه مَتّان،
وَ مَتّان بُوَه یعقوب بی.
16یعقوب بُوَه یوسف مِیرَه مریم بی،
کِه عیسی معروف وِ مسیح دِ او اُوما وِ دی.
17وِ ایی ترتیب، دِ ابراهیم تا داوود ری یَک چهاردَه نسل، وَ دِ داوود تا زِمُونِ تبعیدِ یهودیا وِ بابِل، چهاردَه نسل، وَ دِ زِمُونِ تبعید وِ بابِل تا مسیح چهاردَه نسل بییِن.
وِ دی اُومایِه‌نِ عیسی مسیح
18وِ دی اُومایِه‌نِ عیسی مسیح چِنی بی: مریم، داآ عیسی، دَسگیرُونِ یوسف بی. اما وِرَز یَه کِه وا یَک دُووات بَکَن، دیاری بی کِه مریم دِ روح‌القدس حاملَه‌آ. 19دووچِه کِه مِیرَه‌ش یوسف پیا خوئی بی وَ نِمی‌حاس مریمِه رسوا بَکَه، چِنی فکر کِرد کِه بی‌کِش دِش سَوا با. 20اما هِه او موقَع کِه ایی تصمیمِه گِرِت، فرشتَه خداوند دِ خُو وِش ظاهر بی وَ گُت: «اِ یوسف کُرِ داوود، دِ یَکِه مریمِه وِ زَنی بِئیری زَلَه‌ت نَرُوئَه، سی یَکِه چیئی کِه ها دِ گیَه‌ش دِ روح‌القدس اَ. 21مریم کُری میارَه وِ دی وَ تو بایِس نُومِشِه بَنی عیسی، سی یَکِه او قُومِ خُوشِه دِ گُنَه‌یاشُو نجات مِی‌ئَه.» 22گِردِ یِنُو اتفاق اُفتا تا چیئی کِه خداوند دِ زِوُونِ اِشعَیا نبی گُتی وِ اَنجُوم بَرَسَه کِه:
23«ری‌بَستِه‌ای حاملَه بی‌یَه، کُری وِ دی میارَه
کِه نُومِشِه می‌نیئَن عِمانوئیل،»
کِه یعنی «خدا وا اِیما». 24هِه کِه یوسف دِ خُو بیار بی، چیئی کِه فرشتَه خداوند وِ او هُد کِردی، اَنجُوم دَه وَ مریمِه وِ زَنی گِرِت. 25اما واش هُمبِستر نِوی تا او کُرِ خُوشِه اُوِرد وِ دی، وَ یوسف نُومِشِه نِئا عیسی.
Šiuo metu pasirinkta:
انجیلِ مَتی 1: NLB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
@ 2024 Korpu Company