Chibkees 2
2
1Lus ntuj, has lus ntajtes, has is puas tsaab yaad yeej tsid tab taaz liad. 2Vaajtswb ted tsid txhua tsaab yaad tab taaz liad, hnoos xyaa niz ha su has tsi ua is yaad hujlwd daastsi ni.#Hen 4.4,10 3Vaajtswb food kooshmoob tu hnoos xyaa has teed hnoos qhai ua hnoos tseedcees, tu qhob is puas tsaab yaad kwg niz tsid ted tab taaz tu hnoos qhai liad,#2.3 is puas tsaab yaad kwg niz tsid ted tab taaz tu hnoos qhai liad; lossis hnoos qhai is puas tsaab yaad kwg niz tsid tab taaz liad. niz ha su tsi ua hujlwd daastsi.#Tsk 20.11 4Tuz Tswb kwg yog Vaajtswb tsid lus ntuj has lus ntajtes rias ni taw has taaz luz saw na liad.
Lus Vaaj Edees
Thaws tuz Tswb#2.4 Tuz Tswb: Phaw Henplais qhob twg kwg muaj lus npe Yaves, rias ni kebcai mas saw ua Yehawvas, ces thoos pliaz phaw ntiab na ha txhais ua tuz Tswb kwg yog saw tuz tsaj ntiab luj. kwg yog Vaajtswb tsid lus ntuj has lus ntajtes, 5lus ntajtes tseed tsi taw muaj nroj tsuag xyoos ntoo has tsi muaj is yaad noos tuaj tawz kiag ni, tu qhob tuz Tswb kwg yog Vaajtswb tseed tsi taw tso naag luz, has tseed tsi taw muaj neeg tiad muz ua laj ua tes; 6tadsis dej ca ni txa hub nruas tibtxwb tuaj ntxawd daid aab ntajtes noo zia thoos pliaz.
7Tuz Tswb kwg yog Vaajtswb muas aab luz puas taw is tug yiag,#2.7 Aab … yiag: Henplais cob luz “yiag” has “aab” has lus suas is yaad nkaws. has tshuas sab tshuas paa tu tuz yiag qhai lus qhobntswg, ces tuz yias qhai txiad caj sa.#1 Klt 15.45
8Ces tuz Tswb kwg yog Vaajtswb tsid taw is lus vaaj nyos tusaas hnoostuaj hub Edees, has niz muas tuz yiag kwg niz puas luz nyos tu hub lus vaaj qhai. 9Tuz Tswb kwg yog Vaajtswb tsid txhua yaad ntoo tuaj zoo nkawj kiag nkaws tu hub has txi txib zoo heeb ni. Nyos tu hub pliab vaaj muaj is tsos ntoo kwg ciad txuj sa has muaj is tsos ntoo kwg ua tu paws qhob phed has qhob zoo.#2.9 paws qhob phed has qhob zoo; lossis paws txhua yaad hubtsig.#Tsd 2.7; 22.2,14
10Muaj is tug dej txhiab hub Edees has ntwz muz ntxooj lus vaaj qhai; tuz dej qhai ncaw ua plaws ceg ntwz tiad hub Edees muz liad. 11Cez is hu ua Pisoos, cez dej na ntwz muz vij lus teschias Havilas. 12(Lus teschias qhai muaj tej tseed kug, muaj tej roj ntoo tsw qaas has muaj tej hlias muaj nqais.) 13Cez os hu ua Nkihoos, cez dej na ntwz muz vij lus teschias Kuses.#2.13 Kuses (kwg yog Mexuputamias); lossis Sudaas. 14Cez pes hu ua Tikis, cez dej na ntwz muz tusaas hnoostuaj kwg npuas tu lus teschias Axilias, has cez dej plaws hu ua Efalates.
15Ces tuz Tswb kwg yog Vaajtswb coj tuz yiag kwg niz tsid luz nyos hub lus Vaaj Edees, kuas niz zub has tu lus vaaj qhai. 16Tuz Tswb kwg yog Vaajtswb has tu niz has tas, “Kud pus koj noj txhua yaad txibntoo kwg nyos hub lus vaaj na, 17tadsis kud tsi pus koj noj tsos txibntoo kwg ua tu paws qhob phed has qhob zoo nyaz. Koj yiadtsud tsi xod noj tsos ntoo qhai cob txib; yog koj noj hnoos twg, koj yiad tuag hnoos qhai.”
18Ces tuz Tswb kwg yog Vaajtswb has tas, “Tsi tsidnyog ca tuz yiag na nyos tuas tug. Kud yiad tsid kua is tug luz nrug niz nyos ua txij nkiad paas niz.” 19Yog ni qhai, tuz Tswb kwg yog Vaajtswb ha muas aab luz puas ua txhua yaad tsaj has txhua yaad noog. Vaajtswb ha coj taaznrhiab tej tsaj has tej noog luz tu tuz yiag qhai tis npe; mas tej tsaj has tej noog qhai nyaz ha muaj nyaz npe rias ni tuz yias qhai tis tu. 20Niz tis npe tu tej tsaj nyeg, tsaj qud, has tej noog taaz liad, tadsis tej tsaj qhai yeej tsi muaj is tug kwg paas taw niz has yiad nrug niz ua taw txij nkiad ni.
21Tuz Tswb kwg yog Vaajtswb ha ua kuas tuz yiag qhai tsawg zawg heeb, thaws niz tsawg zawg liad, Vaajtswb ha muas niz is tug txhaa taab rhu tiad luz has muas lus qhob nqaj qhai foos nqiad rob zoo ni qus. 22Tuz Tswb kwg yog Vaajtswb muas tuz taab qhai luz tsid ua is tug puj has coj tuz puj qhai muz cos tu tuz yiag. 23Ces tuz yias qhai has tas,
“Nizna, muaj is tug zoo ni pes liad has lawj,
tuz na tej txhaa yog kud txhaa, has tej nqaj yog kud nqaj.
Niz lus npe hu ua ‘puj’, tu qhob yog rhu niz tiad qhais yiag luz.”#2.23 puj … yiag: Henplais cob luz “puj” has “yiag” lus suas has is yaad nkaws.
24Ted yog vid ni na tuz yiag ha tso niz nad niz vaid tseg, has muz nrug niz tuz puj nyos, has ostug yiad kood ua is lus ceb.#Mat 19.5; Mak 10.7-8; 1 Klt 6.16; Efe 5.31
25Tuz yiag has tuz puj, ostug puabtsig lasqaas, tadsis ostug is tug tsi paws thwstxaaj tu is tug.
Šiuo metu pasirinkta:
Chibkees 2: CQD2024
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2024 Bible Society Vietnam. All rights reserved.